عمو إسلام عمو إسلام .. هو ليه اللاعيبة زمان كانت بتدخّل الفانلة في الشورت ..
عمو إسلام عمو إسلام .. هو ليه اللاعيبة زمان كانت بتدخّل الفانلة في الشورت .. و دلوقتي لا ؟!
سمعت أنا السؤال البرئ ده ..و خدت نفس عميق .. و إتعدلت في القعدة .. و جاوبت :
بإختصار .. عشان اليابان كانت مسيطرة علي الجٌزر و المسارات البحرية في المحيط الهادي في الأربعينات في الحرب العالمية التانية 😊🤣
و كما توقعت .. صوت التيليفزيون فجأة وطي .. و سمعت المتحدث الرسمي لأغلبية اللي كانوا قاعدين حواليا بيقول بهدوء و هو بيحاول يتمالك دموعه :
أرجوك مش دلوقتي يا جويلي .
( مصر كانت لسة داخل فيها الجون بتاع إيران 🤣 ) ..
ف وعدت إني حاكتب البوست ده لما أفضي ... و ها هو ذا
العواجيز أمثالي .. يفتكروا كويس بطولة أوروبا 2000 ( كنت طالع من خامسة إبتدائي ل أولي إعدادي ) .. و ما زلت فاكر كويس جداً كمية التحفيل اللي سمعته علي فريق إيطاليا بالذات ..
و ده .. لأن فريق إيطاليا سنة 2000 .. كان أول فريق يلبس فانيلات ( ستريتش ) .. و كان منظرها عجيب و مختلف جداً جداً عن كل اللي كنا معتادين عليه قبل كده .
و إزاي إن تضاريس جسم اللعيبة الإيطاليين كانت باينة بالكامل تقريباً ..
و كل الموضة أيامها للبس الرجالي أساساً كانت ثورة علي كل ال (تحزيق و الهدوم الضيقة بتاعت السبعينات و التمانينات ) و كان الموضة و الكاجوال هو إنك تلبس هدوم واسعة أوي ( زي حالياً بالمناسبة ) .
أيامها .. ماكنش لسة في إنترنت .. و لا كنا نعرف سبب اللبس العجيب ده .. و لا الشركة المسئولة عنه .. ولا كل الحاجات اللي دلوقتي بنعرفها بكل سهولة ..
ف إكتفينا بإننا كلنا ( في المدرسة الإعدادي الحكومي ) إقتنعنا إقتناع تاااااام إن كل الإيطاليين كانوا شوية عيال ولامؤاخذة 🤣 ..( لأن موضة البنات في الفترة دي هي كانت المحزّق و الملزّق كالمعتاد ) .
لحد كاس العالم 2002 .. ف إذا بنا نكتشف إن أغلب الفرق بقت بتلبس محزّق و ستريتش هما كمان ..
و كل اللاعيبة المشهورين و الجامدين أيامها ( تيري هينري , رونالدينيو , .. ) كانوا بقوا بيطلعوا الفانلة برة الشورت .
و علي 2006 .. كان خلاص .. الأغلبية و الطبيعي في كل أنحاء العالم هو :
إنك تطلّع الفانلة برة الشورت
طيب .. إيه بقي اللي كان حصل سنة 2000 في إيطاليا ؟!
ببساطة .. الشركة المسئولة عن ملابس الفريق الإيطالي أيامها ( كابّا - Kappa ) .. كانوا توصلوا أخيراً ل نوع أقمشة جديييييييييييييييد ... لما تشدّه .. يتشد معاك و يتمط ..
و اللي هو حالياً كل الناس تعرفه بإسم ( ليكرا ) ..
نوع المادة دي فعلاً إسمه ( سبانديكس - ليكرا ) ..
و ليه ده كان شيء أسطوري في كرة القدم بالذات ؟! ..
لأن أحد أكثر الحاجات المعروفة في الدفاع في كرة القدم .. هو إنك تشد المهاجم من التيشيرت و هو بيجري من غير ما الحكم ياخد باله .
و عشان كده .. كان زماااااااااان .. الفانيلات بتاعت لاعيبة كرة القدم .. كانت بيتم تصميمها ( عن قصد ) عشان تبقي كبيرة زيادة عن اللزوم و ( مبهوقة ) و واسعة .. عشان يعرف يتحرك فيها اللعيب .. و لما يتشد منها المهاجم .. مايقعش .. يكمل جري .. و يبان و تطلع من التيشيرت فالحكم ياخد باله ..
و لكن .. زي أى حد جرّب يجري ب جلابية أو فانيلة واسعة .. الهوا بيخبط فيها و تخلي الجري صعب جداً ..
