في ماتش مصر اللي جاي ضد الأرجنتين .. حأفتكر كوريا 😅 .

تأثير ( حٌسام حسن ) علي اللاعيبة .. و الجمهور .. و الحطّابين في الصحاري .. و الصيادّين في المزارع .. و المٌزارعين في البحار ..

تأثير حقيييييييييييقي جداً .. جداً .. مش مٌجرد إيحاء ..

نسبة قليّلة جداً من البشر اللي عندهم القدرة دي بشكل فطري ..

إنه يقول خٌطبة فوسط مجموعة .... يوّلع فيهم الحماس و يخليهم يآمنوا بهدف مٌعين .. و يغير من مٌعدلات إنتاجهم و قدرتهم فعلاً بشكل ملحوظ .

في بوستات لاحقة ممكن أتكلم تفاصيل الموضوع ده بشكل أكبر .. و عن أمثلة كتير لل ( نوعية ) دي من البشر .. و اللي في المٌعتاد دائماً و أبداً بنعرف عنهم من قصصهم في مراكز القيادة ..

لأن النوعية دي في الأغلب .. دايماً بتوصل لمركز قيادي ..

و لكن .. البوست ده عن واحد بس من أشهر الأمثلة دي .. و اللي لو حتكلّم أى حد مٌهتم بأى حاجة لها علاقة بال ( فلوس , بيزنس , تكنولوجيا , ... و الأرجنتين بالذات ) .. لازم حيكون سمع عنه ..

أو عن اللي بناه ..

و هو :

بوسكوووووووو ( POSCO ) .. ده إسم الشركة مش الشخص 😅 .

الشخص إسمه ( بارك تاي-جون ) ..

و الشركة دي .. تبقي أحد المٌعجزات الإقتصادية و الصناعية خلال ال100 سنة اللي فاتوا .. و هي شركة كوريا الجنوبية للحديد و الصلب ..

و ( بارك تاي-جون ) ده .. تقدر تتخيله كده شبه ( حٌسام حسن ) في نفسه 🤣 .. مش شوية فروقات بسيطة :

( كان مهندس ميكانيكا ... جينيرال في الجيش .. و ماكنش أصلع 🤣) .

لكن .. قبل ما أحكي لك هو قال لهم إيه بالظبط بين الشوطين ( بارك تاي-جون ) مش حٌسام حسن أقصد 🤣 ..

و قبل ما أحكي لك بالظبط هو مين ... و عمل إيه .. و ليه أنا باعتبره أحد أفضل شخصيات القصة اللي بنحكيها حتي الآن ..

لازم أعرف الأول إنت ( ك قارئ ) جاي جديد هنا مٌباشرة .. ولا متابع من الأول ؟!

ده البوست السادس في سلسلة ( قصة LG و كوريا الجنوبية ) .. اللي باستمتع شخصياً دلوقتي فعلاً و أنا براجع كل تفاصيلها أثناء كتابتها خلال الأيام اللي فاتت ..

الأجزاء ال5 اللي فاتوا موجودين قبل البوست ده علي البروفايل هنا .. اللي عليهم صورة ( إعلان حازم إمام ل LG ) .

و في نهاية البوست اللي فات ( الجزء الخامس ) .. وقفنا لما الجينيرال ( بارك ) قال ل ( تشونج = رئيس هيونداي ) في بداية السبعينات :

" عايز سٌفن عملاقة " 🙂 .

لاحظ هنا .. إن البلد اللي إتقال فيها كده .. ماكنش فيها أى حاجة عملاقة أساساً قبل كده ..

هيونداي ذات نفسها في الوقت ده .. كانت مٌجرد ( مصنع تجميع صغنن عالضيّق كده ) ل عربيات فورد ..

اللي هو كل ممتلكاتهم في الحياة كانت مفكّين تلاتة و كام مٌفتاح 24 و بكرتين لزق مثلاً 🤣.. و بيدخل له عربية فورد من ناحية متفككة .. يركبها فبعضها و يطلعها من الناحية التانية و شكراً .

ف لما تروح ل حد بالمنظر ده .. و تقول له : قشطة .. أنا بقي عايزك تبنيلي مصنع سٌفن عملاقة هنا ..

عايزك تتخيل الرد كان إيه 🤣 .

لكن .. زي ما شرحت .. رئيس هيونداي شاف ( الجينيرال بارك ) و هو بيستعد يبيّعه هدومه حرفياً و يبيعه خٌردة ل ( كيم = رئيس دايو ) ..

ف ( تشونج ) بيروح واخد أول توكتوك و طالع علي بريطانيا .. و يقعد عالرصيف قٌدّام البنك مستني دوره ييجي ... و يدخل علي الموظف و يقول له :

عايز قرض 🥹 .. الله ما يحوجك لحد و لا يسلّط عليك ديكتاتور إيده طارشة .. إديني قرض ..

