ده ( حُمّص )

1- ده ( حُمّص ) .

من فترة شهرين تقريباً كنت نزلت فيديو ليه لما لقيته في الجيم , و وضحت إني إستضفته عندي مؤقتاً لحين ما نلاقي له ملاذ طبيعي. هو حالياً سافر لمكان يقدر يعيش فيه حياة ( أكثر طبيعية نسبياً ) حيث إنه كان بدأ يعلن عن رغبته في الزواج .. و بشدة و عنف , و لكنها حياة بكل تأكيد مش بنفس الرفاهية اللي كان فيها في الصورة دي.

و خلال الفترة اللي هو كان قاعد معانا فيها, كان في نقاش و جدال دائم حول : 1- نعمل له عملية ( تعقيم ) عشان يبطل يطلب التزاوج و يستمر في كونه قط بيتي أليف ؟ 2- ولا نطلقه في مكان أقل رفاهية من حياة المنزل الأليفة , و لكنه حيلاقي حياة أكثر طبيعية لنوعه و جنسه .. و يتزاوج و يعيش حياته بقي ؟

أنا كنت من أنصار القرار رقم إتنين . و برغم عشقي الضخم للقطط و الكلاب بشكل خاص , و للحيوانات جميعاً بشكل عام . إلا إني كنت ضد إني أحرم كائن ربنا خلقه من أحد أكثر غرائزه إمتاعاً , فقط لمجرد إني باستمتع بصحبته و وجوده فحياتي. …

2- علي مدار اليومين التلاتة اللي فاتوا, إنتشر فيديو تم تصويره في معرض الكتاب مؤخراً .. لرجل أشيب يشبه ( رفعت إسماعيل ) .. بيرقص مع بعض الشباب علي أنغام موسيقي ( أخمن إنها لـ ويجز ) .. لكن مش متأكد الصراحة لأني سعمت لـ ويجز تراك واحد فقط لا غير حتي الآن … و كان بالصدفة أثناء إنتظاري لباريستا فاتنة في إسكندرية إنها تخلص لي القهوة الفرنساوي الدوبل إسبريسو بتاعتي .

بمجرد مشاهدتي للحظات الأولي للفيديو ده ( للأشيب الراقص ) .. قدرت أخمن نوعية الكومنتات اللي عليه .. و للتلخيص .. هما بينقسموا لـ :

1- إيه العجوز الأشيب المتصابي ده ؟ 2- و ماله ياخويا .. ربنا يسعدهم أكتر و أكتر .. سيبهم يفرحوا . 3- آدي أخرة أكل الإندومي و الحداثة في الأاوني المستطرقة ( أى كلام شباب وسط ) . 4- إنها النهاية يا سادة , دعنا ننتظر قدوم يوم القيامة بقي .

و بالفعل , تخميني طلع صائب للغاية .

… الفكرة إني فعلاً ماقدرتش أفهم إحساسي تجاه الفيديو ده من أول مرة .

يمكن لأني أنا كمان عندي نوعي المفضل من الموسيقي , و غالباً ممكن جداً تقابلني بامشي أو باجري علي كورنيش إسكندرية أثناء ما بانفعل مع كمانجا ” سامفيل إيرفينيان ” في سماعاتي العازلة للصوت .. و إيديا بترقص معاه .

يمكن لأني البلايليست عندي فموبايلي فيها أغاني أجنبي ( إنجليزي و لغات أخري ) .. كلماتها و اللي بيغنوها يخلوا ( ويجز ) مقارنة بيهم شاب مؤدب لابس قميص مكوي و كرافات لون واحد .

يمكن لأني أنا كمان تشربت آراء كتير تخليني فعلاً شايف إن أكل الإندومي بيأثر سلبياً علي الحداثة في الأواني المستطرقة .

و بكل تأكيد , أنا مسلم , و و مقياس الحرام و الحلال في عقيدتي بييجي قبل كل ده .. و هو مقياس واضح لا خلل فيه .. و لكن لأن العقيدة سهلة و واضحة و صريحة لكل فطرة سليمة .. بتكون برضه غريبة و صعبة لكل فطرة ملعوب فأساساتها .. و عشان كده في لغات و أساليب كتير للكلام من الفطرات اللي ملعوب فأساساتها دي .. و بعد ما تستقر أساساتها .. تقدر تتكلم معاهم بمقياس الحلال و الحرام . لكن قبل كده , كتير منهم حيزدادوا عنداً بمجرد ما تكلمهم بكلام دين .

