بمناسبة الدوشة اللي علي ( بلبن ) .. و العيد

بمناسبة الدوشة اللي علي ( بلبن ) .. و العيد بقي .. و كل سنة و إنتوا طيبين . … زمااااااااااااان .. أيام التسعينات .. أيام ما كان وزير الإعلام ( صفوت الشريف ) .. سأله أحد المذيعين في لقاء :

• تقول إيه للتيار الديني اللي بيطالب بمنع مسلسلات و أفلام معينة من العرض علي شاشة التيليفزيون ؟! .. و إنه التيليفزيون مسئول عن رقابة أخلاق المجتمع . . رد عليه ( صفوت الشريف ) رد من أشهر الجمل في التسعينات علي ما أتذكر :
• التيليفزيون له زرار .. اللي مش عايز يتفرج .. يطفيه . … الجملة دي علقت معايا فترة طويلة جداً فحياتي .. بالنسبة لدماغ زي دماغي .. و فحدود علمي و خبرتي الحياتية الضئيلة أيامها ( كنت لسة 11 سنة تقريباً ) .. الجملة منطقية 100% … فعلاً… إنت دلوقتي إنسان محافظ و متدين و مش عايز أطفالك أو أسرتك يتعرضوا للي في التيليفزيون .. تمام .. إطفيه .. فين المشكلة ؟! … الموضوع أخد مني لحد ما وصلت ل عمر 23 سنة تقريباً .. و دي كانت أول مرة فحياتي أعرف عن فرع من فروع الرياضيات و الإقتصاد و علم نفس الجماعات إسمه : ( game theory - نظرية اللعبة ) .. النظرية دي موجودة بأشكال كتيييييييير جداً في حياتك اليومية .. و لو طاوعت نفسي دلوقتي و ماعملتش بنصيحة الناس اللي بتقول لي ( إختصر بوستاتك ) .. كان زماني بدأت في شرح أمثلة كتير من إزاي النظرية دي بيتم تطبيقها عليك فأغلب أنشطة و أوجه حياتك يومياً .. .. و لكن للإختصار المخل الشديد .. خليني أقول لك إن النظرية دي بتثبت بشكل قاطع .. إن : موضوع ( التيليفزيون له زرار .. اللي مش عايز يشوفه يطفيه ) … مجرد خدعة قبيحة جداً .. بيستخدمها من يعلم .. ليستغل من لا يعلم . … الخدعة دي بالمناسبة موجودة منذ قديم الأزل .. و بسببها في دول و إمبراطوريات كاملة .. خسرت حروب .. .. إزاي ؟! .. أى جماعة أو مجتمع في الدنيا .. بيتكون من أفراد مختلفين .. مختلفين في قدراتهم العقلية و الجسدية .. . أحد القدرات دي هي ( الإرادة ) .. يعني قدرتك علي التحكم في نفسك و تصرفاتك . . في ناس عندها إرادة من فولاذ .. ممكن يقف قدام ألف شخص .. و مايشكش فنفسه لحظة .. ولا يتأثر بيهم .. و في ناس عندها إرادة من جيلي بالفراولة .. لو أى حد معدي قال لهم علي أى حاجة .. بيقتنعوا بيها فوري و وقتي .. . و في ما بينهم .. درجات .. . في مثلاً اللي عنده إرادة نص نص .. و اللي ممكن يقاوم مرة .. و إتنين .. و تلاتة .. لكن عند مرحلة معينة من الضغط .. بيضعف .. و يمشي مع التيار . … و هي دي كلمة السر … ال ” تيار ” .. يعني ” أغلبية الناس ” . … لأن زي ما شرحت فوق .. مش كل الناس شبه بعض في قوة إرادتهم .. اللي بيحصل دايماً هو إن لو في مجموعة من 100 شخص .. متقسمين بشكل طبيعي ( يعني 10 أقوياء جداً .. و 10 ضعاف جداً .. بينهم الباقي بالتدريج ) .. . أول ما بيتم تعرض المجموعة دي لأى مؤثر خارجي ( زي فيلم في مناظر مثلاً , فيديو فضيحة معينة , … .