عشان تفهم بقي المغناطيس زي ما الناس كانوا فاهمينه زماااااااااان .. سنة 1850 ..

إرجع هات كٌباية الشاي اللي إحنا حاطينها في التلاجة بقالها بوستين تقريباً دي 🤣 ..

شربتها خلاص ؟! .. مش مشكلة .. هات حلّة شاي كبيرة .. كده كده إحنا عايزين نفوّق 😅 .

إملا الحلّة الكبيرة دي مياة ..

و تعالي في نص الحلّة بالظبط .. و إبدأ حرّك معلقة عاديّة خالص حوالين نفسها .. بسرعة شوية ..

تدريجياً .. حتلاقي دوامة بدأت تتكوّن حوالين المعلقة دي .. و بتكبر و بتكبر .. لحد ما بتوصل لحد جدران الحلّة ..

و كل المياة اللي في الحلة حتبقي بتدور بشكل دوّامي حوالين المعلقة ..

المياة شفّافة ..

ف عشان أخليك تاخد بالك من حاجة مٌعينة .. هات ورقة نعناع ( أو فلية .. أو ملوخية .. هات أى حاجة مش فارقة ) .. و سقّطها في عمق المياة بالقرب من جدار الحلة .

شايف إيه اللي بيحصل ؟!

ورقة النعناع بدأت تتحرك في شكل دائري مع المياه طبعاً .. و لكنه مش دائري بس ... لا ... ده ( دوّامي ) ..

يعني تدريجياً تدريجياً بتقرّب من مركز الدوامة ..

بتقرب من المعلقة اللي إنت مابطلتش لف فيها من أول البوست ..

لحد ما حتلاقي ورقة النعناع دي أصبحت عايشة فأقرب و أصغر دايرة حوالين المعلقة .

و سألتك من بوستين فاتوا ( اللي هو عدد إتنين بوست .. مش عدد إتنين بوسة ولامؤاخذة 🤣) ..

هل معني كده .. إن المعلقة بتجذب ورقة النعناع ؟!

الإجابة : بكل تأكيد .. لا .

إنت لو طلّعت المعلقة من الحلة و سبتها علي الرٌخامة جنب الحوض شوية .. مش بترجع تلاقيها متغطية بورق النعناع أكيد ..

و لكن ..

لمّا ال ( مجال = عالم الحلة ) المٌحيط بالمعلقة .. تم التأثير عليه بشكل خارجي مٌعين .. أثّر علي باقي العناصر الموجودة في الحلة ( ورق النعناع ) .. و بالتالي .. إنجذبت ورقة النعناع في إتجاه المعلقة بشكل دوراني دوّامي .

زي ما شرحت لك في البوست اللي فات ..

سنة 1850 .. كان آخر العلم الحديث هو ( فيزياء و هندسة الموائع = Fluid Dynamics ) ..

اللي هو لما كان أب عايز يأمّن مٌستقبل عياله زي دلوقتي مثلاً .. فيوديهم معهد ياخدوا كورسات ذكاء إصطناعي مثلاً 😅..

زماااااان .. كان الأب بيوّدي عياله يتعلموا كورسات ( فيزياء و هندسة موائع ) .

و ( جيمس كلارك ماكسويل ) .. عاش في العالم ده ..

لو تتبّعت قصة حياته .. حتكتشف إنه كان بيتم التنمّر عليه فطفولته و العيال تضايقه في المدرسة و المدرّسين متضايقين منه و شايفينه بطئ و مٌختلف ( مش مٌتخلّف 😅) .

مش لأنه كان فقير .. ولا ضعيف .. ولا بطئ الفهم مثلاً ..

ناس كتير جداً أفقر و أضعف و أبطأ .. و بتعيش و تتعايش فوسط أقرانها و بيبقي لهم أصحاب و شلّة يلعبوا معاهم كورة و يضحكوا معاهم و يجروا ورا بعض في الفٌسحة عادي خالص ..

و لكن ..

في ناس مٌعينين .. الحياة العادية خالص دي .. مٌعقدة جداً بالنسبة لهم ..

بيتوهوا بين تفاصيلها ..

النٌكتة بتتقال قدامهم مثلاً .. و مابيضحكوش .. مش لأنهم مافهموهاش .. و لكن لأن عقلهم فكّر ف ألف طريقة و طريقة عشان يترجم النٌكتة دي .. مش طريقة واحدة بس ..

و لما بيتكلموا .. و لما بيعبروا عن أفكارهم دي .. و لما مابيضحكوش زي اللي حواليهم ..

فجأة بيكونوا ( مٌختلفين ) عن اللي حواليهم ..

