عارف إنت غلطتك إيه ؟!

غلطتك إنك بتحاول تقرا بوستاتي القصيرة دي حاف .. من غير كٌبّاية شاي بالنعناع و الفلية تبلّع بيها 🤣 ... جرّب كده بس .. جرّب تجيب كٌباية شاي ( بس كبيرة شوية زي بتاعتي كده 🤣) .. و هات عامود نعناع مزرّع .. و عامود فليّة مزرّعة .. و تعالي ..

هاتها .. و أوعدك حتشوف الفرق .

بس إستني بس قبل ما تاخد أول شفطة .. معلش .. إنت قلّبته ؟!

بتكلّم بجد والله .. قلّبت الشاي ؟! ..

معلش خٌدني علي قد عقلي ... و قلّبه مرة تانية .. بس المرة دي .. معلش .. قلّبه بطريقتي أنا .. تعالي أشرح لك إزاي :

حط المعلقة في نص الكٌباية بالظبط .. و بعدين لفها حوالين محورها ..

الموضوع صعب في الأول أنا فاهم .. بس إستحمل و حتستمتع في الآخر ..

لف المعلقة حوالين محورها تماماً .. بسرعة .. واخد بالك من الدوامة اللي بدأت تتكوّن حوالين المعلقة ؟!

دوامة كبرت تدريجياً لحد ما وصلت لحدود الكباية .. ممتاز جداً جداً .. خليك مكمّل لف للمعلقة .. ماتوقفش ..

هات بقي معايا ورقة من عود النعناع .. و نزلها في الكٌباية براحة بعيد عن المعلقة .. بحيث إنها تفضل متعلّقة بين سطح الشاي .. و بين قعر الكباية .

ممتااااز ..

يا ريت تكون الكباية أساساً إزاز شفّاف زي بتاعتي كده ..

شايف بقي ورقة النعناع حصل فيها إيه ؟!

ورقة النعناع إتحركت من المكان البعيد اللي إنت سقطتّها فيه .. و راحت إتحركت في إتجاه المعلقة اللي إنت قاعد بتلفّها في سنتر الكباية بالظبط !!! .

لحد ما بقت بتتحرك في أصغر دايرة ممكنة حوالين المعلقة !! .

سؤال .. هو إنت المعلقة بتاعتك اللي إنت بتقلّب بيها دي .. في المٌعتاد بتجذب ورق النعناع لها ؟!

الإجابة المنطقية .. أكيد لأ ..

إذن .. ليه ؟!

ليه لما نزّلت ورقة النعناع دي في الكٌباية .. إنجذبت ناحية المعلقة ؟!

أيون .. سامع الرد المنطقي بتاعك :

إن ورقة النعناع مانجذبتش للمعلقة .. و لكن إن لأن المعلقة بتلف .. و عملت حواليها دوامة .. الدوامة دي هي اللي حرّكت ورقة النعناع من الطرف لمركز الدوامة .

أسألك أنا تاني هنا :

و ليه مايكونش هي دي نفس الطريقة اللي بتنجذب بيها المعادن للمغناطيسات في الحياة عموماً ؟! ..

أو بتنجذب بيها الكواكب للشمس أثناء دوارنها حواليها ؟!

أو بينجذب بيها القمر للأرض ؟!

فاهم معني ده إيه ؟! ... إن إحتمال نكون كلنا أساساً في الآخر .. طلعنا عايشين جوة كٌباية شاي بنعناع و فلية بتتقلّب 🤣🤣🤣🤣 .

اللي إحنا عملناه فوق ده ( في كٌباية الشاي ) ..

إسمه إننا :

إفترضنا نظام مٌحاكاة = يعني بالإنجليزي ( hypothesizing a model ) ..

و مافيش أى حاجة في الحياة إطلااااااااااااااااااااقاً تمنعك من إنك تعمل ده كما تشاء و بمزاج مزاجك ..

