الإجابة هي : 42

الإجابة هي : 42 .

” إيلون ماصك .. بيتحّي و يدحرج المسا عالناس الكويسة و سمّعني أجدع سلام لعم الناس و كوبّارتنا ( ترامب ) الكبير أوي أوي .. و رقّصني يا جداااااااااااااااااااااااع ” 🤣🤣🤣 .. اللي فات ده .. كان الترجمة الحلمنتيشية الفصيحة للي قاله ( Elon Musk ) في مؤتمر ترامب الأخير اللي حصل أول إمبارح . ( ماصك ) بقاله كام شهر كان واضح ميوله إنه عايز يدعم ( ترامب ) في إنتخابات الرئاسة الأمريكية القادمة .. و من شهرين تقريباً أعلنها صراحة .. و إمبارح طلع معاه في المؤتمر بتاعه و إتنطط جنبه شوية عالمسرح . … … ممكن تقول كلام كتير جداً عن ( إيلون ماصك ) .. لكن إطلاقاً ماتقدرش تقول إنه محدود أو متوسط الذكاء و المعلومات .. مش لازم تقول عليه ( عبقري ) .. و لكنه بكل تأكيد مستوي ذكائه مرتفع جداً جداً .. و مستوي معلوماته و ثقافته برضو أكبر بكتييييير من المعدل الطبيعي للبشر . … فبالتالي .. قرار زي ده ( إنه يدعم شخصية بهلوانية زي دونالد ترامب ) في إنتخابات مهمة جداً زي دي ( إنتخابات رئاسة أمريكا ) .. قرار يستحق إنك تفكر فيه .. و تحاول تفهمه .. … … أنا قرأت أغلب كتب السير الذاتية اللي إتكتبت عن ( إيلون ماصك ) .. و متابعه بقالي سنين طويلة .. يمكن من قبل ما ناس كتير تسمع عنه أساساً أو يبقي ( mainstream figure - شخصية عامة ) .. أول مرة وضعت إسمه في ال ( Google notifications ) بتاعتي أساساً .. كان سنة 2012 تقريباً .. ال (google notifications ) دي آداة من جوجل .. بتقدر تحط فيها أسامي معينة أو مواضيع معينة .. و يومياً تبعت لك إيميلات بآخر أخبار الأسامي أو المواضيع دي في الحياة .. آداة تحفة و أنصحك بإستخدامها لو تقدر . … لو عايز تفهم بقي جزء كبييييييييييييييييييير من شخصية ( إيلون ماصك ) .. و دوافعه و فلسفاته .. يبقي لازم تقرأ قصة إسمها : the hitchhiker’s guide to the galaxy .. القصة دي سمعت عنها كتير من زمان .. و تقريباً فكل مرة إيلون ماصك كان بيتكلم عن نفسه أو فلسفاته .. كان بيذكر أمثلة من القصة دي و يقتبس منها .. … من سنة أو أكتر تقريباً .. نزلت القصة دي .. و سمعتها بالكامل .. و كتبت عنها أكتر من بوست علي ما أتذكر في وقتها .. … القصة بالإختصار و التلخيص المخل هي : كوكب الأرض بيتم تفجيره بالكامل عشان يفضوا مكان يعملوا ” كوبري 🤣🤣 ” بين مجرتين .. و تم إرسال تحذيرات و تنبيهات كتير لسكان كوكب الأرض .. و لكن عشان البشر أغبياء و لسة ماوصلوش إنهم يفهموا اللغة اللي تم إرسال التنبيهات و التحذيرات بيها .. ماعرفوش إن ده المفروض يتم . في حين إن كائنات تانية كتير أذكي من البشر ( زي الدلافين ) فهموا و خدوا إحتياطاتهم 🤣 . و قبل التفجير بلحظات .. مواطن بريطاني عادي جداً جداً جداً .. بيكتشف إن أحد زملاء عمره .. كان ( مسافر = عابر = Hitchhiker ) بين