عن ( الهجّاص .. الهرّاي .. الهبّيد .. الفاسد .. المٌدلّس .. المٌهرطق .. القمّوصة ..

عن ( الهجّاص .. الهرّاي .. الهبّيد .. الفاسد .. المٌدلّس .. المٌهرطق .. القمّوصة .. ال #$$#@&$ .. تيييييييييييييييييييييييييييييت ) ..

إسحاق نيوتن 🙂 .

و قبل ما حتي تفكّر تدخل ليا في التعليقات و تدافع عنه .. لااااااااااا ..

مش أنا اللي قلت عليه كده ..

و لكن .. ده أغلب الناس الجامدين أوي هما اللي قالوا كل الكلام ده عليه ..

الناس الكٌبّارة .. العلماء الأفاضل .. و رجال الدين البريطانيين اللي فاهمين الدين أكيد أحسن من نيوتن ألف مرة ..

و بعدين ده لسّة عيّل صغير ( نيوتن يعني ) .. عنده 29 سنة بس ..

يعرف إيه هو العيّل ده .. مقارنة بالناس اللي شعرها شاب و عندهم 40 و 50 سنة خبرة في مجالاتهم المٌختلفة ..

بٌص .. أقول لك ؟! .. تعالي ندوّر علي بروفايله و نعمل عليه حملة و نطلّعه مسرح و نقفل له أكاونتاته .

😅😅😅😅

اللي فات ده كله بقي .. مش بس مٌقدمة البوست ده ... و لكن تقدر تعتبره مٌقدمة أغلب المرحلة القادمة في القصة العملاقة اللي باكتبها بقالي فترة دي تحت إسم ( سيليكون ) ..

القصة اللي إبتدت ب تساؤل ( هو ليه كوريا الجنوبية مثلاً عندهم سامسونج و LG و شركات تكنولوجية مٌتقدمة ؟! .. و إحنا لا ؟! ) .

و اللي كان نتيجة كده إني علي مدار الشهرين اللي فاتوا تقريباً .. واخد توكتوك .. و راجع بيه في الزمن في رحلة حلمنتيشية بتتبّع بداية الخيط ..

بداية خيط العلوم و الفيزياء و الهندسة و الرياضة و التكنولوجيا .. اللي بتكوّن شكل عالمنا الحالي .

القصة دي عشان تفهمها .. و تفهم أنا باكتبها إزاي و ليه :

1- هي مٌش مرجع تاريخي بأى شكل من الأشكال .. يعني مثلاً أنا حاقول لك إن نيوتن كان له حسابات علي الفيسبوك سنة 1660 ... و ده بكل تأكيد مزحة و قلشة رخيصة جداً .. لأن أى حد فاهم كويس .. أكيد عارف إن نيوتن كان بيستخدم تويتر فقط .. و فبعض الأحيان إنستاجرام🙂 .

2- أنا إطلااااااااقاً مايهمنيش ( إيه اللي حصل ) .. مقارنة ب ( حصل إزاي .. و ليه .. و إيه اللي حصل لما ده حصل ) ..

يعني : أنا ما زلت فاكر كويس تجربة ال ( منشور = Prism ) اللي خدناها في التيرم الأول في أولي ثانوي مدرسة دمنهور العسكرية بنين 😁 .

و لو إنت كنت تلميذ شاطر ... أكيد لسة فاكر التجربة .. و عارف إنك لما تعدّي الضوء الأبيض من خلال منشور زٌجاجي .. بيطلع لك الناحية التانية ألوان قوس القزح ( rainbow ) ..

و أيام ما أنا كنت في أولي ثانوي ( 2003 ) .. كان لسة الألوان دي بريئة من التٌهم المٌخلّة بالشرف المشهورة بتاعت دلوقتي 🤣 .

فبالتالي .. أنا مش جاي أعلّمك تعيد التجربة إزاي ..

