قواعد السواقة في القاهرة تحت الدائري

قواعد السواقة في القاهرة تحت الدائري : .. 1- التوكتوك هو سيد الموقف .. و هو ملك الشارع و ملك الغابة و ملك الكوتشينة كمان .. و هو بابا و ماما و أنور وجدي . .. 2- الشارع مش مكان آمن إطلاقاً لأى عربية جديدة مغسولة .. و حيحصل فيها حاجات مش كويسة و قليلة الأدب و حتفقد جزء ضخم من برائتها .. و حيتفرق دمها بين القبائل ( أقصد التكاتك و التروسيكلات ) .. و أسهل رد حتسمعه هو ( هو إيه اللي وداها - العربية أقصد - هناك ) … 3- رواية جحيم دانتي بتوصف المستويات السبعة للجحيم .. تحت الدائري بيبتدي تحت آخر مستوي من المستويات السبعة دول . … 4- لو حصل و ( جوجل مابس ) بعتتك بالغلط تحت الدائري .. إعرف إن ده بتخطيط من وسائل الإستخبارات الأمريكية .. و إنهم بيحاولوا يعرفوا إيه بالظبط اللي بيحصل تحت الدائري .. و لكن بمجرد نزولك .. بتكتشف إن مافيش شبكات إتصال بالعالم الخارجي .. تحت الدائري .. له شبكات إتصال داخلية .. لا يعلم أسرارها غير سواقين التكاتك . … 5- لو حصل و مضطر تسوق تحت الدائري .. تحت أى ظرف .. و مهما حصل .. و مهما كانت المُغريات .. و مهما كانت التهديدات .. ماتنزلش تسوق تحت الدائري يوم السوق ( اللي هو يوم التلات ) . … 6- لو حصل .. و إكتشفت إنك فجأة بقيت تحت الدائري .. يوم التلات ( اللي هو يوم السوق ) .. دور علي حد جنبك في العربية يكون بيعرف يسوق .. و إنزل إنت إكتشف المكان قدامه علي رجليك ( حتكون أسرع ) .. عشان مايمشيش علي ألغام ( أقصد ناس فارشين بضاعة عالأرض ) . … 7- لو حصل .. و إكتشفت إنك فجأة بقيت تحت الدائري .. يوم التلات ( اللي هو يوم السوق ) .. و مالقيتش حد جنبك في العربية بيعرف يسوق .. ماتبصش من إزاز العربية .. أى حاجة حتشوفها من خلال إزاز العربية دي مش حقيقة .. تمويه .. خداع بصري .. طلّع دماغك من الشباك جنبك .. و إعتمد فقط علي اللي حتسمعه .. و حتشمه .. باقي حواسك فجأة حتكون أقوي من عينيك .. أصل مستحيل منطقياً إن الناس فعلاً فارشين فنص الشارع .. و العربيات بتعدي علي البضاعة .. … 8- تحت الدائري .. الزمن بيختلف .. يعني الطفل اللي تشوفه تقول عنده 4 سنين مثلاً .. ده مش زي الطفل اللي عنده 4 سنين فوق الدائري .. ده طفل ( أينعم هو مش لابس حاجة من تحت ) .. و لكنه بيماثل في نضجه العقلي و اللغوي .. نضج راجل أربعيني مطلّق مرتين و مسجون مرة و مدخن شره .. و صاحب مزاج . … 9- تحت الدائري .. مافيش شوارع .. في محلات و بيوت .. أى شيء بين المحلات و البيوت .. هو إمتداد للمحلات و البيوت دي .. فأى نوع من الإستحقاقية ممكن تحس بيه ( إنك سايق في شارع و من حقك مساحة ) .. ده وهم … و قلة أدب .. و تستحق تتعاقب عليها .. . تحت الدائري .. إنت دخيل .. فأى مكان و أى حتة .. تحت أى ظرف .. إنت الغلطان .. تنزل و تعتذر و تتأسف و تتمني إنهم يغفروا لك خطيئتك . … … **** الفيسبوك باعت ليا إشعارات بيسألني ليه مانزلتش بوستات بقالي كام يوم .. و إنه علّي الريتش بتاعي عشان بوستاتي ( علي حد قوله ) محتوي ذو جودة عالية 🤣😅 .. فده شرح السبب .. إن كل خلايايا العصبية بالكامل .. و كل مواردي العقلية .. كان تم إستنفاذها في السواقة تحت الدائري . .. و الله أعلم .