شوية كلام سريع عن ال ( بتاع ) 🤣

شوية كلام سريع عن ال ( بتاع ) 🤣 .. عن موضوع تعريب علوم الطب و الصيدلة . ( للتلخيص أنا متفق و فرحان و مش متضايق ) . … أولاً : أنا رأيي مبني علي تجربتي الشخصية المحندقة اللي علي قدي , و شوية كام كتاب قرأتهم علي كام كورس أخدتهم علي كام كباية قهوة بالقرفة و الجنزبيل شربتهم علي مدار السنين 😅 . فبالتالي .. كلي علم و يقين و حنان و آمال .. و جيهان جات متأخر .. إن في أساتذة جهابزة متمرسين مخضرمين عندهم وجهات نظر مضادة أرض جو لوجهة نظري .. كامل إحترامي لهم . … ثانياً : أنا دراستي لحد قبل ما أدخل الكلية مباشرة ( كلية هندسة ) كانت بال ( س و ص ) .. يعني سحر الأعاجم بتاع ( X Y Z ) ده .. ماشفتوش غير فأول محاضرة في الكلية . … … أما بعد .. تسمع عن ال ( Parameter - باراميتر ) ؟! . لو ماتسمعش عنه .. فهو ترجمته الحرفية هي ( مُعامل إعتباطي ) … آه والله العظيم زمبئولك كده .. اللي هو بالترجمة الحلمنتيشية الفصيحة اللي باحبها .. ال ( بتاع ) . … و قبل ما تفكر إني باتكلم كلام لامؤاخذة +18 .. إديني فرصتي أضايقك شوية و أكلمك في الرياضة .. .. المعادلات الرياضية اللي هي إنت بتبدأ تسمع عنها من أول ( أولي إعدادي ) .. ليها صور كتير .. من أشهرها مثلاً المعادلة التربيعية .. اللي هي مثلاً : (6 س تربيع + 7 س - 32 = 0 ) . و كنت تبقي إنت مطلوب منك تحلها عشان تطلع قيمة ( س ) .. و لما بتتكتب بشكل أصيع شوية .. يعني من غير أرقام بتبقي : ( أ س تربيع + ب س - ج = 0 ) . . ال ( أ , ب , ج ) هنا بيبقي إسمهم ( arbitrary parameters ) . يعني ثوابت إعتباطية .. يعني لما نيجي نطلع حل للمعادلة اللي فوق دي .. و نكتب صيغة معقربة شوية مش حاكتبها هنا مراعاة لمشاعر أى أطفال 🤣.. الصيغة دي ممكن نكتب فيها الثوابت الإعتباطية دي ك ( أ , ب , ج ) .. أو ( a ,b,c ) .. أو ( حنان و آمال و جيهان ) برضو .. زي ما تحب .. الإسم مش حيفرق .. المهم الشخصية 😅. … … فكلية هندسة بقي .. أول محاضرة أحضرها في إعدادي هندسة .. كانت محاضرة ميكانيكا .. آه والله العظيم .. اللي هو إنت لسة بتتعرف بزمايل و زميلات الدفعة .. و فرحان إنك قاعد فمدرج .. و فجأة لقيت راجل كُبارة لابس بالطو أبيض واقف بعييييييييد علي السبورة .. و بدأ يكتب طلاسم .. .. و قسماً بالله … ( أنا بأقسم ) .. أنا كان عندي مشكلة كبيرة مع موضوع ال( باراميتر ) ده 🤣 . … الدكاترة فهندسة نادراً منهم اللي كان بيعاملك ك كائن أخضر لسة طالع من ثانوي حكومي أقاليمي زي حالاتي .. و أغلبهم كان بيشرح بكل أريحية متوقع من اللي قاعدين قدامه إنهم لا قدر الله لو مش فاهمين .. حيسألوا .. . و ك كائن أخضر طالع من ثانوي حكومي أقاليمي زي حالاتي .. قاعد في المدرج شايف اللي قاعدين علي لمينك و شمالك قاعدين بيكتبوا ورا الدكتور بكل أريحية .. إنت بتحس إن إنت اللي غلط .. و بيبقي صعب تستحضر أى شجاعة أدبية أو حتي شجاعة مش مؤدبة ..