البيضة الأول ولا الفرخة ؟!

البيضة الأول ولا الفرخة ؟! يعني : أديلك مرتب عشان تشتغل ؟! , ولا تشتغل عشان أديلك مرتب ؟!

أنا قاعد بقالي 45 دقيقة تقريباً مسهم في صفحة وورد مكتوب فيها شوية كلام جميل أوي ( عشان أنا اللي كاتبه طبعاً 😁) .. فيه تفاصيل خطة عمل ظريفة كنت وعدت Nermine El Nemr إني حابعتها ليها لمشروع معين بيننا خلال 48 ل 72 ساعة .

من 3 شهور تقريباً, كنت جزء مع نرمين في مبادرة (Freeluencer ) و هدف المبادرة دي إننا نقرب العملاء للفريلانسرز اللي بيدوروا علي طرق أكتر تدر عليهم دخل .

و تم بناء أول فكرة في المبادرة .. كمسابقة إنتاج محتوي .. و تم رصد ميزانية جوائز بسيطة ( 30 دولار لكل فائز ) ك ( تحفيز ) للمشاركين و الفائزين منهم . طبعاً أنا ماكنتش دافع الفلوس من جيبي 😅 , العميل كان هو اللي دافع .. و الهدف الأكبر للعميل ( زي ما شرحت في الفيديوهات اللي عملناها أيامها ) هو إن يكون في عائد ( مبيعات ) ليه يحقق له ( ROI - return on investment ) يعني عائد لإستثماره ده .

فكرة المبادرة لما طرحتها علي ( نرمين و العميل ) من 3 شهور , ماكنتش مبنية في عقلي من فراغ أو وليدة اللحظة .. بل كانت أحد الحاجات الأساسية اللي بنعملها في شركتي ( Toshkar ) بقالنا 7 سنين تقريباً . ألا و هو : إنتاج محتوي .. بشكل مستمر .. كتير .. بشكل مستمر .. بدرجات جودة مختلفة .. بشكل مستمر .. في مجالات مختلفة ..بشكل مستمر .. فأماكن و منصات مختلفة .. بشكل مستمر . و عمل ( monetizing - إستثمار يحقق فلوس ) من المحتوي ده عن طريق الإستفادة من ال ( traffic - زيارات و مشاهدات و إنتباه البشر ) اللي بييجي علي المحتوي ده .

لو لاحظت في الفقرة اللي فاتت .. كلمتين ( بشكل مستمر ) إتكرروا كذا مرة .. و صدقني ده مش كفاية .. الإستمرار في الإنتاج هو أهم شيء .. ال ( consistency ) .

لما بدأنا عملية إنتاج المحتوي من 7 سنين, , ماكنش في أى عائد مباشر مقابل الإنتاج ده بيدخل لنا .. إطلاقاً .. و شهور كتير .. جداً .. جداً .. كنت بابقي أنا ال(content creator -منتج المحتوي ) الوحيد اللي شغال .. بدون أى عائد مادي مباشر علي الإنتاج ده .

كتبت مقالات عددها أكتر مما أتذكره ( بالعربي و الإنجليزي ) فجميع المجالات اللي أفهم فيها و اللي مافهمش فيها ( كنت بادرسها و أكتب عن إزاي بادرسها ) , و أنزلهم علي المواقع ( الوورد بريس ) بتاعتنا أيامها .

والله العظيم عمري ما أنسي 3 أيام كنت مقضيهم بحث و تمحيص فأنواع المكياج و المونيكير و الأظافر علي أمازون البرازيل .. عشان باكتب مقال عن أفضل المنتجات دي و كيفية الإختيار منها و أضرار السيء منها و ما شابه .. و المقال كان موجه بشكل مباشر لديموجرافيك ال( latin americans ) 😂😂.

كنت باتعلم موشن جرافيكس مستويات متقدمة , و باشتغل موشن جرافيكس مستويات متقدمة و متوسطة , و بادرّس و أشرح موشن جرافيكس مستويات مبتدئين .. و باعمل فيديوهات موشن جرافيكس لقنواتي الخاصة فمنصات مختلفة … كل ده فنفس ذات الوقت .. كنت باشوف كل الطرق اللي أقدر أزود بيها كم المحتوي اللي بننتجه .. و أشتغل عليها .. و أعمل ( Funnels - أقماع ) تصب ل ( CTA - Call to actions ) , و أعمل backlinks من مواقعي لمواقعي .. و قصص كتير ..

