في قصة قديمة مشهورة بتتقال بطرق كتير عن المجموعة اللي

في قصة قديمة مشهورة بتتقال بطرق كتير عن المجموعة اللي ” إحم ” بيحسسوا .. كل واحد منهم بيحسس علي جزء معين من شيء ما .. و بيقرر بناءاً علي خبرته الخاصة جداً .. و رؤيته المحدودة .. إيه هي الحاجة اللي هو ” إحم ” بيحسس عليها دي . واحد بيقول ده تعبان .. كان ماسك الزلومة واحد بيقول لا ده حصان .. كان ماسك البطن واحد بيقول لا ده تور .. كان ماسك الرجل . .. لكن من بعيد .. و بتجميع لكل عناصر الصورة .. بيكون واضح إنه ( فيل ) … من بعد ما تابعت اللي حصل مع ( آدم نيومان - مؤسس ويورك ) .. و الزحليقة المحترمة من تقييم يعدي ال40 مليار دولار .. لحد ما يقارب الإعلان علي الإفلاس .. ( الكلام ده كان من تلات أربع سنين ) .. كان معظم تركيزي علي ( سوفت بانك ) .. و ده للي مش عارف هو مين .. عامل زي بيومي فؤاد في الأفلام العربي حالياً .. أو حسن حسني ( الله يرحمه ) في فترة بداية الألفينات .. اللي هو أى فيلم .. لازم تلاقيه فيه .. و الفيلم اللي بيبقي فيه .. لازم ينجح ولو علي مستوي متوسط .. يعني حتي فشله بيبقي ناجح . هو كمان .. زي ( y compinator ) .. أى مصلحة بيرشق فيها بنسبة ما … ( سوفت بنك ) ده وراه باشمهندس إسمه ( ماسايوشي سان ) .. لسة بادور وراه خلال اليومين دول .. و باقرا كتب مختلفة عنه من حواليه .. مش عنه مباشرة ( لنفس السبب اللي ضربت بيه المثال في أول البوست ) . … من ضمن الكتب اللي بتشرح جانب من جوانب باشمهندس ماسايوشي .. هو الكتاب ده عن ( علي بابا ) . … كان عندي شوية معلومات كتير ( بطبيعة إن ده شغلي ) عن علي بابا من قبل ما أسمع الكتاب ده طبعاً .. و لكني إكتشفت إني فعلاً حاجات كتير كنت مش ضاممها للصورة اللي مكونها ذهني عنه . و من ضمن أكبر الحاجات دي ( علي باي - alipay ) .. و دي الذراع المالي حالياً ( المتحكم في معظم عمليات التحويل المالية ) اللي بتحصل علي علي بابا و تاو باو .. و باقي الأسرة الكريمة . و بالتالي جزء محترم من تركيزي خلال الفترة القادمة حيبقي عليه برضو ..