أنا إتضايقت .. قرأت بعض التعليقات علي البوست اللي فات ..

أنا إتضايقت .. قرأت بعض التعليقات علي البوست اللي فات .. و الموضوع اثّر عليا فعلاً .. ف قررت دلوقتي إني حاكتب بوست سريع جداً .. و قصير جداً جداً جداً .. أوضّح فيه حاعمل إيه .. و بعدين حاخد كام يوم بعيد عن الإنترنت و التكنولوجيا بالكامل لحد ما أهدي شوية ..

حاستلف يخت من صديقي المٌغرم باليخوت .. و حاسيب موبايلي و اللابتوب و الأتاري و الآلة الحاسبة .. مش واخدهم معايا ...

و بعدين حاطلع باليخت مباشرة من ترعة المحمودية في دمنهور عند المستشفي .. و حافضل دايس بنزين عالرابع بغضب .. و مش حاشيل رجلي من عالدواسة غير في نص المحيط الأطلنطي تقريباً .. قبل رست circle K بشوية ..

و لكن .. كالمعتاد أكيد حانسي مفتاح الجزيرة بتاعتي ..

و دلوقتي أنا كده محتاج أرجع من وسط المٌحيط تاني علي البيت ..

و لكن ثانية واحدة ..

أنا ماعيش موبايل .. و اليخت مافيش فيه جوجل بلاي ولا جوجل مابس ولا جي بي إس ..

أعمل إيه ؟!

أسرع حل هو إني أطلب من أى سواق توكتوك من اللي رايحين جايين في المٌحيط إنه يدلّني عالطريق ..

لكني متخيل ردّه .. خصوصاً إنه أكيد متابعني و متابع بوستاتي القصيرة اللي باكتبها .. و حيغلطّني و يقول :

" ما هو برضو إنت بتكتب لوغاريتمات ماحدش بيفهمها يا جدع "

ففي الحالة دي حلاقي إني مٌضطر أشرح له :

" إنت تعرف أساساً يعني إيه لوغاريتمات ؟! .. و جات منين ؟! .. و ليه ؟! " 😅 .

بص يا صاحبي يا اللي شغّال علي توكتوك خط أيرلندا نيويورك ..

اللي حاقوله لك ده .. تقدر تعتبره الجزء اللي بعد قصة توماس يونج .. في القصة الضخمة اللي باكتبها بقالي أكتر من شهر و نص دلوقتي ( بمٌعدل بوست يومياً تقريباً ) .. و إسمها ( سيليكون ) .

و في الجٌزء ده بقي ( و الأجزاء اللي جاية ) .. أنا قررت إني أشرح لك :

الرياضة 😅 .

ليه ؟!

لأن عشان نتحرّك من اللحظة اللي راجل فرنساوي طيّب إسمه ( فريزنل ) .. وقف في أوضة قّدّام شوية فتوات و فطاحل الرياضيات حرفياً .. زي : ( لابلاس , بواسون , فوريير ) .. و قال لهم بلهجة فرنسية رقيقة :

" يا أوضة مافيش فيها حد بيفهم غيري .. الضوء موجات زي ما ( توماس يونج ) قال . "

لااااااااازم تفهم .. هما مين فتوّات و فطاحل الرياضيات دول ..

يعني ضربوا مين ولّا غلبوا مين في البلايستيشن عشان يتسمّوا ( فطاحل الرياضيات ) ..

و الأهم :

إمتي بالظبط ال " رياضيات " بقت صعبة بالمنظر ده ؟!

الكلام بجد شوية بقي فعلاً و بدون قلش رخيص هنا :

عايز تفهم ليه أوروبا سيطرت علي العالم ؟!

عايز تفهم ليه بريطانيا هي اللي فجأة و بين يوم و ليلة .. إتحولت من دولة بتكح تراب .. لإمبراطورية لا تغيب عنها الشمس ؟!

