هل لازم تعرف إن ( شرودنجر ) كان بيدوفيلي 😐؟!

بعد 10 أيام من عيد ميلادي من 4 سنين تقريباً .. 11 ديسمبر 2021 بالظبط .. و كنت خلاص داخل أنام .. ف كالمعتاد ( و زي ما شرحت في بوستات كتير ) .. شغّلت الراديو بتاع جوجل ( اللي هو فيه محطات و بودكاستات من كل أنحاء العالم ) .. لأني مابعرفش أنام في صمت إطلاقاً ..

المهم .. لسة عيني حتدخل في النوم .. و إذا ب خبر بيتذاع في جرنان ال ( تايمز ) الأيرلندي .. إن ( شرودنجر ) كان بيدوفيلي 😱 .

طبعاً أنا عينيا فنجلت فجأة .. و النوم طار .. و أنا شخصياً طرت أفتح اللابتوب ..

شرودنجر مين ؟! .. شرودنجر بتاعنا ؟! ..بتاع المعادلة إياها ؟! .. أشهر مٌعادلة في عالم الفيزياء الكمّية ؟!

و إتضح إن فعلاً .. الراجل كان مصيبة سودة و بلوة مسيّحة و إبن ستّين في سبعين ..

ضحاياه بنات عندهم 12 سنة و 14 سنة .. كان بيدرّس لهم .. و حمل تم إجهاضه .. و مراته ذات نفسها كانت علي علم بكل اللي بيحصل ده .. و لكنها لأنها كانت هي كمان ماشية مع واحد صاحبه ... ف كانت مطنّشة ..

و هو شخصياً كان كاتب كل التفاصيل في مٌذكراته .. و كان شايف إن البنات دول بيتعبوا معاه فعلاً .. لكن تعبهم ده حلال بالنسبة له .. لأنه عبقري و محتاج وقود من البنات الطازة اللي لسة ماتلوثوش بالزمن .. عشان يغزّي عبقريته الفذة دي .

الموضوع ده فضل شاغل بالي أيامها فترة .. و لأن ماكنش عندي أى حاجة ذات قيمة أو مفيدة ممكن أقولها في الموضوع ده .. ف ماكتبتش عنه ..

و لكن تساؤل معين فضل عايش جوايا ..

و هو :

عند أنهي مرحلة ؟! ..

عند أنهي مرحلة .. المفروض إن دارس الفيزياء يعرف إن شرودنجر كان شخصية زبالة ؟!

البوست ده مش عن شرودنجر إطلاقاً .. لسة بدري .. إحنا رايحين له في السكّة إن شاء الله ..

لأني قررت بإذن الله .. و بقدر ما أستطيع من معلوماتي البسيط .. إني أعدّي علي أغلب العلماء اللي ليهم علاقة بكل ما هو ( سيليكون ) لحد عصرنا الحالي ..

لما بدأت كتابة السلسلة دي ( سيليكون ) ماكونتش ناوي علي مستوي معين من التعمّق .. و كنت بافكّر أكتفي ب كتابة تسلسل سريع جداً للأحداث من منظور هندسي تقني ..

لكن .. أثناء الكتابة .. لقيت نفسي بافتكر كتب قرأتها من سنين .. و زي اللي بياخده الحنين بعد السنين 🤣 .. لقيت إني لازم أتعمّق في شخصيات بعينها .. زي ( نيوتن ) مثلاً .. اللي شرحته في البوستين اللي فاتوا .. ف ده نتيجة أكتر من كتاب قرأتهم عنه .. يمكن أشهرهم هو ( Never at rest ) ..

و من ضمن الشخصيات دول برضو .. و اللي لازم تقف عنده فأى رحلة في تاريخ ( طيف الترددات الكهرومغناطيسية ) .. هو :

توماس يونج = Thomas Young .

و اللي الكتاب اللي بيحكي قصّته إسمه :

( The last man who knew everything = آخر راجل عرف كل حاجة 🤣 ) .