ف كان بيدخلوها في الشورت عشان ( يلموا البهوقة دي كلها ) .
لكن ..
لما شركة ( كابّا ) دي إكتشفت الخامة ال ( ليكرا ) اللي حالياً إنت عايش في رفاهية إنك شايفها بتتباع تحت أى كوبري 🤣 ..
إكتشفوا إنك لما تشدها .. حتتشد معاك و تتمط .. لحد حاجة وتلاتين سنتيمتر .. و ترجع تاني عادي خااااالص ولا كإن حصل حاجة .
و ده معناه ؟! ..
معناه إنك تقدر تصمم تيشيرتات محزّقة ستريتش علي جسم اللاعيبة .. ف يجروا من غير ما الهوا يعاكسهم .. و يعرفوا كمان يتحركوا براحتهم فيها من غير ما تكتفهم .. و لما تتشد .. تمط .. و اللعيب مايوقفش .
ده كان حرفياً إسم الحملة الإعلانية بتاعت الفريق أيامها ( stop stopping = ماتوجفّش يعني 😅 ) .
لو عند المرحلة دي إنت سرحت و نسيت موضوع اليابان و الحرب العالمية التانية .. مش حالومك .. ف خليني أشدّك تاني و أسألك :
هو إيه اللي يخلي شركة تصرف و تكلّف عشان الموضوع ده بالذات يعني ؟!
ما الناس كانوا عايشين حياتهم و بيلعبوا كورة ب فانيلات موضة التسعينيات زي الفل .. إيه اللي حصل ؟!
الحقيقة هو إن البحث في المجال ده .. إبتدي فعلاً في الحرب العالمية التانية ... عشان كان تقريباً في حد عجلة عربيته إتخرمت و كان بيدور علي كاوتش و مش لاقي ..
( حرفياً بالمناسبة 🤣 ) ..
بس ماكنش حد واحد .. ده كان كل جيوش الحلفاء .. و كانوا عايزين كل الحاجات اللي كانت بتتعمل من المطّاط أيامها .. و علي رأسهم فعلاً .. كاوتش عجل العربيات و الطيارات .
ال ( مطاط ) ده .. منتج نباتي طبيعي جداً .. كان بيطلع من مكان واحد فقط في العالم .. و هو أشجار معينة في البرازيل .. لو جرحتها .. حتلاقيها بتطلّع مادة بيضاء شبه اللبن التقيل شوية .. لما تسيب المادة البيضاء دي في الهوا شوية .. ب تجمد و تتحول للمطاط ..
و ده حرفياً اللي كان بيعمله المزارعين .. كانوا بيلعبوا كورة بالمطاط ده .
و بعدين إكتشفوا إن العالم عايز المادة دي ( كانت صناعة العربيات بدأت تكبر ) .. و صناعات تانية كتير بدأت تحتاجها ..
ف البرازيل عملت أجدع إحتكار للصناعة .. لدرجة إن ملاك مزارع المطاط البرازيليين كانوا حرفياً بيولعوا سجايرهم بالفلوس ..
و البرازيل كانت بتعامل بذور شجر المطاط ك سر قومي ممنوع منعا باااااااااتاً الإقتراب منه .
( سريعاً جداً للأخوة اللي بيحبوا الإيتيمولوجي زيي .. سبب إن المطاط إسمه بالإنجليزي : Rubber ..
إن لما إكتشف الإنجليز موضوع المطاط البرازيلي ده سنة 1700 تقريباً .. جربوا يدعكوا ( Rub ) الكلام المكتوب بالفحم ( القلم الرصاص بتاعهم ) طلع بيتمسح ( اللي هو الأستيكة = الجومة ) ..
ف سمّوا المادة كلها علي بعضها ( Rubber ) .
لحد ما علي سنة 1876 تقريباً .. بريطانيا قررت إنها تمارس هوايتها الأزلية .. و تسرق ..
و بعتت واحد كان إسمه ( ويكهام ) .. سرق سبعين ألف بذرة ... و رجع بيهم علي بريطانيا ..
عشان يكتشف إن المٌناخ البريطاني ( اللي حالياً بيتغير و مسبب مصايب هناك بالمناسبة ) .. بارد مش زي المٌناخ الإستوائي و ماينفعش يتزرع فيه شجر مطاط ( غير في صوب ) .
ف راحت بريطانيا عاملة إيه ؟! ..
بالظبط كده .. بعتت البذور ل كل البلاد اللي كانت محتلاها و لها مناخ إستوائي شبه البرازيل ..
