لو إنت يرضيك اللي حصل ده و حاتسكت ..

لو إنت يرضيك اللي حصل ده و حاتسكت .. أنا مايرضينيش ..و مش حاسكت .....................................................

إحنا حنلم الرجّالة و نأجّر عربية رٌبع نقل و نطلع علي فرنسا الأول .. نرن الجرس بتاع بيت الحكم و نطلع نجري و نعمل نوش و نمرة في شارعه عشان يبقي إتعرف إنه إتعلّم عليه .. و بعدين قبل ما نطلع علي أمريكا .. حنقف الأول عند مقر الفيفا في سويسرا .. نعمل نفس الموضوع برضو .. و نعلن من هناك إن المٌباراة تتعاد و إلا حنجيب واطيها عاليها .. و بعدين نطلع علي أمريكا .. نعيد المٌبارة و نغلب و نجيب الكاس و نرجع .

معانا ؟!

البوست اللي فات قبل ده .. إنتهي ب جٌملة ( إسعي إنك تفهم القوة صح .. و تمتلكها ) ..

و أغلب التعليقات سألت : قوة زي إيه ؟! و إيه هي القوة اللي أقصدها ؟

و كان في تعليق إني ( أكمّل قصة كوريا 😅 ) .. و تعليقات بتشتمني كالمعتاد .

البوست ده .. فيه إرضاء ل كل الجماهير تقريباً ..

البوست ده حابدأه ب سؤال :

تتخيل إزاي و ليه شركة سامسونج الكورية حالياً .. هي من أكبر 5 شركات في مجال التكنولوجيا و الإلكترونيات في العالم ؟! .. و أكبر مٌسيطر علي صناعة الشرائح الإلكترونية عموماً ؟

يعني ..

زمااااااااااااااااااااااان .. كنت شرحت في بوستات كتير القصة المٌختصرة ل نشأة الكمبيوتر و التكنولوجيا في العالم .. و كنت شرحت إن الكمبيوتر ب شكله الحالي كان بإختصار شديد جداً عبارة عن :

معمل في أمريكا .. إشتغل فيه شوية علماء بعد الحرب العالمية التانية .. حنكشوا مع بعض شوية كده لحد ما عملوا الترانزيستور ... واحد ياباني كان معدّي عليهم صدفة .. شاف الترانزيستور ده .. عجبه .. و قال لهم ( 25 ألف دولار أهو شبرقوا علي نفسكوا .. بس البتاع الجديد ده يلزمني ) .. و خده و رجع بيه علي اليابان .. و غيّر إسم الشركة بتاعته ل إسم جديد يناسب المرحلة اللي جاية .. و سمّاها ( سوني - Sony ) .

و علي مدار 40 سنة تقريباً .. من 1940 ل 1980 .. التكنولوجيا و الإلكترونيات كانت حاجة بتاعت أمريكا و اليابان بس .. لوحدهم .. و باقي العالم قاعد بيشجّع في المدرّجات .

ف إمتي و ليه و إزاي بقي ... فجأة كوريا دخلت عالخط ؟!

و ليه .. لحد يومنا الحالي .. و بالرغم من وجود دول ضخمة معاها فلوس كتير فحت .. ما زال مافيش حد قادر ينافس ؟! ..

الموضوع ده عشان يتشرح صح ..

حتركب معايا آلة الزمن من دلوقتي .. و نمشي عكس بسرعة فحت ..

حتشوف حكومة كوريا و هي بتحتفل و بتهنّئ سامسونج و بتتصور معاها ك رائدة الشركات الكورية في عوالم التكنولوجيا في أواخر التمانينات ..

و حترجع شوية .. حتشوف نفس الحكومة دي هي هي بالظبط .. و هي بتسب و تلعن لسامسونج إنها بتضيّع نفسها ورا شوية أوهام .. و إنهم ( سامسونج ) حيفلسوا و هما بيحاولوا يدخلوا عالم الإلكترونيات ..