و لكن .. اللي يهمني هو : لما نيوتن عمل التجربة دي .. عملها ليه ؟! .. و العالم حصل في إيه بناءاً علي كده ؟!

لأن .. فوجهة نظري .. دي هي الطريقة الأمثل إنك ( كإنسان عايش معانا عالكوكب حالياً ) .. تفكّر في حاجة جديدة بنفسك ... مش تفضل مفكّر إن العلم عبارة عن كهنوت .

المهم ..

عايزك تتخيل بقي شكل العالم سنة 1642..

الناس في إيطاليا بيحتفلوا ب وفاة ( جاليليو جاليليي ) .. المٌهرطق عدو الدين اللي الكنيسة حبسته في بيته لحد ما مات .. لأنه نشر كتابه الفاسق اللي بيقول فيه ( إن الكواكب و الأرض بتدور حوالين الشمس .. مش إن الأرض هي مركز الكون ) ..

و فنفس ذات السنة .. بيتولد ( نيوتن ) ..

بالنسبة ليا شخصياً .. نيوتن بيٌعتبر جزء من إجابة أحد أكثر الأسئلة الفلسفية تعقيداً و هو :

( إيه هو الخير ؟! .. و إيه هو الشر ؟! ) .

عشان تفهم ليه أنا باعتبر نيوتن جزء من الإجابة ... لازم تعرف إني كنت لحد بدايات عيشرينياتي تقريباً .. باشوف العالم ك ( أبيض و أسود ) ..

خير و شر ..

حلو و وحش ..

عقلي ماكنش بيستوعب أى درجة من درجات الرمادي بينهم .. ولا كنت باقدر أفهم حرية الحركة بينهم ..

فعقلي .. الحياة كانت بنفس ألوان رقعة الشطرنج .. و الإنسان بيتحرك بين الأبيض و الأسود .. و بالتالي ... و علي حسب أنا بالعب في أنهي جيش .. كنت باحكم علي اللي حواليا من المنظور ده ..

نيوتن إتولد في بيت فقيييييييير جداً ..

إتولد ضعيف جداً .. بدري عن معاد ولادته .. أبوه مات قبل ولادته ب كام شهر ..

أمه ؟! .. أمه ( هاننا ) كانت ( ولامؤاخذة ) لسة حلوة و شابة 😅..

ف لمّا وصل نيوتن ل سن 3 سنين .. أمه جالها عريس غني و متريّش .. لكن كان له شرط و هو ( إبنك مايجيش معاكي ) ..

و الست قبلت ( و ماتقدرش إطلاااااااقاً تغلّطها ) .. لاحظ إن الكلام ده سنة 1645 .. يعني كان لسة مافيش كل فرص العمل من البيت بالذكاء الإصطناعي بتاعت دلوقتي 🤣 .

كان إن يبقي في بنت أو ست حلوة .. لوحدها .. و فقيرة و ضعيفة .. ده كان معناه حياة من المعاناة و الخطر الدائم .

ف الست ( هاننا ) بتروح تتجوز .. و بتسيب إسحاق الصغنن مع جده و جدته ..

و السبب في إن إحنا دلوقتي عارفين كل الكلام ده عن تفاصيل حياة نيوتن و ذكرياته .. إنه كان زيي 😅( بيكتب ) .. بيدوّن كل حاجة ..

و مٌذكراته من مرحلة المراهقة في حياته بتشرح تفصيلياً إزاي إنه كان بيفكّر طول الوقت في إنه يروح يولّع في بيت أمه و جوز أمه .

لكن ..

بيروح المدرسة .. و كالمعتاد .. بيتم التنمّر عليه .. و علي فقره .. و ضعفه ..

لكنه ماكنش بيسكت .. و يمكن دي أحد أشهر الحاجات عنه علي مدار حياته ..

إنه كان ( برّاوي 😅 - نرفوذ - بيغضب بسهولة جداً ) ..