يعني .. مافيش حاجة تمنعك إنك تتخيل : ماذا لو ماكنتش كٌباية شاي نعناع .. ماذا لو كان شوب ميّة طٌرشي ؟! .. إيه اللي حيختلف ؟!

قسماً بالله تقدر تتخيل الكون علي هيئة صينية بطاطس بالشوكولاتة و البصل .. حد مانعك ؟! إنت حٌر يا جدع ..

لكن ..

لما تيجي بقي تطلع في بلكونة بيتكم و تزعّق إنك ( إكتشفت نظام جديد يشرح لغز من ألغاز الكون مثلاً ) .. ساعتها لازم بقي تشرح الأسباب .. و تقنع الناس اللي ماشيين في الشارع بالدليل القاطع بالكلام ده ..

طيب ..

إيه هو الدليل القاطع ده ؟!

يعني .. إيه هي القواعد اللي بيلجأ لها حكم الفيفا عشان نعرف .. هل الكون أقرب ل ( كٌباية شاي نعناع ؟! ) .. ولّا ( صينية بطاطس بالبصل و الشوكولاتة )؟! .

الإجابة هي :

الرياضيات ( الحساب و الجبر و الهندسة و باقي فروع العيلة الكريمة ) 🙂.

خلّيني أشرح :

هل في يوم الصبح و إنت نازل من بيتكم .. لقيت البوّاب بيوزع 4 تٌفاحات علي ولاده الستّة اللي رايحين علي مدارسهم .. و في الآخر كل عيّل طلع الباص بتاعه ماسك تٌفاحة كاملة مثلاً ؟! 🤣 .

هل في يوم و إنت و زمايلك الخمسة قاعدين في المكتب .. إترفد منكوا إتنين و نطوا من البلكونة .. عديتوا نفسكوا عشان تعرفوا تجيبوا فطار لكام واحد .. طلعتوا تمانية مثلاً ؟! 🤣

قواعد الرياضيات .. ثابتة و أزلية منذ بداية التاريخ ..

الجمع ماتغيرش .. الطرح زي ما إنت خدته في إبتدائي بالظبط .. الضرب .. القسمة ..

و كل حاجة بتتبني في الرياضة فوق ال4 عمليات الرئيسيين دول .. قسماً بالله ثابتة ...

حتي لو المٌطربة إياها قررت ترجع لجوزها اللي بيضربها ..

برضو الرياضيات حتفضل قواعدها ثابتة .

إستنّي بس قبل ما تاخد كٌباية الشاي بتاعتك و تطلع تجري .. خٌفت ليه ؟!

ليه أول ما قلت ( رياضيات ) .. حسيتك إرتبكت و بدأت تهرش ؟! ..

مين يابني اللي عمل فيك كده و خلّاك رٌكبك تسيب أول ما تسمع كلمة ( حساب و رياضيات ) ؟!

أقول لك أنا مين ؟!

نظام تعليم ماكنش عنده لا الوقت ولا الإمكانية إنه يسألك بهدووووووء :

( تحب تشرب إيه ؟! ) 🤣

ببساطة .. لو أخدت جولة بسيطة جداً في آخر كام بوست علي بروفايلي .. حتشوف تباين عجيب في التعليقات .. بين ناس بتمدحني بشكل مٌلتهب .. و بين ناس بتشتمني بعنف و متضررين من قد إيه بوستاتي قصيرة و مابيلحقوش يستمتعوا بيها و عايزني أكتب بوستات أطول 🤣🤣🤣 .

الموضوع ده أنا مش مستغرب منه إطلاقاً ..

بل ده من أكتر الحاجات اللي إعتدتها و راقبتها في حياتي .. ك طالب .. و بعدين علي مدار سنين درّست فيهم لعدد كبير من الطلبة ..

و هو إن :

الناس .. أذواق .

نظام التعليم الإعتيادي .. مش مٌصمم إطلاااااااقاً إنه يفهم ذوق كل طفل ..

الرياضيات .. أمتع علوم الكون .. بلا إستثناء ..

