أين ذهبت و إختفت ( دايوووووووووووووووووو - مافيش زيّوووووو ) ؟! .

زماااااااااااااااااااان .. و أنا في إعدادي ( 2000 ل 2002 ) كان أحد أكبر أحلام حياتي .. هو إني أمتلك ( دايو لانوس ) 😅 ..

أيامها .. ولا كنت أفهم حاجة في العربيات .. و ولا كنت محتاج مثلاً أسوق و أنحرف مع باقي شلتي المٌنحرفة أيامها اللي كنا بنقضي كل وقتنا بنمارس أنشطتنا الطايشة ( نستعير و نقرأ روايات مصرية للجيب و نعلب شطرنج 🤣 ) ..

و لكن .. شكل فوانيس العربية الخلفية اللي في الصورة دي .. كان أحد أكبر مصادر المٌتعة ليا في الحياة أيامها .. و كنت بافضل أدوّر عليه و أنا ماشي في الشوارع بين الدروس .. و أتفرّج عليه ..

أيامها طبعاً ماكٌنتش أعرف إطلاقاً إن اللي باعمله ده شيء مش مٌعتاد بالنسبة للأغلبية .. و إنه أحد أكثر العلامات المشهورة لل ( AuDHD = توحد و تشتت إنتباه ) .. إني أقعد مبحلق و مركّز مع فوانيس عربية واقفة في الشارع لمدة دقايق .. أو أتابعها بعينيا لو ماشية لدرجة إني ماخٌدش بالي لو عربية تانية حتدوسني 🤣 .

ماعرفتش و مافهمتش ده .. غير بعد سنين طويلة جداً .. بعد ما فهمت أكتر عن ( تشخيصي ده ) .. و بعد ما فضلت أبحث عن : ليه ممكن أقعد مبحلق لمدة نص ساعة في شكل فروع شجرة مٌتشابكة في الخريف ( مافيهاش ورق يعني ) .. و أبقي حاسس ب رااااااااااااااااااااحة و هدوووووووووء .. كإن كان في ضغط كبير علي وداني و نافوخي .. و لكن لما باركّز مع الشكل ده .. الضغط ده بيتشال ! .

لكن .. كنت لمّا بارجع البيت و أتفرّج عالتيليفيزيون .. كان بيظهر تساؤل جديد و أنا باشوف الإعلانات .. و هو :

" إيه العلاقة بين العربيات .. و التيليفزيونات ؟!! " .

دايوووووووووووو ... مافيش زيّووووووووووووو ( الإعلان اللي يفتكروا العواجيز أمثالي 🤣 ) ..

بتصنّع تيليفزيونات .. و عربيات .. ليه ؟!

و مش بس كده ..

دماغي العجيب اللي بيلاحظ حاجات أعجب .. فضل يزن عليا ب سؤال أغرب فترة طويلة بعد كده .. بعد ما كذا رمضان عدّي .. و فجأة إعلانات دايو اللي كانت مٌستمرة طوال الشهر .. إختفت !!! :

" هي شركة دايو دي .. إختفت فين و إمتي و ليه و إزاي ؟! "

البوست ده .. هو البوست الخامس ضمن سلسلة ( قصة LG) ..

و اللي ( شركة دايو ) تٌعتبر جزء أساسي جداً جداً من القصة دي ..

و سبب إني إبتديت البوست بالمٌقدّمة العجيبة دي .. هو إنك ك قارئ تفهم بشكل أوضح أنا دماغي بتفكّر إزاي ..

أنا مٌش ( ناقل ) للتاريخ .. أنا مٌش ( مٌتخصص ) في التاريخ .. أنا مٌش ( كاتب مٌحترف ) .. و عٌمري ما سعيت إني أكون أى حاجة من دول ..

أنا ( مٌهندس عنده توحّد و تشتت إنتباه 🤣🤣) ..