عيّل زميله ضربه في بطنه مثلاً .. راح رايح حرفياً ممرمغ دماغه في الأرض .. و بعدين ماكتفاش ب ده .. و قرر يعلّم عليه في الدراسة كمان .. و ده سبب إنه ركّز شوية في المدرسة و طلع الأول عليهم .

و بعدين راح الكلٌية ..

و لكن .. نتيجة غضبه و كراهيته الواضحة في التعامل مع أمه .. بالرغم من إنها كانت دلوقتي متريّشة و تقدر تطلب من جوزها يبعت لها فلوس إنستاباي تدفع مصاريف الكلية بتاعت إسحاق ..

إلا إن إسحاق بيشتمها .. و الموضوع بيبوظ .. و بيروح الكلية ك ( خدّام ) .. يخدّم علي زمايله و ينضّف لهم أوضهم حرفياً .. مقابل إنه يدرس .

مٌتخيل البطارية النفسية بتاعت شخصية زي دي بتتشحن إزاي ؟!

كراهية و رفض من المٌجتمع و للمجتمع .. و إحساس دفين ضخم بالغضب من الدونية .. و فنفس الوقت .. إنه ذكي للدرجة اللي تمكنه يكون أفضل منهم جميعاً ..

و بعدين كورونا بتيجي و العالم بيقفل و الكليات بتقول للطلبة كله علي بيته و المحاضرات حتبقي علي زووم بقي 🤣🤣

طبعاً ماكنتش كورونا .. و لكن كان ( الطاعون ) و العياذ بالله ..

سنة 1665 ل 1666 .. أشهر سنة في تاريخ نيوتن بالكامل ..

كانت أوروبا بالكامل ضربها الطاعون .. و إتقفلت الكليات و المدارس و المصالح الحكومية ..

و بيرجع نيوتن ل بيت جده و جدته ( أحد أكتر الأماكن اللي بيكرهها في حياته ) ..

و يقفل علي نفسه ..

في خلال 18 شهر .. سنة و نصف فقط ..

نيوتن اللي كان عنده 22 سنة في الوقت ده .. بيقفل علي نفسه .. و يكتئب ( أو الناس تظن إنه مكتئب ) .. و يفضلوا يشتكوا إنه مابيكلمش حد .. مابيخرجش من أوضته إلا للشديد القوي .. ولا بينزل يقعد علي قهوة .. ولا بيروح الساحل مع إصحابه ..

و بعد ال 18 شهر دول .. نيوتن بيطلع من عٌزلته ..

بعد ما إكتشف 3 حاجات أساسيين :

1- قوانين الجاذبية ( اللي هي إحنا بعد كده عرفناها بإسم معادلات نيوتن التلاتة ) .. و اللي هي قصة التٌفاحة المشهورة ( اللي غالباً مش حقيقية 😅 ) .

2- و عشان يوصف قوانين الجاذبية دي ب شكل رياضي حسابي .. بيخترع لغة رياضة جديدة تماماً .. و يسمّيها ( تغير و سريان = Fluxions ) .. اللي هي بعد كده إحنا بنعرفها بإسم ( تفاضل و تكامل ) .

3- بيعمل التجربة .. اللي بتغير شكل العالم بالكامل ..

بيطلب إتنين منشور زٌجاج ( Prism ) من أمازون .. و بيبدأ الأول يكرر أحد أشهر التجارب في التاريخ في الوقت ده .. إنه :

يعدّي الضوء الأبيض النقي الطاهر .. من خلال منشور زٌجاجي .. فيتلوّث الضوء الأبيض الطاهر ده .. بالزٌجاج اللي من الرملة الأرضي المتوسخة ..

و تكون النتيجة هي :

إن الضوء ينقسم ل 7 ألوان قوس القزح .

و لكن .. نيوتن كان عايز يشوف ( آخرة الوساخة إيه )🤣🤣 ..

ف قرر إنه يغطّي باقي الألوان .. و يسيب اللون الأحمر ( أول لون في قوس القزح ) ..

