ألوووو .. ألوووووووووو .. أيوااااا .. سامعني كده ؟! ..

ألوووو .. ألوووووووووو .. أيوااااا .. سامعني كده ؟! .. طيب إستني حاروح جنب الكٌرسي اللي عنده شبكة .. سامع كده ؟! .. تمام .. ما هو الشقة كلها مافيهاش شبكة .. غير عند الكٌرسي ده 🙂 .

سؤال : الموقف ده إتكرر في حياتك أو حياة حد تعرفه كام مرة ؟!

السؤال اللي بعده ( و الأهم ) :

هل حاولت تفهم ليه ؟! .. ليه الشقة كلها مافيهاش شبكة .. غير عند الكٌرسي ده ؟!

عشرات .. بل يمكن مئات من المواقف و المشاكل و الإحتياجات .. بتعدّي عليك يومياً في حياتك .. شبه الموضوع ده بالظبط ..

لكن ..

لكن بكل تأكيد لو فجأة لقيتني طالع لك من المطبخ بعد ما خلّصت المٌكالمة بتاعتك.. و سألتك :

( مش عايز تفهم ليه الشقة كلها فيها شبكة المحمول ضعيفة غير عند الكٌرسي ده ؟! ) .

حترد عليا و تقول :

مش فاضي .. الموضوع حياخد وقت طويل .. و إن وراك شغل و حياة و تفاصيل و إحتياجات و أسئلة تانية كلها أهم بالنسبة لك ... صح ؟

سنة 1796 .. الشاب اللي عنده 23 سنة .. اللي إسمه ( توماس يونج ) .. ورث ثروة ضخمة .. جداً .. جداً .. من عمه اللي مات ..

الشاب ده ( زي ما شرحت في البوست اللي فات ) .. كان طفل ذكي جداً .. و إتربّي في بيئة طائفة ال ( رعّاشين = Quakers ) .. اللي أجبرته إنه يدرس بشكل غير مركزي ... لأن الطائفة كانت ممنوعة من دخول المدارس الحكومية ..

و إتعلم الإعتماد علي نفسه في تعليم نفسه .. مش علي منهجية تقولب دماغه و تفكيره .

ف بالتالي .. جزء كبير جداً في تكوينه النفسي و العقلي كان :

"ماتنتظرش حد ييجي يحل لك مشاكلك . "

و ده بالمناسبة متسّق جداً مع تنشئته الدينية برضو ( طائفة الرعّاشين ) ..

ف بمجرد ما ورث الثروة الضخمة دي بعد موت عمّه .. و اللي كانت تسمح له إنه يعيش حياته كلها بدون ما يضطر يشتغل يوم واحد عشان يجيب فلوس ..

أصبح حٌر ..

الحرية اللي المفروض إن أى إنسان علي وجه الأرض يسعي لها طول الوقت ..

الحرية اللي تسمح لك إنك تفكّر .. بدون ما تحس إن في كٌرباج بيلسوع ضهرك عشان تجيب فلوس أو درجات أو تحصل علي رضا إنسان آخر عنك .

في بدايات شبابه و هو عنده 15 سنة .. " توماس يونج " كان جاله مرض الدرن ( السٌل = Tuberculosis ) .. و ده كان بيٌعتبر حكم إعدام في الوقت ده ( 1788 ) .. كان مرض العلاج منه شبه مستحيل .. و لكنه بينجو منه بأعجوبة ..

لاحظ هنا إن الشاب ده أساساً مش ( ضعيف هزيل ) .. بالعكس ..

توماس كان بيحب ركوب الخيل و الجري و التنطيط جداً .. و بطله المٌفضّل كان " أحمد السقّا " أكيد 🙂 .

فبالتالي ..

الحياة اللي لقي نفسه فجأة مجبور عليها .. ( أكل بحساب و شرب بحساب و حركة بحساب ) .. بسبب التدمير اللي بيسببه مرض الدرن للرئتين ( حرفياً مابتعرفش تتنفس و العياذ بالله ) ..