عشان تسأل .. ( عمو عمو .. هي يعني إيه باراميتر ؟! ) . … و الكلمة دي ( لأن معناها زي ما شرحت فوق = بتاع ) .. كان بيتم إستخدامها أكتر من كلمة ( السلام عليكم ) أساساً في المحاضرات .. و أنا مش فاهم .. هو كل الناس متصالحة إن في كلمة جديدة قليلة الأدب زي دي بتتقال قدامهم ؟! .. ولا هي إتشرحت فمحاضرة في الأجازة و أنا ماعرفش مثلاً ؟! ولا الغلط فيا ولا في الآخرون ؟! . … و علي أيامي ( 2005 ) .. ماكنش في جوجل سيادتك .. آه والله .. أنا عارف إنها حاجة صعبة إنك تتخيلها .. و لكن علي أيامنا كان السيرش عال ( ياهووووو ) .. و ماكنش في نت .. كان في حاجة إسمها ( dial up ) .. اللي هو توصل التيليفون الأرضي بكارت المودم في جهاز الكمبيوتر … و تستني تسمع نغمة مميزة جداً .. و تبقي محظوظ لو عرفت تفتح صورة واحدة قبل ما تلاقي أهلك بيتبروا منك لأنك فصلت التيليفون الأرضي عليهم . … فبالتالي .. كنت بادور في قاموس إلياس الورقي .. و ماكنتش برضو بالاقي معني للكلمة دي 🥹 … … أنا عارف إن اللي كاتبه فوق ده كله يبدو مُبالغة مني .. و لكن صدقني ده تبسيط مش مبالغة .. خصوصاً لما تتخيل باقي مواد كلية هندسة .. و منظر المخمضة اللي كنا فيها أيامها و إحنا بننزل من البيت الفجر .. و نرجع بعد العشاء .. و محتاجين نعرف إحنا مين أساساً قبل ما ناكل لقمة و ننام .. عشان نصحي تاني يوم الفجر ننزل نجري ورا القطر عشان نلحق أول محاضرة . … حاجز اللغة فكل اللي فوق ده .. كان أحد أكتر الحواجز اللي أخد مني وقت و مجهود عشان أعرف أتخطاه .. .. و بالمناسبة .. بعد أول كام شهر .. بتتأقلم بكل تأكيد ( يعني بتاكل أقلام لحد ما تشبع 🤣 ) .. .. و بتلاقي نفسك بتتكلم مع واحد صاحبك و إنت بتشرح له موضوع ما عالقهوة .. و تقول له ( بس الباراميتر برضو هو اللي غلط و لازم يعتذر ) .. و صاحبك ( لو مش مهندس ) بيفضل باصص لك شوية و هو متنح .. و بعدين ياخدك علي قد عقلك و مايسألكش .. خصوصاً إن أعراض تانية كتير من دراسة هندسة بتبقي مخوفاهم أكتر 🤣 . … لكن .. إنت بتقول الكلمة و إنت مش فاهم معناها .. إنت بتكون بتقولها و إنت فاهم إستخدامها .. و ده فرق كبيييييييييييييييييييييييييييير جداً بين الإتنين .. يعني إيه ؟! . … يعني الطفل الصغنن بيشوف الكبار حواليه بيستخدموا لغة معينة .. و بيشاوروا علي إسطوانة مجوفة و لها قعر و يقولوا ( باية .. كوباية ) .. . فهو بيطلع عند سن سنتين تلات سنين مثلاً .. و يشاور علي نفس الأسطوانة المجوفة ذات القعر و يقول ( باية .. كوباية ) .. لكن .. هل هو فاهم إن ال ( باية .. كوباية ) .. دي عبارة تصريف حلمنتيشي لكلمة ( كوب ) .. و هل هو فاهم مصدر الكلمة .. أو إعرابها ؟! .. . و الأهم .. هل هو فاهم يتخيل بيها ؟! . … … أى طفل مولود فأى وسط لغوي .. بيكون قادر تمام القدرة علي الكلام باللغة اللي إتولد فيها .. و لكنه إطلاااااااااااااااااقاً بيكون غير قادر علي ال ( شعر ) بيها .. يعني مايقدرش يرسم باللغة دي لسة .. يكون تشبيهات و إستعارات مكنية و مجاز و ليلة كبيرة سيادتك .. .. و الفرق بين القدرة علي إستخدام لغة .. و القدرة علي التخيل بيها .. والله