موظف البنك بيسأل : حتعمل بيه إيه ؟!

تشونج بيرُد : الديكتاتور بتاعي حالف ما حيدخّلني الشقة إلا و أنا معايا سفينتين عمالقة ( tanker-ships ) و عايزني أبنيله ورشة صناعة سٌفن عملاقة كمان .

موظف البنك بيسأل : إنت مين يا جدع إنت و دخلت هنا إزاي ؟! .. ورشة سٌفن عملاقة إيه اللي عايز تبنيها ؟! .. مين اللي دخل الراجل ده هنا ؟! .. فين الأمن ؟! .

تشونج بيرٌد : لااااااااااااااااا .. إنت فاكرني مييييييييين .. إنت عارف إنت بتكلّم مين ؟! ..

و راح مادد إيده في جيبه فجأة .. ف كل الناس تأهبّت .. و راح مطلّع .. إحم .. 500 وون ( won ) .. ما يٌعادل نص جنيه مصري🤣🤣 حرفياً أيامها ( سنة 1971 ) ..

موظف البنك بص له .. و بص للي حواليه .. و بعدين زعّق تاني :

يا أخواننا مين اللي دخّل الناس دول هنا ؟! .. يا جدعان الراجل بيحاول يرشيني ب نٌص جنيه 🤣🤣 ..

تشونج بيرٌد : بٌص ياض عالورقة ياض .. بٌص علي ضهرها .. شايف إيه ؟

الورقة علي ضهرها في رسمة سفينة من أشهر تصميمات السٌفن الضخمة في تاريخ كوريا .. حاجة إسمها ( Turtle Ship = Geobukseon = سفينة الزٌحلفة يعني 😅 ) ..

و راح ( تشونج ) مزعّق فيهم و قال : انا تشونج بتاع هيونداي سليل الكوريين .. إحنا اللي بنينا السٌفن العملاقة دي 300 سنة قبل ما بريطانيا حتي تتجرّأ تبل رجليها في المياة ..

و دلوقتي بنوعد إننا لو بدأنا تاني و رجعنا الكار .. حنرجع بهيبتنا و نقعّد الهواة في بيوتهم .

موظفين البنك خافوا و بدأوا يقتنعوا .. و ردّوا عليه : تسلم يا سيد المعلمين .. اللي ما يعرفك يجهلك .. لكن ما هو برضو حٌط نفسك مكاننا .. إنتوا ولامؤاخذة لسة طالعين من إحتلال ياباني .. و ماسمعناش يعني إن إنتوا حتي صنعتوا معلقة شاي ..

حتجيبوا ولامؤاخذة حديد منين تبنوا سٌفن ؟! .. نضمنك إزاي ؟!

تشونج رد عليه : مش قصّتك الحديد .. إنت حتتدخّل في شٌغلنا ياض ؟!

هات إنت الفلوس .. و ليك إنك تاخدها و عليها فوايدها .. هو أكل و بحلقة ؟!

الموظف رد : طيب عالأقل طمّننا يا معلّم إنك عندك زبون للسٌفن اللي حتبنيها دي .

تشونج قال : آمين .. أجيب لك الزبون .. تكيّشني ؟! ..

الموظف قال : أكيّشك .

تشونج راح طالع واخد أول توكتوك من بريطانيا .. طالع عاليونان ..

راح علي وكالة الحاج الكبير ( جورج ليفانوس ) .. أشهر تاجر سٌفن عملاقة في العالم وقتها ..

و قال له : ولامؤاخذة إنت بتشتري السفينة علي 10 جني إسكندراني .. صح ؟

أبيعها لك أنا علي 6 ؟!

جورج رد : آمين .. و أنا إشتريت .. نقرا فاتحة ؟!

تشونج كان فاتح الكامير و بعت الفيديو بتاع الفاتحة ده واتس لموظف بنك باركليز اللي فبريطانيا .. راح موظف بنك باركليز عامل له ( 👍 ( علي الفيديو .. و باعت له سكرين شوت بتحويل إنستاباي بالقرض .

*** القصة اللي فوق دي حقيقية بالكامل 100% بالمناسبة 🤣 ..

العٌملة ال500 وون اللي إستخدمها تشونج في الإجتماع ده ما زالت متبروزة في متحف هيونداي التاريخي حتي يومنا الحالي .

تشونج خد الفلوس .. و قرر يكافئ نفسه و خد الكٌرسيين اللي قٌدّام في أول ميكروباص من اليونان علي كوريا .. و راح ل الجينيرال ( بارك ) و قال له :

آدي الفلوس .. و آدي الزبون ... فين الحديييييييييييييد ؟!!

الجينيرال بارك إبتسم إبتسامة ذات مغذي .. و راح مشاور له علي الراجل اللي شبه حٌسام حسن و قاعد علي ترابيزة الإجتماعات ..