عايز تفهم ليه الإمبراطورية الإسلامية .. شافت كل اللي بيحصل ده .. و فضلوا مستنيين 200 سنة كاملين قبل ما يكتشفوا إن العالم كله سبقهم ؟!

لازم تفهم هنا إن الرياضة كانت أحد أهم أجزاء الإجابة دي علي الإطلاق ..

و لازم تسأل سؤال مهم :

إنت درست ال ( لوغاريتمات ) بالذات ... إزاي ؟!

ليه هنا بقي بالأخص باركز علي ال ( لوغاريتمات ) ؟!

لأن ..

لو العلم في العقل البشري .. زي مبني من طوب .. لازم كل طوبة تبقي ثابتة كويس جداً .. قبل ما الطوبة اللي فوقها تتحط و تحمّل وزن فوقها .

عند مرحلة معينة في حياة الطالب .. فجأة بيلاقي عليه في المنهج حاجة إسمها ( لوغاريتمات ) !!! ..

أياً كان اللغة اللي بتدرسها بيها .. ناس كتير عند المرحلة دي بالذات .. بيتكسر جواها المبني ده ..

لأن :

طوبة العلم عشان تكون ثابتة و قوية و راسخة .. لازم تعشّق في ال ( intuition = حدس الإنسان ) ..

اللي هو تبقي قادر تتخيلها .. تفهمها بالفطرة ..

زي مثلاً ( برتقانتين + 3 برتقانات = 7 برتقانات ) .. دي معادلة سهلة و واضحة أى طفل عنده 4 سنين يعرفها .

لكن .. لما أقول لك إن جزء من مٌعادلة إنتشار الموجة الكهرومغناطيسية في الفراغ هو ( e مرفوعة لأس i مضروب في k مضروب في ( r+s ) ) 🙂🙂 .

إنت أكيد حتاخد التوكتوك و تهرب .. قبل حتي ما أكمل لك و أقول لك إن كل ده بيتعمل عليه عمليتين تكامل فنفس الوقت 🤣😅 .

لأن كل اللي حصل ده .. مافيش له أى علاقة بفطرتك أو حدسك أو فهمك الطبيعي إطلاقاً ..

طيب .. إيه القصة إذن ؟!

مين يعني صحي من النوم الصٌبح .. و بعد ما عمل مج الفرابتشينو بتاعه .. فتح الفيسبوك و قرر يكتب بوست يخترع فيه علم جديد إسمه ( لوغاريتمات ) ؟!

الإجابة بإختصار شديد جداً : ( جون نابيير = John Napier ) ..

ده راجل باشا إبن باشا ( حرفياً .. أرستقراطي أباً عن جد ) .. إتولد سنة 1550 .. و مات 1617 ..

و لأنه كان غني فحت .. و عنده أراضي و فدادين و أطيان ..

ف كان ( فاضي ) ماعندوش شغل الصبح بدري و مواصلات و مين اللي حيحاسب علي الفطار النهاردة .. ..

و لكنه كان دماغه ( نضيفة ) .. من النوعية اللي هو مايهداش لمجرد إنه معاه فلوس يصرفها علي ملذاته و خلاص ..

فبالتالي .. تخيّل دماغ زي ده .. و عايش لوحده .. و محتاج يوزّع الإيراد علي الفلاحين اللي بيشتغلوا في أراضيه .. أو حتي يشتري لهم فطار ..

فبالتالي مثلاً .. عندك 3591 فلّاح .. كل واحد فيهم عايز 2 فول مخصوص الواحد ب 2 جنيه 75 قرش .. و 2 طعمية بتنجان الواحد ب 17 جنيه و ربع ..

يبقي إنت محتاج تدّي كام للكاشير ؟!

و بعدين تخيّل و هو راجع بالميكروباص .. حيضطر ياخد كام كرسي زيادة عشان الساندوتشات .. و أجرة الميكروباص من عند بتاع الفول لحد القلعة بتاعته ب 8 جنيه و ربع ..

