إحساس إنك خلاص حتعطس .. و ترجع راسك لورا كده

إحساس إنك خلاص حتعطس .. و ترجع راسك لورا كده و عينيك تبربش .. و مناخيرك تاكلك .. و .. و … و خلاص .. راحت العطسة .. عارف الإحساس ده ؟! … ..... إحساس إنك تحط راسك علي المخدة .. فتلاقي ودنك فجأة سمعت صوت تزييق باب بيتقفل في الشقة اللي فوقك .. و فجأة تلاقي عقلك بدأ يعزف جزء من لحن موسيقي سمعها من 8 سنين .. و تحاول تفتكر اللحن .. تلاقي نفسك ناسي كل حاجة عنه .. إلا الجزء اللي شغال فعقلك ده .. فتحاول تفكك و تنام … و لكن تلاقي إن كل حياتك و محاورها تمحورت حوالين اللحن ده .. فتقوم تمسك الموبايل و تدخل أوضة فاضية الساعة 2 بالليل و تشغل البحث بالصوت .. و تقعد تدندن اللحن لعل و عسي تلاقيه و تهدي و تنام . … … مكالمة شغل مهمة كان المفروض إنك تعملها النهاردة الساعة 4 عصراً .. بس نسيت .. و مش فاكر نسيت ليه .. بس فجأة عقلك إفتكرها الساعة 2.30 بالليل . … حاجات كنت محتاج تشتريها بقالك كام يوم .. و كنت مستني لما تعدي جنب المول تشتريها .. النهاردة كنت في المول ذاته .. و خلصت بتاع 6 مشاوير مختلفين طلعوا فذهنك و حياتك فجأة .. و بعد ما رجعت .. إفتكرت اللي كنت محتاج تشتريه من فترة و نسيته بالكامل … صديق ليك محتاج مساعدة .. و إنت عارف إنه محتاج مساعدة .. و طلب منك المساعدة .. و قلت له إنك حتساعده .. و نسيت تكلمه بقالك كام يوم .. ضميرك يقرر يأنبك دلوقتي .. لأنك كنت تقدر تاخد أكشن عشان تساعده فنقطة معينة من الزمن .. بس نسيت … … تاسك في الشغل .. فمجال خبرتك .. و مجال دراستك .. و مجال إختصاصك .. كل ما تفتكر إنك تكرس له شوية وقت عشان تنجزه .. تسرح في 10 تاسكات تانيين ينسوك إنت كنت فين أساساً .. … 93 تاب مختلفين مفتوحين في كروم .. و قدهم في فاير فوكس .. غير اللي في البراوزرات التانية .. و اللي إتسيفوا من فترات قديمة .. و كل تاب فيهم بدأت في كام كلمة من اللي فيه .. و سبته لحد ما ييجي وقته .. وقته ماجاش ؟! . … كل يوم مشاريع جديدة بأفكار جديدة بتاسكات جديدة بمكالمات جديدة .. و كل يوم بانسي أكتر من اللي قبله .. و باتخانق مع نفسي أكتر .. و أحس إني مهما ركزت فناحية .. باكون مقصر في النواحي التانية .. … … انا لو في حاجة باتمناها فعلاً ك ” قوة خارقة مثلاً ” .. مش حتكون إني أطير .. أو أكون Invisible مثلاً .. و لا قوة جسدية خارقة .. و لا حتي سرعة خارقة .. أو إنتقال آني .. .. أنا فعلاً باتمني إني أمتلك القدرة علي التحكم في ” تركيزي ” .. إن ال ” short term memory ” عندي ( رامات دماغي يعني ) .. تبقي أكبر .. أوي ..