12 نقطة تانيين عن الإدمان ( رداً علي بعض الأسئلة

12 نقطة تانيين عن الإدمان ( رداً علي بعض الأسئلة ) . … 1- في كلامي هنا .. أنا مش باتكلم عن الحاجات اللي ماينفعش يتكلم فيها غير مختص ( و أقصد هنا الحاجات اللي بتحتاج تدخل طبي كيميائي ) .. و لكن باتكلّم عن حاجات زي ( إدمان الأكل , إدمان الفيديو جيمز , إدمان الإباحية , … ) . … 2- كل حاجة إنت بتتعامل معاها في حياتك .. بتأثر علي كيمياء مخك و تركيبك العصبي ( ال Neuroplasticity ) بتاعتك ب شكل أو بآخر .. و لكن في حاجات بتعمل ده بشدة و بضراوة ( اللي هي إسمها Hard Drugs = مخدرات قوية ) .. و دي اللي ماينفعش أى حد مش متخصص يفتي فيها .. ( و المتخصص هنا لازم يكون طبيب بالمناسبة ) . … 3- في الحاجات التانية دي بقي ( الأكل , الفيديو جيمز , الإباحية , … و غيرهم ) .. في أسطورة بتقول إن في طريقتين بس .. و لازم تختار طريقة واحدة منهم عشان تتخلص من الإدمان ده . الطريقة الأولي : Cold turkey = يعني تدخل بغشومية = يعني تقطع مرة واحدة و ل يكن ما يكون و عليا و علي أعدائي يا رب 🤣 . . الطريقة التانية : تدريجياً .. و بحنية .. و واحدة واحدة مش مرة واحدة 🤣 .. و مافيش حاجة تيجي كده إهدي حبيبي كده 🤣🤣 . . 4- الحقيقة هي إن الطريقتين مش متعارضين مع بعض إطلاقاً .. و إن مش لازم تختار طريقة واحدة و بس .. بالعكس .. الطريقتين لازم دايماً يتواجدوا مع بعض .. بس تفهم كل واحدة منهم بتشتغل علي إيه . … 5- حاجة زي إدمان الأكل و حلم فورمة الصيف و الإلتزام بالجيم مثلاً .. أنا مُدمن للسكريات .. و عاشق للمُعجنات بكل أشكالها و صورها .. و ماعنديش أدني مشكلة أعيش 30 يوم في الشهر باكل بيتزا فقط .. و مُعدل الحرق الطبيعي بتاعي ( المُعتمد علي جيناتي يعني ) .. بطيء جداً .. و ضعيف جداً .. و فطفولتي .. كنت كلبوظة كميلة 🤣 . . و عندي (ADHD ) زي ما قلت في عشرات البوستات قبل كده .. و إتكلمت عن تأثير ده علي إستعدادي إني أدمن أى حاجة و كل حاجة .

فبالتالي .. فيما له علاقة بالأكل .. : اللي زيي .. ماينفعش لنا إطلاااااااقاً موضوع ( واحدة واحدة مش مرة واحدة .. و بطّل بالتدريج .. و قلل بالهادي عالهادي 🤣 ) .. التبطيل تدريجياً ده بالنسبة للي زيي : عذاب أسطوري . … 6- اللي زيي .. فموضوع الأكل بالذات .. لازم يبطّل فجأة .. مرة واحدة .. بكل غشومية و عنف ممكنين .. ليه ؟! لأننا أساساً ك ( adhd ) .. عقلنا طول الوقت أساساً بيدور علي حاجات تعوض إفراز المُركبات الأساسية للسعادة و الإثارة اللي إحنا عندنا مشكلة ضخمة في إفرازها . و عقل الإنسان .. كسووووووووووول لأقصي درجة .. أهم أهدافه في الحياة منذ لحظة وجوده .. هي إنه يحافظ علي بقاءه و مايبذلش أى مجهود . فبالتالي .. أسرع طريقة دايماً يلاقي بيها دوبامين .. حيدور عليها .. و يعتمدها ك أهم حاجة في الحياة . … 7- ده معناه .. إن أى معلقة تورتة تشيز كيك كراميل باللوتس .. مهما كانت صغننة .. مهما كنت إنت مُلتزم قبلها لمدة شهور و أسابيع .. بمجرد ما تنزل علي مُستقبلات الطعم بتاعت لسانك .. حترجع كإنك مابطلتش إطلاقاً .. و إدمانك حيرجع ب كل قوته و ضراوته .. … 8- و حتضطر تعاني من تاني مع أعراض الإنسحاب بتاعت التبطيل .. اللي ( بالنسبة للي بيتغاشموا زيي ) .. بتكون عنيفة و مؤلمة