هو أنا عارف إن التالي قد يكون ( هبد ,

هو أنا عارف إن التالي قد يكون ( هبد , فتي , هراء , كلام فاضي , … ) .. و لكن .. لو عقلك بدأ يسوحك في سكة ( نهاية العالم , خلاص بتجيب ضرفها , حيضربوا بعض بالمنوي 🤣🤣, و دمّر الدايت و إضرب بيتزا عائلي لوحدك طالما هي كده كده بايظة قبل ما تلحق تعمل فورمة الساحل , … و غيرها من الأفكار الجميلة اللي بدأت تنتشر جداً ) .. … فخليني أوضح لك شوية حاجات ظريفة و لطيفة : . 1- شهر مارس اللي فات .. إنتشر أكتر من خبر إن أحد أكبر مناجم ال ( antimony = أنتيموني ) تم إكتشافه فين ؟! .. خمن معايا كده فين ؟! .. عيب إحترم نفسك 🤣🤣 .. في إيران . الأنتيموني ده سيادتك يبقي مادة إسمها ( semi metal = يعني شبه معدن ) و دي داخلة تقريباً فكل و أى حاجة لها علاقة بالصناعات العسكرية و التكنولوجية اللي ممكن تتخيلها . و قبل ما إيران تعلن عن الإكتشاف ده .. أكبر مناجم العالم في المادة دي كان في الصين . الصين حلوة 🤣 … 2- إيران نفسها بتعتبر من أكبر الدول اللي عندها بترول و غاز طبيعي .. و عشان تفهم العالم الحالي .. رجاء إرمي خريطة الحدود السياسية للدول اللي إنت معلقها علي جدار أوضتك دي في الزبالة .. و علّق مكانها خريطة تانية .. فيها أماكن وجود البترول في العالم .. و الشركات اللي مسيطرة علي الصناعة دي . … 3- السعودية بدأت من فترة كام سنة تاخد خطوات كتير عشان تبطل تعتمد علي البترول ك مصدر دخل رئيسي و وحيد لها . و دي مشكلة ضخمة لأمريكا .. لأن أمريكا كانت معتمدة إنها تفضل تدي السعودية دولارات .. مقابل البترول ده .. أمريكا عندها دولارات كتير أوي .. و السعودية عندها بترول كتير أوي . … 4- طب إيه اللي يحصل لما السعودية تبدأ تعمل شيفت كارير و تحاول تفتح لها كشك يجيب لها قرشين بعيد عن وظيفة البنزيمة بتاعت العالم دي ؟! ببساطة .. أمريكا تترعب .. ليه ؟! لأن أمريكا مش دولة سيادتك .. أمريكا عبارة عن شوية شركات بيقعدوا مع بعض كل خميس بالليل عالقهوة و يشوفوا حيمشوا العالم إزاي . الشركات دي مجالاتها هي ( بترول , سلاح , بنوك , تكنولوجيا , زراعة و بذور , إستخبارات و معلومات ) . و تحتهم بقي في مجالات تانية زي ( منتجات إستهلاكية , إباحية و دعارة , ترفيه و أغاني و أفلام و مسلسلات و غيرها ) . … 5- و البترول .. هو أحد أكبر المجالات دي .. و قد يكون أهمها .. و اللي له أذرع و إسثمارات في كل مجال تاني منهم . و سياسة أمريكا علي مدار ال70 سنة اللي فاتوا .. هي فرض السيطرة العالمية الكاملة علي كل مصادر البترول دي . … و السيطرة دي لها أشكال و أنواع كتيييييييير أوي .. و يمكن أشهر الأمثلة غير السعودية .. هي فينزويلا .. .. فينزويلا .. أحد أكبر مصادر البترول في العالم .. و لكنها مضروب فأساسها السوس و العفن بسبب أمريكا علي مدار ال40 سنة اللي فاتوا .. عشان تفضل أمريكا مسيطرة علي بترولها . … 6- طب ليه درس العلوم و التاريخ و الجغرافيا اللي أنا قاعد باحكيه ده ؟! . لأن .. الشركات دي زي ما وضحت .. هي اللي متحكمة تحكم كامل متكامل في كل قرارات أمريكا السياسية .. و دول تانية كتييييييير أوي .. . و الشركات دي مابتحبش تدفع كتير عالفاضي .. . و تكلفة البحث و تشغيل آبار البترول , و آبار الغاز الطبيعي , و المناجم .. أساساً تكلفة عالية .. . و تكلفة إني أعمل حروب .. و أوقع حكومات .. و أقتل ملايين .. تكلفة عالية برضو .. و لكن كل ده ضئييييييييييل جداً جداً .. مقارنة بتكلفة إن التنقيب ده كله يتعمل في مناطق ملوثة بإشعاع نووي . .. أصل في الآخر سيادتك اللي بيروح يشتغل في شركات البترول الضخمة دي مهندسين و فنيين بيقبضوا بالدولار .. و لكنهم مافيش مبالغ كافية تخليهم يروحوا يشتغلوا في مناطق ملوثة بإشعاع نووي مثلاً . . و بلاش المهندسين .. المهندسين سهلين .. و الفنيين كمان .. حنستبدلهم بذكاء إصطناعي .. و لكن المواد اللي عليها الكلام و العين و الحرب و الخناقة دي كلها .. تبوظ لو إتعرضت لإشعاع نووي . … 7- فهمت ؟! يعني من الآخر .. حوار النووي و الناهية و إن الكوكب بيجيب ضرفه .. كل ده هري .. مجرد كلام أخبار و جرائد وظيفته هو إن القنوات تبيع إعلانات أكتر .. و إن اللي مش فاهم .. يخاف … … 8- فبالتالي .. إلغي أوردر البيتزا العائلي اللي كنت ناوي تضربها لوحدك دي .. و جدد إشتراكك في الجيم تاني .. و إمسح الرسالة اللي كنت حتعترف فيها للكراش بتاعتك بمشاعرك .. و إمسح الرسالة التانية اللي كنت حتشتم فيها كل اللي إنت متضايق منهم .. .. و روح إتعلم و ذاكر و إشتغل و إتمرن .. … 9- أو ممكن أطلع أنا حمار و بافتي .. و الكوكب فعلاً حينتهي بعد بكرة العصر .. و في الحالة دي البوست بتاعي برضو مالوش لازمة .. ف عادي يعني 🤣 … … و الله أعلم .