المجرات .. رحالة يعني 🤣 .. و العابر ده .. بياخد المواطن البريطاني معاه و يهربوا علي سفينة فضائية تابع الكائنات اللي بتفجر كوكب الأرض . .. و العابر ده .. معاه كُتيب صغنن 🤣 .. فيه معلومات كل حاجة عن أى حاجة فأى حاجة .. الكُتيب ده إسمه ( The hitchhiker’s guide to the galaxy = دليل الرحالة بين المجرات ) . .. و بتمشي فرحلة طوييييييييلة .. مليانة بالتفاصيل و الأحداث اللي مستحيل أقدر ألخصها هنا .. و لكنها بتنتهي بالتالي :

إنهم بيكتشفوا إن كوكب الأرض ما هو إلا كمبيوتر كبير أوي .. بناه كائنات معينة وصلت لكل حاجة ممكن يتمناها أى كائن في الحياة … كل التقدم و الرخاء و التكنولوجيا اللي ممكن تتمناها في الحياة .. الكائنات دي وصلت لها … لحد ما إكتشفوا إنهم واقفين قدام سؤال مش عارفين يجاوبوا عليه .. السؤال الأهم في الحياة = the ultimate question السؤال ده أخد منهم مليارات و مليارات السنين من المعاناة عشان يجاوبوه .. و برضو مش عارفين .. السؤال هو : ( إيه الهدف و المعني من كل شيء ؟! ) . … … مليارات و مليارات من السنين .. و أجيال و أجيال من الفلاسفة بتورث السؤال .. و ماحدش عارف يجاوب .. لحد ما إتنين من الكائنات دول وصلوا لفكرة .. إحنا حنبني أضخم كمبيوتر عرفه التاريخ … أضخم كمبيوتر في الحياة .. الكمبيوتر ده وظيفته هي إنه يجاوب علي السؤال ده . … … و بيبنوا الكمبيوتر ده فعلاً .. ( و اللي بعد كده بيسموه كوكب الأرض 🤣) . و أحداث كتير بتحصل .. و تاريخ و قصص و حروب .. و بعدين في النهااااااااااية خالص .. بيسألوا الكمبيوتر ده .. .. عرفت الإجابة ؟! .. بيرد عليهم الكمبيوتر بصوت جهوري عظيم … ” طبعاً عرفت .. أنا عرفت كل حاجة ” . بيقولوا له .. بجد ؟!!!!!!! .. السؤال الأهم .. السؤال الأعظم … معني و هدف كل حاجة و الحياة و الكون نفسه … عرفت الإجابة علي السؤال ده ؟!!!!!!!! . بيرد عليهم بصوت ضخم عظيم جداً … طبعاً عرفت .. .. الإجابة .. الإجاااااااااااااااااااابة .. إجابة السؤال الأعظم و الأهم علي الإطلاق هي : 42 . 🤣🤣🤣🤣🤣🤣🤣🤣🤣🤣 … … خيبة أمل فظيعة بتظهر علي وشوش الكائنات اللي كانوا مستنيين يعرفوا الإجابة .. و ماحدش فهم حاجة إطلاقاً .. فبيسألوا الكمبيوتر .. ( إزاي هي دي الإجابة ؟! ) .. بيرد عليهم الكمبيوتر : ( ما هو إنتوا اللي سألتوا السؤال الغلط ) .. و يكمل : ( إنتوا المفروض تعرفوا تسألوا إيه الأول ) . .. يقولوا له : ( طيب .. تقدر تقول لنا المفروض نسأل إيه ؟! ) . يرد عليهم : ( طبعاً أقدر .. بس سيبوني أحسب الحسبة دي و آخد وقتي في إجراء الحسابات بتاعتها .. و أطلع لكم الإجابة ) . .. يقولوا له .. تمام .. خد وقتك .. .. و بيبدأ الكمبيوتر يحسب .. و مليارات السنين تعدي .. و خلاص وصل ل 99,999% .. و حيطلع الإجابة .. و يقول … و … .. و ينفجر كوكب الأرض .. عشان بيروقراطية إدارة المجرة