جداً لمدة أيام .. لحد ما عقلك يفهم مين فيكوا اللي له كلمة عالتاني 🤣 .. و يبدأ يرضخ .. و يدور علي إنه يتعود يفرز دوبامين من مصادر تانية ( و هو ده موضوع تبديل إدمان ب إدمان زي ما شرحت قبل كده ) . … 9- في بوستات سابقة .. شرحت إزاي إني بابدّل إدمان ب إدمان .. و إن ده مش بيحصل بسهولة .. ده بيحصل بإني باتغاشم و أقفل الحاجة اللي أنا مدمن لها مرة واحدة .. فجأة .. و أقعد أعاني أيام و أيام .. لكن في الأيام دي .. بابقي برضو مركز إني أفضل أعيد و أزيد و أكرر في الحاجة الجديدة اللي عايز أدمنها ( شغل , دراسة , لعبة جديدة , … أو حتي مسلسل جديد طويل عايز أخلصه ) . . و باعرف إني وصلت لإدمان الحاجة الجديدة دي .. لما ألاقي نفسي عايز أعملها بشكل تلقائي و بدون سبب أو داعي .. لمجرد إني أستريح أو أحس بمتعة ما .. بافهم ساعتها خلاص إن عقلي تربس عليها ( هي إسمها الحرفي كده .. latching = ترجمتها بالإنجليزي .. تربسة 🤣🤣) . … 10 - لكن .. الجيم بقي حاجة تانية .. لأنه مش معتمد علي لياقتك العصبية و العقلية ( الneuroplasticity بتاعتك ) .. لا .. ده معتمد علي لياقتك الجسدية و العضلية .. و في فرق ضخم بين الإتنين . . عضلاتك .. أكتر حاجة تكرهها و ماتقدرش تعملها .. هي ال ( فجأة ) .. تركيب الألياف العضلية نفسه ( سبحان الله ) معجزة في الحكمة .. إنك بتحتاج ( تسخنها , تلينها , تخليها تستعد , … ) .. و بعدين علي مدار شهور و شهور .. بكل بطء .. تكسرها كل يوم .. عشان جسمك يرجع يبنيها أقوي .. أكبر .. أمتن . . و كل ما أخدت العملية دي علي الهادي أكتر .. ببطء أكتر .. بإستمرارية .. كل ما كان العائد منها جبار أكتر .. و أقوي .. و أفضل آلاف المرات . … 11- فبالتالي .. الإنسان اللي بيعاني من وزنه الزيادة .. و نفسه يلتزم بالجيم و يبطل أكل مش صحي .. و يدخّل القميص في البنطلون من غير ما كرشه يبان 🤣 … . خصوصاً ( لو هو من النوعية اللي زيي = adhd ) . . لازم يفهم كويس إنه محتاج يشتغل بطريقتين عكس بعض … فنفس الوقت . . ياخد قرار مباشر و سريع و مٌفاجئ و لا رجعة فيه ولا إستسلام .. و ينهي علاقته بشكل نهائي مع مُشتقات السكر الأبيض .. و الدقيق الأبيض .. و إبراهيم الأبيض كمان 🤣 . . لكن يبتدي بأقل شيء ممكن يعمله له علاقة بالجيم .. و يداوم و يستمر عليه ل فترة .. حتي لو كان الشيء ده .. مجرد إنك تروح الجيم تقعد علي كرسي هناك لمدة نص ساعة ( تقعد بس .. تتفرج .. ماباقولش تعمل أى حاجة … لا .. مجرد تقعد و تعتاد وجودك في الجيم لمدة نص ساعة ) . . و بعد أسبوعين من ده ( إنك بتروح تقعد ) .. تبتدي الأسبوعين اللي بعدهم تزود حاجة بسيطة جداً .. و صغننة جداً … حتي لو كانت مجرد إنك تعمل تمرين واحد بدون أوزان .. لمدة دقيقة .. و هكذا . … 12- الإباحية بالمناسبة .. ماينفعش فيها تدريجياً برضو ( زيها زي السكر الأبيض و الدقيق الأبيض ) .. بس ده بقي لكل الناس .. مش بس لل (adhd ) .. الإباحية مُستحيل .. من رابع المُستحيلات .. و من غير المنطقي إطلاقاً .. إنك تقدر تبطلها تدريجياً .. .. لأنها ( كيميائيا .. تأثيرها مشابه لل سكر أبيض .. بس أضعاف شدته ) .. ف عقلك بمجرد ما يتعرض لها .. دايماً بيعتمدها هي كالحل الأسهل و الأنسب .. و يعذبك تاني ل شهور عشان تقدر تبطل . … و الله أعلم .