و قال له :

سلّم علي الجينيرال ( بارك تاي-جون ) .. رئيس مجلس إدارة شركة بوهانج لإنتاج الحديد و الصٌلب = POSCO (Pohang Iron and Steel Company) ) .

إيه بقي قصة ( بوسكو ) دي ؟!

زماااااااااااااااان .. ليلة ما كان الجينيرال ( بارك ) بيلّم عساكره و إصحابه عشان يطلع يسطو علي الحٌكم تاني يوم بعد الصلاة ..

راح رايح مميّل علي أحد أعز أصدقاءه و اللي يٌعتبر تلميذه .. الجينيرال ( بارك تاي-جون ) .. و قال له : إنت مش طالع معانا الليلة دي .

بارك تاي-جون كان لسة حايطلّع صوت مش كويس و يقول كلمة مش كويسة ..

الجينيرال ( بارك ) قال له : إهدي ياض .. أنا عايزك إنت تفضل عايش و ماتتمسكش .. عشان لو فشلنا و إتعمل معانا الجٌلاشة .. حد ياخد باله من بيوتنا و عيالنا .

و بمجرد ما نجح الإنقلاب .. بارك الكبير راح باعت ل بارك الصغنن .. و قال له ألف مبروك .. إنت من النهاردة دراعي اللمين .

طيب .. يعمل إيه بقي ب دراعه اللمين ده ؟!

فاكر لما اليابان كانت محتلة كوريا لمدة 35 سنة مشرباهم فيهم الويل و الذل ؟! .. و بعدين خدت إتنين نووي ورا بعض و طلعت من كوريا بعدهم مباشرة ؟! .

لمدة 15 سنة بعد كده .. و اليابان بتستسمح كوريا تسماحهم ..

و تطلب منها إنها ماتزعلش .. أصل ماكنوش يعني 200,000 ست تم إستعبادهم جنسياً .. و ملايين ماتوا .. و 35 سنة ذل و إحتلال .. مايبقاش قلبك إسود بقي .

لكن في الحقيقة ده لأن اليابان كانت بتدور علي أى وسيلة تحمي بيها نفسها من كوريا الشمالية بالذات .. و الصين .. اللي هما الإتنين برضو كانوا مأذيين و ناويين لليابان عالشر .. لكن ماكنش لهم سكة اليابان تدخل لهم منها .. لأنهم كانوا متدفيين بفلوس الإتحاد السوفييتي قبل ما يٌقع .

فبالتالي .. اليابان كانت جاهزة تشتري رضا كوريا الجنوبية بأى حاجة ..

ف كوريا الجنوبية قالت لها : قشطة .. هات فلوس .

شعب كوريا الجنوبية حرفياً كان بيشتم ليل و نهار في حٌكّامه الخونة المتواطئين مع اليابان ..

تبيع حقنا و ذلنا و دمنا و تاريخنا و سنين عمرنا بالفلوس ؟! ..

كام مليون يعوّض شعرة بنوتة كورية واحدة ؟!

لكن الجينيرال بارك كان فعلاً محتاج الفلوس دي .. لأنه كان قبلها راح يطلب قرض كالمعتاد من ( World bank ) عشان يبني محطة إنتاج حديد و صٌلب ضخمة .. و ال( بنك العالمي ) سقّعله و عمل seen علي رسالته و ماردّش .

ف الجينيرال بارك .. بيمضي مع اليابان .. إتفاق ال ( Reparations = فلوس الإعتذار و التعويض ) .. اللي الشعب الكوري كله كان ضده .

و بياخد من اليابان مئات الملايين من الدولارات ... فالشعب الكوري يقول له .. طيب .. هاتهم بقي .. مش دول حقنا بدل ال35 سنة ذل و بهدلة ؟!

الجينيرال بارك يرد علي الشعب و يقول له " حاحوشهم لك يا عبيط " .

و ياخدهم ... يدّيهم ل صاحبه و تلميذه .. مهندس الميكانيكا .. الجينيرال اللي شبه حسام حسن ( بارك تاي-جون ) .. و يقول له :

" إبني لي بيهم شركة حديد و صلب تخلينا مش محتاجين ل حد ."

ياخد الجينيرال ( بارك تاي-جون ) الفلوس .. و يطلع علي حتة أرض جنب البحر ( أى مصنع حديد و صلب محتاج مياه كتيييييييييييييييييير ) ..

و يقول لطقم المهندسين و العٌمّال اللي جابهم..

