في لعبة كوتشينة مشهورة جداً إسمها ( شلّح ) ..

في لعبة كوتشينة مشهورة جداً إسمها ( شلّح ) .. لما فضلت أفكر فعنوان للبوست ده .. لقيت إن اللعبة دي مناسبة للغاية 😂 … عالساعة 5 كده .. و بعد ما لسة باتأقلم علي التوقيت الصيفي الجديد في مصر .. لقيت لسة بدري علي المغرب .. و حسبت الحسبة المعتادة بالنسبة ليا .. اللي هي لو إتحركت دلوقتي أكون بإذن الله في نادي المهندسين عالبحر في إسكندرية علي الساعة كام ؟ . لقيت إني حاكون هناك علي الساعة 6,30 إن شاء الله , خدت بعضي و نزلت .. كنت هناك بفضل الله فعلاً 6.30 بالدقيقة . ركنت العربية و طلعت أجري لحد محطة الرمل .. أثناء ما كنت قاعد باسمع ( بودكاست سوالف بيزنس ) , و ده للي مايعرفش .. بودكاست ممتااااااااااز للغاية .. فيه مجموعة من الحلقات مع عدد من رواد الأعمال الرائعين في الخليج العربي في مجالات مختلفة .. أنصح بيه للغاية ( حاسيب اللينك ليه فأول كومنت ) . … الحلقة اللي كنت باسمعها كانت عن تجربة ( caridge ) و دي شركة ناشئة بدأت في الكويت سنة 2015 ( نفس السنة اللي بدأت فيها شركتي تقريباً 😅 ) و لكنه بعد فترة سنتين تقريباً .. باع الشركة ل delivery hero .. الشركة الألمانية الضخمة ( اللي بتملك طلبات و هانقر ستيشن و غيرها من الشركات ) .. بمبلغ 180 مليون دولار .. ربنا يبارك له . … العديد و العديد من الأفكار كانت بتجري في دماغي أثناء ما أنا كنت باجري علي الكورنيش .. و بافتكر بدايات شركتي .. و أول ثلاثة آلاف جنية قبضناها مقابل خدمات بسيطة للغاية أيامها كنا بدأنا نعملها بجانب فكرة الشركة الأساسية .. فقط حتي يكون هناك عائد مادي بسيط للي بنعمله في الوقت ده . فاكر كويس جداً إننا رجعنا أنا و صديقي بعد ما قبضنا الثلاثة آلاف دول مشي .. و أنا حاسس إني رائد أعمال مخضرم , و إني محتاج أعين مدير مالي فأسرع وقت عشان الميزانيات الضخمة و الثروات دي يتم إدارتها بشكل مظبوط 😂🤣.

أثناء ما أنا باسمع صاحب التجربة ربنا يبارك له .. و هو بيحكي عن إن بداية رأسماله كانت مليون دولار تقريباً .. جمعها من والده رحمة الله عليه , و بعض الأقرباء . و إنه بالميزانية دي .. إشتري 50 موتوسيكل تقريباً , و 120 سيارة .. و الباقي كان مرتبات السائقين . … … و تقريباً الجزء الأكبر من حسابات السوشيال ميديا المصرية الخاصة بيا .. لا حديث له غير عن سرقة الفنان الروسي , و التصميمات المسروقة .

و لسبب ما .. مش قادر أحدده أو أصفه حتي جوة عقلي يمكن بشكل كامل , أنا مش متضايق . و مش حاسس إن المصممة اللي سرقت التصميمات دي عملت حاجة غلط .

يمكن السبب في ده إن ” جتتي نحست = desensitized” ؟! . يعني خلاص أصبحت متشبع بالقصص المشابهة .. لدرجة إن الفعل ذاته أصبح بالنسبة ليا معتاد و شائع و طبيعي … و صح ؟! . … يعني الناس متضايقين ليه ؟! .

متضايق إن الفنان الروسي إتسرق ؟!!!! بجد ؟!! والله العظيم ؟!! … إنت خلاص نصرت كل إخواتك في كل المجالات التانية .. لدرجة إن إهتمامك و غضبك أصبح كافي إنك تثور لأخوك الفنان الروسي ؟! .

