من 10 سنين .. في بدايات سنة 2015 .. و

من 10 سنين .. في بدايات سنة 2015 .. و بعد كام شهر من بناء ( Toshkar ) .. و اللي كان هدفي منها أيامها هو تجميع أكبر قدر ممكن من بيانات السوق المحلي من آخر طبقة تحت فيه .. يعني ( Class E , Class D ) .. اللي هي طبقة المحلات البسيطة .. و البسيطة جداً .. لحد الأكشاك .. .. و طبعاً كل مكان كنا بندخله .. كان بيتبص لنا بكل شك و إستغراب ؟! .. و بنتسأل : عايز بيانات البضاعة اللي عندي ليه ؟! عايز تعرف بيجيلي زباين ولا لا .. ليه ؟! عايز تعرف أنا محتاج إيه .. ليه ؟! إنتوا شغالين تابع مين ؟! إنتوا بتوع دعاية و إعلان يعني ؟! .. ف بعد فترة من الأسئلة دي .. قررنا إن تمام .. ماشي .. إحنا بتوع تسويق و دعاية و إعلان و حنعمل لك كل اللي إنت عايزه و نفسك فيه .. بنرات و بروشورات و فيديوهات و مواقع كمان .. بس ممكن بعد إذن سيادة حضرتك تديني بقي الداتا اللي أنا محتاجها 🤣🤣 . … و بعدين .. طرأت في دماغي أيامها إننا نبدأ نضرب سبع أو تمن أو بتاع خمستاشر عصفور تقريباً ب حجر واحد .. … إزاي ؟! .. و الله العظيم لسة فاكر تفاصيل القعدة اللي كنا قاعدينها بعد صلاة جمعة .. فمدخل بيتي ( الحوش ) .. حوالين ترابيزة سفرة متهالكة كان إتبرع بيها ليا صديقي اللي عارف نفسه كويس 🤣 و هي أساساً كانت بتاعت جدته بالمناسبة .. و ترابيزة السفرة دي .. في حوش بيتي .. كان مقر إجتماعاتنا الأسبوعي 🤣🤣 .. و لا تقول بقي جريك كامبس .. أو القرية الذكية .. أو داون تاون دبي .. لا .. حوش بيتي و ترابيزة سفرة ب تلات رجول .. و الرجل الرابعة كانت مخلوعة .. والله العظيم 🤣 … و أثناء القعدة دي .. و أثناء ما أنا قاعد علي السٌفرة أم تلات رجول و ساند عليها عشان ماتقعش 🤣 .. سبت إيديا فجأة و وقفت .. و قلت : .. إحنا ممكن نعمل ( Physical manifestation of a virtual value ) 🤣🤣🤣 .. . السفرة وقعت .. و الورق اللي كان عليها طار .. و لكن كل ده ماكنش مهم .. الفكرة اللي نطت في دماغي فجأة أيامها .. كانت .. و مازالت لحد النهاردة .. من أكتر الأفكار اللي كنت شايف إنها ضربة بلياردو مثالية .. و كانت المفروض تحقق كل الأهداف اللي كنا عايزينها أيامها بالكامل . … يعني إيه بقي ( Physical manifestation of a virtual value ) ؟! الجملة اللي قعدت أكررها بعد القعدة دي لمدة شهور .. … الترجمة يعني ( حنحول قيمة رقمية .. ل قيمة مادية الناس تمسكها في إيديها ) .. يعني إيه برضو ؟! .. قلت لهم : إحنا حنعمل كروت .. الكروت دي عليها ( QR Code ) .. الكلام ده سنة 2015 لو لاحظت .. كان ال ( QR Code ) أيامها تكنولوجيا جديدة جداً لسة .. و طبعاً .. بحكم إنها كانت جديدة .. أنا كنت عايش فتلافيف و أعماق تفاصيلها .. و مفكر إن كل الناس كانوا زيي .. . لكني كنت حمار .. . المهم .. أيامها كنت لسة ماعرفتش إني حمار 🤣 .. فشرحت للمجموعة إيه هو ال ( QR code ) ده .. و شرحت لهم الفكرة : . إن كل كارت .. حيبقي عليه QR Code معين .. بيشاور علي مكان فاضي في قاعدة بيانات ( جدول ) .. فإتخيل مثلاً دلوقتي .. 