9 خطوات إعملهم رجاءاً قبل ما تسألني عن ال (

9 خطوات إعملهم رجاءاً قبل ما تسألني عن ال ( فلوس ) . … 1- إفتح (upwork ) و إعمل أكاونت عليه . 2- إكتب في السيرش المجال أو الحاجة اللي إنت بتتعلمها . 3- إفتح تاب تاني و إفتح فيه ( شات جي بي تي ) . 4- إقرأ تفاصيل أول 30 شغلانة … علي الأقل . . 5- أثناء قراءة التفاصيل دي .. كل كلمة إنت مش عارف معناها .. او مش متأكد إنك فاهم معناها .. أو فاهم معناها .. بس مش متأكد إن فهمك ده هو اللي مقصود في الشغلانة .. حتاخد كل التفاصيل اللي مكتوبة في الشغلانة كوبي .. و تعمل لها بيست في شات جي بي تي .. و تطلب منه يشرح لك .. ك حد مايفهمش أى بلح في بتنجان له علاقة بالشغلانة أو المجال . و خصوصاً ال ( كلمات ) المُفتاحية دي ( key words ) يعني . . 6- بعد ما تعمل ده مع 30 شغلانة ( تعمله بضمير .. يعني ياخد الموضوع منك يوم أو يومين علي الأقل ) .. مبروك .. إنت دلوقتي أصبحت فاهم نسبياً السوق محتاج إيه في الشغلانة .. و الأهم … أصبحت عارف إنت مش عارف إيه . و ده من أهم أنواع المعرفة . . 7- دلوقتي .. القرار ليك .. إما إنك تبدأ تتعلم عن الحاجات اللي إنت عرفت إنك مش عارفها .. أو تبدأ تدور علي حد عارف الحاجات دي .. و لكن مش عارف يشتغل بيها إزاي . و توفق راسين في الحلال … و تاخد عمولتك . . 8- الخطوات اللي فوق دي .. هي اللي أنا مشيت عليها سنة 2015 ل 2017 .. و بناءاً عليها إتعلمت منتجات أدوبي بنفسي .. و أشتغلت بيها فمجال الموشن جرافيكس و المونتاج .. و عينت ناس إشتغلت في المجالات دي معايا ( كانت مهاراتهم تفوق مهاراتي بمراحل .. بس مكانوش عارفين السوق محتاج إيه ) . . و علي أيامها .. ماكنش في شات جي بي تي يوفر عليا الشرح و المعرفة .. و كنت باتفحت أيام و ليالي .. عشان أوصل لمعلومات .. إنت دلوقتي تقدر توصل لها في دقايق حرفياً . . سنة 2018 .. أرباحي من (upwork) لوحده كانت وصلت ل 10,000 دولار بفضل الله . و في بوست تفصيلي كنت كتبته عن الموضوع ده أيامها . . 9- أنا حالياً .. و أثناء ما باحضّر لباقي محاضرات الكورس اللي باشرحه هنا علي البروفايل مجاناً عن ( كل ما له علاقة بالذكاء الإصطناعي بالحلمنتيشي ) ..و عشان أتأكد إني ماسرحش في الشرح و مابعدش عن إحتياجات السوق الحقيقية .. دخلت إمبارح علي ( upwork ) .. و عملت الخطوات اللي شرحتها دي بالظبط . و حرفياً .. باحسد أى حد عنده الإمكانيات المتاحة حالياً ( شات جي بي تي ) .. إنه يشرح له اللي ناقصه من معلومات . . أنا كنت باتفحت و أتردم زمان عشان أدور علي المعلومات و الشرح .