ما تيجي نفترض 🎻🎻 🤣

ما تيجي نفترض 🎻🎻 🤣 رغماً عني والله .. سمعت أغنية عمرو دياب بيغني فأولها ( ما تيجي ننبسط ) بما إن كل التكاتك و الجيمات و المحلات و الإعلانات كانوا مشغلينها لما نزلت من فترة .. و بالتالي .. و رغماً عني .. لقيتني باغني العنوان ده ( ما تيجي نفترض ) .. بنفس اللحن 🤣 .. … المهم .. ما تيجي نفترض إن العالم مختلف شوية .. إزاي ؟! . مثلاً : بمجرد ما تثبت إنك حافظ للقرآن و تجتاز إختبار قراءة .. يتصرف لك مباشرة شاليه عالبحر مباشرة في هاسييندا أو مراسي .. مٌجهز تجهيز فندقي كامل .. . و بعد ما تثبت إنك حفظت ألف حديث ب تواترهم .. و تفسيرهم .. يتصرف لك عربية بي إم دبليو إكس 6 .. . و بعد ما تثبت إنك قادر علي حل 100 مسئلة فقهية مثلاً .. تاخد بلايستيشن بإشتراك بريميام مدي الحياة 🤣 … ما تيجي نفترض .. إن ال ( Idols ) حالياً .. هما الشيوخ .. و لا … مش باقصد هنا الشيوخ الكيوت اللي هما بالفعل (Idols ) في بعض الأوساط .. لا .. أنا أقصد .. إن ثقافة ال (idol ) نفسها .. و تقديس المظهر و الإكسسوارات و التفاصيل الشكلية .. تبقي هي مظهر ال ( شيخ ) .. يعني .. الجلباب المٌقصّر .. و اللحية المُطلقة .. و حف الشوارب .. و حتي الطاقية البيضاء .. اللي هو حتلاقي العيال اللي لسة بالغين أول إمبارح العصر .. ماشيين في الشارع لابسين اللبس ده .. و بيقلدوا الشيوخ في كلامهم و مظهرهم .. عشان يبقوا ( كووووووووول .. و كاجوال ) . … ما تيجي نفترض .. إن جميع المساجد أصبحت مُكيفة .. بتقدم وايفاي سريع جداً مجاني بالكامل .. و فيها كمان مساجد كتير بتبقي ( Full board all inclusive 🤣 = يعني كل أكلك و مشاريبك مجاناً طول الوقت زي ما مزاجك يجيبك … في الحلال طبعاً ) . … ما تيجي نفترض .. إن باسبورك لما بيتكتب فيه في خانة الديانة ( مسلم ) .. بيتم التعامل معاك علي إنك معاك أعلي حصانة دبلوماسية في العالم .. تسافر أى بلد علي مزاجك بدون تأشيرة . تدخل صالات كبار الزوار مباشرة .. مابتتفتش .. مابتقفش في جمارك . و شنطك بتنزل من الطيارة علي عربيتك مباشرة .. و مابتقفش تستناها علي السير و جنبك حد بيزن في ودنك ( حمد الله عالسلامة يا باشا .. باشا .. باشاااااااااااا 🤣 ) . … ما تيجي نفترض .. إنك لمجرد إنك مسلم .. بيتصرف لك راتب شهري يكفي كل إحتياجاتك .. و رفاهياتك كمان .. و أحدث موبايل .. و أحدث لاب .. و كمان حيتحجز لك ملعب خماسي جنب بيتك تلعب فيه براحتك كورة كل خميس من غير ما تكتشف إن حد دفع زيادة و خد حجزك 🤣 . و آه .. إصحابك حيبقوا فاضيين و عندهم طاقة ينزلوا يلعبوا .. و مش حتكتشف بعد ما حجزت إنهم عواجيز مكسلين ينزلوا من عالسرير 🤣🤣🤣 … ما تيجي نفترض .. إنك لمجرد إنك مسلم ( أو مسلمة ) .. بمجرد البلوغ .. و إنك تشعر الشعور الطبيعي الفطري اللي ربنا خلقه فينا ل حكمة يعلمها .. إنك عايز ترتبط و تكمّل إنسانيتك .. إنك تقدر .. ب كل بساطة .. ب كل سهولة .. فقط لاقي واحدة تستحمل رزالتك و غتاتتك … و إنت تستحمل