" شايفين الفلوس دي ؟! .. كل ملّيم في الفلوس دي .. دم كوري .. شرف كوري .. ألم و معاناة و ذل و إستعباد "

" الفلوس دي .. لو ماتصرفتش صح .. لو قصّرنا فحقها .. لو ماعملناش بيها اللي يجيب لنا حق ال35 سنة إحتلال ... حننزل كلنا نمشي كده - و راح مشاور لهم علي البحر - و مش حنرجع "

*** الخٌطبة بتاعته دي ما زالت أحد أشهر الجٌمل في التاريخ الكوري حتي يومنا هذا .. و بيتم إستخدامها ك مٌصطلحات بين الشعب .. إسمها :

( "Right Turn to the Sea" spirit ) .. أى حد بيتفرج علي كوري علي نيتفليكس زيي غالباً حياخد باله منها ..

الموضوع ماكنش فلوس و بس ..

زي ما قلت .. بارك تاي-جون .. ده كان أساساً مهندس ميكانيكا ..

و لو جيت دلوقتي أنا و قلت لك : خد فلوس .. و خد عمّال .. و إبني لك مصنع حديد و صلب ..

مش حتعرف تدق مسمار .. غير لو عرفت فين و إزاي و ليه .. ال ( know how ) ..

فبالتالي ..في إتفاقية ال ( إعتذار - Reparations ) .. كان إن مهندسين يابانيين متخصصين في الموضوع ده .. ييجوا يعلّموا الكوريين ...

و إن مهندسين كوريين .. يروحوا يشتغلوا في شركة ( نيببون ) للحديد و الصلب .. أشهر شركات اليابان في المجال ده .

ف بيمسك ( بارك تاي-جون ) طقم المهندسين اللي رايحين يتدرّبوا .. و اللي حيتشغلوا تحت اليابانيين اللي كانوا جايين بيذلوهم بالمعلومات و يتنططوا عليهم حرفياً .. و يقول لهم :

لو إتقال لك إعمل كباية شاي سكر زيادة .. و عملتها من غير ما تعرف لي ليه سكر زيادة مش مظبوط ... حا@#$@ تيتتيييييييييتك ..

كان بيدير المهندسين بتوعه بالظبط زي الجواسيس ..

و مكتبه اللي عمله علي الشط جنب المصنع بالظبط .. كان كوخ خشب ... راح داقق عليه يافطة و مسمّيه : ( بيت روميل = Rommel House ) .. اللي هو ثعلب الصحراء بتاع الحرب العالمية التانية في مصر .. و اللي قصصه ما زالت موجودة فمتحف العلمين في مصر حتي يومنا هذا بالمناسبة .

لأنه كان بيتعامل مع التاسكاية دي ( شركة و مصنع حديد و صلب ) ك مٌهمة حرب حرفياً .

حاجات كتييييييييييييييييييييييييييييير بقي حصلت بعد كده ..

و لكن البوست طوّل جداً .. جداً .. و أنا لو سبت نفسي ... حافضل أكتب لحد ما عدد اللي حيقروا البوست تقريباً مش حيكمّل 5 أفراد 🤣 ..

و الفيس قاعد بيزن عليا عشان عايز بوستاتي تنتشر أكتر .. و أنا باغتت عليه و مش باكتب في التريندات اللي قاعد بيرشحها ليا .. و باكتب اللي علي مزاجي 🤣 .

لكن .. يكفي إنك تعرف دلوقتي ( بما إن التريند اليومين دول حيبقي الأرجنتين ) .. إن سنة 2020 .. بوسكو .. شركة كوريا للحديد و الصلب .. عملت أكبر تغيير جذري ممكن تتخيله .. و اللي أنا شخصياً خدت كام قرار بيزنس بناءاً عليه أيامها ..

و هو إنها إستثمرت 12.5 مليار دولار .. في الأرجنتين ..

و قررت إنها حتصب كل مجهودها و إستثماراتها .. علشان تستخرج و تشتغل في الليثيوم اللي محشور بين الأرجنتين و بوليفيا و تشيلي .. لكن الأرجنتين هي اللي حكومتها مسهّلة الليلة شوية في التعدين ده .

ليه ليثيوم ؟!

لأن ده إستثمار في نٌخاع و عمق توجه كوريا الجنوبية ( بشركاتها و سلطاتها و بابا غنوجها و سامسونج و هيونداي و أخواتهم ) لل عربيات اللي بالكهربا ..

و أنا و أمثالي و أى حد متابع حركة الأموال التقنية العالمية خلال ال6 سنين اللي فاتوا .. شاف التحرّك ده بكل وضوح ..

و كنت كتبت عن ده بسيط لما شرحت وجهة نظري بعد ما قرأت كتاب آشلي فانس اللي كتبته عن إيلون ماصك من سنين

طيب .. إيه بقي اللي حصل بعد كده ؟! .. و يا تري برضو .. علاقة دايو بالكلام ده كله إيه ؟! .. و إختفت ليه بالظبط ؟! ..

الإجابات علي ده إن شاء الله في البوست القادم ( الجزء السابع ) إذن ..

و الله أعلم .