" أنا لو كنت سمعت كلامك و إشتريت بيتكوين سنة

” أنا لو كنت سمعت كلامك و إشتريت بيتكوين سنة 2014 كان زماني دلوقتي مليونير عايش برة مصر ” … طيب .. تعالي نفترض إننا رجعنا سنة 2011 مش 2014 كمان .. عشان أيامها كان لسة البيتكوين بقروش حرفياً .. وقتها أنا كنت باعيد سنة تالتة هندسة لتالت مرة .. و باشتغل في تلات حاجات مالهاش أى علاقة ببعض ( تطوير ألعاب ويب browser games - مساعد باحث في تطوير عقاقير بإستخدام تقنيات فوق جينية epigenetics - بارسم مانجا ) 🤣😁😅. بس تعالي نفترض إننا حينكشف لنا حجاب الغيب .. و نعرف نشوف كل شيء لحد دلوقتي ( باكتب البوست ده الساعة 10.30 الصبح يوم 18 ديسمبر سنة 2023 ) . .. كنت حتعمل إيه ؟! . .. يعني .. تعالي نتخطي الرغبات الطبيعية الأولية بتاعت محمد هنيدي فكامننا .. 🤣 ( أنا نفسي ألقي نفسي واد حبيب و بيه , و معايا فلوس كتير ستين تلاف جنيه , و أشرب أزوزة في العجوزة مع إستاكوزة إيه , و أجيبلي دش مع الموبايل و الحتة الكوبييييييييييييييييييييييييه ) . … إيه بقي ؟ .. دلوقتي .. و إنت مليونير عايش في المكان اللي تتمناه في العالم .. مش قلقان بأى ماديات إطلاقاً .. واد حبيب و بيه و مقضيها ( بالحلال يا سيدي و متجوز أربعة .. و عندك ملك يمين كمان ) .. و عندك دش و موبايل … و حتت كوبيه مش حتة واحدة .. .. و بعدين ؟! .. تقدر تغير حاجة ؟! .. قوتك إيه ؟! .. تأثيرك إيه ؟! . … … الحقيقة هي إني من أول مرة إطلاقاً سمعت إسمه .. و أنا كتير قعدت أفكر في الخيالات و القصص اللي حوالين ( ساتوشي ناكاموتو - مخترع البيتكوين ) .. و اللي لحد دلوقتي ما زال في شكوك كتير جداً حوالين هو مين شخصياً .. لأن الفكرة الأساسية و الأصلية للكريبتو .. كانت الخلاص من السيطرة المطلقة اللي متحكم بيها كيانات معينة جداً علي إقتصاد العالم بالكامل .. .. و فوجهة نظري ( الحالمة جداً ) .. إن اللي قدر ينشيء حاجة زي البيتكوين ..و يخطط لنشئتها في بداياتها بالطريقة اللي تمت بيها .. كان فاهم كويس جداً جداً جداً شكل العالم الحقيقي عامل إزاي .. و بالتالي .. كان قراره في إنه يفضل مستخبي .. قرار أساسي في الرحلة دي . … … سبب إني باهري شوية الهري دول دلوقتي هنا .. إنهم بيكملوا علي فكرة البوست اللي فات ( لو ماكنتش قرأته .. حتلاقيه قبل ده مباشرة ) .. .. ألا و هي .. إيه هو مفهوم ال ( قيمة ) بالنسبة للإنسان .. و المفهوم ده بيأثر فحياتك قد إيه . .. و الله أعلم .