كانت بالنسبة ل توماس هي ال ( إحتياج ) .. ال دافع الأكبر اللي أصبح بيحرّكه في الحياة .

فبالتالي .. بيتخصص في دراسة الطب ..

بالرغم من إنه في الوقت ده كان عنده الإمكانية إنه يختار أى مجال آخر ..

بيتكلّم 14 لغة حية و ميتة ... دارس فيزياء و هندسة و رياضة علي مستوي أى حد متخصص ..

و لكن (إحتياجه الأساسي كان : الطب ) ..

ف بعد ما بيورث الثروة الضخمة دي من عمّه .. بيبدأ يكرّس الجزء الأكبر من وقته و مجهوده .. في الإتجاه الطبيعي و المنطقي جداً بالنسبة له .. الطب .

المٌعادلة دي إذن :

( شاب عبقري بكل المقاييس + أصبح معاه ثروة ضخمة جداً + و عنده إحتياج أساسي + و تنشئته من طفولته هو دين ( الرعّاشين ) زي ما شرحت تفاصيله في البوست اللي فات ) .. تٌنتج إيه ؟!

نسيت أقول لك معلومة مٌهمة جداً جداً هنا .. ( أو أجّلت إني أقول لك عليها 😅 ) .. و هي :

توماس يونج كان عنده ( قصر نظر ) .

يعني كان بيحتاج يلبس نضّارة مسافات ( زيي 😁 ) ..

و معلومة تانية مهمة جداً جداً جداً برضو .. ( يونج ) حب الحياة بالكامل .. حبّها لدرجة إن حب يستمتع بكل حاجة فيها ( بالرقص و الحفلات و السهر و الستّات ) .. لدرجة إنه عند مرحلة مٌعينة .. بيسيب ديانته ( الرعّاشين ) .. و بيعلن الولاء للكنيسة البريطانية .. عشان يعرف يلبس براحته و يرقص ( كان بيحب الرقص جداً ) .. و يعيش حياته بالكامل .

سبب إني شرحت لك كل اللي فوق ده بقي ( بإختصار شديد ) .. و شرحت لك جزء من طفولة ( يونج ) في الجزء اللي فات ..

هو إنك تفهم ..

تفهم إن مافيش إنسان بيصحي الصٌبح من النوم .. يقرر يعمل تجربة و يسمّيها ( تجربة الشق المزدوج ) 🤣 .. و يكتشف بيها إن الضوء له طبيعة موجية .. و بعدين يقرر فرض التجربة دي في المناهج علي الأطفال في ثانوي عام .. و في الكليات 🤣🤣 .

بدون سبب .

أنا قرأت أول مرة في حياتي عن تجربة الشق المزدوج دي .. و أنا في تالتة إعدادي .. لما سرقت كتب أحمد أخويا لما كان في تالتة ثانوي .. و كانت عليه في الفيزياء .

و طبعاً إتولد جوايا أسئلة كتيييييييييير جداً .. كانت أدواتي في الإجابة عليهم محدودة للغاية ( الكلام ده سنة 2002 ) .

و بعدين .. لما دخلت كلية .. و بدأنا نتعرّض ل معادلة شرودنجر ( البيدوفيلي ) .. و باقي تفاصيل طيف الترددات الكهرومغناطيسية ..

كنت باتعصّب و أتنرفز أكتر .. كل مرة القصص بتاعت ال200 سنة دول يتحكوا .. ك لقطات مقطوعة من فيلم طويييييييل أوي ..

و مافهمتش تسلسل الأحداث غير بعد كده ب سنين ..

الطفل ( توماس يونج ) اللي قرأ و درس و أتقن 14 لغة .. إكتشف إن ال14 لغة .. بينهم علاقات ... كتير .. جداً . .

إكتشف إن الكلام و اللغات .. لها أصول واحدة .. و لما تفهم الأصول دي و تفهم العلاقات .. تفهم جزء كبير جداً من شكل و صورة العالم .

