12 وجهة نظر في الإستثمار ... السادسة ستفاجئك

12 وجهة نظر في الإستثمار … السادسة ستفاجئك … 0- غالباً باحتاج أكتب الديباجة التالية كل مرة في بوستات من النوعية دي : أنا مهندس إتصالات و إلكترونيات .. و شغلي علي الكمبيوتر من سنة 2005 , حياتي و إهتماماتي و شغلي و دراستي و دموعي و إبتساماتي و إحلامي .. علي مدار ال18 سنة اللي فاتوا عايشها علي ال ( cutting edge - آخر ما وصل له العلوم و التكنولوجيا ) قدر إستطاعتي . يعني كنت باعمل محاضرات و فيديوهات تشرح يعني إيه ( بلوك تشين , و بيتكوين .. سنة 2014 ) لما كان البيتكوين بأقل من 20 دولار .. .. و لحد النهاردة .. ماعرفتش عن أى وسيلة بتجيب فلوس ( حلال ) .. غير البيع . يعني : إما إني أبيع منتج .. و أقبض عمولتي . أو أبيع خدمتي .. و أقبض تمن مهارتي . أو أبيع وقتي .. و أقبض تمنه مرتب . … أى فلوس غير كده .. إما إنك بتتكلم في ميراث .. أو نصب . … 1- لما تجيلك رسالة محتواها ( ألف ألف مبروك , حضرتك كسبت معانا ( ترباتتيت ألف جنيه ) عشان ( أى بلح في البتنجان ) .. ) . يفضل ماتفتحش الرسالة من الأساس , و بلوك .. و إمسحها . … 2- لما صاحبك يشيرلك عن برنامج تشترك عليه عشان هو ياخد فلوس .. ماتفتحش الرسالة .. و ماتشتركش .. و لو تعرف .. إقطع علاقتك بصاحبك ده . … 3- لما تسمع عن منتج بيخسس الكرش , أو يكبر البنش , أو يعرض ال ( ما علينا ) .. سد ودانك .. و إقفل جيبك علي محفظتك .. و روح الجيم . … 4- لما تسمع عن أى ( بلح في البتنجان ) بيجيب فلوس بشكل ما .. و إنت ماتفهمش كل تفاصيل البلح في البتنجان ده .. ماتجريش ورا الفلوس … إجري ورا إنك تفهم . يعني : لو سمعت عن : تعدين سحابي .. تعمل إيه ؟ .. سهلة : إقفل جيبك علي محفظتك .. و روح ذاكر يعني إيه تعدين سحابي . .. لو سمعت عن سحاب تعديني … تعمل إيه ؟ سهلة برضو : إقفل محفظتك علي جيبك .. و روح ذاكر .. .. القانون لا يحمي المغفلين … ماتبقاش مغفل .. و ماتغفلش حد عشان تكسب منه … لأنك كده بتبقي أحقر من المغفل . … 5- تعدين سحابي , حوسبة سحابية , عملات مشفرة , شفرات معمللة , ذكاء إصطناعي , ذكاء طبيعي , زيت قلية وسخ حنكرره .. كل اللي فات من مصطلحات تكنولوجية معقدة .. و غيرها .. بتجيب فلوس فعلاً… للي بيذاكر و بيفهم أصول و حيثيات و كيفيات تكرار زيت القلية الوسخ و فلترته . .. أى حاجة أو وسيلة تانية غير مذاكرتها و فهمها بالكامل عشان تدخل في المجالات دي و تكسب منها .. مابيبقاش إسمه ( إستثمار ) .. لا .. إسمه ( إستحمار ) .. … 6- الحداية مابتحدفش كتاكيت … 7- القانون مش المفروض يحمي المغفلين .. … 8- المغفل مش اللي بيتسرق و هو مش واخد باله , المغفل .. هو اللي بيتجاهل أسس الحياة المنطقية .. و يروح يجري ورا اللي يشتغله عشان يكسب بالسبهللة . … 9- لو كنت غير قادر علي فهم أسس الحياة المنطقية ( و إن الفلوس اللي مانتش فاهم حتيجي إزاي .. يبقي حيتنصب عليك فيها ) .. يبقي سيادتك سفيه . و لا تؤتوا السفهاء أموالكم . يعني اللوم مش عليك , اللوم علي اللي إدالك فلوس تتصرف فيها . … 10 - الأرض اللي مش فاهم بتتزرع إزاي .. ماتشتريش فيها . و متشاركش فلاح .. و إنت مابتفهمش في الفلاحة .. … 11- ( الإستثمار ) في المعجم .. مصدر .. من الثمر .. يعني إنتاج المزروعات . إنك تستثمر .. يعني إنك تبذل ( مجهود + موارد ) .. بالظبط زي ( الإستصلاح - الزراعة ) . إنك تبذل فلوس بس و تستني حد يديلك نصيبك من الإيراد .. ده ماسموش إستثمار .. ده إسمه إستحمار و إستعباط و إستهبال و إستسهال . و المصطلح ده شاع بالمفهوم الغبي بتاع ( دفع الفلوس و بس ) .. زي في البورصة مثلاً و ما شابه .. بسبب قرف كتيييييييييير جداً في أسس النظام الرأسمالي أساساً .. و اللي بسببه حالياً بدأت تظهر مصايب لا حصر لها . … 12- عايز تستثمر ؟ إدفع لحد ييجي يذاكرلك .. يكون مستشار عندك .. يعلمك .. لكن ماتدفعش لحد عشان يشغلك فلوسك و تروح إنت تقعد علي القهوة رجاء . … و الله أعلم .