و لو حيزود مخلل ؟!

ده بالمناسبة كان الدافع الحقيقي فعلاً عند ( جون نابيير ) ..

مش حسابات ( الفول و الفلافل ) .. لا .. و لكن ( الحسابات المعقدة دي اللي بتتطلّب ضرب 5 أرقام في 4 أرقام .. و بسرعة .. جداً ) .

أشهر الأمثلة علي النوعية دي من الحسابات في وقت نابيير هو :

حسابات البحّارة في السٌفن فوسط المحيط .... إزاي ؟؟!

خٌد نفس عميق هنا عشان حاخدك في غٌطس سريع فحت في علم ال( astronomy ) ..

تخيّل مثلاً إنك علي جزيرة بتاعتك فوسط المحيط .. و قضيت سنين بتتأمل في السما و تفكّر في وسامتي الطاغية ..

لحد ما إكتشفت إن في 3 نجوم دايماً ثابتين فنفس المكان ..

لما بتبقي باصص للشجرة المٌفضلة بتاعتك فوسط الجزيرة مثلاً .. دايماً و أبداً في نجم معين بيبقي في قفاك مباشرة .. و نجم تاني علي لمينك تماماً .. و نجم تالت علي شمالك بالظبط ..

عشان مانتوهش حنسمّي النجم اللي في قفاك ده ( طلعت ) .. و اللي علي يمينك ( فتحي ) .. و اللي علي شمالك ( رحاب ) .

و طلعت في قفاك مباشرة .. و لكنك بترفع عينك عن الأرض بزاوية 40 درجة مثلاً عشان تبص له مباشرة .

تخيل بقي إنك في يوم .. كتبت بوستات قصيرة زيي .. و التعليقات كانت أغلبها شتيمة .. ف زعلت و خدت بعضك و طلعت في المحيط برضو .. و بعدين حبّيت ترجع .. تعمل إيه ؟!

ببساطة .. حتفتكر .. إنك حتبص في السما .. و حتخلّي طلعت في قفاك .. و فتحي علي يمينك .. و رحاب علي شمالك .. و تسوق طوّالي .. فأكيد حتوصل للشجرة المٌفضلة بتاعتك .. صح ؟!

لكن .. بعد وقت قد إيه ؟!

ف تفتكر ... إنك و إنت عالجزيرة .. طلعت بيحتاج إنك ترفع راسك عن الأرض بزاوية 40 درجة تقريباً ..

لكنك و إنت فوسط المحيط .. أخدت بالك إنك إحتجت ترفع رقبتك و تبص لفوق بزاوية 70 درجة مثلاً .. عشان تشوف طلعت مباشرة .

ده معناه إيه ؟!

معناه إنك محتاج تفضل سايق طوالي .. لحد ما رقبتك تتعدل و إنت باصص علي طلعت .. من زاوية 70 درجة .. لحد ما تنزل لحد زاوية 40 درجة .. صح ؟!

و إنت بتحسب كل الحسابات دي فعقلك .. حتلاقي سوّاق توكتوك معدّي جنبك و يقول لك :

إن كل الحسابات دي .. عملها البشر منذ بداية التاريخ ..

بل إن الإمبراطورية الإسلامية .. أبدعت في الحسابات دي بالذات .. لدرجة إنهم من أى مكان أصبحوا يعرفوا يعملوا حسابات فلكية ( Astronomy ) عشان يعرفوا إتجاه القبلة فين .

يعني مثلاً ..

الحسبة اللي إنت عايز تحسبها دي .. اللي هي ( المسافة بين لما رقبتك تبقي باصّة لفوق بزاوية 70 ) .. و بعدين لما تنزّلها ل زاوية 40 .. تساوي كام ؟!

الحسبة دي تقدر تتخيلها ك مثلثين .. و إنت عايز تحسب أطوالهم .. صح ؟

المثلث ده بيبقي عامل زي القوس كده لما تشد ( الوتر بتاعه ) عشان ترشق سهم في ضهر صاحبك .. صح ؟!

