شوية كلام عن الفلوس .. و المايوه الجديد ده ..

شوية كلام عن الفلوس .. و المايوه الجديد ده .. و التربون اللي قبله .. و زلطة جوينيث بالترو .. و ما علينا . … فأحد حلقات مسلسل ( the office ) المحببة جداً لقلبي .. بيقرر مجموعة من زملاء العمل في مكتب ما إنهم يعملوا ( garage sale = يوم لبيع الحاجات المستعملة بتاعتهم ) .. و فكرة ال ( garage sale ) دي فكرة منتشرة جداً فأمريكا و ما زالت ضمن أحد الحاجات اللي عامل لها ملف ضمن درج أفكار المشاريع اللي ممكن أعملها في يوم من الأيام . الفكرة بتاعت ال( garage sale ) دي .. إنك تجمع الحاجات اللي مستغني عنها خلاص في بيتك من لعب و أجهزة و هدوم قديمة و ما شابه .. و تحطها علي رصيف بيتكم أو ( جراج بيتكم يعني ) … و اللي معدي من الجيران و الناس اللي في الشارع .. لو عجبه حاجة .. يعرض عليك سعر .. و يا توافق و تبيع .. أو ماتبيعش . … الفكرة دي للأسف مش منتشرة في مصر … أعتقد من أسباب كده هي :

1- إن المساحات في مصر ضيقة جوة المدن .. و مافيش مكان تفرش فيه حاجتك اللي عايز تبيعها .. 2- إن ثقافة ال( لا أتكسف , و الناس تقول علينا إيه ؟! ) ثقافة بتشكل جزء ضخم من وعي المجتمع المصري .. و حاجة زي كده ممكن كتير يخجلوا من عملها خوفاً من إنهم يبانوا فقرا أو محتاجين فلوس لا سمح الله . … لكن مش موضوعنا حالياً إن ليه الفكرة دي مش منتشرة فمصر .. موضوعنا هو إن في الحلقة دي .. بيتم عمل ( parody = تمثيل كوميدي ) لواحدة من أشهر قصص الإنترنت في التجارة .. و هي الشخص اللي قدر إنه من خلال عدد من عمليات المقايضة .. إنه يوصل في الآخر بمبادلة دبوس ورق أحمر مايساويش سنت حتي … ببيت مكون من دورين يساويله مبلغ ضخم من الفلوس .. … في المسلسل .. أحد الأبطال بيعمل نفس الشيء .. و بيدخل السوق الصغنن ده بدبوس ورق أحمر … و بينتهي في آخر الحلقة إنه طالع بتيليسكوب يساويله أكتر من عشرة آلاف دولار مستريح . بس في الآخر .. زميله في الشغل بيقنعه إنه يشتري شوية بذور فاصوليا مقابل التيليسكوب ده 🤣🤣 .. لأنه أقنعه إنها بذور فاصوليا سحرية . … … من 5 سنين أو أكتر بحاجة بسيطة .. لما عملنا النقلة في شغلنا من إنه يكون معتمد علي الخدمات ( برمجيات و ميديا ) .. و ضفنا جزء ال ( ecommerce ) فيه .. شفت عجب العجاب من إحصائيات السوق و طبائع البشر في الشراء .. .. اللي إتعامل معايا في شغل عن قرب .. عارف إني مش باهتم بعدد المبيعات و الأوردرات .. قد ما باهتم بالإحصائيات و البيانات الناتجة من المبيعات دي .. يعني يهمني دايماً أعرف ليه ..

ليه النوع ده بالذات من الموبايلات هو اللي الناس بتشتريه .. بالرغم من إنه مش الأفضل ولا أحسن سعر .. ولا حتي متسوق له كويس ؟!!

ليه .. ليه مكنة تقشير الخضروات دي فجأة باعت بملايين الدولارات خلال أقل من 3 شهور ؟!! ..

