مولد مولاهم خالد النبوي , و الزواج علي مذهب الإمام

مولد مولاهم خالد النبوي , و الزواج علي مذهب الإمام شات جي بي تي .

1- أنا ماتفرجتش علي أى حلقة ” أو حتي مشهد ” من مسلسل خالد النبوي اللي بيمثل فيه الإمام الشافعي , و ماعتقدش إني محتاج أتفرج علي أى شيء منه عشان أشرح اللي عايز أشرحه في البوست ده , و كل معلوماتي عنه حتي الآن .. من مجرد بعض بوستات و ميمز متشيرة قدامي علي الفيسبوك . .. 2- من طفولتي و أبويا و أمي ربنا يبارك لهم فصحتهم و عمرهم .. ربوني علي إن كل ما له علاقة بـ : ( كرامات الأولياء , معجزات الشيوخ ذوي الذقون الطويلة اللي بيطلعوا في التيليفزيون , قصص الأساطير و الإسرائيليات و حكاوي المساء و السهرة اللي منتشرة إنتشار السرطان في الجسم المريض , … و غيرهم ) عبارة عن هري و عبط و كلام فارغ . ( و ده كان منهج جدي رحمة الله عليه الشيخ محمد أبو علو ) و إن غير معجزات الأنبياء المذكورة في القرآن و السنة النبوية الصحيحة .. ماصدقش . و إن إيماني بالمعجزات دي .. مش معناه إني أمشي في الحياة أدور علي عصا تشق البحر .. أو شخص بيمشي علي المياه .. إطلاقاً .. إيماني بالمعجزات المذكورة في القرآن و السنة النبوية الصحيحة .. وظيفته الأولي و الأهم بالنسبة ليا .. هي إني أتدبر في كل جزء من خلق الله يدركه وعيي ولا يدرك كيفيته عقلي. يعني : كل حاجة عيني بتقع عليها في الحياة دي … معجزة .. معجزة ..يعني شيء يعجز عن فعله و “خلق ” تفاصيله .. الإنسان العادي محدود القدرات . فبالتالي .. كل حاجة فحياتك المفروض إنها بتعجز عقلك المدرك , و تخليك تسبح بحمد الله و قدرته اللا متناهية . .. لكن لو شفت إنسان قدامي رأى العين بيمشي علي المياه .. اول حاجة عينيا حتدور عليها .. حيكون الكاميرا اللي بتصور عمو الساحر اللي بيعمل عرض ده .. و بعدين حادور علي الخيط اللي رابطه و متشعلق منه . … … 3- و مع ذلك .. المؤمنين بالأولياء و كراماتهم و معجزاتهم و خوارقهم .. ماليين الدنيا حوالينا .. و مش باتكلم في مصر و بس .. إطلاقاً .. أنا باتكلم في العالم أجمع .. من أول نصابين الهند , لحد نصابين الصين , و نصابين أمريكا و كنائسها متعددة الأسامي . و كل نصاب من دول , بيكون قدامه جحافل من المغفلين اللي بيسقفوا له و مؤمنين بكراماته . … سؤالي بقي : أروح عند **** القرد و لا مؤاخذة … و أشمها ؟! 😅😅 … 4- يعني أنزل أي مولد من اللي مليانين نصابين علي مغفلين علي عبط علي ناس رايحة تتفرج و تزيط في الزيطة … و أحاول أوعظهم و أوعيهم ؟! .. إجابتي علي السؤال ده دايماً بتكون : الرسول صلي الله عليه و سلم .. أفضل خلق الله .. خاتم الأنبياء و المرسلين .. و مش بس كده .. لا .. ده كان معاه الصحابة عليهم رضوان الله .. خيرة البشر اللي ربنا إختارهم ليصاحبوا الرسول في بداية الرسالة .. و كل واحد منهم كان عقلية جبارة .. النخبة دي كانت موجودة … و كان موجود معاهم ( منافقين , و مضللين , و ضالين ) . ضالين يعني : ناس سمعت كلام الرسول صلي الله عليه و سلم … و سمعت كلام الصحابة .. و سمعت كلام المضللين .. و إختاروا يمشوا ورا المضللين !!! . .. مضللين يعني : ناس سمعت كلام الرسول صلي الله عليه و سلم .. و فهموه و عقلوه .. و لكن إختاروا إنهم يعملوا العكس و يمشوا في طريق الضلال .. و مش بس كده .. لا .. ده إختاروا يسحبوا معاهم الضالين كمان . .. منافقين يعني : ناس سمعت كلام الرسول صلي الله عليه و سلم … و فهموه و عقلوه .. و إختاروا إنهم يحاولوا يمكروا عليه و علي المسلمين الأوائل ذوي العقول الجبارة دي و النفوس القوية دي … متخيل غباء المنافقين دول و غتاتهم عاملة إزاي ؟! … … 5- و لكن مش معني كلامي إطلااااااقاً إني باقول : ماتتكلمش .. ماتحاولش .. ماتشرحش … إطلاقاً .. كلامي معناه هو : توقع الأسوء .. بمرااااااااحل .. و ماتتفاجئش لما تلاقي ناس قريب ممكن تقيم موالد لمولاهم خالد النبوي . سقف غباء البشر .. عاااااااااااااااااااااااااااااالي أوي . … 6- الإجابة المعتادة اللي ممكن تسمعها لما تيجي تشرح لحد مدي البظرميط اللي ممكن يؤدي له معلومات مغلوطة زي اللي بتتعرض في المسلسلات الديني الدايت دي . هي إنه حتلاقيه بيرد عليك ب : إنت حاتعمل فيها شيخ ؟ .. طب تقدر تفتيني في كذا و كذا و كذا ؟ .. طب إيه رأيك في كذا و كذا ؟ و يبدأ يسرد عليك هري و كلام فارغ مشروح فمئات الكتب .. و لكنه مش عايز يقرأ الكتب دي من البداية .. و مش عايز يقرأ الكتب اللي تؤهله لقراءة الكتب أساساً .. لا .. هو عايز السهل .. السريع .. المختصر .. الشورت كاط . … و دي الحاجة اللي مخلياني متأكد إن قريباً جداً حيكون في ناس حتاخد فتواها من chatgpt . ما هو اللي يخلي الذكاء الإصطناعي يطلع من ال10% الأوائل في إختبارات المحاماة الأمريكية .. يخليه يذاكر كتب الفتوي و الشريعة الإسلامية برضو .. و يرد من المعلومات دي … صح ؟ غلط … غلط فظيع كمان .. … … زي ما شرحت فوق .. الرسول صلي الله عليه و سلم .. و الصحابة .. كان موجود معاهم فنفس المدينة .. و بين نفس البيوت .. منافقين . يعني ناس سمعت المعلومات .. و فهمت الكلام .. و قررت تعمل الغلط .