يعني جزء كبير جداً من حياتي هو : إني بلاحظ حاجات مٌعينة فجأة .. و يتولد فعقلي أسئلة كتييييير فجأة .. و ألاقي نفسي إتسحلت في البحث عن إجابات كتييييييييييييييير .. و ماهداش .. غير لو كل حاجة ربّطت في بعضها جوة عقلي .. ( تاريخياً و إقتصادياً و نفسياً و هندسياً و عسكرياً و سياسياً و ....)

يعني ..

أنا مابكتفيش إطلاقاً إني أعرف ( إيه اللي حصل ) .. و لكن .. الأهم بالنسبة ليا هو :

( حصل ليه ؟! , حصل إزاي ؟! , تأثيره كان إيه علي اللي حواليه ؟! , ... و هكذا و هكذا .. ) .

ف لو إنت بتدوّر علي ( حقائق تاريخية مٌجرّدة ) .. يا باشا قسماً بالله تقدر تعمل سيرش لمدة ثواني في جوجل .. و شكراً .. مش حتحتاج تعاني إطلاقاً مع طول بوستاتي و إفيهاتي و القلش الرخيص بتاعي ..

أمّا .. سبب إني ( باستخدم الإيفيهات و القلش الرخيص ) ده كتير .. ف ده زي ما وعدت إن شاء الله حاشرحه في بوست مٌنفصل لاحقاً .

المهم ... خليني دلوقتي أكمّل القصّة .. و تعرف ليه ( دايو ) جزء أساسي من القصة دي .

آخر حاجة كنا وقفنا عندها في البوست اللي فات .. هو إن العلاقة بين الجينيرال ( بارك ) .. و ( شلّة الميليونيرات = سامسونج , LG , SK , .. ) ..

أصبحت علاقة مدرّب و مروّض حيوانات مٌفترسة في السيرك تقريباً ..

كل واحد من المليونيرات دول .. حيوان مٌفترس فعلاً .. ماوصلش للي هو فيه بين يوم و ليلة .. و لكنه بني و ورث إمبراطوريات في بلد غير مٌستقرة إطلاقاً ..

و فجأة دخل عليهم ( الجينيرال بارك ) .. ماسك ( كورباج ) أسواني بيلسوع ..

و قال لهم ( اللي حيدخّلي دولارات منكم .. يبقي حبيبي و كفاءة ... اللي مش حيدخّلي دولارات .. حاعصره أنزّل منه عصير شركات ) ..

التهديد كان حقيقي فعلاً بالمناسبة ( مش قلش ) ..

كان في إجتماع رسمي شهري بيحصل .. بيجمّع فيه رؤساء الشركات دول .. و يمسكلهم سبّورة ( قسماً بالله ) .. و يصحح لهم علني شغلهم ...

اللي صادراته عدّت التارجت .. يظبّطه في قروض البنوك .. و يدّيله تسهيلات حكومية و بنكية ..

اللي صادراته كانت أقل من التارجت .. يهدده وقتي إنه حيقطع عنه قروض البنوك .. و يضايقه في التراخيص و التسهيلات .. لحد ما يجوع و يفلّس .. و بعدين يبيعه خٌردة ل زميله اللي قاعد جنبه علي نفس ترابيزة الإجتماعات .

و ده اللي شكّل جزء ضخم جداً جداً من صورة إقتصاد كوريا الجنوبية الحالي ..

إنك لحد يومنا الحالي .. تقف في كارفور محتار تشتري شاشة سامسونج 50 بوصة .. ولا LG برضو 50 بوصة .. و الإتنين تقريباً نفس السعر .. و نفس الإمكانيات .. ف تقرر إنك تسمع كلام باشمهندس حازم إمام و تشتري السامسونج 🤣.

و لو إنت عجوز من أمثالي .. كنت حتلاقي إن زمان في بدايات الألفينات ( دايو ) بتنافسهم هما الإتنين ..

ده ماكنش في التيليفزيونات بس .. و لكن في كل الصناعات تقريباً ..