الوتر ده باللغة السنسكريتية إسمه ( جيفا = jiva ) ..

السنسكريتية دي أحد اللغات اللي تم إشتقاق بعض اللغات الهندية منها ..

عالم هندي بقي عمل شوية الحسابات دي .. و كتب بوستات عنها زمان ..

راح واخدها عالم مسلم و طوّر عليها .. و راح كاتب الكلمة بالفرانكو 🤣 زي ما أنا كتبتها فوق كده ( جيفا ) ..

عالم أوروبي بيتكلم عربي مكسر .. سمع الكلمة في بودكاست .. فكّر إنها ( جيب = جيب بنطلون يعني ) .. راح مترجمها حرفياً ل ( sinus ) ..

( أى حد عنده جيوب أنفية .. عارف الترجمة دي .. جيب يعني sinus ) ..

و دي يا حاج .. هي بداية علم ( حساب المثلثات ) بالكاااااااااااااامل ..

أصبحت المسميات بالعربي ( جيب , جيب تمام , ظل ) .

و بالإنجليزي (sin = sinus) , ( cosin = complementary sinus ) و ( tangent = يعني ملامس ) ..

و العلماء المسلمين طوروا حاجة إسمه ( إسطرلاب ) بناءاً علي كل العلوم دي..

الكلمة دي كانت أحد الكلمات اللي فزت بيها شخصياً بمسابقة أيام ما كنت ففريق المكتبة في تالتة إعدادي 🤣 لأني كنت عارف معناها ..

لكن ماعرفتش أصلها غير لما كبرت و قريت الكتب اللي شرحت تاريخ العلوم دي كلها ( جزء من الكتب دي في البوست التعريفي في البروفايل ) .

إسطرلاب .. لأن العلماء المسلمين ترجموا كل كتب اليونانيين القدامي .. و اللي عندهم ( أسترو = نجم ) .. و ( لامب = يمسك , يقفش ) ..

فبالتالي .. ( أسترولاب = star catcher = اللي بيقفّش في النجوم ولامؤاخذة ) ..

المهم ..

بناءاً علي كل الكلام اللي فوق ده .. سوّاق التوكتوك اللي شايفك باصص في السما ل ( طلعت ) بزاوية 70 درجة .. و شايفك عايز ترجع تبص ل ( طلعت ) بزاوية 40 درجة .. حيقول لك :

أساحبي .. بحسبة بسيطة إنك كده محتاج تسوق 1800 ميل بحري .. طوّالي كده و ماتحودش لمين ولا شمال ..

الحسبة دي منين ؟!

لأن الناس اللي قبلنا كلهم كانوا خلاص عارفين بالحساب إن الأرض كروية ( و ماكنش عندهم لجان إلكترونية زي دلوقتي ) .. و إن الدايرة ( مقطع الكورة ) 360 درجة .. و لو قسّمت محيط الأرض ل 360 درجة .. حتعرف إن كل درجة فيهم بتساوي 60 ميل تقريباً .

و بالتالي .. في المثلث اللي رؤوسه هي ( راسك , طلعت , و الزاوية القايمة اللي نازلة من طلعت علي الخط المستقيم بينك و بين الأرض تحته = الأفق يعني ) .. يبقي طلعت حيغير نظرته لك ب زاوية 30 درجة .. يعني إذن إنت حتمشي مسافة تساوي ( 30 * 60 = 1800 ميل بحري ) .

لكن ..

هل الحياة زي ما إنت تعرفها .. بالبساطة دي ؟!

هل عمرك رحت حاسبت علي ساندوتشات فول أو كرسي فميكروباص .. و لقيت العملية سهلة و مافيش باقي و حسابات معقربة .. و خٌد 3 من 10 و هات الباقي .. يا حرامي ؟!