و خطر المنافقين الأكبر .. مش بيكون علي المسلم الصح القوي اللي فاهم .. لا .. خطر المنافقين الأكبر .. بيكون علي اللي مش فاهم .. و اللي مش عارف .. و اللي بيدور علي أى كلام يمشي علي هواه عشان يمشي وراه .. لأنه حيسمع من المنافق كلام منمق .. و شوية معلومات .. و حياخد المنافق علي إنه شيخه .. و عشان مايكونش لوحده في الغلط … حيكون من أكبر أبواق الدعايا للشيخ المنافق ده .. عشان يزود أتباعه .. عشان يحس إنه مش لوحده اللي ماشي في الطريق الغلط ده .. و كل ما حس إنه معاه ناس أكتر حواليه … إتطمن قلبه للغلط أكتر و أكتر . … … 7- طيب .. تعمل إيه ؟! .. الصح واضح جداً جداً جداً ..

ببساطة .. الدين في حياتنا مش حل مؤقت .. مش حباية نروح لأى صيدلية ناخدها لما نحتاج و بعدين ننساها لما مانحتاجهاش . لا .. الدين المفروض هو عصب حياتنا .. يعني الدين الأول .. و بعد كده كل حاجة تانية ..

فزي ما بنتعلم أ ب فأى لغة لأى مكان بنعيش فيه .. و زي ما بنتعلم أساسيات الحساب فإبتدائي .. أساسيات الدين مالهاش بديل .. و ماينفعش تختصرها أو تنساها ..

و لكن .. إنت مابتستخدمش الحساب كل يوم في حياتك إلا لو كنت مهندس . و مش بتستخدم اللغة كل يوم في حياتك إلا لو كنت كاتب . و مش بتستخدم الأحياء كل يوم في حياتك إلا لو كنت طبيب .

لكن الدين .. المفروض إننا بنستخدمه كل لحظة فحياتنا .. حتي مماتنا .. فبالتالي .. زي ما المهندس بيدرس الرياضة و الهندسة بمنهجية و بشكل مبني صح . و زي ما الكاتب بيدرس اللغة بمنهجية و شكل مبني صح . و الطبيب و غيرهم ..

الدراسة المنهجية للدين معناها دراسة مبنية بشكل تراكمي .. مش من كل كتاب فتوي و من كل بوست أغنية .. لا .. الدراسة المنهجية معناها إنك فأى لحظة وقفت قدام مسئلة مش فاهمها أو مش عارف تفاصيلها إيه .. ماتفتيش .. و ماتصدقش حد بيفتي .. و لكن أقل القليل فمعلوماتك المفروض يكون إنك تعرف تسأل مين يدلك .

يعني أقل القليل في العلم … هو إنك تعرف تسأل مين .. و تسأل إزاي ..

لكن إنك عقلك يكون مبولة عمومية .. مفتوحة لأى مسلسل تيليفزيون يقضي حاجته فيه .. فده شيء مقرف .. و بتكون نتيجته مقرفة .. ببساطة .. نتيجته توهاااااااااااااااااااااااان .. إنك تبقي ماشي في حياتك مش عارف إنت مين ولا رايح فين ولا بتعمل إيه .. و تبقي بتدور علي مسكنات من كل شكل و نوع .. مسلسلات تعيش معاها و فيها كل شوية .. قصص حب و علاقات فاشلة تدخل و تطلع منها .. شغل و فلوس و هري دنيا .. كل ما تشرب منه تعطش أكتر ..

و اللحظة اللي روحك تحس فيها بشوية فوقان .. و تبدأ تحس إنك محتاج تفهم فعلاً حقيقة الدنيا دي … للأسف بيكون أقرب ليك أحياناً مسلسل ديني لايت دايت .. بموسيقي هادية و كلام منحنح .. رجاء .. دور علي الطريق الصح … المنهج .

و الله أعلم .