و لكنك مستحيل تدرك ده .. إلا لو كان العلم ده متصل إتصال كاااااااااامل طبيعي ب شجرة معلوماتك الفطرية .

يعني إيه ؟!

يعني .. ماينفعش أقول لك ( إستمتع بالدالة دي ) .. و أروح راصص لك شوية رموز عجيبة علي سبّورة ... و إنت أساساً مش فاهم هي ( دالة ) يعني إيه ؟! .. و جات منين ؟! .. و بنستخدمها ليه ؟! .. و إنت لو حبّيت تعمل حاجة بدالها بنفسك .. حتسمّيها إيه ؟!

عارف الموضوع عامل زي إيه ؟! ..

كإني جبت لك قصرية ( شلية يعني ) نعناع صغننة .. و حطيتها قدامك علي المكتب بتاعك اللي أرضيته سيراميك .. و بعدين قلت لك عايز أعدّي عليك بعد 6 شهور ألاقي شجرة نعناع ضخمة هنا !!!

ده مستحيل تماماً ..

ليه ؟!

لأن في حواجز ضخمة من الخرسانة و السيراميك بين التٌربة الخٌصبة اللي محتاجها النعناع عشان ينمو و يترعرع ... و بين فروع النعناع دي .

بكل تأكيد شتلة النعناع دي ممكن تكبر شوية جوة القصرية .. تكبر بالشكل الكافي إنها ( تدخل إمتحان .. و تجيب درجة نجاح .. و شكراً ) ..

لكن ... بعد فترة من الزمن بسيطة جداً .. و بعد ما تتوقف عن رويها ... و لأنها أساساً مامدتش جذور في أى تربة حقيقية أصلية ..

حتموت ..

و كل اللي حيفضل في عقلك بعد سنين طويلة هو : مجرد فروع ميتة لحاجة كانت في يوم من الأيام ( كيان حي ) ..

و تسمع ناس كتير تقول :

" ده أنا والله كنت أشطر واحد في المدرسة في مسائل التفاضل دي " ..

تسأله : طيب .. هو يعني إيه أساساً تفاضل و تكامل ؟! ..

يقول لك : ماعرفش .. بس والله إمتحنت عليه و جبت درجات عالية كمان !!!

تحب أقول لك علي مٌفاجأة بقي ؟! ..

شوية الفروع اللي إنت تظن إنها ماتت من زمان دي ؟! .. لسة حية ..

كل اللي إنت محتاج تعمله هو إنك بس تفهم ... تفهم إن الطريقة إنك تشوفها بتزرّع و تكبر تاني .. مش هي نفس الطريقة بتاعت المدرسة بتاعت زمان ..

زمااااااااااااان .. كانوا بيدّولك الشتلة حية و خضرا .. بتبدأ المنهج بشوية أمثلة محلولة بسيطة .. تحفظها .. و يعقدولك المسائل تدريجيا .. و تمتحن و تطلع و شكراً ..

دي ماكنتش الحياة الحقيقية للمعلومات في عقلك ..

الحياة الحقيقية هي :

إنك إنت اللي تحط البذرة بنفسك في التٌربة بإيدك .. تشوفها و تراقبها من أول لحظة و هي بتمد أول شٌعيرات بسيطة .. و تفضل تحاول إنك توصل الجذور البسيطة الصغننة خالص دي .. بجذور تانية في تٌربة معلوماتك .. بنفسك ..

و تشوف ... في حاجة زرّعت ولّا لا .

التاريخ .. مليان بأمثلة كتييييييييييييييييييييييير جداً ... لناس .. ماكنش لها أى علاقة بالعلوم الأكاديمية ولا الرياضيات .. و لكن في سن التلاتين و الأربعين و الخمسين كمان .. بدأوا تدريجياً لأول مرة في حياتهم .. يفهموا الرياضيات فعلاً .. أو الفيزياء ..

و خلال فترة بسيطة جداً عقلهم أنتج أشجار ضخمة من العلوم و الإكتشافات ..