ليه .. ليه حاجة زي ال ( صبارة اللي بترقص دي ) كانت تريند ؟! … … إجابات الأسئلة دي كتير .. و متنوعة .. لكن من أكتر و أهم النتايج اللي وصلتلها بعد ال5 سنين من دراسة السوق دي هي : ( قدرة البشر علي التفكير المنطقي .. لا تؤثر بأى بلح في البتنجان في قراراتهم الشرائية ) .. و : ( لو حتبني البيزنس بتاعك و تجارتك علي إحتياجات البشر بشكل منطقي و عقلاني .. بالكتير حتقدر تغطي مصاريفك و تاكل عيش و بروتين .. لكن عمرك ما حتوصل للثراء الفاحش اللي بتشوفه في الإنستاجرام ده ) .

ببساطة : إما إنك تآمن بإن أغلبية البشر بيبنوا قراراتهم المادية و الشرائية علي العاطفة و بالعاطفة فقط … و تشتغل علي ده و ترضي بيه .. أو حتفضل طول عمرك بتحارب طواحين الهوا و تحاول تقنع الناس إنها تشتري حزمة جرجير أفيد لها من باكو شيبسي . … … أكبر معضلة كانت بتواجهني علي مدار السنين اللي فاتت دي هي الخناقة دي جوة عقلي : أبيع للناس الشيبسي و الكوكاكولا .. و أنا عارف إنه مضر و مش مفيد ؟! و أحاول أقنعهم بالفجل و الجرجير بعد كده علي أمل إنهم يفكروا بنفسهم و يختاروا بنفسهم .. ولا .. ولا أوفر وقتي و جهودي … و أختار حاجة من الحاجتين و شكراً علي كده .. يعني أبيع شيبسي و كولا .. و أفكني من إن الناس دي كان ممكن تشتري فجل و جرجير من علي أول الشارع بس هما اللي إختاروا غلط .. ولا أبيع فجل و جرجير بس .. و أكرس كل مجهودي و وقتي فإني أعلم الزباين الصح فين و المفيد فين . … … لاحظ هنا إن الخناقة اللي باتكلم عليها مش بين الصح و الغلط .. لا .. دي خناقة بين : المنطق و العاطفة .. … كتير حتلاقيهم بيقولوا لك .. يا عم هو إنت بتبيع مخدرات ؟ .. ده شيبسي و كولا .. بس إنت عارف إن الفرق الوحيد بين البيبسي و المخدرات هو .. إن واحد منهم مقنن و التاني لا .. يعني في هولاندا مثلاً الإتنين عادي إنك تشتريهم من السوبر ماركت . .. حتلاقي كتير بيقولوا لك .. يا عم و إنت مالك .. ما الناس عقلها فراسها .. و اللي بياكل علي ضرسه بينفع نفسه .. و إنت مش وصي علي الخلق .. بس إنت عارف إن عشان إنت و غيرك و غيرك و غيرك حتقولوا لبعض كده .. حتكون النتيجة إن كل المحلات اللي جنب مدارس الأطفال مافيهاش حاجة تتشري غير البيبسي و الشيبسي .. و نتيجة لكده كل الأطفال حتطلع صحتها مضروبة بالنار .. … … … بس بعد فترة طويلة وصلت للتالي : إن دون كيهوتي كان مجنون .. ( دون كيهوتي ) .. من أجمل ما كُتب في أدب الحالمين في وجهة نظري .. لو ماتعرفش إيه دي .. هي رواية بينضرب المثل دايماً بالبطل بتاعها إنه كان شايف نفسه فارس مغوار لازم يحمي محبوبته من العمالقة المدمرين . العمالقة دول ماكانوش غير شوية طواحين هوا .. لكن علشان دون كيهوتي كان متوهم إنه فارس مغوار .. ففضل يتخيل طواحين الهوا دي إنها أعداءه العمالقة .. و كل ما يهجم عليهم و مراوح طواحين الهوا تكسر الرمح بتاعه أثناء حركتها .. كان يقتنع أكتر جوة نفسه إن العمالقة دول بيدافعوا عن نفسهم و بيهاجموه .. … ثقافات ال ( فلوس , الشراء , أغاني التيكتوك , … و كل ما شابه ) .. أصبحت واقع للأسف خلاص .. بل هي واقع من زماااااااان في وجهة نظري .. من أيام ( أبجد هوز حطي كلمن