أو غيرها من المؤثرات ) .. اللي بيحصل هو إن أضعف فرد في المجموعة دي دايماً بيكون أول حد بيجري علي المؤثر ده .. و يمشي في تياره .. و بالتالي .. أصبح تاني أضعف فرد في المجموعة دلوقتي محتاج إنه يقاوم ( التأثير الأساسي + تأثير زميله الضعيف الأولاني ) .. فبيضعف .. و يمشي معاهم .. و بعدين اللي بعده .. و اللي بعده .. و هكذا . … دايماً هي دي القاعدة .. إن أى مجتمع أبداً و دائماً و إلي قيام الساعة .. حيكون بقوة أضعف فرد فيه .. أى سلسلة .. قوتها بتتحدد بقوة أضعف حلقة فيها . … فبالتالي .. لما شفت إعلان بلبن بتاع رمضان السنادي .. ضحكت .. و بصوت عالي .. لأني إفتكرت كم النقاشات اللي خضتها علي مدار سنين عمري في موضوع ( التيليفزيون له زرار ) ده . . الحقيقة هو إن التيليفزيون له زرار صح .. لكن المجتمع مالهوش زرار .. . يعني ماقدرش أمنع زمايلي في المدرسة يتكلموا عن الفيلم الجامد طحن اللي مليان مناظر اللي إتعرض عالتيليفزيون إمبارح . . يعني ماقدرش أمنع كل من هم مسلوبي الإرادة قدام إدمانهم للسكريات إنهم يقفوا طوابير قدام محلات بلبن .. و بالتالي بيكون أى حد معدي محتاج مش بس إنه يقاوم رغبته في السكريات .. و لكن يقاوم إحساسه بالغُربة عن الجماعة .. و ال ( Fomo - Fear of missing out ) .. ( و أنا كنت مدمن سكريات بالمناسبة .. و لكن دي قصة بوستات كتير كتبتها عن الإدمان عموماً زمان ) .. .. معلومة إن السكر بيسبب الإدمان مش معلومة جديدة إطلاقاً .. بالعكس .. إمبراطوريات كاملة قامت بسبب السكر .. و أشهرهم كوكاكولا و بيبسي .. و تأثير الإمبراطوريات دي الضار علي البشرية .. يفوق بأضعاف تأثير حروب و مجازر مشهورة . .. و لكن .. الخدعة دايماً بتكون في جملة بسيطة بيقولها أى مسئول في الشركات دي .. ( ماحدش بيجبرك إنك تشتري المنتج بتاعنا ) . … الإجبار هنا مش بيكون إجبار قسري فردي .. و لكن بيكون إجبار إجتماعي كامل .. بيستغل أضعف فرد في المجتمع .. إلي أن يصبح أغلب المجتمع نفسه ضعيف .. .. مهما أنا أو غيري كتب أو إتعملت حملات توعية .. السجاير حتفضل مسيطرة علي شعوب كاملة .. التيليفزيون حيفضل ينحدر من سيء إلي أسوأ .. بلبن و غيره من البراندات المشابهة ( ماك , كنتاكي , كولا , … ) حيتفحل و يتحول لإمبراطورية .. .. المعادلة معروفة و مش جديدة إطلااااااااقاً .. زي ما بيُقال ( the most famous secret - أشهر سر في العالم ) . … طب أمال أنا باكتب هنا ليه دلوقتي ؟! طالما إنه مافيش فايدة يعني ؟! .. لأن اللعبة كلها عمرها ما كانت إن الضعيف أوي مايقعش .. الضعيف أوي دايماً حايقع .. دايماً أى مجموعة حتلاقي فيها اللي يخاف الأول .. اللي يخون الأول .. اللي يضعف الأول .. . اللعبة الحقيقية دايماً بتكون علي ( النص نص ) .. اللي بيمشي علي سطر و يسيب سطر .. اللي شوية قوي و عنده إرادة .. و شوية ضعيف و بيغلط .. . النص نص .. هما الأغلبية .. و هما القوة الحقيقية لأى جماعة أو مجتمع . . و ال( نص نص ) دول .. كل ما بيحتاجوه هو : التذكير .. إن حد كل شوية يفكرهم .. لأنهم أذكياء جداً .. بس مش لدرجة إنهم ماينسوش .. و فنفس الوقت مش أغبياء .. لدرجة إنهم مايفهموش .. .. هما بس كل شوية .. بيحتاجوا اللي يفكرهم . . و دور اللي يفتكر منهم ( زيي كده لما إفتكرت موضوع صفوت الشريف ) .. إني أفكر اللي جنبي .. . و هكذا . و هكذا . و هكذا . … و الله أعلم .