… 3- يمكن السبب في إحساسي بال ( غرابة ) تجاه الفيديو السابق ذكره .. هو إني علي مدار السنين اللي فاتت عموماً .. و الشهور اللي فاتت خصوصاً .. بواجه نفس الإحساس ده مع العديد و العديد من اللي باشوفه و أقراه و أسمعه بشكل يومي ..

ألا و هو ( خلل مقياس القيمة ) ..

بحكم شغلي و دراستي و إهتماماتي .. أنا متابع لمعظم إن لم يكن كل الأخبار التكنولوجية و الإقتصادية و البيزنس عالمياً .. و إنهيار كيانات كانت بيتم ” تقييمها ” بمليارات الدولارات .. لتصبح ” قيمتها ” بتساوي صفر . كان بيخليني أفضل أتسائل … هل كلمة ( تقييم ) بيتم إستخدامها صح هنا ؟

بحكم إهتماماتي الثقافية .. أنا متابع لمعظم الأخبار عن إنتاجات ( نتفلكس ) .. و ( ديزني ) .. و كل ما شابه .. و متابع كم الإهتمام و الدوشة علي حركات ال ( شواذ ) و النقاشات حولها .. و ده بيخليني أتسائل .. هل في أى ( قيمة ) بيستند ليها مؤيدي الشذوذ .. غير ( عواطفهم ) ؟!

و طبعاً بحكم شغلي و إهتماماتي .. متابع و باتفرج علي الصورة الكبيرة للسوشيال ميديا .. و الإنفلونسرز .. و كل ما ينتج عن ده من فوضي فكرية و عاطفية . و ده بيخليني أتسائل .. هل الوقت المبذول في حياة زي دي ( إنتاج محتوي لا يتم تقييمه غير بالـ فلوس ) .. بيدي إحساس حقيقي بإني ليا ” قيمة ” ؟!

… 4-

أنا عاشق للحيوانات .. لكن هل عاطفتي دي مبرر منطقي كفاية إني أغير من طبيعة حيوان لمجرد إشباع إحتياج عاطفي جوايا ؟! أنا في أغاني و موسيقي معينة موجودة في البلاي ليست المفضلة عندي بقالها أكتر من 15 سنة .. هل إستمتاعي بيها كفاية كمبرر منطقي إني أشغلها و أرقص عليها علي العام ؟!

أنا في عوالم الكريبتو من 2014 .. أيام ما كان البيتكوين بيساوي 12 دولار حرفياً .. و عملت الفيديوهات اللي علي اليوتيوب دي اللي بتشرح الكلام ده .. و كان أيامها البيتكوين بيساوي 20 دولار ..

و فـ 2015 فاكر إني إحتفلت إحتفال ضخم بأول 3000 جنيه مصري أخدتهم كمقابل لأول شغل تجاري عملناه في ( تشكر ) و قعدت أشتغل عليه لمدة شهر كامل تقريباً عشان يطلع .

هل الشهر ده دلوقتي .. الطريقة الوحيدة لـ (تقييمه ) بالنسبة ليا .. المفروض يكون ال 3000 جنيه دول ؟!

… 5- أنا كنت آخر دفعتي في كلية هندسة .. و شلت سنتين .. و طلعت 2012 بدل 2010 .. و الإمتيازين الوحيدين اللي جبته .. كان في مادة ( رسم و وصفية ) في إعدادي هندسة … و مشروع التخرج . و باقي تقديراتي كانت كلها ( مقبول و ضعيف و راسب ) .

و علي مدار ال7 سنين اللي في الكلية .. مافتكرش إني كنت باعمل شيء غير إني ( أذاكر , و أتفرج علي أنيمي ) … و كنت و مازلت عاشق لكل معلومة درستها .

هل ( قيمتي ) ك مهندس .. هي في تقديراتي دي و درجاتي ؟!

… 6-

و لكن يبقي السؤال .. فأى وقت كنت باروح أشتري ( توناو ) عشان ال ( مياو ) حمص .. هل كان حيقبل السوبرماركت إني أحاسبه علي ( قيمة ) التوناو .. غير بالـ ( فلوس ) ؟! ..

و الله أعلم .