لو بتحب إنسانة فعلاً .. حب حقيقي و صادق ..

لو بتحب إنسانة فعلاً .. حب حقيقي و صادق .. و مش بتكدب علي نفسك .. إذن اللي المفروض تعمله هو : إنك تسيبها 😅. .. معلش .. ركّز معايا .. و قبل ما تشك من إني أنا اللي كاتب الكلام ده .. و إنك مادخلتش بروفايل غلط مثلاً 🤣 .. إقرأ بداية البوست تاني .. واحدة واحدة و بهدوء . … لو بتحب إنسانة فعلاً .. حب حقيقي و صادق .. إذن إنت أكيد بتتمني لها أفضل شيء في الحياة علي الإطلاق .. صح ؟! . و لو مش بتكدب علي نفسك .. إذن إنت أكيد عارف إنك مليان عيوب .. كتير .. أوي .. جداً جداً 😅 .. يعني بكل تأكيد إنت مش أفضل حد في الحياة إطلاقاً .. و في رجال كتير أفضل منك .. أكيد .. . إذن .. ” المنطق بيقول ” إنك المفروض تسيب اللي بتحبّها .. بل .. ” المنطق ” بيقول .. إنك تحاول تجوزها لأفضل حد تقدر بإمكانياتك تلاقيه . … و لكن .. إزاي حتعرف إذا كان الشخص ال ” أفضل منك ” ده .. حيحبها زيك .. و يتمني لها أفضل شيء في الحياة زيك ؟! . . ممكن جداً يكون هو فعلاً أفضل حد في الكوكب حالياً .. و يرتبط بيها عشان خاطرك و عشان إنت مٌقنع جداً مثلاً 🤣 .. لكن مايعرفش يحبها .. و كل مرة يحاول يدّيها هي ( ورك الفرخة ) .. و ياخد هو الصدر .. في حين إنه في الحقيقة هو اللي بيحب الورك 🤣 … يتضايق .. و يتشحن منها تدريجياً .. و يبدأ ده يلوّن كل مشاعره في باقي حياته .. و عند فرخة مٌعينة .. أقصد لحظة معينة .. حينفجر فيها . … إذن .. لازم يكون ( الحب ) ضمن المعايير اللي تحسبها و تقيسها .. أثناء بحثك عن ( الشريك الأمثل ) ل البنت اللي إنت بتحبّها . … طب ثانية واحدة .. هو الحُب يتقاس إزاي ؟! و هل بيتقاس أصلاً ؟! .. و مشكلة تانية كمان .. ما هو لو إنت لقيت أحسن حد في الحياة حالياً .. أكيد أحد مواصفاته إنه برضو مش بيكدب علي نفسه .. يعني أكيد حيكون عارف عيوبه الكتير .. و مستحيل يكون شايف نفسه أحسن حد في الكوكب .. لأن الكمال لله وحده .. إذن .. حتي لو قدرت تخليه يحبها نفس مقدار حبّك ليها مثلاً .. حتكون النتيجة إنه حيقعد جنبك علي نفس الترابيزة .. و يفكّر معاك إنها أكيد تستحق حد أحسن منه هو كمان . .. و بالمنظر ده إنت بتحكم علي ( أكتر بنت إنت بتحبها في الحياة ) .. إنها تعيش وحيدة للأبد .. و تعاني أكبر معاناة ممكن تعانيها أنثي في الحياة .. و هي إنها ماتلاقيش حد تقول له : ” خٌد الزبالة معاك و إنت نازل ” 🤣 … ال هري اللي فات ده كله .. بيلخصه العبقري د أحمد خالد توفيق .. رحمة الله عليه في الجٌمل : «أنا لستُ جديرًا بها. لكن من قال إن الخنزير الآخر الذي سيتزوجها يومًا جدير بها هو الآخر؟ لكن ما دامت ستقع في قبضة وغد لا محالة، فليكن أنا.» … و سبب إني كتبت الهري ده كله .. هو إنه أحد أفضل و أسرع الطٌرق اللي أشرح لك بيها حقيقة مٌعينة .. بيحتاج الفلاسفة ل سنييييييييييييين طويلة في دراسة الفلسفة و المنطق عشان يشرحوها .. و هي :