100 كارت .. كل كارت بيشاور علي خانة في جدول مترقمة من 1 ل 100 .. . لما تعمل (Scan ) للكارت .. يظهر لك في الموبايل الحاجة اللي موجودة في خانة الجدول ( في قاعدة البيانات ) دي . . و أنا من ال ( Back end ) .. أقدر أتحكم أحط إيه في قاعدة البيانات دي في أى وقت .. . فمثلاً إنت تعمل scan لل كارت اللي بيشاور علي الخانة رقم 9 .. تلاقي طلع لك صورة بطوط .. و بعد شوية .. تعمل scan لنفس الكارت .. اللي بيشاور علي نفس الخانة رقم 9 .. و لكن تلاقي طلع لك صورة ميكي ماوس .. . ده لأني أنا باتحكم في إيه اللي موجود في الخانة دي . … و بعدين .. نطبع 1000 كارت مثلاً .. و نبني قاعدة بيانات فيها 1000 صف .. و ننزل نلف علي المحلات .. و ندي لكل محل 20 كارت مثلاً .. و نشرح له .. إنه يقدر يخلي كل كارت لما حد يعمل له (scan ) .. يطلع له خصم علي منتج معين من المحل بتاعه .. … و باعمل ل صاحب المحل ( access ) مخصوص … إنه يقدر يتحكم في اللي محطوط في قاعدة البيانات .. عشان يعمل خصومات علي المنتجات اللي هو عايزها براحته و يتحكم في اللي هو عايزه . … و أأجر له ال 20 مكان دول برقم معين شهرياً .. و أشرح له .. إن الكروت اللي بتشاور علي الخصومات علي المنتجات اللي هو محددها .. حاوزعها أنا عند محلات تانية .. … … فمثلاً .. إنت صاحب محل في شارع ضيق في منطقة بعيدة .. و لكن عندك منتجات حلوة .. و حتعمل عليها خصومات كبيرة .. و مشكلتك .. إن ماحدش عارف عنك .. أو عارف عن المنتجات دي .. . فأنا .. حاروح للمحلات الكبيرة في المناطق المشهورة في مجالات مش منافسة ليك ( يعني لو إنت بتاع ملابس .. حاروح أنا لبتاع أكل مشهور ) .. و أدي له عدد من الكروت اللي بتشاور علي الخصومات عندك .. و أشرح له إنه يطلعها ك هدية لأى زبون دخل يشتري أكل من عنده .. . فبالتالي .. صاحب محل الأكل ده مبسوط ( و مادفعش حاجة ) .. الزبون اللي إشتري الأكل مبسوط إنه خد هدية ( هو لسة مش عارف هي فيها إيه ) .. و إنت حتنبسط لما تلاقي حد جاي لك عايز ي ( redeem ) الكارت اللي معاه اللي إكتشف فيه إنه كسبان خصم علي منتج عندك .. و ظاهر له بيانات المنتج و عنوانك و كل التفاصيل اللي إنت كاتبها بنفسك في قاعدة البيانات اللي إنت ليك access عليها . … متخيل الروعة ؟! .. لو إنت عارف قد إيه حاجة زي ال (pokemon cards = كروت البوكيمون ) دي حاجة جامدة فحت حالياً .. و الناس بتجري وراها بالملايين فقط عشان متعة ال ( مقامرة ) .. في إنه بيشتري مجموعة كروت مقفولة و هو مش عارف لما يفتحها حيلاقي إيه .. فإنت أكيد فاهم دلوقتي إن نفس الفكرة متطبقة حرفياً في موضوع كروت تشكر ده . .. و لكن .. الفرق كمان .. إن الكارت اللي معاك مش بيبقي شيء ( static ) .. و لكن ( dynamic ) .. يعني لو طلع لك مثلاً كارت بيديلك خصم علي صوباع روج .. و إنت ماعندكش حتة طرية فحياتك .. تقوم تدايق و ترميه 🤣 . لا .. لأن لو صبرت .. ممكن جداً الشهر اللي جاي تلاقي البيانات اللي بتطلع لك لما تعمل له ( scan ) .. إتغيرت .. و تعمل ( scan ) لنفس ذات الكارت هو هو .. و تلاقي إن طلع لك خصم علي برفان حريمي مثلاً 🤣 .. … بل .. في كمان ال ( مقايضة ) .. اللي هو إنت خدت كارت هدية من مطعم لما عملت له (scan ) طلع بيديلك خصم علي برفان حريمي .. و إنت ماعندكش حتة طرية فحياتك زي ما قلت 🤣 .. و لكن .. صديقك اللي في الشغل .. خد كارت هدية .. لما عمل له ( scan ) .. لقي إنه بيديله خصم من محلات الشامي بتاعت البلايستيشن مثلاً .. لكن لأنه هو متجوز و عنده ( حتة طرية في حياته ) .. ماعندوش وقت إنه يلعب بلايستيشن .. .. فساعتها .. إنتوا تقايضوا مع بعض . … و لو فكرت في الموضوع شوية … حتكتشف عشرات و عشرات التطبيقات الكتييييييييير أوي التانية .. .. و اللي ساعتها .. و أثناء ما أنا باحاول أسند السُفرة المتهالكة عشان ترجع تقف تاني .. و بنرص فوقها الورق اللي كان طار في كل مكان في