التعليق ده فكّرني ب لقطة مٌعينة في فيلم أجنبي علي MBC2 سنة 2002 ..

التعليق ده فكّرني ب لقطة مٌعينة في فيلم أجنبي علي MBC2 سنة 2002 .. عٌمري ما أنساها ..

في اللقطة دي .. واحد ( غير مٌتعلّم ) راح مزعّق وسط مجموعة فجأة إن :

" تعالوا أشرح لكم نظرية النسبية بتاعت آينشتاين .. الموضوع ساهل جداً مش صعب إطلاقاً "

و بيكمّل :

" بص يا حاج .. آينشتاين كان بيقول إن الوقت نسبي مش ثابت.. و عشان تفهم يعني إيه .. حادّيلك مثال ..

إلمس حلّة سٌخنة .. حتلاقي إن الثانية بتعدّي عليك و كأنها ساعة ..

إلمس بنت سٌخنة ( Hot يعني 😅 ) .. حتلاقي إن الساعة بتعدّي عليك و كأنها ثانية ..

فهمت يا حاج ؟! .. الوقت نسبي 😆 "

و عٌمري ما أنسي رد عالم الفيزيا المفروض اللي كان من ضمن المجموعة اللي بتسمع لما بص للراجل اللي شرح ده ب نظرة مليانة مشاعر و قال له :

" بقالي عشرين سنة تقريباً باشرح النسبية .. أول مرة حد يشرحها قدامي بالبراعة دي "

🤣🤣🤣🤣

أيام ما شفت اللقطة دي كنت في تالتة إعدادي ..

و آه .. قسماً بالله أيامها كنت قرأت شوية حلوين عن النسبية 😅.. و لكن ..

البوست ده مش عن النسبية بتاعت آينشتاين إطلاقاً ..

ولا الشرح اللي فوق ده هو الشرح الحقيقي بتاع نظرية آينشتاين إطلاقاً أكيد ..

لكن ..

البوست ده عن ( نسبية فهم الحياة من خلال عقلنا = الإدراك = Perception ) ..

لأن هو ده اللي عمو شرحه في اللقطة دي في الفيلم ..

و هو ده اللي إفتكرته لما شوفت التعليق اللي في الصورة ده .

أنا شرحت علاقتي بالإدمان في بوستات كتير قبل كده ..

و شرحت إن من فضل الله وحده عليا .. إني ماتعرّضتش لإدمان ( كيميائي = مٌخدرات مثلاً ) ... ولا إدمان الإباحيات ..

و لكن إدماني كان أكثره :

( إنعزال عن الواقع بالأنيمي و المسلسلات و الفيديو جيمز = Dissociation ) ..

يعني حتي الفٌرجة علي الأفلام العادية كان بيبقي شيء غير مٌحبب بالنسبة ليا ( لأنها كانت بتخلص بسرعة ) .. ف كنت بادوّر علي الأفلام اللي هي أجزائها بتوصل ل10 ساعات مثلاً .. عشان أتأكّد إني ممكن ( أنغمس جواها لحد ما أنسي الواقع ) ..

و شرحت إني كنت توهمت ففترة إن سبب إدماني ده هو فشلي في الحياة الأكاديمية مثلاً ..

لكن بعد ما فضلت فترة أدرس أكتر عن ال( Psychology و ال Neuroscience ) .. فهمت إني كنت مدمن من الطفولة .. من أيام ما كنت باختار الروايات اللي تتخطّي ال1000 صفحة .. عشان بابقي متطمّن إني حاغرق فيها بالكامل ..

و ده ماكنش كراهية للواقع اللي حواليا .. بالعكس .. بفضل الله أنا طفولتي مستقرة بشكل كبير مقارنة بأغلب الناس اللي عرفتهم ..

و لكن لأن عقلي نفسه كان غير متزّن كيميائياً طول الوقت .. و الحياة العادية .. ب طبعها .. ماكنتش ( مٌثيرة ) لعقلي بما فيه الكفاية ..