طيب متضايق إن في شخص إنت تظنه غير مستحق .. أخد شيء تظنه غير مستحق ليه ؟! بجد برضو ؟! .. طب بتحكم علي إستحقاقها أو كفائتها من عدمها .. من أنهي إتجاه ؟! يعني إنت درست أى شيء ليه علاقة بالفن أو التصميم ؟! .. ولا فقط بتزيط مع زيطة السوشيال ميديا ؟! .

طيب خايف علي صورة مصر مثلاً ؟! لا يا عم قول كلام غير ده ..

والله بجد .. فكر كده .. إنت متضايق أو مضايق نفسك ليه ؟! .. أو فعلاً .. هي البنت غلطت فإيه ؟! . … … ستيف جوبز .. حرامي .. و كان حاجات كتير كمان سيئة غير إنه حرامي .. بس الراجل كان برنس .. كان واقعي .. و عرف ياخد فرصته .

بيل جيتس .. محتكر .. و واحدة من أكبر قصص التكنولوجيا في بدايات الألفينات كانت القضايا اللي خسرها و فيها تفاصيل أذيته و سرقته لحاجات كتير من شركات تانية عشان يفضل محتكر سوقه .

مارك بتاع الليلة اللي باكتب فيها البوست ده .. قصصه و قصص إستحواذه علي واتساب و إنستاجرام .. و خناقاته مع سنابشات .. إتكتب فيها أفلام و روايات .

إختار أى حاجة من الحاجات اللي حواليك إنت بتمجد فيها يومياً .. و بتستخدمها كل ساعة تقريباً .. و بتنزل بوستات نجاح عن اللي عملوها .. في الغالب حتلاقيهم متشابهين جداً للي كتبت أساميهم فوق دول .. إقرا عن : جي بي مورجان .. روكافيلر .. فاندربيلت .. بلاش دول .. كريستوفر كولومبس .. و اللي عمله لما وصل لأمريكا أول مرة . … … إنت متضايق ليه ؟! .. أقول لك أنا إنت متضايق ليه بس مش عايز تقول السبب الحقيقي ؟!

إنت متضايق لأنك كنت عايز إنت اللي تاخد فلوس الكامبين =الحملة الحلوة دي .. قرشين حلوين يسندوا برضو في اليومين دول ..

شوية دوشة علي السوشيال ميديا حلوين .. برضو حتخليني تريند .. يعني بعد كده البراندات حتتنافس عشان تجيب الفنان المصمم اللي كانت السوشيال ميديا كلها بتتكلم عنه من يومين ..

الناس حيبقي عندها فضوووووووووول ضخم تشوف إخر سرقات إحم .. أقصد إبداعات الفنان المبدع . و ساعتها لو حتي فتحت فرخ كانسون أبيض .. و رسمت عليه حمامة بقلم رصاص .. الناس حتدفع في التصميم ده رقم .. و حيروحوا يدوروا يشوفوا يا تري أنا سارق التصميم الرهيب ده من مين 😅 . … …

القصص اللي زي دي بتحصل يومياً و عشرات المرات يومياً في جميع أنحاء العالم المادي المتقدم الرأسمالي اللي إحنا عايشين فيه ..

و بتتراضي .. ببساطة الطرفين بيتجابوا .. و settlement = ترضية مادية نضيفة يعني بتتكيش … و بتتراضي ..

إنت نفسك ( لو شغلتك ينفع تسرق فيها شغل ناس مشهورين و كده ) .. خد بعضك و إسرق شغل ناس مشهورة .. و إعمل عرض بيزنس .. و روح قدمه لشركة كبيرة .

لو إتقبل العرض بتاعك .. إعمل الشغل ( المسروق ) .. و بعد كده روح إعتذر في القنوات .. أو قاوح برضو .. المقاوحة حلوة و بتاكل مع ناس كتير .. الفكرة إنك تشتغل و تاكل عيش .. الفلوس أهم .. و إلا ؟! ..