و أى مٌختلف .. هو هدف سهل .. سهل جداً .. خصووووووصاً كل ما عدد اللي هو مٌختلف عنهم كان كبير .

الألم اللي بيعيشه الناس اللي زي ( ماكسويل ) .. صعب جداً يفهمه غيرهم ..

ألم إحساس بالوحدة .. مستمر .. طول الوقت ..

ألم خوف من الإختلاف .. و عدم قدرة علي التأقلم أو التشبّه باللي حواليه ..

ألم إنسان بيحاول كل يوم و كل دقيقة و كل لحظة .. إنه يفهم العالم اللي حواليه و يلاقي له كتالوج ..

و بمجرد ما يظن إنه فعلاً فهم حاجة .. و بيحاول يتصرّف بناءاً عليها تاني يوم ..

يكتشف إن الناس كلهم كإنهم غيّروا الكتالوج ده فجأة .. و فهموا لغة جديدة و طريقة جديدة للتعامل بينهم و بين بعض .. و إنه هو مرة تانية وحيد .. لوحده .. مختلف .. مش فاهم ..

الناس اللي من النوعية دي ... الرياضة و الحساب و الأرقام .. ملاذ آمن جداً لهم ..

لأن زي ما شرحت في البوستات اللي فاتت ... الرياضة لغة واضحة .. ثابتة .. منطقية ..

مش حتضحك النهاردة معاك .. و بكرة تضحك عليك .. و بعده تضحك فضهرك ..

مش حتقول لك حاجة .. في حين إنها تقصد حاجة تانية مختلفة ..

الرياضة و الحساب و الأرقام .. مش حتسئ فهم كلامك .. حتفهم نيتك طالما مبادئك واضحة و منطقية .

الرياضة و الحساب و الأرقام .. بيكونوا بالنسبة للناس دي .. الصديق و الأنيس و الحبيب و السند و الأمان .

أول ورقة بحثية كتبها ماكسويل .. كتبها و هو عنده 14 سنة ..

السن اللي هو إنت لسة بالغ بقالك سنة أو إتنين ..

يعني العالم إتغير أكتر بالنسبة لك و أصبح أكثر تعقيد و أخطر ..

و ألم الوحدة زاد لدرجة لا تٌحتمل ... خصوصاً لأنك بيولوجياً بتحس إنك محتاج لأنثي في حياتك ... لكن البشر كلهم بالنسبة لك بيكونوا كأنهم بيتكلموا لغة غير لغتك ... و إنت بتتكلم لغة غير لغتهم .

ف بيكتب ورقة بحثية .. و بتتنشر في المعهد الملكي .. و لكنه مش بيبقي مسموح له إنه هو اللي يقراها ..

و لكن بيبدأ إسمه يتعرف .. إنه ( الرياضة بالنسبة له .. سهلة )

و بيدخل الجامعة و يتخرّج ك تاني دٌفعته ...

و بيكون إهتمامه ب ( علم الكهربا و المغناطيسات ) منطقي جداً جداً ..

العلم الجديد اللي بادئ يكون تريند في العالم ...

العلم اللي أخباره بتنزل في الجرائد عن ( الملايين اللي حيصرفها المليونير سايروس ويست فيلد .. علي سلك تيليجراف حيندفن في المحيط الأطلنطي بين بريطانيا و إنجلترا ) ..

العلم اللي مٌقترن بإسم ( مايكل فاراداي ) .. العالم اللي الناس بدأت تحترمه لما إحتاجت شغله و إنتاجه ... لكنه كان هو كمان فقير و مٌختلف ..

ف لمّا ماكسويل بيسأل ( أستاذه ) : ويليام ثومسون .

اللي كان بدأ يدرس هو كمان شغل فاراداي .. و اللي إكتشف إن التيار الكهربي اللي ماشي في السلك تحت المحيط بيزوّد درجة حرارته بشكل ضخم بناءاً علي كمية التيار و الفولط فيه ...

و هو اللي إقترح بناء خط التيليجراف بالإعتماد علي ( حساس دقيق جداً .. و فولط قليل جداً ) بدل ( ضخ فولط عالي جداً ) زي ما شرحت في البوست اللي فات .

و ويليام بيقول له : روح إدرس شغل فاراداي ..

بيكون ماكسويل كإنه لقي الحاجة اللي كان بيدوّر عليها طول عمره ..

ماكسويل كان درس ( هندسة و فيزياء موائع =Fluid dynamics ) ..

و بالتالي .. لما فكّر في شغل فاراداي :

إنك لما بتمشّي كهربا في سلك جنب مغناطيس .. السلك بيتحرّك ..