اللي إتعلمته خلال السنين اللي حاولت أدرس فيها كل ما له علاقة بتركيب عقلي العصبي ..و تركيبتي النفسية .. هو :

مدي ( نسبية ) الإدراك = Perception .

عدد نااااااااااااااااااااااااااااااااااااااااااااااااااااااااااااااادر جداً من البشر .. اللي قدرته علي الإدراك بشكل داخلي جوة عقله .. دقيقة و مش مٌتغيرة .

معلش .. ركّز في الجٌملة دي تاني .. لأنها أهم جملة في البوست بالكامل ..

في خلال حياتك العادية .. كل فكرة في دماغك .. كل ذكري .. بتكون ( متلونة و حجمها متغير ) ..

كإنك ماشي لابس نضّارة ( ملّونة ) .. بتغير ألوان الحياة حواليك ..

و بتغير حجم كل حاجة في الحياة حواليك ..

و ألوان النضّارة دي نفسها .. و قدرتها علي تغيير الحجم .. ( بتتغير ) طول الوقت .. و بتتغير بشكل إنت مابتتحكمش فيه ..

الألوان و قدرة تغيير الحجم دي هي : ( عواطفك و إنفعالاتك و مشاعرك ) .

لكن ... اللحظة اللي إنت ( بتتكلّم فيها مع حد في كل أفكارك دي .. أو بتكتبها .. أو " بتطلّع أفكارك دي من جوة دماغك " ) .. بيبقي كإنك بتشوفها لأول مرة بألوانها الحقيقية و الطبيعية .. و حجمها الحقيقي .

و الفرق بينهم .. بين الصورة الحقيقية .. و بين الصورة المتلونة و متغير حجمها ..

عند الإنسان العادي .. ضخخخخخخخخم للغاية ..

و لكن .. الفرق بينهم عند الإنسان اللي عنده أساساً إختلاف عصبي ( زي حالاتي = ADHD .. أو AuDHD ) .. ضخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخم جداً جداً جداً 😅.

الكتابة و التدوين .. سلاح جبّار ..

إتخيل مثلاً إنك في حلبة ملاكمة ..

حياتك من غير التدوين .. عبارة عن جولات .. كل جولة بتدخل قدام خصم إنت مش عارف هو مين .. مش عارف أيمن ولا أشول .. مش عارف ملامحه .. مش عارف أسلوب لعبه .. و حتي إنت مش عارف تشوفه ..

و بتاكل ضرب 😅 ..

بتاكل ضرب لحد ما تتعمي 😅 ..

و الجولة بتخلص ( بعد ما بتنتهي من تناول جرعة الشيء اللي إنت مدمنه ) .. و إنت بتنزف من كل مكان .. و بتكره نفسك .. و حاسس بالضعف و قلة الحيلة و ....

و بعدين تفتح اليوتيوب أو السوشيال ميديا .. تلاقي فيديوهات عن ( التعافي ) .. كلها بتكلمك بأسلوب زي :

حنروح الجيم النهاردة .. نرمي الأكل اللي في التلاجة .. نرمي الموبايل الطاطش عشان مانفتحش إباحيات .. و حنبقي حلوين .. و ........

و بعدين تدخل الجولة اللي بعدها ... و تلاقي نفسك قاعد بتاكل ضرب تاني ..

و تتهزم (تنتكس ) ..

للدقة .. في عدد ناااااااااااااااااااااااادر ( زي ما شرحت فوق ) بيقدروا فعلاً يبطلوا فجأة ( Cold turkey ) .. و بيظنوا إن دي بسبب حاجة إسمها ( قوة إرادة ) ..

لكن الحقيقة هي إن ( قوة الإرادة ) دي .. ثمرة متركبة .. مش أساس النبات إطلاقاً ..

يعني إنت ماتقدرش تروح ( تزرع قوة إرادة ) فإنسان فجأة ..

كإني بالظبط باقول لك روح إزرع ( مكرونة ... أو كٌشري 🤣😅 ) ..