قررت إنشاء كوبري في الحتة دي 🤣🤣🤣🤣🤣🤣🤣🤣🤣🤣 … … … لو فهمت اللي فات ده ( أو أفضل إنك تقرأ الرواية نفسها ) .. حتفهم بكل وضوح و سهولة و يُسر .. سبب دعم إيلون ماصك ل ترامب .. .. بس الأهم فوجهة نظري .. إنك حتبدأ تفهم حاجات كتيييييييير أوي من التريندات اللي حاصلة حواليك حالياً .. من أول : ( إحنا مع مين ضد مين ؟! ) .. و ( مين صح و مين غلط ) … في المعتاد .. أنا كنت ممكن أقفل البوست ده علي كده .. و أسيبه لفئة قليلة جداً و نادرة جداً من البشر .. حيروحوا فعلاً و يقرأوا الرواية .. و بعدين يفكروا .. و بعدين يفهموا .. .. و لكن .. و علي غير المعتاد .. أنا ححاول ألخص سريعاً هنا في الآخر .. إنت المفروض تطلع بإيه من رواية زي دي .. … … … أحد أعظم المفاهيم اللي بتشوفها في رواية ( hitchhiker’s guide to the galaxy questio ) .. هي إنه بيجيب لك ( آخر كل حاجة ) .. النهاية يعني .. .. يعني إيه ؟! .. ناس كتيييييييير بتعيش و تموت حياتها .. محبوسة جوة قفص نظرها الضيق .. يعني بيعيش حياته كلها أمله إنه يجيب عربية معينة غالية شوية .. أو يشتري فيلا في مكان معين بجنينة .. أو يأمّن مستقبل عيال عيال عيال عياله .. أو ينتصر في خناقة تافهة مع جار أو قريب أو عدو له .. أو يحب أو يتجوز أو أو أو … كلها حاجات دنيوية … الرواية فأول كام صفحة .. بتجيب لك آخر الهري ده .. اللي هو بص يا برنس … الكوكب كمان 5 دقايق حينفجر .. يلا مع السلامة 🤣🤣🤣🤣 . … فإنت مابتلحقش حتي تفهم هو إيه اللي حصل .. يعني بطل الرواية نفسه فجأة بيكتشف إن ( الكوكب بحياته بتاريخه بمشاكله الشخصية .. بذكرياته .. بطفولته .. بسلاطاته و بابا غنوجه .. كله كده شكراً .. خلص خلاص ) . .. فبيبدأ فجأة يكتشف إنه ( حر ) .. حر من قفص الكوكب الضيق جداً ده .. … … و بعدين .. بتلاقي الرواية بتاخدك في رحلة .. تواجه فيها كل فكرة أو مصطلح أو حتي ( إعتقاد ) .. ممكن تكون فكرت فيه فحياتك … و يجيب لك ( آخره ) .. … يعني حاجة زي ( السُلطة و الرئاسة ) .. أحد أبطال الرواية الأساسيين هو ( رئيس المجرات 🤣🤣🤣 ) . فاهم يعني إيه ( رئيس المجرات ) ؟! .. يعني مش رئيس دولة .. ولا رئيس كوكب .. ولا حتي رئيس مجرّة .. لا يا باشا .. ده رئيس المجرات كلها 🤣🤣🤣🤣🤣 .. و بكل عبقرية .. بيوريك إن ( رئيس المجرات ) نفسه .. عبارة عن دُمية .. مجرد خيال مآتة بيتم إستخدامه من خلال أشخاص تانيين متحكمين في أمور أقوي بكتير .. و لكنهم مش عايزين الضوء يتسلط عليهم هما .. .. فبالتالي .. مهمة ( رئيس المجرات ) الحقيقية و الوحيدة هي : إنه الضوء يتوجه عليه هو .. فيفضل المتحكمين الحقيقين مش معروفين و في الضل . … و بيوريك رحلة الشخص ده .. إزاي إنها رحلة حتمية لأى حد بيسعي لأى سُلطة أياً كانت .. و إن أى ( سُلطة أو حكم أو رئاسة فأى مجال ) .. دي هي آخرها .. إنك تكون ( خيال مآتة ) .. بيتم