و اللي قرأته أيام ما كنت باتفرّج علي مسلسل ( Fringe ) أيام ما كان بينزل .. و هو اللي عرفني علي الكتاب ده .

المهم ..

سبب إني إفتكرت بقي موضوع شرودنجر البيدوفيلي ده .. لما قررت إني أشرح المرحلة دي من التاريخ ( مرحلة ما بعد نيوتن ) .. هو إن التساؤل بيرجع يفرض نفسه تاني .. و بقوة ..

تساؤل :

هل العلم يتم دراسته بالإستقلال عن شخصية و نفسية العالم ؟! ..

أو كما يتم دراسة التساؤل ده حالياً ( Should we separate the art from the artist ) ..

و حتفهم ليه .. لما تعرف قصة ( توماس يونج ) فعلاً .

إنت غالباً سمعت إسمه قبل كده ( لو إنت كنت طالب ثانوي شاطر 😅 ) .. أو حتي لو إنت كنت شاطر فأى مجال من مجالات العلوم أساساً .. أو حتي لو ليك علاقة ب مصر 🤣😅..

- تجربة الشق المزدوج ( اللي بتثبت إن الضوء له طبيعة موجية ) .

- معامل يونج ( اللي يعرفه أى مهندس مدني ) .

- قاعدة يونج ( اللي بيستخدمها الدكاترة و الصيادلة عشان يحسبوا جرعة الدوا للأطفال )

- حجر رشيد 🤣 .. آه والله العظيم .. يونج هو اللي فك الشفرة بتاعته .. و اللي بعد كده إعتمد علي شغله شامبليون ( اللي سرق مجهود يونج و خد البوستات بتاعته كوبي بيست من غير ما يعمله مينشن أو تاج أو شير 🤣🤣 ) ..

الكتاب واضح من عنوانه صح ؟! .. ( آخر الرجال اللي كان عارف كل حاجة ) ..

الراجل ده ( يونج ) .. كان بيتكلّم 14 لغة بمهارة و إتقان .. منهم أساساً كذا لغة ميتة .. قبل ما أدهم صبري يكون معروف ..

و اللي هو كان أساساً شغلته الأساسية هي : دكتور طبيب ..

و ناجح جداً جداً جداً كمان ..

و لكنه كان ( طيب ) .. كان ( حنيّن ) .. و .. لا .. ماطلعش كداب كبير 😅 ....

لكنه وقع مع ( كداب كبير ) ..

بلطجي كبير .. أوي ..

و البلطجي ده .. أثبت القاعدة المعروفة دايماً .. و هي : البلطجة و القوة .. بتفوز .. دايماً ... للأسف ..

طيب .. إيه اللي حصل بالظبط ؟! ..

خلّيني أشرح من البداية إذن .

عشان تفهم شخصية ( توماس يونج ) .. لازم الأول تعرف معلومات أساسية عن ( دينه ) .. أو بالأدق .. طائفته الدينية .. طائفة ال ( ناس اللي بترتعش 🙂 = Quakers ) ..

بإختصار شديييييييييد جداً :

الطائفة دي .. طائفة مٌنشقة عن الكنيسة البروتستانتية .. اللي هي أساساً مٌنشقة عن الكنيسة الكاثوليكية ..

و زماااااااااااان .. كنت شرحت في بوستات ( عصر النهضة بالحلمنتيشي ) .. تاريخ نشأة الطائفة البروتستانتية دي بالكامل .

ف فإنجلترا سنة 1650 .. بيحصل المٌعتاد فأى مكان في العالم و أى زمن في التاريخ .. و هو إن الناس تعلّي علي بعضها ..