و حترجع شوية .. حتشوف رئيس سامسونج ( ليي ) .. اللي لو تفتكر ( هو اللي عمل أول مفاوضات مع جينيرال بارك في أول قصة كوريا ) و هو واقف بيتمشي في ( طوكيو في اليابان ) سنة 1979.. و شايف محلاتهم كلها حاجات إلكترونية .. و فجأة ب يتصل ب المكتب في كوريا .. و يقول لهم :

إحنا من النهاردة كل إهتمامنا حيبقي بالإلكترونيات و خصوصاً ال ( VLSI - حاجة درسناها في الكلية و حاشرحها تفصيلياً إن شاء الله في الأجزاء القادمة ) .

و إزاي الناس اللي عنده في الشركة فكروا إنه إتجنن و إن سرطان المعدة اللي كان عنده حرفياً سافر لدماغه و الراجل خلاص كده بيهلوس ..

في حين إنه ( كالمعتاد ) كان سابق زمنه بسنييييييييييييييين .

و بعدين حنشوف من بعييييييييد .. إزاي إن فنفس ذات الوقت و اللحظة ..

بيحصل حاجة علي بعد خطوتين من كوريا و اليابان .. في جزيرة صٌغننة كده في المحيط إسمها ( تايوان ) ..

و الحاجة دي .. بتغير شكل موازين القوة في عالمنا الحالي بالكاااااااااااااااامل ..

و إن دي الحاجة اللي تخلي (تايوان ) لو لها مزاج بكرة الصٌبح تعلن إنها حتنافس علي كاس العالم اللي شغّال ده ... إحتمال تاخده من غير ما حد يقدر يقول لها تلت التلاتة كام .

و ده لأن ( تايوان ) حالياً .. هي الدولة الوحيييييييييييييدة في العالم ... اللي ماسكة العالم كله من مكان حسّاس ولامؤاخذة ..

و هو وجود شركة ( TSMC ) فيها .. الشركة الوحيدة القادرة علي تصنيع كل الشرائح الإلكترونية اللي عالمنا بيعتمد عليها .

و إن كل المحاولات اللي إتعملت علي مدار السنين اللي فاتت .. إن العالم يخلص من الماسكة المؤلمة اللي تايوان ماسكاها له دي .. باءت بالفشل .. بالرغم من محاولة كل الدول الغنية فحت .. غنية أوي ..

إلا إن .. فشلوا !!!

طيب .. ده كله حصل إزاي و ليه و إمتي ؟!!

إمتي حتة جزيرة صغننة حرفياً ماتاخدش بالك منها عالخريطة .. مسكت العالم من .. ولامؤاخذة أكتر منطقة حساسة في يومنا الحالي ..

عشان تفهم معايا ده ... حنرجع عكس أكتر بآلة الزمن .. لزمان .. زماااااااااان ..

ل سنة 1887 ... في الصين ..

و تجيب معايا حلة المياه السٌخنة ( بتاعت كل مشاهد الولادة فأى فيلم عربي قديم ) ..

و ألف ألف مبروك يا حاجّ و يا حاجّة .. يتربّي في عزّكوا اللي لسة مولود طازة ده ..

( تشيانج كاي شيك - Chiang Kai-shek ) .. الشخصية الجديدة اللي بتظهر في المٌسلسل العجيب اللي ماكنتش ناوي أكتبه إطلاقاً قبل ما أبتديه ده 🤣.

و .. اللي حيبقي بعد كده مؤسس : تايوان .

و تقدر تقول إنه هو أول قطعة دومينو .. في إن تايوان تبقي ماسكة العالم الماسكة المؤلمة دي .

قصة الراجل الطيب ده بإختصااااااااااااااااااااااااار شديد هي :

الصين ( لو تفتكر كنت حكيت جزء كبير من تاريخها زماااااااااااان .. من أيام الفراعنة و إنت طالع ) .. عند سنة 1887 .. كانت خلاص الإمبراطورية اللي ماسكاها تعبت .. قدمت .. اللي كان إسمها ( Qing Dynasty = تتنطق تشينج .. مش كينج 🤣 ) ..