و ده لأن تٌربة عقلهم كانت خصبة ب معلومات تانية كتييييييير جداً .. تبدو من بعيد في الأول و كإنها مالهاش علاقة إطلاقاً بعلوم الرياضيات و الهندسة و الفيزياء مثلاً ..

و لكن بمجرد ما تتزرع بذرة صح .. بيكتشفوا فجأة إن كل جذر معلومة موجود في عقلهم .. بيخدّم علي العلم الجديد اللي بيكبر ده .

الرياضيات .. ما هي إلا لغة وصف .. زي أى لٌغة وصف إستخدمها أى إنسان في التاريخ ..

أى مٌعادلة أو قانون أو مجموعة رموز رياضية معقدة و معقربة تظن إنها ( سر كهنوتي لا يعلمه إلا قلائل ) ..

أقسم لك إنها مٌجرد ( جٌملة بتوصف حاجة مٌعينة ) ...

و لو إنت فهمت أصل و فصل الحاجة دي .. و قعدت فكرت مع نفسك شوية لوحدك .. تقدر جداً جداً إنك تتخيل طرق كتييييييييييير عشان توصف الحاجة دي ..

بس هل كل الطرق دي بقي حتبقي صح ؟! أو دقيقة ؟! أو مٌختصرة ؟!

يعني ..

إنت واقف بتقلّب كٌباية الشاي بتاعتك علي أول الشارع .. و شفتني طالع بعربيتي من دمنهور رايح علي إسكندرية إن شاء الله .. و ناوي أسوق علي الزراعي بالسرعة القانونية اللي هي

يادوب توصلني من دمنهور ل مدخل سموحة في أقل من نص مهرجان: إنت عمري بتاع أم كلثوم .. اللي هي مدته ساعتين و رٌبع تقريباً .

عايزك بقي تتخيل زميلك اللي بيقلب كٌباية مية الطٌرشي بتاعته جنبك .. و بيسألك :

ألّا هو إسلام حيوصل كده كفر الدوّار ( مركز بين دمنهور و إسكندرية ) إمتي بالظبط ؟!

تروح إنت باصص في الرٌكن البعيد الهادي .. و حاطط المعلقة اللي بتقلب بيها ورا ودنك و تقول له :

هي الست أم كلثوم بتقول في الكوبليه السبعتاشر في مهرجان إنت عمري "ولااااااااااااااااااااا " .. و بتزعق فيها جامد كده ..

أهو الباشمهندس إسلام بقي .. حيكون عند كفر الدوار كده .. في نص ال " ولاااااااااااااااااااااا " .. اللي بتزعق فيها الست جامد كده .

سؤال :

زميلك فهم ؟! ... زميلك حافظ مهرجانات أم كلثوم ؟! .. زميلك حافظهم بالتوقيت كمان ؟!

لو زميلك حافظ كل ده .. و مشي المسافة بين دمنهور و إسكندرية كتير و هو بيسمع مهرجانات أم كلثوم ..

إذن .. بناءاً علي ( لغة الوصف المٌشتركة ) دي بينك و بينه ..

إنت : كتبت مٌعادلة رياضية .. و حلّيتها .. و طلعت ناتج ..

شٌفت إنت جامد إزاي ؟!

كل اللي فات ده .. كان مٌقدمة البوست الرابع بقي في سلسلة ( سيليكون ) 🤣🤣🤣🤣🤣🤣🤣 ..

المٌقدمة اللي لازم تفهمها .. عشان تفهم يعني إيه إن ( مايكل فاراداي ) .. و اللي علي 1850 تقريباً .. كان أحد أعظم علماء العالم .. و من أكتر الناس المشهورين في المجالات العلمية بالكامل ..

إلا إنه كان : بيٌنظر له علي إنه فلّاح بيئة مش عالم بحق و حقيقي 🤣 ..

و السبب ؟!

إنه كان مايعرفش رياضة بالفرنساوي ..

آه قسماً بالله ..

