سنة 2014 .. إتعرض الموسم الأول من ( Silicon Valley

سنة 2014 .. إتعرض الموسم الأول من ( Silicon Valley ) .. مسلسل من أروع المسلسلات الكوميدية .. و اللي تابعته من أول حلقة نزل فيها . و فأحد حلقات الموسم الأول ده .. أحد الأبطال اللي المفروض إنه ( ملياردير ) و إنه علي سبيكترام التوحد كمان .. بييجي له ناس من أحد الشركات اللي هو مستثمر فيها … و بيطلبوا منه أى فلوس عشان شركتهم بتخسر و محتاجة فلوس بأسرع وقت و إلا حيفلسوا . و علي مدار الحلقة .. بيفضل سرحان في ال : سمسم . … و إزاي إنه و هو ماشي في الشارع لفت إنتباهه يافطة ل سلسلة محلات برجر مشهورة .. و علي اليافطة دي .. كان في منظر ل ساندوتش برجر عليه سمسم .. كتير . و علي مدار الحلقة .. الناس اللي حواليه كلهم قلقانين و خلاص حيفقدوا الأمل فإنهم ياخدوا منه أى فلوس .. و هو قاعد بيتأمل في حاجة وعشرين سندويتش برجر طلبهم .. و حاططهم قدامه علي المكتب .. بيتفرج عليهم بس .. مش بياكل . .. و فآخر الحلقة .. و الناس خلاص بتنفجر و بيطلبوا منه إنه يركز معاهم و لو لثواني .. بيرفع راسه من علي مكتبه و يبص في عينيهم لأول مرة في الحلقة و يقول : ميانمار .. و البرازيل .. دولتين من أكبر 3 دول مسيطرة علي إنتاج السمسم في العالم .. عندهم برضو مشكلة ضخمة في تكاثر ال ” جراد ” . و دورة حياة الجراد في ميانمار بتتكرر كل 13 سنة .. يعني كل 13 سنة .. ميانمار بتعاني من تكاثر ضخم في ال ” جراد ” . في حين إن الدورة دي في البرازيل بتحصل كل 17 سنة . و السنة الجاية .. الدورتين دول حيحصلوا فنفس السنة .. لأول مرة من 221 سنة . يعني محاصيل الدولتين دول .. لأول مرة من 221 سنة .. حيتدمروا بالكامل فنفس الوقت . تالت دولة في إنتاج السمسم في العالم هي ” إندونيسيا ” .. و إندونيسيا .. ماعندهاش مشكلة جراد . و لكن .. لأن إندونيسيا محاصيلها بتعتبر تالت جودة في العالم .. ف طبيعي إن سعرها كان دايما أقل من البرازيل و ميانمار .. و ماحدش بيهتم بيها . ف .. علي مدار اليوم .. هو عقله كان سرحان في التفاصيل دي .. و إشتري شوية أسهم في الشركات المسئولة عن الزراعة في إندونيسيا .. و إشتري شوية ( رهانات - يعني Shorted ) ل الشركات المسيطرة علي إنتاج السمسم .. … *** الرهانات دي شرحها بشكل مخل و سريع جداً : إنت بتراهن علي إن شركة ضخمة و قوية مثلاً زي كوكاكولا إنها أسهمها حتنهار خلال فترة معينة مثلاً . و لو حصل و إن السهم ده إنهار .. إنت بتكسب .. و لو فضل قوي .. إنت بتخسر رهانك ده .. ف .. لأن ماحدش عاقل ممكن يراهن علي إن شركة ضخمة و قوية جداً زي كوكاكولا مثلاً ممكن سهمها ينهار .. ماحدش حيرفض رهانك .. و كتير أوي حيجروا إنهم ياخدوا فلوسك . … ف البطل اللي باتكلم عليه .. عمل كده .. و بالتالي بناءاً علي حساباته .. لو سعر السمسم إتأثر و لو بمقدار 10% .. هو حيكسب تقريباً 8 مليون دولار ف هو قرر إنه حياخد قرض 15 مليون دولار من البنك بناءاً علي الربح المتوقع ده .. و يديه للشركة اللي حتفلس دي 🙂 . .. و طبعاً الناس رقصت من الفرحة . … أول ما شفت الحلقة دي زمان .. سنة 2014 .. كانت معلوماتي أيامها عن العالم ده ( التداول و الأسهم ) مجرد قشور بسيطة جداً … يعني .. كنت يادوب أعرف شوية عناوين و مفاهيم رئيسية . .. بعد الحلقة دي مباشرة .. خدت غطس عمييييييييق .. أحاول أتعلم كل شيء عن العالم ده .. .. و سبحان الله .. ده كان فنفس الوقت اللي كنت فأعماق حياتي فيما له علاقة بالكريبتو و البيتكوين ( قبل ما يكون لسة البيتكوين ب 15 دولار 🤣 ) . … إيه اللي فكرني بكل الكلام ده دلوقتي ؟! .
