عمرك جربت تاكل ( wasabi ) ؟!

• عمرك جربت تاكل ( wasabi ) ؟! . … بتاع أخضر فاتح كدة .. بتلاقيه دايماً مع وجبات السوشي خصوصاً .. و بعض الأكل الصيني و الياباني عموماً .. لو جربته .. حتحس إن مناخيرك إتفتح فيها خرمين جداد .. و حد ركبلك فيهم خرطوم فريون تلاجة .. يوصل علي عقلك مباشرة . .. أول مرة فحياتي جربته .. كان في فندق من الفنادق ال5 نجوم المتلمعين دول .. و كان في فوج ياباني ضيف علي الفندق .. فقرروا تغيير منيو الغدا بالكامل للأكل الياباني . و كنت فرحان إني حاجرب كل الأكلات الجديدة دي .. و حطيت كمية محترمة من البتاع الأخضر الفاتح ده فطبقي … و كنت مفكره سلطة طحينة بالنعناع والله . و خدت منه معلقة محترمة كبيرة .. علي بق واحد .. و مضغت .. … عينيا فجأة إتحولت أحمااااااااار .. و بدأت أدمع .. لا .. أعيط حرفياً .. و حسيت إن حد ركب شكمان عربية نصر من بتوع الجيش فمناخيري مباشرة .. و قاعد بيكارك . و اللي حواليا باصين ليا علي أساس إني خبير في الياباني بالكلمتين التلاتة اللي أعرفهم في اللغة .. و منتظرين مني إني أشرح لهم طعم ( سلطة الطحينة اللي بالنعناع ) اللي بيفرقع فبقي ده . … كل اللي فاكره إن أول حد من اللي كانوا معايا حاول يمد إيده علي الطبق يجرب ( سلطة الطحينة اللي بالنعناع 😂 ) دي .. إني نطيت من فوق الكرسي و مسكت إيده اللي كان غرف فيها معلقة محترمة من البتاع ده… و باصص له بعينيا اللي مليانة دموع … و إيدي التانية ماسكة مناخيري بحاول أقفلها عشان أوقف سرسوب الهوا اللي داخل علي عقلي منها … و مش عارف . … و بكل ما أوتيت من قوة كنت باحاول أقول له ( و أنا مخنف ) .. ” بلااااش ” . … … بعد المرة دي زماااان .. فاكر إن الموضوع بالنسبة ليا أصبح تحدي .. و إني ( بما إني باحب الأنيمي الياباني ) .. لازم أحب الواسابي ده .. حسيت إني لو ماحبتش البتاع ده و أدمنته .. حابقي كإني باخون حبي للأنيمي مثلاً .. … مرات عديدة بعد المرة دي طلبت فيها سوشي مخصوص .. عشان آكل الواسابي .. و كل مرة كان بيأثر عليا نفس التأثير .. كل مرة كان بييجي الراجل بتاع نفس العربية النصر .. و يركب نفس الشكمان فمناخيري 😭.. … … لحد ما في يوم من ذات الأيام … و إحنا بنفكر حنتغدي إيه .. لقيتني نفسي فيه .. لقيتني مشتاق للطعم .. للإحساس .. لقيتني عايز ( واسابي ) قبل ما أكون عايز السوشي نفسه . … … اللي حصل ده مش غريب عليا .. و جربته في حاجات كتير جداً قبل كده .. و إتكلمت و كتبت عنه فأكتر من مكان كمان .. اللي حصل ده هو ال : ( acquired taste ) . لو خدت الكلمتين الإنجليزي دول في جوجل و كتبتهم .. حيطلعلك التلات جمل التاليين اللي بيشرحوا بالظبط قصدي : An acquired taste is an appreciation for something unlikely to be enjoyed by a person who has not had substantial exposure to it. It is the opposite of innate taste, which is the appreciation for things that are enjoyable by most persons without prior exposure to them … ترجمة الكلام ده بالعربي الحلمنتيشي الفصيح هو : ال ( أكوايرد تيست ده = الطعم المكتسب يعني ) .. هو إنك تحب و تستطعم حاجة مش سهل إنك تحبها و تستطعمها غير لما تجربها .. كتير .. و تتعرض لها فترة طويلة . علي عكس ال ( innate taste = الإستطعام بالفطرة ) .. اللي هو الحاجة اللي كل الناس بتحبها و بتستطعم و تستمتع بيها بالفطرة .. و مش بتحتاج الفترة الطويلة من ال ” تدريب” علي الطعم بتاعها . … … علي مدار حياتي .. أعتقد إن المفهوم ده من أكتر الحاجات اللي ساعدتني أمتلك مهارات و أكون كويس و أنجح فمجالات معينة بفضل الله ..