و إلا حتعيش إزاي ؟! .. …

حتجيب آيفون أحدث موديل إزاي ؟! حتشير صور خروجاتك و سفرياتك علي إنستاجرام إزاي ؟! حتجيب حق الهدوم البراندات اللي حتلبسها إزاي ؟! حتحط صور شهادات تكريمك و إنجازاتك و دكتوروهاتك الفخرية و تتنطط علي صحابك و زمايلك علي السوشيال ميديا إزاي ؟!

الفلوس و أكل العيش أهم .. هي كلها ماشية كده ..

ما هو يا إما كده … يا إما حابقي مفروس و متضايق و حاسس إن مكاني إتاخد .

إتاخد فين ؟؟! مكانك إتاخد فين ؟!

… … الدنيا منذ بداية الخلق .. و هي فيها من يمجد قارون و يحسده .. و يشتغل عنده .. و هي فيها من يتبع السامري .. و يمشي وراه و ورا العجل الدهب المخروم اللي بيصفر .. و حتفضل فيها الناس اللي من كل الأنواع حتي يقضي الله أمراً كان مفعولا .

و لو كان الناس ( عامة و أغلب الناس ) بيسمعوا للمنطق .. ماكنش حيبقي شكل العالم بالمنظر اللي عليه حالياً .. أبداً .. ( عامة و أغلب الناس ) حيفضلوا يصنعوا تماثيل من ذهب في أذهانهم لأحقر الناس و أضلهم .

و حيفضل ( عامة و أغلب الناس ) يتنافسوا في دنو الدنيا .. و يعلوا علي بعض في دنوهم و دنيتهم .. … … … المذيع في البودكاست بيسأل رائد الأعمال الشاب ربنا يبارك له .. و بيقول له : ماذا كان إحساسك بعد قبضك للشيك بملايين الدولارات ؟!

رد عليه رائد الأعمال الشاب : ذهبت فسددت ديوني .. و حمدت الله .. و كملت حياتي عادي .

عقب عليه المذيع : أنا شاهدت العديد من الناس ممن مروا بظروف مشابهة .. و ينقسمون إلي قسمين .. قسم حياته بعد ملايين الدولارات لم تتغير نسبياً .. فقط يصرف ما يحتاجه لأساسيات حياته و بعض الترفيه .. و لكنه كما كان ..

و الآخر يحزن .. و يستمر في معاناة .. حينما يحصل علي 20 مليون دولار مثلاً .. و يظل يتخيل ماذا لو كنت إستطعت الحصول علي 30 أو 40 مليون دولار .. ألم يكن حالي حينها أفضل .. و يستمر في هذا . … … … الجو في إسكندرية كان ترااااااااااااااااااااااااااااااب كتير النهاردة .. و بعد ما جريت لحد محطة الرمل .. كنت ناوي أرجع جري أو مشي لنادي المهندسين .. و لكن عند مكتبة الإسكندرية كنت خلاص .. إكتفيت .. عديت الطريق جري .. و وقفت تاكسي .. كان اللي بيسوق شاب صغير .. سألته عن سنه .. قال لي 19 سنة .. و إنه فأول سنة نظم و معلومات .. و أول مرة يسوق التاكسي النهاردة .. سألته حابب يشتغل إيه أو يركز علي إيه ؟! .. رد عليا إنه حابب يدرس برمجة .. بس مش قادر يعرف يبتدي منين فوسط المتاهة الموجودة حالياً .. سألته يعرف إيه عن ( chat gpt و ال AI ) رد عليا إنه عمره ما سمع عن الموضوع ده ! .. و فضل يطلب مني أتهجي له CHAT GPT.

شرحت له قدر إستطاعتي في المسافة البسيطة .. و وصيته يدور و يسيرش .. و حاسبته و نزلت . … … و في الطريق أثناء العودة .. سمعت الفيديو اللي حاسيبه في الكومنت التاني ده .. و هو ده السبب اللي إداني ترابط الأفكار المبني عليه البوست ده .