الجينيرال ( بارك ) .. لمّا قسّم الصناعات في كوريا علي شلّة المليونيرات الأوائل دول .. مادّاش حد إحتكار لأى حاجة ..

هو زي ما شرحت كان ( براجماتي ) علي قديمه .. و مالوش عزيز ولا غالي ... و ماكنش عايز يتمسك من حتة حساسه 🤣 ..

فبالتالي .. لما قرر إنه عايز ( ينتج إليكترونيات ) .. ماراحش ل ( سامسونج ) و قال له ( عيش في الإليكترونيات لوحدك ) .. لا ..

ده دخّل معاه ( LG ) .. و قال له ( إتعلّم كل حاجة في الشغلانة ) .. عشان لو في يوم من الأيام سامسونج حب يلعب بديله ... يقطعهوله .. و يبيعه ل ( LG) وقتي .

و نفس ذات الأسلوب في كل حاجة تانية بقي في الصناعات الخفيفة ( أجهزة إستهلاكية ) ... و في الصناعات ال ( تقيلة ) ..

و الصناعات ال ( تقيلة ) دي بقي بالذات .. قصتها أهم .

بعد ما إنتهينا في البوست اللي فات إن ( الجينيرال بارك ) قال ( تشونج = بتاع هيونداي ) إعمل لي طريق سريع 400 كيلو من الميناء للعاصمة ..

و إتعمل فعلاً الطريق السريع ده في زمن قياسي مقارنة بكل المقاييس أيامها ( سنتين و نص ) ..

رجع ( تشونج ) ل ( الجينيرال بارك ) .. و هو مستنّي منه تهنئة .. بونبوناية .. ياخده بالحضن مثلاً و يحسسه بحنان الأب 🤣..

لكن لا ..

الجينيرال بارك كان في واحد تاني هو اللي واخد المكان ده في قلبه ( مكان الإبن المٌفضّل ) .. و هو ( كيم ووتشونج = رئيس دايو )

ليه بقي ؟! .. إشمعني يعني ؟!

فاكر زمااااااااااااااااااااااااااان في البوست قبل اللي فات تقريباً .. لما قلت لك إن ( الجينيرال بارك ) ده .. كان فلاح فقير معدوم من أعماق الفقر الكوري ..

أهو أيام ما كان لسة بقي طفل فقييييييييييير بيتعرّف علي الحياة المدارس .. مٌدرّسه في المدرسة هو اللي حسسه بالحنان و الإهتمام و بدأ يرعاه و يحسسه إنه بنى آدم فعلاً ..

للتوضيح هنا .. لازم تعرف إن في كل تاريخ كوريا القديم و الحديث .. زي باقي تاريخ آسيا عموماً .. إحترام و حب و تقدير المٌدرّس .. بنفس درجة إحترام و حب و تقدير الأهل تقريباً ..

المٌشابه في ده ل حضارات جنوب شرق آسيا هما العرب ... و أبعد ما يكون عن ده .. هما الغرب بالمناسبة .

المهم ..

بعد سنيييييييييييين .. بيكتشف ( الجينيرال بارك ) إن في شاب الصغنن يعمل قلق في الإيكوسيستم اللي ماكنش موجود أساساً بتاع الستارت أبس في كوريا ..

ليه ماكنش في حاجة إسمها ( شركات ناشئة ) ؟!

لأن الحكومة الكورية زي ما شرحت لك في البوست اللي فات بأمر مباشر من ( بارك ) كانت بتسهّل إن الكٌبار ( سامسونج و LG و غيرهم ) يحتكروا كل حاجة .. و مايحسوش إن أى حد بيضايقهم أو ينافسهم .. عشان يشتغلوا براحتهم و يعملوا اللي هو عايزه بالظبط ( دولارات كتير ل كوريا ) .

فبالتالي .. كان أى حد يبدأ يحنكش أو يحاول يخربش في البيزنس .. أخباره كانت بتيجي أول ب أول ..