الحقيقة هي إن ( قوة الإرادة ) .. بتتكوّن من حاجات كتير ... اولها هي ( صحة الإدراك = true perception ) ..

يعني إنك تكون عندك القدرة إنك تفتكر و تشوف الحاجات بصورتها الحقيقية و ألوانها الحقيقية ..

و ده زي ما شرحت .. قدرة ناااااااااااااااااااااااااااااااااااااااااااااادرة جداً جداً جداً ..

زي الناس اللي ربنا خلقهم بطبعهم فوق المترين مثلاً ..

ده تركيب عصبي عضوي نادر ... جداً .

باقي الناس بقي ..

لازم تتعلّم أهمية ( التدوين ) ده ..

لأن دي بتبقي الطريقة الوحيدة .. إنك مهما إنضربت .. فإنت بتتعلّم ..

بتتعلّم إمتي بتكون خلاص مش قادر تفكر في حاجة غير الإدمان ..

بتتعلم إيه اللي وصلك للمرحلة دي ..

بتتعلم و بتفتكر ( بشكل دقيق و حقيقي ) قوة خصمك قد إيه بالظبط .. و أسلوبه ..

و بعدين ؟!

و بعدين بتبدأ تشوف فعلاً الفرص إنك تهاجم .. لأول مرة في حياتك ..

لأنك بيبقي ( لأول مرة في حياتك ) قادر تتوقع اللي حيحصل ..

دي هي طبيعة الإنسان في الأرض ..

إنت بتعرف تصطاد .. لأنك إتعلمت تراقب الفريسة .. فتتوقع حركتها .. فتصطادها ..

إنت بتعرف تزرع .. لأنك إتعلمت تراقب فصول السنة .. و تتوقعها .. فتزرع ..

و إنت لما تراقب نفسك كويس جداً .. و مشاعرك .. و أفكارك ..

حتتعلم تتوقعها .. و حتجرّب ..

حتجرّب ( ماذا لو ) ...

ماذا لو بدل ما أسيب نفسي لتسلسل الأفكار اللي أنا متأكد إنه حيقودني إني أستهلك الحاجة اللي مدمن لها ... ماذا لو جربت أغير حاجة معينة مثلاً ..

أصلي ؟! أقرأ قرآن ؟! أكلم حد ؟! أدخل جولة ضد خصم مختلف ( نوع شغل مثلاً ) ؟! ..

أو حتي .. إني فقط أشوف و أراقب ..

أراقب نفسي حاقدر أصمد في الجولة كام ثانية زيادة ..

و أخيراً ... الحديث الشريف ده يشرح لك حقيقة مهمة جداً :

عن أبو هريرة رضي الله عنه أن النبي صلى الله عليه وسلم قال:

«لو لم تذنبوا لذهب الله بكم، وجاء بقوم يذنبون، فيستغفرون الله فيغفر لهم».

الحديث ده مش رٌخصة إنك تروح تذنب .. و العياذ بالله .. تبقي أحمق لو فهمته كده ..

الحديث الشريف ده .. عشان تفهم إن الحياة الدنيا دي .. لازم و لابد إنك حتنضرب فيها ( حتٌبتلي ... حتٌفتن ) ... لكن مش كل الناس حتقوم تاني .. و تحاول تاني .

الشيطان ماخلقكش عاصي .. و العياذ بالله ..

ربنا هو اللي خلقك بشر مش ملاك .. بتعصي و تتوب ..

الشيطان .. عايزك يائس .. بعد معصيتك .. ماتحاولش تاني ..

ربنا .. عايزك توّاب .. مهما عصيت .. باب التوبة مفتوح ..

ولا يمل الله حتي تملوا

و الله أعلم .

** التعليق ده كان علي الفيديو بتاع ( Zalfol Urges = الرغبات الإدمانية في زالفول ) .. و اللي باشرح فيه الجزء اللي بنيته في ( زالفول= Zalfol ) لتدوين الرغبات الإدمانية و محاولة التعافي منها ... حاسيب رابط للفيديو ده في التعليق الأول إن شاء الله .