و يحاول يعدّيه من خلال المنشور التاني .. و يشوف :

حيتوسّخ لألوان شكلها إيه ؟!

و اللي بيكتشفه !! .. إن الأحمر بيعدّي من المنشور التاني .. و يطلع أحمر عادي خالص !!

نيوتن بيبدأ يشك في حاجة ..

و بيقرر يجرّب حاجة جديدة ..

و بيروح جايب المنشور الأول .. و يخلّيه ( يوسّخ ) الضوء الطاهر النقي .. و يطلّعه علي هيئة ال 7 ألوان بتوع قوس القزح ..

و لكنه بيجيب بعد كده المنشور التاني .. و يخلّي ال 7 ألوان الوسخين دول .. يعدّوا من خلاله ..

و اللي بيكتشفه إن : الضوء طلع من الناحية التانية أبيض طاهر نقي نضيف !!!!!! ..

إنت فاهم ده معناه إيه ؟!!!

معناه حاجة من إتنين مالهومش تالت :

إما إن المنشور التاني.. كان بيستخدم مسحوق غسيل ألوان .. و قدر ينضّف الضوء المتوسّخ ده .. و يرجعه تاني أبيض 🤣🤣 ..

أو إن ( و ده الإحتمال الأبعد ) :

إن الضوء أساساً أساساً .. كان متركّب من الألوان ال7 دول .. إن المنشور .. بيقدر يفكك الضوء لألوانه ال7 ... و يقدر يركبهم تاني فبعض !!!!!

لكن ... لكن ده كده خطر جداً جداً جداً ..

لأن :

الضوء .. الضوء الأبيض .. أحد أشهر الحاجات اللي الكنيسة في الوقت ده بتعتبره هو علامة الدين و التديّن ..

معني كده إنه عبارة عن ( ألوان متركبة في بعضها ) .. مش ( أبيض نقي طاهر ) زي ما الكنيسة كانت بتقول !!

و ده كمان مصيبة كبيرة جداً ..

لأن :

نيوتن أساساً كان بيكتب بوستات ( و يعملها برايفت ) عن إنه مٌختلف مع أغلب أفكار الكنيسة في الوقت ده ..

نيوتن كان مٌتدين جداً .. جداً .. لأقصي درجة ..

لدرجة إنه فعلاً يٌقال عنه إنه ( كان بيكتب في الدين 80% .. و يكتب في الحاجات التانية زي الفيزياء و الرياضة 20% بس 😅 ) ..

لكنه .. لكنه كانت أغلب كتاباته عن :

إنه مش مقتنع بأغلب أفكار الكنيسة .. و علي رأسهم ( فكرة التثليث ) .. و شايف إنه سيدنا ( عيسي ) عليه السلام .. كان مٌجرد نبي مخلوق .. مش إله .

السنة ( 1665 ل 1666 ) في تاريخ نيوتن .. بتتسمّي : سنة العجائب .

و ده لأن ال3 إكتشافات دول :

( التفاضل و التكامل - قوانين الجاذبية و الحركة - طبيعة الضوء الأبيض ) .

غيروا منظر الحياة بالكامل حرفياً بعد كده ..

لكن .. زي ما شرحت في عنوان البوست فوق ..

تخيل ..

تخيل شاب عنده 29 سنة ( لأن نيوتن فضل خايف ينشر إكتشافاته دي لمدة 6 سنين ) ..

شاب لسة يادوب متخرّج من كام سنة .. و إتعين مٌعيد و مٌدرّس في المعهد الملكي ..

أينعم هو ذكي .. أينعم هو بني تيليسكوب جامد ماحصلش ..

لكن ..

تخيل ..

العالم إزاي حيستقبل الهرطقة اللي هو بيهرطقها دي ؟!

التفاصيل .. و اللي حصل بعد كده .. في الأجزاء القادمة إن شاء الله .. لأني لازم أنزل دلوقتي .. و البوست طوّل جداً .. جداً .. جداً ..

و الله أعلم .