و علي رأسهم .. جذر جنوب شرق آسيا في المحيط الهادي .
و لحد يومنا هذا بالمناسبة .. غالباً أى منتج فيه مطّاط زي ( عجل عربيتك ) ب نسبة كبيرة جداً .. طالع من شجر المطاط اللي في الجذر دي ( بسبب سرقة بريطانيا ) .
و طبعاً إنهار الإحتكار البرازيلي .. لكن ما علينا من ده .. قصة إقتصاد البرازيل لوحدها حتحتاج بوست كامل منفصل غير ده .
المهم بقي .. إن الجُذر دي .. تحت سيطرة بريطانيا .. فضلت هي خط إنتاج العالم من المطاط ( العالم اللي كان بدأ يفرشح في الثورة الصناعية و بقي محتاج مطاط في كل حتة ) لمدة 60 سنة تقريباً ..
ف لما اليابان قفلت المنطقة دي بالكامل علي أمريكا و حلفاءها في الحرب العالمية التانية ..
أمريكا راحت طالعة علي أحد أكبر شركاتها الكيميائية ( و أحد أكبر شياطين العصر ) .. ( شركة دو بونت DuPont ) ..
و راحت قايلة لها : شيك علي بياض ... بس تتشقلب في قلب المعمل .. تطلّع لي مطّاط صناعي .
الشقلبة دي بقي إتسببت إن الشركة بنت ال$@^@$ دي .. تطلّع كمية من المواد اللي شقلبت شكل عالمنا الحديث بالكامل ( كل حوارات النايلون و التيفلون و الحاجات المٌسرطنة المشهورة دي ) ..
و علي رأسهم .. كل مشتقات البلاستيك و ال ( بولي إيثيلين ) ..
اللي العالم الصناعي بالكامل بعد كده .. خدها و شرخ عالرابع ..
بص علي كل حاجة حواليك في الحياة بلاستيك و بتروح و بتيجي ( مطاط ) .. و إنت حتفهم جزء ضئيل جداً من حجم الصناعات دي الخرافي قد إيه ..
و في بقي شوية قصص كتير فحت في النص بين المرحلة دي ( الأربعينات ) .. و التطور الصناعي في الغزل و النسيج خصوصاً ( أقل قسم في الدرجات في هندسة و اللي كنا بنقول عليه قسم اللي مبيذاكروش في إعدادي هندسة 😅 ) ..
لحد ما وصلنا ل شركة ( كابّا ) .. و إكتشافها بتاع التيشيرتات المحزّقة سنة 2000 ..
و لو إتمشّيت لوحدك في القصص دي .. حتلاقي من أشهرهم قصص اللبس الحريمي .. و كل صناعات ال ( ليجين ) و السبانكس و بناطيل اليوجا اللي منتشرة في الجيمّات الميكس اللي الواحد بيهرب منها .
روح إتمشّي في القصص دي لوحدك .. لأنها مثيرة للغثيان بالنسبة ليا .. لأن من أشهرها قصة واحدة من اللي كنت مابطيقهومش في شارك تانك الأمريكي ( سارة بلايكلي ) .. اللي إسمها أصغر مليارديرة عصامية في العالم .
في جزء ضخم تاني هنا نفسي أتكلم عنه .. بس بما إني مابحبش أكتب بوستات طويلة .. و باحب إن كل بوستاتي تبقي مٌختصرة للغاية زي ما أكيد إنت عارف لو قرأت أى حاجة علي بروفايلي قبل كده 🤣🤣🤣 ...
و هو جزء : ال 10 تيشيرتات الرياضيين اللي باشتريهم من دٌبي ( من day to day ) ب 15 درهم علي بعض ..
و كل تجارة الملابس اللي في دٌبي عموماً .. و ليه الملابس رخيييييييييييييييييييييييييييييييييصة فحت هناك .
و كل العالم المؤدي لها من ( الصين ) و ( شي إن ) و أخواتهم ..
لكن ..
مسيري أتسأل سؤال برئ تاني في ماتش أستراليا مثلاً 🤣 .. و يفكرني بالحوارات دي و أبقي أكتبها حينها إن شاء الله
و الله أعلم .
أما عن سبب أنا ليه عارف كل الحوارات اللي فوق دي .. ف ده جزء منه مشروح في البوست اللي قبل ده تقريباً .. بتاع ( أنيمي dr stone ) .. و إني لما باتفرج عليه .. و يشرح هو في مشهد أو إتنين تاريخ المطاط في العالم مثلاً .. انا كنت باروح أكمل مع نفسي و أسأل و أعرف باقي الحوارات دي كلها .
نهاية المحطة 9