زيي .. زي باقي البشر كلهم .. أحياناً كده بتحصل

زيي .. زي باقي البشر كلهم .. أحياناً كده بتحصل حاجات .. بيبقي أول رد فعل في عقلي هو :

• ليه ؟!
• أنا عملت إيه غلط ؟
• أنا عملت كل حاجة صح , و رتبت كل حاجة , و حاولت بكل الطرق .
• أنا عملت دراسة جدوي , أنا باصوم و باصلي و قرأت سورة ياسين قبل ما انزل .. و كلت سبع تمرات .. و نزلت قبل ميعاد الطيارة ب7 ساعات .. و ذاكرت كل اللي المفروض أذاكره و أكتر .. و كنت أكتر حد بيتمرن في الجيم .. و ماشربتش سجاير .. و سرحت شعري و نزلت كاوي القميص كمان 🤣 . . و مع ذلك .. و فجأة .. و بدون أى أسباب .. النتيجة بتكون زي الصورة كده .. اللي هو إنت قاعد في بيتك .. و فجأة لا قدر الله تتعرض لخسارة مادية و لوجيستية بالمنظر ده .. اللي هو إنت مش بس حتدفع فلوس كتير .. لا .. إنت حتتمرمط شوية حلوين أوي ورا عربيتك … كمية الصبر و الجلَد و الإيمان و الإحتساب اللي بتحتاجها في اللحظة دي .. كمية ضخمة .. و بتكون إختبار حقيقي جداً .. إختبار إنت فاهم الدنيا صح ولا غلط . فاهم إنك لا تملك من أمرك لنفسك أو لأى حد أى شيء إطلاقاً .. ولا لا . … في اللحظات اللي زي دي ( ربنا يعافينا منها و يخففها علينا ) .. بافكّر نفسي ب :
• أهل السفينة اللي سيدنا الخضر و سيدنا موسي خرموها لهم .
• أهل الطفل اللي سيدنا الخضر و سيدنا موسي قتلوه .
• ذرية الرجل الصالح اللي إتأخر حصولهم علي الكنز . … … المنظر اللي في الصورة ده .. هو أساس الحياة .. هو الحياة علي حقيقتها .. إنك لا تملك من أمرك شيء علي الإطلاق .. غير نيتك . الوهم .. كل الوهم .. إنك تأمن الحياة .. .. أفأمن أهل القرى أن يأتيهم بأسنا بياتا وهم نائمون .. أوأمن أهل القرى أن يأتيهم بأسنا ضحى وهم يلعبون .. أفأمنوا مكر الله فلا يأمن مكر الله إلا القوم الخاسرون

---

للتوضيح : الصورة مش صورتي أو تخصني إطلاقاً .. و لكنها أحد الصور المنتشرة لأحداث إسكندرية إمبارح .