ف بيطلع واحد إسمه ( جورج فوكس ) .. و يقرر إن ( كل اللي بتعمله المؤسسة الدينية في إنجلترا ... فاسد ) .. و إن الدين الحق مافيش فيه ( فساد مادي .. فساد سلطة .. فساد من أى نوع ) .. و بيقرر يعمل جماعة مع إصحابه و يسموها :

( مجتمع الصٌحاب المتدينين 🤣 = The Religious Society of Friends ) ..

مجتمع رافض أى شكل من أشكال السٌلطة الدنيوية .. و كل ما فسد في السٌلطة الدينية بسبب ده .

سبب إسمهم المشهور ( اللي بيرتعشوا = Quakers ) .. هو إنهم بيفضلوا قاعدين ساكتين مع بعض في هدوء تاااااااااااااام .. و فجأة لما أى حد فيهم يحس إن ( الضوء الإلهي نزل عليه فجأة ) .. بيرتعش و يبدأ يتكلّم باللي هو بيحس بيه ..

فالناس كانت بتضحك عليهم و تتريّق .. و بعدين الإسم لزق .

أنا شخصياً إتفاجئت و أنا باراجع معلوماتي عشان أكتب البوست ده ... إن في أسامي ماكنتش أعرفها .. طلعوا هما كمان من أشهر ال ( اللي بيرتعشوا ) 🤣 ..

منهم مثلاً ( مؤسسين كادبوري = بتوع الشيكولاتة ) .. و ( مؤسسين كيت كات = بتوع الشيكولاتة برضو ) .. و سبب إنهم ركّزوا أوي علي موضوع الشيكولاتة و الحلويات ده .. إنهم ( الجماعة دول ) .. مابيشربوش كحوليات .. ف كانوا بيدوروا علي حاجة يقدموها للناس بدل الكحوليات .. آه والله العظيم .

أنا كنت أعرف عن نشاطهم البنكي ( بنك باركليز مثلاً ) .. و ( جامعة وارتون للبيزنس في أمريكا ) ..

و سبب إني كنت أعرف عن نشاطهم البنكي .. إني أيام ما كتبت عن البيتكوين زمااااااااااااااااااااااااان .. تعمقت في تاريخ البنوك .. و المرجعيات الدينية و الفلسفية لنشأة أشهر البنوك أيامها .

و سبب إن الجماعة دول ( اللي بيرتعشوا ) .. أصبحوا من أشهر و أكبر المؤسسات المالية في العالم .. هو : أمانتهم و دينهم .

الناس دي كانت كلمتهم قسم ( هما مابيقسموش إطلاقاً .. لأنهم بيعتبروا إن القسم معناه إن باقي كلامهم ممكن يكون مش صدق .. و ده ضد دينهم ) .. ف بالنسبة لهم .. لو قالوا كلمة .. ممكن يموتوا نفسهم مقابل إنهم ينفذوا الكلمة دي فعلاً .

و الناس دي كمان .. مابتسعاش لأى مظهر من مظاهر الرفاهية في الحياة .. إطلاقاً .. بتاتاً ..

دينهم و حياتهم حرفياً هي : الشغل ثم الشغل ثم الشغل ... لأن الشغل هو العبادة و العبادة هي الشغل بالنسبة لهم .

و لأن الناس دي مابتقسمش إطلاقاً لأى شيء و علي أى شيء ...

و لأن فبريطانيا كان لازم تقسم بالولاء للملك عشان تعيش و تعمل أى حاجة هناك ..

فالنتيجة إن الناس دول تم نفيهم و العنصرة ضدهم بكل الأشكال .. و إتمنعوا من إنهم يدرسوا فأى مدارس حكومية أو يشتغلوا أى وظيفة مرموقة ..

فإتجهوا للتجارة قسراً ..

و نتيجة طبيعة دينهم .. أصبحوا أكثر التجّار الموثوق فيهم .. و اللي ممكن تسيب معاهم فلوسك ( تأمنهم بقنطار ) .. و يؤدّوه إليك ..

ف تحولوا إنهم أصبح معاهم ثروات و ثروات .. كان التطور الطبيعي لهم إنهم يبقوا ( البنوك ) للي حواليهم .