لو تعلمون عظيم . … … هو هو نفس الفرق بين المهندس اللي درس أسس نظريات الهندسة .. و بداياتها .. و العلم اللي النظريات دي و تطبيقاتها بتقوم عليه .. و بين الميكانيكي .. اللي آخره في الصياعة يعرف يركب إيه فإيه .. … … و ده سيادتك أحد أكبر الفروق الحضارية بين حضارة العرب و حضارة الغرب حالياً … في شوية إحصائيات ظريفة إتعملت علي المحتوي العلمي للهواة علي الإنترنت ( اللي هو الناس اللي بتعدل في المكن مثلاً .. أو تعمل صواريخ و تفرقعها فوق السطوح .. و هكذا ) .. .. المحتوي العربي / عربي في المجالات دي .. مش بس ضحل .. ده يكاد يكون غير موجود إطلاقاً .. في حين إن في شبه تشبع في المحتوي ده غربياً .. … المثير بقي للإنتباه و للإهتمام .. و لحنان و آمال و جيهان كمان .. هو المحتوي الهندي و الصيني في المجالات دي .. محتوي ضخم .. ضخامته بتنافس في معدلات تزايدها حالياً المحتوي الغربي .. … و أحد أهم أسباب ده ( و الموضوع ده قتله بحثاً من هم أفضل مني بكتير ) .. هو عامل اللغة .. … إن المحتوي التقني مثلاً (البرمجيات ) حالياً عشان تدرسها بشكل حر أونلاين .. بنسبة كبيرة حتلاقي إن أغلب المتحدثين فيها هما ( هنود ) .. و النكتة المعتادة في الموضوع ده .. إنك لو حبيت تتعلم برمجة بشكل حر أونلاين .. حتطلع بعد شوية بتتكلم هندي مكسر 🤣 . … … تقدر طبعاً تقول لي .. خلاص .. سهلة .. إحنا نخلي العيال الصغننة تتكلم إنجليزي من أولي حضانة .. و مش بس كده .. لا .. إحنا نجبر أهاليهم في البيت يتكلموا إنجليزي كمان .. و نشغل لهم مسلسل فريندز عالفطار في رمضان 🤣 . .. أقول لك .. تبقي بترقص عالسلم .. ليه ؟ .. لأن اللغة مش بس وعاء للفكر الحالي .. لا .. دي وعاء للتاريخ كمان .. و لاحظ هنا إني مراعي مشاعر أى حد عنده حساسية من الدقون و الدين .. و ماجبتش سيرة الدين نُهائي .. .. لا .. أنا باتكلم عن ( القدرة علي التخيل ) .. اللي هي أحد أهم عناصر الإبداع .. اللي هو السبب في أى ( Know how = إزاي يعني ) بنعمل أى بلح فبتنجان له علاقة بتكنولوجيا أو علوم أو هندسة . … القدرة علي التخيل ب( لغة معينة ) دي .. إنت مش بتاخدها من كورس لغة .. أو حتي من مدارس خاصة مصاريفها غالية .. لا .. إنت بتاخدها من مجتمع و حضارة كاملة .. مجتمع و حضارة و تاريخ بتشربهم بالكامل .. و بيكونوا هويتك .. اللي بيها بتبدأ تتخيل معارك و ملاحم و حروب و قصص حب و قصص تاريخ و ألف ليلة و ليلة .. و غيرهم .. . فلما بعد كده تدرس حاجة معقدة معقربة زي ( الترانزيستور ) مثلاً .. و ينطلب منك ( تبدع ) تصميم معين .. الفرق بينك ك ( دخيل ) علي اللغة اللي إنت بتدرس بيها .. و بين ( أصيل ) في اللغة .. هو نفس الفرق بيننا حالياً ك ( بالكاد قادرين علي حل المسائل ) .. و بين مصممين بيستمروا في الإبداع من سنين و سنين .. … … و في النهاية .. باشمهندس أيمن عبد الرحيم أعزّه الله .. له محاضرات و محاضرات في النقطة دي بالذات .. كلها باعتبرها سماع إجباري .. لأى حد عايز يفهم أى شيء ذو قيمة في الحياة . … … و الله أعلم .