( المنطق .. في الحياة الدنيا .. مش منطقي ) 🤣 … في مٌعضلات تانية كتييييييييييييير مشهورة بتوضّح الموضوع ده .. من أشهرهم مثلاً ( حلّاق كريت ) .. اللي هو : لو في جزيرة كريت .. في شرطين أساسيين .. الأول .. إن كل أهل الجزيرة بيحلقوا عند حلاق كريت .. التاني .. إن مافيش حد بيحلق ل نفسه إطلاقاً ( زي حالاتي علي مدار ال16 سنة اللي فاتوا 🤣 ) .. . إذن السؤال : حلاق كريت نفسه .. مين اللي بيحلق له ؟! … لاحظ هنا إن مافيش مجال للرخامة و الرزالة في الإجابات معلش 🤣 .. إحنا بنفترض إلتزام كامل بالشروط المنطقية الموضوعة .. و ندور علي إنها تولد نتيجة منطقية .. . إلا إن ( زي موضوع البنت اللي بتحبها فأول البوست ) .. المنطق في أحيان كتير بتكون نتيجته .. غير منطقية .. … معني المنطق العام .. بشكل مٌختصر و غير أكاديمي إطلاقاً .. هو : ( نتيجة تؤدي ل سبب بشكل متكرر و مفهوم و ممكن تحليله لأبسط أسبابه ) .. .. يعني .. لو إنت دلوقتي مسكت زلطة و حدفتها في زجاج النيش في بيتكم .. و تاني يوم عرفنا إنك إتعرضت لحادث أليم .. و وقعت من شبّاك بيتكم في الدور التالت .. مرّتين ورا بعض 🤣 .. … كل الناس حتفهم إن ده هو النتيجة المنطقية تماماً لأى حد يحدف زلطة في زٌجاج النيش 🤣 . لأن دي قاعدة عامة فأى بيت مصري . … لكن .. في نوع تاني من المنطق .. إسمه : منطق خاص ( ب قواعد موضوعة ) .. و ده هو اللي منه قصة ( حلاق كريت ) دي .. إنك بتحط علي نفسك شروط .. و تتحرّك بس في حدود الشروط اللي إنت حطيتها دي . … الفوازير المشهورة اللي كنت كتبت عنها من فترة ( فزورة ال12 كورة , و فزورة ال 100 سجين ) .. دول من نوعية المنطق الخاص .. . إننا بنفترض شروط للفزورة .. و لازم تحل في حدود الشروط دي . ماينفعش تخترع حل رخم من عندك .. و تتسائل عن غباء الفزورة 😅 … أحد أفضل الطرق برضو إنك تشوف ( المنطق الخاص ) ده .. هو إنك تتفرج علي أطفال بتلعب بصوت عالي مزعج تحت بلكونة بيتكم .. . حتلاقيهم فجأة بيزعقوا و يقولوا مثلاً : لاااااااااااااااااااااا .. إحنا ماتفقناش علي كده .. إحنا قلنا إن الجون هو بين الطوبتين دول .. و إن اللي أمه تنده عليه من البلكونة مالوش يلمس الكورة .. يبقي الجون مايتحسبش 🤣 . .. أو طبعاً كل قواعد كرة القدم و باقي الرياضات عموماً .. يعني إنت و إنت فبيتكم أكيد لو لمست الكورة بإيدك مش حتلاقي حكم طالع لك من المطبخ بيدّيك إنذار 🤣 … فهمت إيه بقي لحد دلوقتي من كل الهري اللي فات ده ؟! . . أولاً : المنطق بشكل عام في الدنيا … مش منطقي . ثانياً : في حاجة إسمها منطق عام .. لكن في الحقيقة هو مش عام إطلاقاً .. لأنه ( مرة تانية لو مش واخد بالك ) .. مش منطقي . ثالثاً : في حاجة إسمها منطق خاص … و هو ده فقط الوحيد ال ( منطقي ) … خلّيك فاكر بقي كل الكلام اللي فات ده .. لأن البوست القادم إن شاء الله .. حنشرح قواعد لعبة .. لعبة زي أى لعبة عيال بيلعبوا بصوت مزعج و عالي تحت بلكونتك .. و اللعبة دي … هي كانت اللعبة الوحيدة اللي بتلعبها كل الأجهزة الرقمية بالكااااااااااامل ( موبايلات , أجهزة كمبيوتر , … ) حتي الآن .. . و سبب إني قلت ( كانت ) .. إن مؤخراً بقي في لعبة جديدة .. إسمها (Quantum logic ) 🤣 .. و لكن لهذا بوست آخر إن شاء الله . … و الله أعلم .