إنها تقولك خد الزبالة معاك و إنت نازل .. و شكراً .. تتجوزوا و تعيشوا الحياة الطبيعية خاااااااالص اللي ربنا خلقنا أحرار نعيشها . من غير ما تقلق ب تكلفة مادية بتزيد مع كل ألبوم أغاني جديد بينزله عمرو دياب 🤣 .. و آه .. و الأهم .. ما تيجي نفترض إن لعنة ال ( نيش ) لم تحل علي العالم .. و ماحدش في العالم يعرف يعني إيه ( نيش ) 🤣🤣🤣 بس لا .. دي صعبة شوية .. خيالنا مايوصلش للجموح ده .. فاهم 🤣 … إفترضت ؟! عشت الحلم و الخيال و الفانتازيا ؟! زودت كمان إفتراضات من عندك لكل اللي تتمناه ؟! .. جميل .. زوّد كمان شوية إفتراضات .. .. ما تيجي نفترض إن كل اللي بيشتم و يلعن و يسب و يقول حاجة وحشة .. يتحرق وقتي و هو واقف كده 🤣 . … ما تيجي نفترض إن اللي يسرق .. بمجرد ما يسرق .. تنزل صاعقة من السماء تشقّه نٌصّين قدامك . … ما تيجي نفترض إن اللي يظلم … بمجرد ما ظلم .. يتشل .. اللي هو إحنا لسة مش حنجادل … هو شلل رباعي ظريف كده .. و ينزل مربعن عالأرض 🤣 … ما تيجي نفترض إن اللي يؤخر صلاته بدون عذر أو سبب .. يتقطع صوباع من صوابعه مثلاً .. و بالتالي .. معاك 20 فرصة علي مدار حياتك .. ب 20 صوباع عندك .. بعدهم .. يتقطع من جسمك أعضاء تانية .. و إنت و حظّك بقي 🤣 … ما تيجي نفترض إن اللي يرسم وشم .. مايدفعش زكاة .. يؤذي جاره .. يعُق أبوه و أمه ( يضايقهم يعني ) .. أو يعمل أى حاجة تانية حرام .. يشوف عقابه مباشر .. و لحظي .. و فجأة .. … إفترضت ؟؟! عشت الحلم و الفانتازيا ؟! إنتقمت في خيالك من كل اللي ظلمك أو ضايقك أو ضايق المعايير الدينية في فهمك ؟! … جميل .. دلوقتي بقي .. زهقت ؟! أصل طبيعي و أكيد حتزهق .. أصلنا لسة في الدنيا .. ف معلش .. لسة مانقدرش نفترض حاجات مش موجودة غير في الجنة ربنا يرزقنا و يرزقك إياها .. .. يعني إيه ؟! .. يعني .. فاهم إنك شاب عنيف ( بكسر العين بصوت اللمبي ) .. و مليان حيوية و نشاط و أكبر أحلامك في الحياة بتتمثل في ملكة جمال العالم .. و إنك بتقسم إنك لو إتجوزتها .. حتقفّل باب الشقة خرسانة مسلحة و مش حتخرج منها أبداً .. أحب أقول لك إن كل رجال العالم بلا إستثناء .. اللي قدروا يحققوا الفانتازيا دي .. إكتشفوا نفس الحقيقة اللي بيكتشفها كل إنسان في الحياة .. و هي : الزهق و الملل . .. جعان ؟! … ميت من الجوع ؟! .. جميل .. هات أعظم أكلة نفسك فيها .. و إبدأ أكل .. كمّل أكل .. ماتوقفش .. إيه ؟! بطلت تعض في البيتزا و تمضغ ليه ؟! .. شبعت ؟! .. زهقت ؟! .. مش قادر حتي تشم ريحة البيتزا ؟! .. كل قطمة زيادة من أقصي أحلامك اللي كنت بتتمناها .. أصبحت بالنسبة لك عذاب .. .. حمد لله عالسلامة … هي دي الدنيا .. و أحد أكبر نعيم الجنة .. إن مافيهاش زهق . … فبالتالي .. بعد ما زهقت من المتع اللي إنت غرقان فيها كلها دي ( لأنك مسلم ) .. حتحب بقي تمارس مسئوليتك ك إنسان ( اللي ربنا خلقك أساساً لها ) .. بس أنا حريحك .. كل أهل الأرض مسلمين .. إيه رأيك بقي ؟! .. تعالي نفترض يعني ( زي