عايز أجرّب حاجة .. ممكن تكتب في الكومنتات من 5

عايز أجرّب حاجة .. ممكن تكتب في الكومنتات من 5 ل 10 مشاكل صغننة ؟! … شوية معايير مهمة للمشاكل : أ- قريبة منك و خاصة بيك .. ( يعني ماتكتبش مشكلة معاناة المسلمين في الصين مثلاً .. إلا لو كنت منهم ) . ب- مشاكل لها حل منطقي .. ( يعني ماتكتبش إن الناس ماعندهاش ضمير و أخلاق 🤣 ) .. لكن ممكن تكتب ( مافيش كاميرات كفاية في منطقتك عشان تمسك المتحرشين و الحرامية مثلاً ) . ج- مشاكل تافهة .. فعلاً .. كل ما كانت المشكلة تافهة و صغننة.. كل ما كان أحسن .. طالما إن حلها حيؤدي لتحسن و لو بسيط جداً في يومك .. زي ( مش بالاقي ركنة للعربية مثلاً ) .. د- إتأكد إنك بتكتب مشكلة .. مش نتيجة للمشكلة .. يعني ماتقولش ( إني مش عارف أذاكر تكنولوجيا أو برمجة أو أنجح أكاديمياً مثلاً ) … لكن تقدر تقول ( مشكلتي هي نقص اللغة الإنجليزي .. أو نقص الكورسات المفيدة بالعربي .. أو نقص الموارد اللي محتاجها في الجامعة … ) و هكذا . … 5 أمثلة خاصة من مشاكل خاصة بيا أنا حالياً : … 1- الخناقات علي ركنات العربيات .. و العربيات اللي بتسد الجراجات في الشارع بتاعي . . 2- شركات الشحن .. باحلم إني أعمل منصة تنظم الشغل بين شركات الشحن و المخازن يعني ( لو بتتعامل مع شركة شحن إسمها حمادة .. و شحنتك واقفة فمخازنهم لعجز عربيات عندهم مثلاً .. و في شركة شحن تانية إسمها سوسو .. و عندها عربيات مش شغالة .. تقدر تستخدم ده عشان تحل ده ) . . 3- التكاتك .. وباء بالنسبة للعربيات في القاهرة و إسكندرية .. و لكن رحمة و حل رائع بالنسبة للي ماعهوش عربية و علي رجليه في مناطق لا تصلح للعربيات أساساً .. باحلم بعمل منصة توضح أماكن تمركزها .. و زي مؤشر ( أحمر - أصفر - أخضر ) يوضح سهولة تحرك العربيات في أماكن تمركز التكاتك دي .. يعني في مناطق تحت الدائري في القاهرة مثلاً .. يكون المؤشر لونه أحمر دم .. و تظهر لك علامة جمجمة خطر تحذرك من السواقة هناك 🤣 . 4- منصة تنظيم إنتاج فني حر .. يعني .. الكاميرات بتاعت الموبايلات دلوقتي بقت بكفاءة كاميرات السينيما . كل الناس بتصور أى حاجة فأى حتة بسهولة .. النشر أصبح أسهل ما يُمكن .. و مش لازم إطلاقاً توصل لنشر فيلم كبير 90 دقيقة .. يكفي جداً أفلام قصيرة مثلاً ( 10 دقايق ) .. و كمية المواهب ( التمثيل , الغناء , الكتابة , الإخراج , … ) اللي أعرفهم و مش لاقيين فرصهم .. عدد ضخم جداً .. و كمية الفلوس ( المستثمرين يعني ) اللي عندهم القدرة علي تغطية إنتاج أعمال فنية حرة .. كتير أوي برضو .. لكن مافيش تنظيم و إدارة .. و بالتالي .. مافيش إستثمار .. و بالتالي مافيش إنتاج .. و بالتالي .. إحتكار . . 5- منصة لكشافة مواهب ( فيديو جيمز ) .. إحنا ك ( بلد ) متأخرين جداً جداً في ما له علاقة بال ( فيديو جيمز ) عالمياً .. يعني لسة من كام يوم تقريباً فودافون عملت شراكة مع فريق فيديو جيمز .. و كمية المواهب اللي أنا شفتها بعينيا في محلات بلايستيشن في أقاليم .. تنافس أكبر المواهب اللي بيتم رعايتها من أكبر الشركات عالمياً حالياً .. و لكن .. لأن المواهب دي ( أطفال من سن 10 سنين .. ل رجال في سن 25 سنة ) .. مش دايماً بيكون عندهم اللغة أو الثقافة أو الوقت و الإمكانية إنهم يحترفوا … بتكون النتيجة هي إن مواهبهم دي بتندفن . . الفيديو جيمز مش ( نشاط عيالي ) .. و لا ( لعب عيال ) .. الفيديو جيمز تُعتبر من أرقي أنواع الفنون الجامعة .. و أكثر الأنشطة المفيدة عقلياً .. و من أكثر الصناعات العالمية صعوداً في إحصائيات عوائدها المادية خلال ال15 سنة اللي فاتوا .. ف باحلم بعمل منصة لكشافة ( scouts ) للمواهب في العالم ده . … … أخيراً .. مشاكلك اللي تكتبها ممكن تكون أبسط من كده بكتير جداً .. حتي لو حتكتب إنك مش لاقي تيشيرت اللون اللي إنت عايزه مثلاً … أو نفسك تلاقي جزمة برباط لون و لون 🤣 .. . الفكرة من البوست ..مش مجرد إحصائيات للمشاكل .. إطلاقاً .. الفكرة من البوست حاشرحها تفصيلياً في بوست لاحق إن شاء الله . لكن بداية الشرح هو : 1- هل الناس عندها القدرة تشوف أول 10 خطوات في طريق الألف ميل ؟! . ولا عينيهم متعلقة بنهاية الطريق الألف ميل .. و مش قادرين يشوفوا علي الأقل أول عشر خطوات . 2- أى مشكلة لو بيعاني منها 10 علي الأقل .. دول 10 زباين جاهزين لك .. لو قدرت تعمل حل للمشكلة … و الله أعلم .

*** سبب الصورة : مشكلة أبو صلاح كانت ( مين ممكن يصيعنا يا عاطف ؟! 🤣 ) .