شكل الأستاذ بقي منسجمن ) بتاعت ليلي مراد و نجيب الريحاني .. و قبل كده كمان .. في كتب كتير و كلام كتير عن ليه النوع ده من الثقافات هو اللي إستشري و إنتشر و ساد .. بس الكتب دي مملة لأغلب البشر حالياً .. مش مثيرة زي أفلام بيومي فؤاد و قنوات اليوتيوب بتاعت المقالب .. … … فبالتالي .. و بشكل براجماتي بحت .. برافو للي عملت المايوه الجديد ده .. فعلاً تحفة .. و نصيحتي لأى حد شايف البوست ده .. لو عايز تنجح إنت كمان مادياً و تبدأ في تكوين ثروتك من الفلوس الورق .. إعمل إنت كمان المنتج بتاعك ( بإعمل هنا أقصد هات منتج إستهلاكي عاطفي الناس تحب تشتريه … و حط عليه إسمك ) .. أقول لك .. إعمل قناة بتاعت محتوي مقالب و أغاني .. او إنك تقعد تاكل و تدردش مع البشر في العلاقات العاطفية و كده .. و بعدين لما القناة تتشهر شوية .. إعمل خط تيشيرتات بإسمك و جمل مشهورة من اللي بتقعد تكررها في القناة دي .. … التربون الغالي الجديد ده .. برافو .. فعلاً برافو مش باتريق .. ما هو كفاية رقص علي السلم … يعني ليه حنقول لا بلاشه علشان غالي .. في حين إني ماسك فإيدي إزازة بيبسي و حاطط البرينجلز قدامي مثلاً ؟! أنا حر إني أحط السعر اللي يعجبني للمنتج اللي باسوق له .. و إنت حر .. تدفع أو ماتدفعش .. شكلك كده مش قد تمن المنتج بتاعي أساساًَ و مش من المستوي اللي يقدر يشتريه .. لو سمحت فضي المكان بقي عشان الناس الهاي كلاس اللي داخله تشتري تعرف تشتري براحتها .. … … في ممثلة مشهورة جداً إسمها ( جوينيث بالترو ) .. اللي طلعت بدور البنت اللي بيحبها أيرون مان دي .. عارفها ؟ الممثلة دي لو ماتعرفش .. عندها شركة مشهورة جداً إسمها ( goop ) .. أحد منتجات الشركة دي … زلطة .. أينعم .. إنت ماقريتش غلط … زلطة .. زلطة لامؤاخذة بتحطها في .. إحم إحم .. لامؤاخذة .. عشان تنظم طاقة جسمك و تفتح الشاكرا بتاعتك و تخلي هالتك المحيطة بيك لونها حلو .. 🤣🤣🤣🤣🤣 الزلطة دي ( إسمها jade egg ) لو متذكر صح تقريباً .. سعرها 66 دولار .. … ما علينا .. المهم إني عايزك تحضر نفسك عشان تشير كل الصور و الميمز و البوستات اللي جايه قريب بتاعت حفلة روبي لو سمحت .. أيون أيون .. عارف إنها بوستات و ميمز كلها بتتريق علي الحفلة و سعرها الخرافي .. يابني ما تفهم بقي .. الفكرة مش في هل السعر خرافي بالعبيط ولا لا .. الفكرة إني عايزك تشير و تتريق و خلاص .. عشان الناس اللي عندك في البروفايل .. و اللي عندهم .. و اللي عند اللي عندهم يشوفوا البوستات دي .. و يفضلوا حاسسين إنهم عايزين يروحوا بس مش عارفين .. و بعد كده لما تنزل روبي بالأغنية أو الفيلم أو المسلسل الجديد بتاعها .. فضول الناس اللي قاعد بياكلهم ده يتغذي علي المحتوي ده .. و يستهلكه .. و تتشهر أكتر و أكتر .. و بعدين الحفلة اللي جاية حيبقي سعرها أكتر و أكتر .. فإنت تشير بوستات التريقة عليها .. و هكذا .. شير .. و شير أكتر كمان .. بروفايلك و المساحة اللي عليه .. و عقلك .. و إنتباهك .. و وقتك .. يخصوني .. لكن فلوسك يا عم دي بتاعتك .. إختيارك إنت بالكامل تصرفها فإيه .. تقدر تشتري بيها حزمة جرجير مفيدة ليك .. أو أقولك .. شايف الزلطة اللي هناك دي ؟