و كل ده كان بدون عائد مباشر .. إطلااااااقاً ..

كل اللي كنت عارفه أيامها, إني لما نقرر إننا نعمل ( monetization ) لكل ده في يوم من الأيام .. كل قطعة محتوي فمكان ما من الإنترنت .. حتكون ليها فائدة و قيمة .

و بالفعل .. و بفضل الله أولاً و أخيراً .. قد كان . لما بدأنا ( monetization ) من أكتر من 5 سنين بحاجة بسيطة .. كان كل قطعة كونتنت موجودة في مكان ما في الإنترنت مترامي الأطراف ده .. كأنها بذرة بتزرع و بفضل الله ما زالت تؤتي ثمارها حتي اليوم . …

علي مدار الفترة اللي كنت باشرح فيها كورسات في مجالات مختلفة , و بعد كده ركزت علي شرح الشغل الحر ( الفريلانس ) بشكل عام .. ركزت علي النقطة دي العديد و العديد من المرات ..

ألا و هي : إنتج الأول .. بأى جودة .. و فكل وقت .. و بعد كده دور علي العائد ..

و لكن اليأس و الإحباط و الزهق كان بيقابل ناس كتير أوي .. قبل ما كانوا بيقدروا يلاقوا عائد لإنتاجهم .. و اليأس و الإحباط و الزهق ده إتنقل ليا بشكل مباشر .. و أصبحت شبه متأكد إن صعب جداً جداً إني ألاقي ناس عندها المثابرة علي الإنتاج .. بدون رؤية مباشرة للعائد .. و بطلت شرح بالكامل .. و قررت إني أركز علي عدد قليل جداً من اللي حواليا .. أقدر ألتزم ليهم بعائد مادي مستمر ( مرتب ) .. يساعدهم علي الإنتاج .

و بفضل الله .. ده نجح مع نسبة أكبر .. لكن العدد قليل ..

فبقيت باحاول إني أركز علي نفسي أكتر .. عشان أزود قدرتي علي إعطاء مرتبات ثابتة لعدد أكبر .. و هكذا … و مازلت باحاول أعمل ده قدر إستطاعتي والله أعلم .

… لكن كل فترة .. بتحصل حاجة معينة .. بتخليني أحاول مرة تانية .. أحاول أشرح إن : الطبيعي في الحياة .. هي إن الإنسان يتعب الأول .. و بعدين يلاقي .. مش العكس .. و إن الحياة مابتديش مرتبات ثابتة .. ولا تأمينات .. و لا معاشات .. و لا حوافز . الحياة بتديلك أرض تتعب و تزرعها .. الحياة بتديلك شجر تتعب و تبني منه .. الحياة بتديلك نخل تتعب و تتسلقه ..

الحياة بتديلك أدوات .. و مساحة للتعب … و إيمان بالله إنه هو الرزاق ..

.. اللي حصل مؤخراً .. هو اللي إتكلمت عليه من يومين في لايف .. هو ChatGPT خصوصاً .. و الذكاء الإصطناعي عموماً .. عدد أكبر من الأدوات أصبح متاح و مجاناً و بالساهل .. عدد أكبر من الأدوات يخليك تجرب ..

…

أنا حالياً قاعد مسهم في صفحة الوورد دي .. لأن اللي عايز أكتبه و أصمم خطة بناءاً عليه .. هو إن الناس ممكن تنتج بدون إنتظار عائد .. و إن العائد جاي بإذن الله … لأن قاعدة الإنترنت الأساسية و الأولي واضحة وضوح الشمس .. traffic = money و مافيش traffic بدون Content و إن كل ما عدد أكبر من الأشخاص إشتغل علي إنتاج Content .. الكم حيكون أكبر بكتير .. و العائد حيظهر بشكل أسرع بكتير ..

لكن الرهان في القاعدة دي هو علي اللي حيقدر يستمر .. حتي لو لقي فأحيان كتير إنه لوحده .. قاعد بيكتب مقال عن أنواع الأظافر اللاصقة الأنسب لإحتفالات رأس السنة في البرازيل 🤣🤣🤣 .

و الله أعلم .