مدخل بيتي .. كل الأفكار و التفاصيل و التطبيقات و ال( Potential ) الضخم ده .. كان ملي دماغي بالكامل .. … بعد شرح طويل لأصدقائي لكل الكلام اللي كتبته فوق ده و تفاصيل أكتر .. إقتنعوا تدريجياً .. . و صديقي المبرمج العبقري .. كان بالفعل خلّص بناء قاعدة البيانات في دماغه ك ( back end ) و ( front end ) كمان .. . و بكل طاقة و سرعة و خلال أيام .. صممت أنا الكارت اللي في الصورة ده .. و طبعنا 1000 منه فاضي ( يعني مكان ال QR ) اللي فيه فاضي .. لأن ماكنش معانا فلوس نطبع 1000 كارت مختلفين و بلاستيك و شيك .. لا .. إحنا طبعناهم بالظبط زي الكروت الشخصية .. نفس الخامة .. . و بعدين طبعت 1000 QR مختلفين .. كل qr منهم بيفتح لينك ل صف في قاعدة البيانات .. طبعتهم بنفس الحجم بتاع مكانهم في الكارت .. علي ورق a4 عادي .. . و رحنا أنا و صديقي التالت اللي عارف نفسه .. عند صديقي اللي كان مسلفني السفرة .. و قعدنا والله بالمسطرة و المقص و الصمغ .. نقطع و نقص و نلزق 1000 qr .. علي 1000 كارت . … و بعدين نزلنا إشترينا علب بلاستيك نضيفة شوية لل كروت .. بحيث إن لما ندي صاحب المحل الكروت .. تبقي في علبة بلاستيك للعرض شكلها نضيف شوية .. و لأننا كنا شحاتين و مفلسين .. إشترينا 5 تقريباً بس .. و قررنا إن ال5 دول حيروحوا عند أنضف و أكبر محلات حنعرف نتعامل معاهم 🤣. … و بعدين … بدأت المرحلة اللي إكتشفت فيها إني حمااااااااااااااااااااار … و إتعلمت 3 دروس من أهم الدروس اللي إتعلمتها في حياتي .. … 1- 99% من اللي رحنا لهم ( أصحاب محلات و بشر عاديين و زباين و أصدقاء ) .. كانوا بيسألوا : هو يعني إيه QR ؟! .. أيون .. يعني أعمل بيه إيه ؟! .. طب إنت حتهكر موبايلي ؟! .. طب هو مش شغال علي موبايلي ليه ؟! . أنا ببساطة كنت جاي بدري شوية .. بدري 10 سنين .. 🤣🤣🤣 … 2- تصميم الكارت الرائع في عينيا ده … كان بالظبط زي القرد في عين أمه ولامؤاخذة .. لأني أيامها كنت لسة مافهمتش بالشكل الكافي .. إن مقاييسي للجمال .. مختلفة عن 90% من البشر .. و كنت باعتمد علي نفسي عشان أصمم الحاجات اللي لها علاقة بشغلي . و لكن كل اللي شاف الكارت .. كره التصميم ( اللي طلع غااااااااااامق جداً في الطباعة ) . … 3- أهم مهارة علي الإطلاق كنا محتاجينها في الموضوع ده كله .. ماكنتش معانا .. و هي : المبيعات -SALES . . أنا كنت لسة عايش دور الصنايعي اللي رافض يطلع من الورشة .. و كنت لسة شايف إن المبيعات دي أى حد عنده شوية لباقة يقدر يعملها .. كنت حمار .. إحتجت سنين بعد كده .. عشان أفهم إن أهم قسم في أى شركة في الحياة هو : المبيعات . … و تدريجياً .. و بعد محاولات .. شفت بعيني إحتضار فكرتي الرائعة اللي ما زلت محتفظ بكراتين الكروت بتاعتها حتي الآن في أحد أطراف بيتي .. .. و علي مدار السنين .. شفت إزاي و بوضوح جداً .. كل درس من التلاتة دول فعلاً بني شركات .. و هد شركات تانية . … إمبارح .. و أثناء ما كنت باتفرج علي الماتش بتاع الأهلي .. جه الجزء بتاع ( إختار و صوت علي أحسن لعيب في المباراة ) .. و علي الشاشة .. كان في ( qr ) تعمل له scan عشان تختار و تصوت .. .. إبتسمت … ضحكت .. و إفتكرت كل الكلام اللي فوق ده .. … و بصيت علي أحد الشاشات بتاعتي .. و اللي عليها أحد الأفكار اللي شغال عليها بقالي فترة .. في سوق بعيييييييييد خالص عن السوق المصري .. و اللي إن شاء الله .. يمكن كمان 6 أو 7 سنين مثلاً .. ممكن تتواجد في السوق المصري . … … و الله أعلم .