خليني أشرح : … اللغة مثلاً ( الإنجليزي و غيرها ) .. كل ما أتكلم مع حد و أشرح له إني إتعلمت الإنجليزي و أتقنته كلغة باعتمد عليها إعتماد كلي فحياتي حالياً ( شغل و ترفيه و إجتماعيات كمان ) ..
و ألاقيه بيسألني عن ( أنهي كورس ) ياخده عشان يتعلم ؟ باشرح له إني ( و كتير غيري ) .. إتعلمنا الإنجليزي من الإستخدام اليومي في حياتنا . ( الأغاني اللي كنا بنسمعها , الألعاب اللي بنلعبها , الأفلام و المسلسلات , و الكتب اللي كنا بنقراها .. و ما شابه ) .. الحاجات دي ماكنتش سهلة إطلااااقاً إننا نحبها و نتعلق بيها و ندمنها … … مثلاً .. ماكنش سهل إطلاقاً إني أحمل ال7 أجزاء بتوع ( harry potter ) بالإنجليزي مثلاً سنة 2010 أو 2011 تقريباً .. و أفضل أجاهد عشان أقراهم PDF علي شاشة CRT 15 بوصة ( اللي هي شاشات الكمبيوترات القديمة اللي بضهر دي ) ..
… أينعم كنت عايز أعرف إيه اللي حيحصل في الجزء السابع قبل ما كان ينزل فيلم … بس السبب ده ماكنش كفاية إني أفضل أمقق عينيا في الشاشة عشان أقرا كل ده … … أحد أكبر الأسباب كان ال ( HYPE ) .. و الدوشة اللي كانت علي الرواية في الوقت ده علي الإنترنت بين ” الناس اللي كنت عايز أبقي وسطهم ” .. و كنت مش حابب إني أبقي مجرد واحد بيستني الأفلام عشان يفهم القصة .. … أنا كنت عايز أبقي ” COOL ” زي اللي كانوا قاريين الكتب بالإنجليزي 😄 . … … الموضوع خد وقت و مجهود … كتير … لحد ما إكتشفت عند مرحلة معينة إني باستمتع بقراءة الكتب دي .. أكتر من الفرجة علي الأفلام … لحد ما وصلت إني أستمتع بال ( acquired taste ) ده . … … السبب إني باكتب ده دلوقتي .. هو إني شايف الدوشة اللي حاصلة علي حوارات الراب فمصر .. و خصوصاً في الجيل الجديد .. .. و شايف الموضوع فعلاً واخد حجم مش صغير بينهم .. و إطلاقاً مش جاي أفتي لك و أقول لك إيه الصح و إيه الغلط .. .. و لكني بس حابب أوضح لك إن ال (إختيار ) عندك .. إنك تبقي من عشاق ال( طعم ) ده( الراب المصري ) من الموسيقي و الأغاني و الثقافة .. أو إنك ( تجبر ) نفسك حالياً علي إنك تدوق طعوم تانية .. طعوم صعب إنك تفهمها مباشرة ( موسيقات أو ثقافات تانية مثلاً ) .. طعوم صعب إنك تحبها و تتعلق بيها مباشرة ( لأنك مش حتلاقي إصحابك مهمتين بيها أو فارق معاهم ) .. … و لكن .. الطعوم التانية دي ممكن جداً تكون السبب بعد كده إنك :

• بتتكلم لغة معينة بطلاقة .. تساعدك في شغلك و حياتك و علاقاتك .
• تتعلم ثقافة معينة تخليك مش أسير حدود جغرافية .. و ماتفضلش تشتكي إنك مش عارف تسافر .
• تتعلم مهارة معينة تخليك مش قلقان في يوم إن مديرك يرفدك و مش حتعرف تشتغل إيه بعد كده . … … أنا شخصياً حاولت والله من شوية .. فتحت فيديو بتاع مروان بابلو ( أول مرة أشوفه والله ) الأخير ده .. و حاولت أشوف شوية .. ماستطعمتش .. الطعم ماعجبنيش .. بس ماقولتش عليه وحش .. لا … و لكنه طعم .. أنا باختار بنفسي إني … ماحبوش . … و الله أعلم .