راموس .. و تركى الشيخ .. و صلاح .. و

راموس .. و تركى الشيخ .. و صلاح .. و تريكة .. و مرتضى منصور .. و ميدو … آه … و كاريوس كمان . … بوست بايخ أنا عارف .. آسف ..

أنا و أخويا على إبن عمى .. و أنا و إبن عمى على الغريب .. طيب .. أنا و الغريب .. على مين ؟! … فعلاً كنت دايماً باسأل نفسى السؤال ده لما أسمع الجملة بتاعت أنا و أخويا على إبن عمى دى .. كنت باستغرب جداً من المبدأ .. و أفكر .. و بعدين ؟! .. يعنى الغريب ده .. مش ليه درجات ؟! فى غريب أعرفه كويس .. بس لا هو أخويا ولا إبن عمى .. و فى صديق .. و صاحب .. و زميل .. و جار .. و معرفة جيم مثلاً .. يبقى .. أنا و معرفة الجيم على مين بعد كده ؟! .. … بناءاً على أنهى مقياس بنقرر نصرف عدالتنا ؟! بناءاً على أنهى مقياس بنقرر نتعاطف و نساند و نساعد ؟! طيب .. إفرض إن أخويا ظالم ؟ يبقى أنصره برضو ؟! فى فى القرآن آيات مشهورة بتوضح إزاى النبى اللى مؤمن بيه تلات أديان ( سيدنا موسى ) عمل كده .. و نصر حد من عشيرته و هو ظالم .. و إزاى إنه فضل يستغفر على ده كذنب عظيم بعد كده .. … هل الموضوع مصلحة ؟ يعنى أنا باساند اللى عارف إنه ليه مصلحة معاه ؟! .. إذن لو حد دفعلى كفاية .. حانصره على أخويا ؟! هل الموضوع لغة ؟ يعنى لو أنا إتربيت فمصر و أخويا ففرنسا … أساعد إبن لغتى ضد أخويا اللى بيتكلم فرنساوى ؟! هل الموضوع لون ؟ هل الموضوع دين ؟ هل الموضوع فانلة فريق ؟ … بعد فترة تفكير طويلة و أنا صغير … توصلت إن الموضوع عند معظم الناس … ” عاطفة ” .. بس .. يعنى : أنا و اللى أحبه على اللى مابحبوش شوية .. و أنا و اللى مابحبوش شوية على اللى مابحبوش شويتين .. و هكذا .. فكر فيها .. ناس كتير حتلاقيهم بيساندوا اللى بيحبوه على أهلهم .. أو حتى على مصلحتهم الشخصية .. حتى و إن تعارض ده مع المنطق و العقل و العدل .. … كنت باتفرج على ماتش صلاح و ريال مدريد .. أثناء ما حصل اللى حصل و إتصاب صلاح ربنا يشفيه و يقومه بالسلامة .. و فتحت الفيس بسرعة عشان أشوف اللى متوقعه من ردود فعل الناس … ردود فعل متوقعة جداً .. و بعدين لقيت بوست واحد من ضمن 15 بوست على الفيسبوك بيتكلم عن إن غزة بتنضرب بالصواريخ .. سألت نفسى بسرعة .. أنا متعاطف مع مين أكتر ؟ و زعلان على مين أكتر ؟ و قلقان على مين أكتر ؟ لقيت الإجابات كالتالى ( بالترتيب ) … انا متعاطف مع صلاح أكتر من غزة … و زعلان على زعله أكتر من غزة .. و قلقان على إنه مايلعبش كاس العالم أكتر من غزة .. … و بعدين سألت نفسى .. لو اللى حصل كان العكس .. لو صلاح هو اللى خد راموس مقلب حرامية مصرى أصيل و عجزه و كسره و طلعه برة .. كان وضع أغلبية المصريين حيبقى عامل إزاى ؟ ( الفرعووووووون .. راضع لبن بلدى أصيييل .. السمن البلدى يابا .. و كلام مهراجانات كتير .. ) .. بالظبط زى صورة ماتش مصر و البرتغال بتاعت اللى لافف علم مصر على كتافه و بيبوس اللى لافه على البرتغال على كتفاها .. ( إتخيلت لو كانت الصورة دى العكس كان إيه اللى حيحصل ؟! ) . … إطلاقاً إوعى تفكر البوست ده بوست يدعو لعدم دعم صلاح .. أو إنى باقولك تبطل تشتم راموس .. أو إنى باقولك غزة أهم مثلاً أو إن فى حاجات أهم من الكورة و أقلق مزاجك ولا حاجة .. البوست ده ببساطة مجرد خواطر باسأل فيها نفسى .. بصوت عالى شوية .. الأسئلة اللى جاية دى :

• أنا بقيت باحب أخويا أكتر .. ولا إبن عمى .. و لا الغريب ؟!
• أنا مشاعرى و عواطفى .. مازلت أنا اللى باتحكم فيها بالكامل ؟ .. ولا حد تانى بقى معاه الريموت كونترول بتاعها ؟!