ف إذا بإسم ( كيم ووتشونج ) يشد إنتباه ( بارك ) .. و يقول لهم ( هاتولي الواد اللي عامل قلق هناك ده ) ..

و إذا به يكتشف إن ( كيم ) يبقي إبن ( المٌدرّس اللي كان بيحنو عليه زمان و يجيب له ساندوتشات من الكانتين لأنه كان مفلّس )🤣 .

و ك نوع من رد الجميل .. و الولاء ل مدرّسه ده ..

يضم ( كيم ) للشلّة بتاعت ( التشايبولات = أباطرة البيزنس ) اللي كان من راااااااااابع المٌستحيلات إنه يقرّب منها أساساً .. إلا عن طريق الواسطة العجيبة دي .

( كيم ) ده كان أساساً شاب تلاتيني فاتح ورشة نسيج علي صغنن .. بيحاول يخربش و يحنكش عالضيّق كده .. و فجأة .. لقي الجينيرال بارك بياخده تحت جناحه .. و يقعّده علي نفس ترابيزة الإجتماعات المٌرعبة دي جنبه ..

و بعدين شاف الجينيرال ده ( بيبص للراجل بتاع هيونداي = تشونج ) .. و اللي كان لسة جاي عايز يحتفل و يفرح بقي ب موضوع الطريق السريع اللي إتبني ده ..

و يقول له : تمام .. بنينا الطريق السريع من العاصمة لل ميناء ؟!

( تشونج ) لسة حيقوم عشان ياخد البونبوناية ..

لقي ( بارك ) بيقول له : طيب .. ينفع يعني يبقي عندنا ميناء .. و لها طريق سريع كمان .. و ماعندناش سٌفن عملاقة بتاعتنا إحنا ؟! 🤣

(تشونج ) بدأ يعرق و يحس إنه بيتجهزله خازوق متين ..

( بارك ) كمّل و قال له : أنا عايز سٌفن عملاقة .

تشونج كان لسان حاله ( يا عم هو إنت ماعندكش حد غيري ؟! ) .. لكنه كان عارف كويس إن باقي الشلّة أساساً كان محطوط عليهم بالقوي ..

سامسونج و LG الإتنين كانوا متكلفين ب ( بترول ) .. إتشقلبوا و طلعولي بترول .. و عايزه يجيلي متعالج ولامؤاخذة .. مش خام .. و من غير بذر 🤣 .

و قبل ما تشونج حتي يحاول يفلفص ...

بارك راح مطبطب علي كتف ( كيم = بتاع ورشة دايو الصغننة ) .. و قال له :

ما هو لو ماتشقلبتش ليا يا هيونداي و بنيت ليا صناعة سٌفن عملاقة .. جهّز لي شركاتك و مصانعك عشان حابيعها خٌردة ل ( كيم ) بتاع دايو أهه 🤣 .

و بتبتدي في اللحظة دي أحد أشهر القصص علي الإطلاق في حياة شركة هيونداي ...

و لكن ..

القصة دي بتفاصيلها ..

و ليه بالظبط ( بارك ) البراجماتي اللي مايعرفش أبوه .. كان بيحب ( كيم ) بتاع دايو بالمنظر ده ؟! .. هل كان عشان هو إبن مٌدرّسه فعلاً .. ولا كان في سبب تاني ؟!

و ليه بعد سنييييييييين .. كوريا بالكامل حتندم ندم شديييييييييد علي العلاقة العجيبة دي بين ( دايو ) و بين ( السٌلطة ) ؟! ..

و دايو نفسها حتروح فين ؟!

كل الحاجات دي إذن في الجزء السادس القادم إن شاء الله ..

لأن خلاص صلاة الجٌمعة حتبتدي كمان شوية بإذن الله ..

و الله أعلم .

**** تعرف مين اللي في صورة إعلان دايو ده 🤣؟!