… اللي بيحصل بين الصين و أمريكا .. و قرار الصين الأسطوري .. بإنها تبلّع أمريكا حاجة و تمانين مليون فدان فول صويا .. كان المفروض إن الصين حتشتريها . .. لو ماتعرفش .. الفول الصويا .. بيتم إستخدامه في صناعات غذائية كتييييييييير جداً جداً علي مستوي العالم .. لو فاضي مثلاً .. إنزل إتمشي في كارفور أو فتح الله .. و إقرا المكونات علي أغلب المٌعلبات و السناكس مثلاً . … تبعات قرار الصين ده حصلت بالفعل خلاص .. حتي لو رجعت في كلامها و إشتروا مثلاً .. و تقدر تشوفها لو إتفرجت علي حركة الأسهم العالمية .. . و ده .. لأن العالم مليان بالناس اللي فاهمه شوية الكلام اللي فوق ده .. و فاهمين أكثر منه بكتير .. و خدوا قراراتهم خلاص اللي حركت أرصدة بنوك بأصفار كتير .. أوي . … طيب .. هل كلامي ده معناه إنك تروح تجري تتعلم تداول و بورصة عشان تعمل شوية ملايين مثلاً ؟! إطلاقاً .. و أعتذر لو قلت إنك لو عملت كده للهدف ده .. تبقي أحمق . .. كلامي ده مجرد دعوة إنك : تحاول تفهم . .. تحاول تفهم إن كل ( و مش أغلب .. لا … كل ) الأخبار و القرارات السياسية و العسكرية .. و الدينية .. و الرياضية .. و الفنية .. و حتي قرارات زي مين اللي حيلعب دور ميكي في فيلم ميكي ماوس مثلاً .. دي قرارات إقتصادية مالية أولاً و أخيراً .. . و إن الفلوس الناتجة عن القرارات دي .. بتسبب قرارات تانية .. . يعني مثلاً ( علي سبيل المثال المٌبسّط جداً جداً ) : و خلينا نضرب المثال ده في الهند عشان ماحدش هنا يزعل 🤣 حد يروح يدفع مليون روبية ل قناة تيليفزيون تعمل شوية برامج عن إزاي منتجات الألبان حرام بإجماع فقهاء الهندوسية .. لأنها مشتقة من البقر . و بعدين ده يؤدي إن تحصل خناقة .. تأثر علي أسعار منتجات الألبان في الهند .. و أعمل حركة لعب في الأسهم زي ما شرحت فوق .. و آخد شوية فلوس من الليلة دي .. قول بتاع 10 مليون روبية مثلاً .. أروح طالع علي حزب الهند أولاً .. و أدفع لهم هناك مليون روبية تبرع .. فيبدأوا يقولوا كل اللي أنا عايز أقوله في مجلس الشعب الهندي .. و بعدين أدفع 5 مليون روبية تانيين .. هدايا و تبرعات ل رٌتب في الجيش و الشرطة الهنديين .. و بعدين أرجع أدفع مليون روبية تانيين لنفس القناة الأولانية .. عشان تقول إن منتجات الألبان طلعت حلال لأن الشريعة الهندوسية لازم تواكب تقدم الزمن . و أعمل من التغيرات الجديدة في إهتمام السوق بتاع 20 مليون روبية .. و هكذا و هكذا و هكذا … و السوشيال ميديا الهندي .. تبقي متدرمغة دوشة عن : هل الزبادي حلال ولا حرام ؟! و ناس تانيين تبقي بتزعق .. يا جدعان حزب الهند أولاً بيحاول يدخل الدين في الدولة و الدولة في الدين .. و ناس تانيين بتزعق .. يا جدعان إحنا لازم نبدأ نهتم بالعلم و ننتج زبادي خلاط من غير لبن عشان نتقدم . … و طبعاً .. حتلاقي أغلبية عاقلة أوي .. قاعدين ينزلوا ميمز و نكت علي كل الهري ده .. … و في تلك الأحيان … حاروح أنا .. أدفع مليون روبية تانيين .. لقناة مختلفة .. عشان تعمل برامج إن : في رمضان في الهند السنة دي .. الراجل الطيب ( اللي هو أنا ) .. قرر يتبرع ب 5 مليون روبية .. عشان قلبه طيب و بيحب الغلابة 🤣 … و الله أعلم .

*** فيديو الحلقة بتاعت سيليكون فالي في التعليق الأول .