المهم .. ده كان فنفس ذات الوقت و اللحظة .. اللي الشيوعية ( بتاعت كارل ماركس ) الألماني .. كانت سافرت من ألمانيا ل( روسيا ) الإتحاد السوفييتي .. و عششت هناك شوية .. و نزلت منها علي الصين .

( برضو كنت شرحت تفاصيل التسلسل ده زمان ) .

المهم .. الواد ( تشيانج ) أول ما بدأ يخشن صوته .. حس إن الهرجلة و السبهللة اللي في الصين دي مش جايبة همها ..

خد بعضه و طلع عاليابان .. ( الأكاديمية العسكرية في اليابان ) اللي هي لو تاخد بالك برضو خرّجت ( الجينيرال بارك بتاع كوريا ) .. و خد له كورسين تلاتة هناك ب شهادات مٌعتمدة 🤣 .

و هناك .. بيقابل مٌدرّسه .. راجل كبير طيوب و حبّوب كده إسمه ( صان يات سين ) .. تقدر تتخيله زي ( جورج واشنطن ) كده بتاع أمريكا ..

ماتعرفش ( جورج واشنطن ) ؟! .. إتخيله زي ( عبد الوارث عسر في شباب إمرأة ) 🤣..

المهم .. صان يات سين .. كان عنده حلم و أمل .. و عمله .. هو :

يكوّن الحزب الوطني ال .. إحم .. الصيني .. و إنه يشيل الإمبراطور ال( تشينجي ) .. يعلن الصين جمهورية ( الموضوع ده كان تريند أيامها 🤣) .

ف بالفعل بيعمل كده علي 1911 .. و بيقعد بتاع 12 سنة يرازي في فلول النظام القديم .. و فلول النظام القديم و فتوات الصين ( ال warlords ) يرازوا فيه ..

و كل ما كان يطلب من أمريكا و بريطانيا إنهم يساعدوه .. كانوا بيعملوا (seen ) علي رسايله علي الواتساب و مايردّوش ...

ليه ؟!

لو تفتكر .. الصين إتخرتأت أساساً بسبب بريطانيا ( و حروب الأفيون ) ..

ف بريطانيا ( و حليفتها أمريكا ) .. كان من مصلحتهم دائماً و أبداً إن الصين تفضل دويلات متفرقة ( سياسة فرّق تسد الأزلية ) ..

ف لما كانوا بيشوفوا حد كاريزما و شكله فاهم زي ( صان يات سين ) .. كانوا بيسقعوله .. و يطلعوا عليه إشاعات في السوشيال ميديا إنه مالوش فيها و مقضيها سهرات في كباريهات شارع الهرم الصيني .

فبالتالي و عشان يبقي عنده ( جناح عسكري ) عليه القيمة .. بيبعت تلميذه ( تشيانج ) سنة 1923 ف رحلة مدرسية ل روسيا ( الإتحاد السوفييتي ) ... عدو بريطانيا و أمريكا اللدود في الوقت ده .

لكن .. الإتحاد السوفييتي ماكنش ف مرحلة عادية في حياته في الوقت ده برضو ...

دول كانوا فمرحلة ( ما تيجي نشوف آخر الفكر الشيوعي ده فين ) 🤣 ..

عارف شعبان عبد الرحيم الله يرحمه ؟! ..

عارف لما عمل لحن .. لقاه علّم مع الناس .. عمل إيه ؟! ..

ده بالظبط اللي الإتحاد السوفييتي عمله في بدايات القرن اللي فات ..

طلع عالمسرح و قال ( شيوعية .. إيييييييييييييه ) .. لقي الناس صقفّت و غنّت معاه ..

قال قشطة .. و قرر إنه يجيب آخر الفكر الشيوعي حرفياً .. لكن لهذا تفاصيل فلسفية يتم شرحها لاحقاً غالباً إن شاء الله .

المهم .. لما ( تشيانج ) بيقعد في روسيا سنة .. بيتعلم منهم شوية حاجات كتير فعلاً في الإدارة العسكرية و الدعم اللوجيستي و كل الكلام الحلو ده ..

لكنه بيرجع سنة 1924 كاره الشيوعية و ريحة الشيوعية و كل ما له علاقة ب حرف الشين و العين أساساً ..

