بافكر أعمل رواية و أحولها لفيلم .. و أصرف عليها

بافكر أعمل رواية و أحولها لفيلم .. و أصرف عليها مبلغ محترم جداً كإنتاج .. و حاشترك في الإخراج .. و يمكن التمثيل كمان .

قصة الفيلم حتبقي كالتالي : بطل الفيلم .. رجل أعمال مش فدماغه أى شيء غير الفلوس .. و مهمل جداً لمراته و عياله .. و بعدين قرر إنه يبني كومباوند .. بس حيضطر إنه يهد معمل عالم فيزياء و رياضة مات من زمان .. عالم الفيزياء و الرياضة ده كان حاجة كده شبه أينشتاين .. و ناس كتير إتعلمت رياضة و فيزياء علي إيديه .. … المهم .. لما رجل الأعمال المادي الحقير ده .. هد معمل عالم الفيزياء و الرياضة .. مشاكل كتير بدأت تظهر له فحياته .. لاباته و أجهزته و موبايلاته كلها إتفيرست و جاله ransomware و ما شابه .. كهرباء شاليهاته و شركاته ضربت .. و اللمض بقت بتفرقع .. النت عند بقي بطئ فحت و بيهنج .. عربياته كلها ضربت فيوزات و جابت جوانات و سقطت مواتير … و مشاكل هندسية كتير من النوع ده .. … المهم .. سأل أهل الخير .. نصحوه إنه يروح يزور كلية هندسة .. و جنبها كلية علوم .. و لما راح هناك .. وجد ناس شكلهم عجيب .. و قالوا له .. عشان المشاكل اللي فحياتك تتصلح … لازم تصلح مشاكل الناس الأول . … … رجل الأعمال المادي الحقير ماكدبش خبر .. و راح طالع علي أول سايبر .. و فتح منتدي الهاكر الصغير .. و بدأ يقرا مشاكل الناس .. .. لقي واحد مثلاً مشكلته إنه الكهربا فبيته بترعش بالليل .. بس شغاله كويس الصبح .. راح له و دخل البيت عنده .. و قال له مالكش دعوة إنت يا حاج .. أنا حاحل مشكلتك .. و راح فاكك فيشة … و مسك السلوك العريانة جواها .. و حس بصدمة فجأة .. ( بس أنا حاخدك بقي جوا شوية شغل جرافكس حلوين أوريك إزاي إنه بيتكلم مع الإليكترونات و الذرات في الأسلاك في الحتة دي ) .. و بعدين ساب الأسلاك عريانة .. و بص للراجل بصة كلها حنية .. و قال له .. مشكلتك إتحلت يا حاج .. و إبتسم و خد بعضه و مشي . … … و بعدين لقي واحد تاني كان باعت مشكلته علي منتدي الهاكر الصغير .. كالتالي : ” أنا ميكانيكي .. بس كل ما أحط إيدي فعربية .. تعمل حادثة تاني يوم .. ساعدوني يا أهل الخير ” .. رجل الأعمال المادي الحقير ماكدبش خبر .. و راح واخد بعضه و طلع علي الميكانيكي و قال له أنا حاحل مشكلتك .. و أول زبون دخل عليهم بعربية بي إم دبليو حديثة شوية .. راح رجل الأعمال المادي الحقير فاتح الكبوت .. و حط خلطة زيت طعام علي شوية بهارات في قربة زيت الفرامل .. و بعدين راح كاشف بساتم المحرك .. و دهنها شوكولاتة بيضة سايحة .. و قفل الكبوت تاني .. و قال للزبون إتفضل .. طريق السلامة إنت .. و بص للميكانيكي و قال له بإتسامة مليانة حنية .. ” ماتقلقش .. مش حيحصل لك مشاكل تاني ” .. و خد بعضه و مشي .. … … و حاكمل الفيلم بقي بكام قصة من النوعية دي .. أصل أنا عندي هدف سامي .. و هو إن الناس اللي مفكرين إن ( الفيزياء و الرياضة و الكيميا ) حاجات صعبة .. ناس وحشين .. عايزين يعقدوا الناس علي الفاضي .. ( الفيزيا و الرياضة و الكيميا ) ساهلين يا جماعة جداً .. … إمسك سلوك كهربا عريانة براحتك يا جدع … المهم القلب السليم و دعاء الوالدين .. فرامل مين يا جدع اللي تتأكد إنها شغالة في العربية ؟ … الميكانيكا و قوة القصور الذاتي مابتإذيش ولاد الكار اللي بيتبرعوا لكلية هندسة .. … بص .. أقولك علي حاجة حلوة ؟ روح إبني معمل فكلية هندسة .. و إبني معمل تاني فكلية علوم .. و إنت مش حتحتاج لمهندسين أو علماء تاني فحياتك خالص .. … … المهم قلبك أبيض .. … … آه .. و حاسمي الفيلم .. ( صاحب المعمل ) .