أغلب ( رياضيين ) زمانه المٌحنكين .. كانوا فرنساويين .. و لغة التوصيف اللي كانوا بيتكلموا بيها و يوصفوا أى حاجة بتحصل في الحياة .. هي لغة توصيف و ترميز فرنساوية ..

فبالتالي .. و علي مدار حياة فاراداي بالكامل .. الراجل فضل يتخيل العالم زي ما هو شايف في عقله .. و يفترض فرضيات ( زي فرضية كٌباية الشاي فوق ) .. و يتخيل بناءاً عليها نتائج .. عشان يوصف الحاجات اللي كان بيشوفها بتحصل في المعمل ..

اللي هي أغلبها ( حركة الأسلاك اللي ماشي فيها كهربا جنب أى مغناطيس ) .

و كان بيرسم كل الفرضيات دي ..

لكن .. العلماء بينهم و بين بعض علي جروب واتساب خاص .. كانوا بيسفّوا عليه .. و يشيروا بوستاته و يتريقوا عليه و عليها ... و منهم كمان اللي كان بيعمل علي بوستات فاراداي ( إيموشن أغضبني 🤣🤣 ) ..

لأن .. فاراداي ماحاولش إطلااااااااااااااااقاً إنه يوصف اللي في دماغه .. باللغة اللي هما فاهمينها ..

اللغة اللي درّبهم عليها ( مدرسة نيوتن ) ..

بالمناسبة .. زي ما شرحت في بوستات قبل كده ... ( لايبنيتز ) إخترع علم التفاضل و التكامل قبل نيوتن .. لكن لأنه كان علم جديد بالكامل .. ف هو إخترع له لغة توصيف بتاعته هو ..

لكن .. لأن نيوتن كان إستغل سٌلطته و نفوذه ( كان رئيس المعهد الملكي في الوقت ده ) .. و نشر بوست قال فيه (أنا بس الجامد فحت اللي إخترع العلم ده .. و لا عزاء للمنافسين ) .. عشان ينشر اللغة اللي هو إخترعها ل نفس العلم .

و مع إن اللغة و الرموز اللي إنت بتدرس بيها التفاضل و التكامل في المدارس لحد النهاردة هي اللغة اللي إخترعها لايبنتز .. لكن اللي مالوش شلّة ؟! .. بينضرب علي ضهره و يتّاكل حقّه ... صح ؟!

لايبنتز كتب بوستات كتير أيامها و لحد ما مات يدوّر علي حقه ... لكن الناس كانت بتحكها في نيوتن الواصل أبو سٌلطة 😅 .

إنت كمان تقدر ( آه قسماً بالله ) ..

أقعد مع نفسك قعدة صفا كده .. و لو مزاجك أم كلثوم .. شغّلها مهرجان عادي .. و إمسك ورقة و قلم .. و فكّر ..

فكّر إزاي توصف ( مٌعدّل تغيّر سرعة و حركة مكعّب فحم وزنه بالوايم كده يجيله نص 5 كيلو .. وقع من عالشيشة أثناء ما بترصها .. ف وقع علي لوح خشب مايل علي الأرض بزاية 30 درجة .. و نفترض إنه خشب متسنفر أوي و مافيش معامل إحتكاك ) ..

فكّر والله مع نفسك .. و رص شوية جٌمل توصف الحركة دي .. و سمّي لغة الوصف الجديدة دي ( حمادة ) ..

مش يمكن تطلع ( حمادة ) دي .. أجدع من ( التفاضل و التكامل ) .. و يفرضوها عالعيال في مناهج ثانوي ؟!

ماترميش كٌباية الشاي اللي بردت دي إستني 🤣🤣🤣

حٌطها في التلاجة لحد بوست الجزء الجاي .. حنحتاجها جداً فيه ..

لكن ... بجد والله العظيم عايز أسأل ( مش بهزار ) ..

مين اللي فهمّك إن الرياضيات علم صعب و يخوّف ؟!

و الله أعلم .