طيب ليه ؟! ..

ليه بيرجع كارهها أوي بالمنظر ده ؟! ..هي الشيوعية أساساً بتقول إيه ؟! ..

بإختصار شديييييييييييييد و مٌخل جداً جداً ..

الشيوعية ( بتاعت روسيا في الوقت ده ) بتقول :

طبقة العمال الكادحين الفقراء المٌعدمين ( البروليتاريا ) .. لازم يطلعوا علي الطبقة الغنية اللي معاهم فلوس كتير ( البرجوازيين = خدوا اللفظ من فيلم فوزية البرجوازية 🤣🤣🤣🤣 ) .. و يضربوهم بالجزم القديمة ..

و شعارات زي : ثور ( أخي الشيوعي ) علي كل رمز من رموز السلطة ( الخيار و الطماطم و الأفوكادو .... بهزّر و الله ... سٌلطة ب ضم السين ) ..

المهم ..

الكلام ده يبدو جميل و حلو .. لو إنت عبيط ..

أينعم .. أنا شخصياً مقتنع فعلاً ب ده ( إنك تبقي عبيط و ساذج لو صدّقت كلام زي ده ) .. لأن .. أى دراسة حقيقية و فهم ل تاريخ الحضارات .. حتفهم منه إن الجماعات و الأغلبية .. مايقدروش يحكموا نفسهم ب نفسهم ( كلام ماركس ) .. و إن لازم من ( نٌخبة ) .. تحكم .. و بالتالي تحصل علي مزايا بسبب الحٌكم ده ( تكييف في مكتبهم مثلاً ) ..

لكن ..

الفكر الشيوعي كان جذّااااااااااااااااب جداً جداً .. ل طبقة العامة الكادحين الغير مٌتعلمين .. ف كانوا بيصدّقوا فيه .. و ينضموا له .. علي أمل إن في المستقبل هما كمان حيعرفوا يقعدوا في التكييف ..

و ماكنش فيهم حد فني تكييف يشرح إن .. التكييف عشان يشتغل ب كفاءته .. لازم يبقي عدد قليل هو اللي قاعد في الأوضة ..

( الشيوعية بتاعت روسيا دي أيامها :

منطقياً و رياضياً و فيزيائياً و هندسياً و تاريخياً و حضارياً .. نظام فاشل ) ..

و لكنه مش بس فاشل ..

لأ .. ده كمان ضد الفكر الصيني ال (كونفشيوسي ) الأصيييييييييل ..

كونفوشيوس .. كان علي نفس مبدأ أرسطو ( اللي إحنا درسناه في إقتصاد و فلسفة أولي ثانوي .. تفتكرها ؟! ) ..

اللي هو :

المٌجتمع المٌتزّن : هو اللي فيه طبقة حاكمة .. يسمع كلامها طبقة عاملة ..

و ماينفعش ثورة ( عيب و غلط ) .. و ماينفعش العامل يثور علي مكانه الطبيعي ك ( عامل ) .. و إرضي بقسمتك و نصيبك يابني .

( ده بالمناسبة ما زال جزء ضخم من الفكر الصيني الأصيل حتي يومنا هذا ).

المهم .. و عشان ماطوّلش عليك أكتر من كده في الجزء ده ..

( تشيانج كاي تشيك ) بيرجع الصين .. و هو فاهم إزاي يبني جيش صح ..

لكنه كاره إنه مٌضطر يبقي مشارك الحزب الشيوعي اللي كان بدأ يتوغل في الصين في كل حتة .. بمباركة الإتحاد السوفييتي .. اللي هو كان لسة متغدّي عندهم من شوية .

البوست الجاي بقي .. حتفهم حاجة مٌهمة جداً جداً جداً .. و هي :

إن كتب تاريخ كتير بتقول إن الموضوع ماكنش شيوعية ولا مهلبية ..

و لكن كان :

شغل حريم ولامؤاخذة 🤣😅 ..

إزاي .. و ليه .. و ماذا بعد ..

في الجزء القادم إن شاء الله ..

و الله أعلم .