لكن .. لو تتبعت الخيط ده ( زي ما أنا تتبعته زمااااااااااااااان سنة 2014 ) .. حتوصل ل ( معضلة اللي بيرتعشوا = Quakers Paradox ) ..

اللي هي :

الثروة عموماً .. و البنوك خصوصاً في عالمنا الحالي دائماً و أبداً ما بتكون جزء أساسي في مٌعادلة القوة .. اللي هي مٌعتمدة علي الفساد و الحروب .

ف بالرغم من إن الجماعة دول .. فأعماق دينهم مسالمين تماماً .. مستحيل يشاركوا فأى حرب بأى شكل من الأشكال ..

ثروات أحفادهم حالياً ( The grandson problem ) .. أصبحت جزء أساسي في تشكيل معادلات القوة و الحروب في عالمنا اللطيف بتاع دلوقتي .

المهم بقي ..

إن سنة 1773 .. بيتولد ( توماس يونج ) .. لأب و أم ( بيرتعشوا 🤣 = Quakers ) ..

أبوه ( تاجر و موظف بنك ) .. و أمه .. ست بيت عادية جداً بتساعد جوزها في تجارته .

و لأن زي ما شرحت .. الطائفة دي كانت ممنوعة من أى مدارس حكومية أو أى تواجد مسموح في الدولة ...

و لأنهم ( حرفياً كانوا بيعبدوا الشغل و الدراسة ) ..

ف الطائفة علي مدار ال100 بين نشأتها و بين ولادة ( يونج ) كونوا شبكة من الدروس و المكتبات و كل قنوات التعليم ال ( غير مركزي = Decentralized) ..

لااااااااااااااااااااااااازم هنا تركّز جداً جداً علي النقطة دي ..

لأن .. اللامركزية في التعليم دي .. لها عيوب ضخمة ( مافيش طابور الصبح مثلاً .. مافيش كانتين .. مافيش زي موحّد للمدرسة 🤣 ) ..

لكن مزاياها ؟! ... مزاياها ضخمة جداً جداً جداً .. و يمكن أهمها هي :

إن الطفل بيتعلّم إنه يفصل ( سٌلطة ) المٌعلّم .. عن العلم ذاته ..

لأن .. الطفل لما بيتعلم نفس المعلومة .. من أكثر من مٌعلّم .. و بأكثر من طريقة .. بيتعلّم يتسائل عن أسباب الإختلاف .. يتعلّم يفهم ( كيفية التعلّم و البحث ) .. قبل ما يتعلّم ( السمع و الطاعة ) .

و الطفل الأعجوبة ( توماس يونج ) .. اللي عنده سنتين .. و بدأ يقرأ و يكتب فمستوي أطفال عندهم 10 سنين !! ..

و اللي علي سن 6 سنين .. حيكون بدأ يتعلّم لٌغات مٌختلفة .. و حفظ نص الإنجيل تقريباً ..

علي ما بيوصل 19 سنة .. بيسافر سكوتلاندا و بعدين ألمانيا ( عشان يدرس الطب ) لأنه ماكنش مسموح له بدراسة الطب في إنجلترا ..

و لكن قبل ما أكمّل قصته .. و أشرح إزاي الدماغ دي .. كان بيٌعتبر آخر ال ( بولي ماث = Polymath = العلماء الجامعين ) في العصر الحديث ..

و إزاي و ليه كان بيفكّر في الفيزياء زي الطب زي اللغات فنفس ذات الوقت و اللحظة ..

لازم أتسائل ..

عند أنهي مرحلة .. كان حيبقي عنده القدرة إنه يقرأ بوست قصير زي ده .. من غير ما يشتكي إنه قصير زي أغلب التعليقات اللي باشوفها 😅🤣

الإجابة إذن في الجزء القادم إن شاء الله ..

و الله أعلم .