ما باشمهندس أيمن عبد الرحيم .. أعزه الله كان بيقول ) .. إن كل المسلمين إتحدوا .. و طلعوا علي الكُفار و خدوهم فوق سطح الواد حمادة .. و شكراً 🤣 و بعدين طلعوا علي الكوكب ب فنيك و ديتول .. غسلوه الغسلة المتينة .. و عاشوا حياتهم الرائعة بقي . … فا حتعمل إيه ؟! أقول لك ؟! .. الحيوانات .. قطط الشوارع الضالة .. و الكلاب المسكينة .. تعالي نوفر لهم حياة كريمة .. .. خلصت ؟! .. حمّيت كل القطط و الكلاب و لاعبتهم ؟! .. الغابات يا باشا .. الغزالة المسكينة اللي هناك دي … الأسد كان بيبص لها بصة حمدي الوزير 🤣 .. تعالي نحميها منه . … بس إستني … الأسد يا باشا .. بعد ما خدنا منه الغزالة .. زعل و خد علي خطره و بقي جعان مش لاقي ياكل .. تيجي نقنعه يبقي فيجان ؟! … طب المحيطات ؟! سمكة القرش بتجري ورا سمكة التونة العنيدة و عايزة تاكلها .. هي مش سمكة التونة العنيدة دي لها أهل و عيال و عايزة تعيش لهم ؟! … فهمت الرغي اللي بارغيه ده كله أنا عايز أقول إيه ؟! … تفكير ناس كتيييييييييييير جداً للأسف في ( إحقاق الحق ) .. أصبح تفكير مختل و ناقص .. . يعني إيه ؟! . يعني .. إنت مش عايز ( تٌكرم العالم في سبيل الله ) .. و لا عايز ( تدعو العاصي للهداية في سبيل الله ) .. و لكن .. إنت عايز ( تٌكرم العالم بمزاجك .. في سبيل الدنيا بمزاجك ) … و عايز ( تشوف العاصي بيعاني لمزاجك .. في سبيل مزاجك و لذة الإنتقام ) .. . فاهم ده مٌختل قد إيه ؟! . الخلل ده ناتج لأن : الدنيا تملأ قلبك .. و وجدانك .. و منتهي آمالك . . ف شايف إن أقصي ما يمكن أن تتمناه للعالم من خير .. هو الدنيا . و عايز تحرم منها اللي مش علي مزاجك .. و كأنك تملكها . … و في الإفتراضات الكتيييييييييييير أوي اللي فوق دي .. بفرض إنك قمت الصبح لقيت نفسك سوبر مان .. و لابس الأندر الأحمر فوق البنطلون .. و عملتها كلها .. . تسمح لي أسأل .. حتكشف عن مكنون الصدور إزاي ؟! حتعرف إزاي إن اللي سعي في حفظ القرآن و الحديث .. و فهم الفقه و الشريعة .. و غيرها من مساعي الدين .. عمل ده … في سبيل الله ؟! … ولا في سبيل شاليه هاسييندا ؟! . أتٌقسّم الأرزاق بمزاجك ؟! … أتعبد الله في سبيل الله ؟! .. أم في سبيل الدنيا ؟! تأتمر بأوامره .. و تنتهي عن نواهيه .. في سبيل الله .. أم في سبيل الدنيا ؟! .. تسعي للدنيا .. في سبيل الله .. أم في سبيل الدنيا ؟! … رجاءاً إفهم .. إنك مش المفروض تكره العاصي .. و لكن تكره المعصية .. مش المفروض تتمني إنك تشوف مُعاناة العاصي .. و لكن تتمني تشوف هدايته . .. و عشان ال( مُجادلين اللي حيكتبوا علطول .. إن الفرح بهلاك الطُغاة سُنّة من سنن السلف الصالح ) .. رجاااااااااااااااااااااااااااءاً إفهم .. إن الحكم علي إنسان إنه ( طاغي ) .. مش بمزاجك .. ولا معاييرك اللي معتمدة علي فهمك المحدود بقدراتك .. و لكن له ناس مؤهلين ل ده بعلمهم . . و في فرق ضخم جداً .. كبييييييييييييير جداً .. بين ( العاصي ) .. و ( الطاغي ) . … و الله أعلم .