بالظبط ..

علم الفلك و الحسابات البحرية ( astronomy ) .. كان بيتطلّب إن ال ( ملّاح ) المااااااااااهر جداً .. يفضل يعمل حسابات لمدة أيام حرفياً ..

أيام في المحيط ..

بأكل محدود جداً .. و بحّارة مستعجلين عايزين يرجعوا لزوجاتهم .. أو أخبار حروب أو معارك .. لو إتأخرت تتغير مصائر إمبراطوريات كاملة ..

متخيل بقي كل الضغط ده .. و السفينة بتتهز بيك كمان .. و إنت مطلوب منك تضرب ( 246426 في 42537321 ) ؟! ..

و إيه .. لو غلطت غلطة واحدة بس .. ممكن تكون النتيجة إنكوا تتسوحوا و توصلوا سواحل أفريقيا بدل أوروبا مثلاً ( و حصل كتييييييييير جداً ) .

فبالتالي ..

بيقعد عمو ( جون نابيير ) .. و يلعب في الرملة ..

بيرسم خط فيه ... ( 0 , 1 , 2 , 3 , 4 , 5 , 6 , 7 , 8 , 9 , 10 , ... )

و يرسم خط تحته ( 1 , 2 , 4 , 8 , 16 , 32 , 64 , 128 , 256 , 512 , 1024 .... )

و بعدين بيلاحظ حاجة عجيبة !!!!

في الخط اللي تحت .. 16 .. و الرقم اللي فوقها بالظبط هو : 4 ..

و في الخط اللي تحت برضو .. 64 .. و الرقم اللي فوقها بالظبط هو : 6 ..

و بعدين بيكتشف إن :

لما بيحاول يضرب ( 16 في 64 ) .. النتيجة بتطلع ( 1024 ) !!!!!

بيدوّر في الخطّين اللي رسمهم .. بيكتشف إن 1024 .. فوقها بالظبط ( 10 ) .

ال ( 10 ) اللي هي ( حاصل جمع 4 + 6 ) .

متخيل ده معناه إيه ؟!!!!!

إن ( جون نابيير ) .. لأول مرة في التاريخ .. إخترع طريقة يحوّل بيها عمليات الضرب المكلكعة ( رقمين في رقمين ) ... ل ( عملية جمع سهلة يقدر يعملها أى طالب في 9 جامعة ) !!! ..

متخيل ده معناه إيه بجد ؟!!!!!!!!!!!!!!!!

إن الحسابات المعقدة الصعبة .. ال ( أريثماتيكس = arithmetic ) .. لأول مرة حيبقي لها ( معني = لوجو = logo = لوغ ) في الحياة ..

العلم ده ماحدش أكتشفه قبل كده .. و محتاجين نسمّيه قبل ما يتسرق ..

نسمّيه إيه ؟!

أنا قررت .. حنسمّيه ( أريثمالوج ) .. إيه رأيك ؟! .. إسم حلو و كاتشي و يشد كده .. و ينفع نكبره ك براند شنط حريمي و نكسب علي فكره ..

عند المرحلة دي .. صديقي سوّاق توكتوك خط نيويوك أيرلندا .. كان زهق من كلامي .. و قرر يلحق يوصل الراكب اللي كان قاعد وراه ..

و أنا قررت إن الغضب وحش برضو .. و إن أكيد الناس اللي كتبت إن بوستاتي طويلة كانوا بيهزروا و بيكتبوا كده من ورا قلبهم 🤣.. و إنهم بس بيقولوا كده عشان بوستاتي قصيرة جداً ..

فبالتالي ..

الجزء القادم إن شاء الله .. حاستنّي صديقي سواق التوكتوك و هو ماشي علي نفس الطريق .. و أكمل القصة ..

قصة ال : رياضة اللي تقدر تفهم بيها المعادلات بتاعت الموجات الكهرومغناطيسية .. إن شاء الله .

و الله أعلم .