هو هو نفس الطفل اللي لما بدأ يدرس الطب .. بدأ يشوف جسم الإنسان ك ( نظام واحد متجانس ) .. كل جزء فيه بيوصل علي كل جزء تاني ..

ماينفعش إطلاقاً تدرس مرض جلدي مثلاً .. بدون ما تفهم الإنسان ده أكل إيه ..

ماينفعش تدرس مرض تنفسّي زي الدرن .. بدون ما تفهم الدورة الدموية ..

و بنفس الطريقة ..

ماينفعش تدرس العين .. و الإنسان بيشوف إزاي ..

من غير ما تفكّر في الودان .. و الإنسان بيسمع إزاي ..

لو شفت أى حد عنده قصر نظر شديد شوية .. حتلاقيه دايماً لمّا بيحاول يبص علي حاجة بعيدة .. بيضيّق عينيه ..

و علم ال ( نضارات ) كان موجود بقاله 500 سنة تقريباً في الوقت ده .. و الناس بتلعب بالنضارات و العدسات و التيليسكوبات براحتها عادي خالص ..

لكن .. عشان يعالجوا المشكلة .. مش يتسائلوا ( هو سبب المشكلة إيه ) ؟!

يونج .. بيبدأ يدرس تشريح العين ..

هدفه الأول من ده هو : البحث عن العلاقات ..

بنفس الطريقة اللي هو ك طفل كان بيدرس بيها اللغات .. و لما لغة تقف معاه أو مايعرفش يفهمها .. كان بيتعامل معاها علي إنها فزّورة .. شفرة .. و يحاول يحلها عن طريق العلاقات و التشابهات بينها و بين كل لغة تانية هو يعرفها .

دي هي نفس الطريقة اللي بعد كده بيكتشف بيها سر حجر رشيد ..

توماس يونج هو الوحيد في العالم في الوقت ده اللي إكتشف أول كلمة مٌفتاحية في حجر رشيد ( بين اللغتين الديموطيقية .. و اليونانية القديمة ) .. ف بالتالي بيكون ده أول كلمة بتتعرف في اللغة التالتة في الحجر ( الهيروغليفية ) في التاريخ .

و لكن لأن شاملبيون كان هو اللي رايح جاي علي مصر .. و هو اللي شرب من نيلها .. ف هو اللي قعد يغنيلها بعد كده 🤣 ..

شامبليون خد الإكتشاف بتاع يونج .. و طلع يجري كمّل إكتشاف باقي الحروف و الكلمات اللي حجر رشيد .

و لأن فرنسا ( بلد شاملبيون ) .. و إنجلترا .. كان دايماً بينهم خناقات علي مدار التاريخ ..

و شامبليون أساساً كان شخصية مش ولابد 🤣 .. ف طلع يجري فكل العالم يقول إنه إكتشف السر لوحده .

لكن .. نرجع تاني لموضوع العين ..

توماس و هو بيشرّح العين .. بدأ يتسائل ( الناس اللي عندها قصر نظر زيي .. بتضيّق عينيها ليه عشان تشوف البعيد ) ؟!

و بعدين بدأ يبص علي الودن ..

في الوقت ده .. الناس كانوا خلاص مٌتفقين إن الصوت عبارة عن موجات .. طاقة بتتنقل عن طريق تضاغطات و تخلخلات في الهوا .. علي شكل موجات .

لكن .. عمو نيوتن ( أكبر سٌلطة علمية في تاريخ بريطانيا ) .. و اللي ميت من 100 سنة تقريباً .. قال بوضوح إن الضوء عبارة عن ( كور صغننة ) .. بتطلع من الشمس أو أى مصدر ضوء .. تخبط في الحاجة اللي قدامنا .. و تمشي لحد ما تدخل عينينا ( زي ما عمو الحسن بن الهيثم قال زماااااااان ) ..