و إنك لما بتحرّك مغناطيس جنب سلك .. السلك بيمشي فيه كهربا ..

ماكسويل سأل سؤال بسيط جداً .. و هو :

قد إيه ؟!

السؤال ده .. هو ال ( رياضة ) .. هو ال (حساب و منطق ) ..

كمية تيار كهربي قد إيه ؟! ..

نمشّيها في سلك مقاساته إيه ؟! ..

جنب مغناطيس ( يتقاس قوته إزاي ؟! )

عشان يتحرّك مسافة قد إيه ؟! .. فأنهي إتجاه ؟! 🤣🤣🤣🤣

لو إنت حاولت تحل الفزّورة دي ... تحلها إزاي ؟!

لاحظ هنا إن الفزّورة مش ( هات الأرقام ) ... لا .. إطلاقاً ..

الأرقام دي .. طلّعها كلها فاراداي علي مدار حياته جوة المعمل ..

الأرقام عندنا بالكامل ..

لكن .. ماعندناش لغة الوصف اللي تشرح الأرقام دي .. و تخلينا نقدر نتوقع بعضها .. لو غيرنا البعض الآخر

يعني ..

لما مشّينا تيار مقداره 1 أمبير مثلاً .. في سلك طوله 1 متر .. إتحرك مسافة 30 سم .. جنب مغناطيس شكله كبير و مقاساته ( مكعّب مثلاً طول ضلعه 10 سم ) .. مثلاً مثلاً يعني ..

الأرقام دي بتوصف ( حدث ) ... لكنها مش بتجاوب إطلاقاً علي السؤال :

نجيب تيار قد إيه .. في سلك طوله كام .. عشان يتحرّك مسافة 90 سم ؟!!

ولا بتجاوب علي سؤال :

هو المغناطيس بيتقاس قوته إزاي ولامؤاخذة ؟!

فهمت ؟!

الهدف من ال ( رياضة ) هنا .. مش إني أعرف إيه اللي حصل النهاردة ..

و لكن إني أقدر أتوقع .. إيه اللي حيحصل بكرة .. و بعده .. و بعد شهر ..

الهدف من ال ( رياضة ) .. مش إني أجاوب علي مسئلة ..

و لكن إني أقدر أتوقع الحياة .. عشان أهرب من ألم الوحدة .

عشان كده ..

لازم نتخيل ( مثال = reference model = تشبيه ) للحاجة اللي بتحصل قدامنا و لسة مش فاهمينها و لا عارفين نتوقعها ..

و ال ( تشبيه = مثال = model ) ده .. لازم يكون معروف و مفهوم بالكامل بالنسبة لنا .. و معروف معادلاته ( يعني لغة وصف تصرفه ) تماماً ..

ف ماكسويل بيبدأ يستخدم خبرته من عالم ( هندسة الموائع =Fluid Dynamics ) .. و يبدأ يفكّر :

دلوقتي .. عمو فاراداي ورّانا إن حركة السلك في إتجاه المغناطيس .. بتكون حركة دائرية دوّامية .. مش في إتجاه مباشر ..

إيه تاني في الحياة بيتحرك بالمنظر ده ؟! .. هي حلّة الشاي لمّا بنقلّبها ..

طيب .. هي أساساً حلّة الشاي .. لما بنقلّبها .. بتتحرك كده ليه ؟!

يعني .. تعالي نتخيل جزيئات المية زي التروس مثلاً ..

أو لو إنت صعب بالنسبة لك إنك تتخيل حركة ترس ... إتخيل جزيئات المياه زي البشر .

إنت واقف .. و فردت إيديك جنبك .. و بدأت تلف حوالين نفسك ..

إيه اللي حيحصل لو حد واقف جنبك و هو كمان فارد إيديه حوالين نفسه ؟!

و بعدين إنت بدأت تخبط فيه أثناء ما إنت بتلف ..

حيبدأ يلف هو كمان .. صح ؟! .. و لكن .. هل حيلف في نفس إتجاه دورانك ؟!

مستحيل ..

إكيد حيلف في إتجاه عكسك .. صح ؟!

طيب .. لو هو كمان جنبه واحد تاني من الناحية التانية ..

و لما هو بدأ يلف في عكس إتجاهك .. خبط زميله ده ..

زميله ده حيبدأ هو كمان يلف .. صح ؟! .. و لكن عكس إتجاهه .. يعني .. في نفس إتجاه دورانك ... صح ؟!

الموضوع اللي فات ده مش صعب بالمناسبة ..