التحكم فيه من خلال قوي أكبر منه بكتير . … … و هكذا مع كل المفاهيم و المصطلحات اللي مليارات البشر بيعيشوا و يموتوا أسري لها .. لأنهم مش قادرين يفكروا شوية و يفهموا إن ( آخرها علي فشوش ) . .. و دي عبقرية الرواية الحقيقية فوجهة نظري . … … و بالنسبة ليا ك ( مُسلم ) .. ده طول الوقت كان بيخليني أضحك بأعلي صوت أثناء قرائتي و سماعي للرواية دي .. .. لأن الإسلام حقاً بيبتدي من الحقيقة دي … مفهوم ال ( توحيد ) .. يعني ( لا إله إلا الله ) .. أقوي من أى شيء ممكن تتخيله في الحياة .. لأنه فجأة .. بينهي لك القصة .. … الألوهية ( إله ) .. مش كلمة بسيطة .. دي كلمة بتشمل تحتها كل حاجة في الحياة .. يعني : أهلك ؟! .. الإله أهم و أكبر شغلك ؟! .. الإله أهم و أكبر أحبابك ؟! أرضك ؟! حياتك ؟! ذكرياتك ؟! … كل ده ؟! الإله أهم و أكبر . .. و مفهوم الإله موجود في البشرية منذ لحظة وجودها الأول .. و مفهوم بيوصل له الإنسان بالتفكير .. حتي لو ماتبلغش بيه إطلاقاً .. أى بشرية عاشت في مكان لمدة من الزمن .. و ماكانتش تعرف أى شيء عن أى شيء .. بيوصل بيهم التفكير لمفهوم ال ( إله ) .. .. لأن الحضارة البشرية بطبيعتها .. بتجيب آخر كل حاجة .. آه إنت ممكن تموت قبل ما تكتشف إن أهم حاجة في الحياة مش هي الجبنة البراميلي .. و لكن نسلك أو نسل أهلك .. حيوصلوا للجبنة البراميلي .. و حيشبعوا منها .. و حيكتشفوا إنها مش أهم أو آخر حاجة في الحياة . .. و بالتالي .. بعد فترة من الزمن .. حتوصل أى حضارة لمفهوم ال ( إله ) … و لكن .. أى إله ؟! … و دي النقطة اللي إبتدي منها سيدنا إبراهيم .. و أحد أسباب عظمة قصته .. … … و دي هي الرحمة اللي علينا إحنا ك ( مُسلمين ) .. رحمة من إنك تقضي ملايين و ملايين السنين بتحاول تعرف ( أنهي إله ؟! ) .. و تجرب اللي أقوام و أقوام عاشوا و ماتوا و هما بيهروا فيه .. .. الرحمة هي إن ربنا إدالك إجابة السؤال الأهم و الأعظم .. فأول جملة في الإسلام . ( لا إله إلا الله ) . . عشان تبدأ من بعدها .. مش تعيش أسير ضيق نظرك في ما قبلها .. … … أى طريق آخر بقي في الحياة كلها غير كده .. آخره هو .. آخره .. يعني له آخر .. و آخره مالوش قيمة .. زي كل حاجة تانية في الحياة .. فبالتالي بتعيش أسير الثابت الوحيد في الحياة و هو : الوقت . .. و ده بيكون المٌنقذ الوحيد لك من حياة عبثية بالكامل إما إنك تنتحر منها .. أو تتقتل بيها .. ( nihilism ) . … غير كده .. بتعيش ك ( حيوان ) في غابة بتحاول تكبر حجم فريستك فقط .. و لا تعبأ بأى شيء آخر في الحياة .. .. حتي لو كان ده عن طريق .. إنك تطلع علي مسرح جنب بهلوان و تدعمه 🤣.. لأنك بتكون فاهم كويس جداً ساعتها .. إنه لا هو ( البهلوان يعني ) فارق ولا الناس اللي شايفينكم فارقين .. ولا أى بلح في البتنجان فارق .. .. كل المهم هو : فريستي . … … و الله أعلم .