لكن .. الكور الصغننة دي ( كل حاجة في الحياة بالنسبة لنيوتن كانت كور بالمناسبة ) .. تخلّينا نضيّق عينيا عشان نشوف البعيد بوضوح ليه ؟!

مش المفروض العكس ؟!

إننا لو عايزين نشوف حاجة بعيدة .. إننا نوسّع حدقة العين ؟! .. عشان ندخّل كور أكتر ؟!

طيب ما تيجي نشوف ؟! ..

إحنا نجيب أوضة ضلمة خالص .. و نفصلها إتنين ( يبقي عندنا أوضتين يعني ) ..

و نجيب شمعة و نحطها في الأوضة الأولانية ..

و بعدين نخرم الجدار بين الأوضتين خرم صغنن خالص خالص ( نفس تجربة الحسن بن الهيثم ) ..

حنشوف الشمعة بالعكس علي جدار الأوضة الأولي ..

ده كله مفهوم و الناس عارفينه من زمان ..

لكن .. ماذا لو خرمنا خرم تاني جنب الخرم الأولاني ..

مش المفروض إذن إننا نشوف ( شمعتين مقلوبين ) جنب بعض و بٌعاد عن بعض ؟! ..

اللي هو إتخيل بالظبط إنك جايب حمزة عبد الكريم يشوط كور من نقطة الجزاء .

و لكنك حطّيت قدامه بينه و بين الجون .. جدار كبير .. و خرمت فيه خرمين جنب بعض علي قد الكورة بالظبط ..

و طلبنا من حمزة إنه يشوط علي كل خرم مرة ..

الطبيعي و المنطقي .. إنك لو واقف في الجون ورا الجدار .. إنك حتلاقي الكورة مرة جاية لك من الخرم اليمين ... و مرة جاية من الخٌرم الشمال ..

صح ؟!

عمو نيوتن بيقول كده ..

العالم كله بيقول كده بقاله 100 سنة ..

لكن ..

اللي بيتفاجئ بيه توماس يونج ... إنه و هو واقف في الجون .. و حمزة عبد الكريم بيشوط ..

إن في كور بتيجي فنص الجون ؟!!!!!

و كور بتيجي فكل مكان علي هيئة خط ( باركود ) ؟!!!!!!..

و إطلاااااااااااااقاً مش في إتجاه خط مستقيم من رجل حمزة .. للخٌرم .. للجون .. زي ما كان هو متوقع .. و زي ما كان عمو نيوتن بيقول .

ده معناه إيه ؟!!!!

ده معناه :

إن إما حمزة بيخم .. و إنه بيشوط من أماكن مختلفة .. مش من نقطة الجزاء بس .. ( مصدر الضوء مش نقطة واحدة يعني ) ..

أو إن عمو نيوتن زمااااااااااان .. كان غلط ..

و إن الضوء مش ( كور صغننة ) ... و لكنه زي ما الأغنية اللي كان مشغّلها ( توماس يونج ) علي سبوتيفاي :

الموجة تجري ورا الموجة .

لاحظ هنا بقي نقطة مهمة جداً جداً جداً ..

نيوتن في الوقت ده كان : سٌمعة و كرامة إنجلترا بالكامل ..

في وقت حرب بين إنجلترا و فرنسا ..

في وقت الحملة الفرنسية ( و عمو نابليون ) علي مصر ( ده اللي سرق حجر رشيد من عندنا لو تفتكر ) ..

يعني تخيّل كده .. لو لا قدّر الله .. فوقت ( مصر ) فيه كانت كلها مشحونة و بتشجّع .. و الأغاني الوطنية شغالة فكل حتة ..

و فجأة لقيت واحد طالع بيقول : زويل كان غلط .. و المفروض يسحبوا منه جايزة نوبل 🤣🤣🤣 ..

تتخيل .. رد الفعل حيكون عليه عامل إزاي ؟!!! 🤣

إفضل تخيّل بقي .. لحد الجزء القادم إن شاء الله .. 😅

و الله أعلم .