هات 3 إطباق مدوّرة مثلاً و جرّب الموضوع ده علي رٌخامة المطبخ ..

دوّر طبق في إتجاه عقارب الساعة .. و بعدين إلزق الطبق التاني فيه .. حتلاقي الطبق التاني بيدور عكس إتجاه عقارب الساعة ..

إلزق التالت في التاني ... حتلاقيه بيدور في إتجاه عقارب الساعة ..

و هكذا .

طيب ..

المعلقة اللي إحنا قاعدين بندوّرها في حلة الشاي من أول البوست ..

هي بتدور في إتجاه واحد ..

و كل المياه في الحلّة بتدور في نفس الإتجاه ده .. صح ؟!

ده بيحصل إزاي بقي ؟!

ليه مش ( جزء في المياه بيدور مع المعلقة .. و بعدين جزء تاني ضد إتجاه دورانها .. و بعدين جزء تالت معاها .. و هكذا ) ..

ليه في ( إتجاه دوران واحد دوّامي ) ؟! .. مش ( عشوائية ) ؟!

الإكتشاف العبقري الأول اللي ماكسويل فكّر فيه عشان يحل السؤال ده هو ال : رولمان بلي 🤣🤣 ..

أو بطريقة أخري : أختك الصغيرة اللي لازم تلعبّوها معاكم إنت و أخوك عشان ماما ماتزعقّش لكم 🤣🤣🤣🤣🤣🤣 ..

إزاي ؟!

إنت حتقف فوسط الصالة فارد إيديك و بتلف حوالين نفسك في إتجاه دوران عقارب الساعة ...

و أخوك حيقف بعيد عنك مسافة صغننة .. و حيفرد إيديه هو كمان .. لكن لسة مش حيلف .. لأنك لسة ماخبطتش فيه ..

أختك الصغننة بقي حتيجي تقف وسطكوا ... و حتفرد إيديها هي كمان ..

ف إيه اللي حيحصل ؟!

إنت حتلف في إتجاه دوران عقارب الساعة ..

فحتخبط إيد أختك الصغننة ( الرولمان بلي ) .. ف حتلف هي عكس إتجاهك .. يعني عكس دوران عقارب الساعة ..

فحتخبط إيد أخوك الكبير .. ف أخوك الكبير حيلف هو كمان .. و لكنه حيلف في نفس إتجاهك .. في إتجاه دوران عقارب الساعة .

ده اللي ماكسويل فكّر فيه ..

تسائل : ماذا لو المياه في الحلة .. مش دوامة واحدة كبيرة .. و لكن دوامات كتير كتير كتيييييييييييير ... و لكن الدوامات دي كلها بتلف فنفس الإتجاه ..

طيب .. ده يحصل إزاي ؟! ..

بإن يكون في بين الدوامات دي ( حاجة ما = رولمان بلي = أختك الصغننة = طبقة مٌحايدة ) .. هي اللي بتلف عكس الإتجاه .. عشان تسمح للدوامات دي إنها تلف في إتجاه واحد .

ماكسويل .. إتخيل الدوامات دي إنها ( المجال المغناطيسي ) اللي ماكنش لسة أى حد قادر يوصفه بالرياضة خالص ..

و إن ال ( حاجة ما ) اللي بين الدوامات دي هي : الكهربا .

طيب ... نعرف منين الإفتراض ده يمشي ولّا مايمشيش ؟!!

بسيطة .. تعالي نجرّب الأرقام اللي عمو فاراداي كان بيلعب بيها في المعمل ..

إحنا شٌطّار في عالم هندسة و فيزياء الموائع .. و نعرف نكتب معادلات توصف حركة الدوّامات ..

و شٌطّار في عالم الهندسة الميكانيكية بتاعت عمو نيوتن .. و نعرف نكتب مٌعادلات توصف حركة ال( رولمان بلي ) ..

تعالي نجرّب نحط أرقام عمو فاراداي و نشوف .... و ؟!

لسة ... 😡😡😡😡

لسة إزاي ؟! ... يعني إيه بعد التعب ده كله المعادلات لسة ماطلعتش بتطلّع نفس أرقام عمو فاراداي ؟!!!

فاكر في البوست اللي فات .. لما شرحت لك موضوع المخدة السفنج ؟! ..

و إنه ده مشابه ل موضوع ( التكثيف ) اللي بيحصل للكهربا ..

ماكسويل كان لسة حاينفخ في الشمعة و يطفي اللابتوب و يروّح ..

و بعدين إفتكر بقي شغل عمو ( ويليام ثومسون ) .. و إن حركة التيار الكهربي في السلك تحت المحيط .. إتسببت في ( تكثيف ) ..

و فجأة سأل نفسه ..

مش أنا بافترض إن ال ( حاجة ما ) اللي بين الدوامات دي .. كهربا ؟!!

أما أنا حمار صحيييييييييييح ...

ما هي طالما ( كهربا ) .. بين دوامات عازلاها عن بعض .. يبقي أكيد بيحصل تكثيف علي جدران الدوامات دي ...

طيب .. هي المعادلات اللي بتوصف موضوع التكثيف دي .. عاملة إزاي ؟!

بالظبط زي ما شرحت لك في البوست اللي فات ..

كإنك بتوصف ( حركة مياه في سفنج ) ..

ف بسرعة ماكسويل بيفتح اللابتوب بتاعه .. و بيبدأ يعدّل المعادلات .. و يجرّب يخليها بدل ما بتوصف حركة خطية ل ( رولمان بلي ) بين الدوامات ..

لا ..

بيضيف عليها حركة بتوصف عملية تكثيف للشحنة الكهربية ..

و بعدين بيسمّي الله .. و يبدأ يجرّب يدخّل أرقام عمو فاراداي ... و ...............

يزعّق :

طلّعت قمااااااااااااااااااااااااااااااش .. قماااااااااااااااش طلّعت 🤣🤣🤣🤣

( لأن كان بيتعاد علي الدش المركزي في بريطانيا فيلم عائلة زيزي كتير أيامها سنة 1850 🤣 ) .

المعادلات ... وصفت بالظبط العلاقة بين الكهربا و المغناطيس .. بكل دقّة

بالمناسبة ...

ماكسويل ماطلّعش أربع معادلات ( اللي هي ال 4 معادلات المشهورين اللي إحنا درسناهم في هندسة ) ..

موضوع ال ( 4 معادلات ) ده .. حصل بعد فترة طويلة .. و مش ماكسويل اللي عمله ..

ماكسويل .. طلّع 20 معادلة ولامؤاخذة 🤣🤣

عشرين مٌعادلة عشان يوصفوا العلاقة دي .. بين الكهربا و المغناطيس ..

لكن بعد سنين طويلة .. واحد طيّب و إبن حلال ( ممكن نحكي قصته بعدين ) إسمه ( أوليفر هيفيسايد ) .. هو اللي إختصرهم ل 4 معادلات بس .

ماكسويل طلع ركب التوكتوك و نزل يحتفّل و يعقّب في شوارع لندن ..

و الناس ماشية بتزمّر وراه و فرحانين ..

لكن هو كان فرحان بسبب حاجة تانية خاااااااااااالص ... و مرعوب بسببها برضو ..

لأن .. و أثناء ما هو كان قاعد بيجرّب أرقام مٌختلفة في المعادلات بقي ..

لقي رقم طلع قدامه فجأة ...

رقم هو عارفه كويس ... و كل الناس اللي فنفس شغلانته ( علماء ) كانوا عارفين الرقم ده كويس جداً جداً ..

الرقم ده كان تقريباً : ( 3 .. و جنبه 8 أصفار ) ..

رقم .. الناس كان بقالهم سنين طويلة عرفوه .. لأنه بيوصف ( سرعة الضوء ).

لكن ... و لأول مرة في التاريخ بالكامل ... حد يكتشف .. هو الضوء ده أساساً ..

عبارة عن إيه ؟!

و لأول مرة في التاريخ بالكامل ... الضوء يتكلّم .. و يعرّف عن نفسه .. و يقول ب لغة فيزيائية رصينة جداً :

" صباح العسل أزميلي .. أعرّفك بنفسي ولامؤاخذة .. الضوء المرئي .. موجة كهرومغناطيسية " ..

و يكمّل :

" شايف باقي العيلة الكريمة اللي راكبين رٌبع نقل و جايين هناك دول ؟! .. عارف عارف إنك لسة حتتعرّف بيهم و إنت بتتمشّي في التاريخ .. أعرّفك بإخواتي ..

أخويا : وايفاي .. موجة كهرومغناطيسية

أخويا : بلوتوث .. موجة كهرومغناطيسية

أختي : آشعة جاما .. موجة كهرومغناطيسية ..

أخويا : طلعت .. موجة كهرومغناطيسية برضو🤣 ..

و لسّة الضوء حيكمّل و يعرّف باقي العيلة .. و بعدين إكتشف إن النهاردة الجٌمعة و يوم أجازة وكفاية بوست قصير لحد هنا .. و قرر يستأذن و يكمّل البوست الجاي بقي إن شاء الله ..

و الله أعلم .