هل كريستيانو رونالدو سعيد ؟

هل كريستيانو رونالدو سعيد ؟ … قبل كاس العالم اللي فات ده .. شفت مقابلة ( كريستيانو ) مع ( بيرس مورجان ) .. اللي أعلن فيها إنه خلاص مش حيقدر يلعب لمانشستر يونايتد تاني . و شفت كم المشاعر و الخناقات اللي إتكلم عنها … و إزاي إنه عاني مع أنواع من الإكتئاب . كريستيانو .. اللي متجوز جورجينا 😅 .. اللي أعلي أكاونت علي إنستاجرام .. اللي آخر حاجة ممكن يكون بيقلق بيها في الحياة هي الفلوس .. اللي خلاص .. إتأكد إنه حفر إسمه في تاريخ مهنته . اللي و اللي و اللي .. و أقعد إكتب من إنجازات و نعم ربنا أنعمها عليه .. لحد ما نزهق من الكتابة .. . كريستيانو .. هل هو سعيد ؟! . أعتقد إن ناس كتير دلوقتي فعلاً شايفين إنه مش سعيد .. بل و متأكدين من ده . … مفهوم ال ( معاناة ) و ال ( ألم ) بالنسبة ليا .. زي ما كنت إتكلمت عنهم كتير .. مشابهين جداً لمفهومهم عند ( فيكتور إي فرانكل ) . الراجل اللي كتب كتاب ( search for meaning ) . أنا إتكلمت عن الكتاب ده كتير جداً .. و مش حاكرر ده هنا .. لو إنت حاسس إنك بتعاني من أى شيء و مكتئب و كاره حياتك .. دور علي بوستاتي عن الكتاب ده . .أو إقراه .. أو إقرأ عنه .. أو شوف فيديوهات عنه . … أحد أهم المفاهيم عن ال( معاناة ) بالنسبة ليا .. هي إنها مالهاش مكيال . يعني ماتقدرش تقول فلان بيعاني بمقدار 6 .. و فلان بيعاني بمقدار 9 . لا .. المعاناة لا تُكيل .. الطفل اللي البالونة بتاعته فرقعت .. معاناته بالنسبة ليا بتساوي معاناة الشخص اللي فقد كل ما يملك من أهل و ممتلكات في زلزال تركيا الأخير مثلاً ( عافانا الله ) . .. أنا فاهم إن الفكرة دي مش سهل إنك تتقبلها .. و لكن صعوبة تقبل الفكرة هو ده أحد أهم مفاتيح إزاي تتعامل مع معاناتك أساساً .

إنت حتتعجب و تقول ليا .. الطفل يقدر بكل سهولة يشتري ألف بالونة .. لكن الراجل مايقدرش يستعيد ذويه أو ممتلكاته . حاقول لك ( الطفل لو هو فعلاً مقتنع إنه يقدر يشتري ألف بالونة .. يبقي ماكنش حيعاني من الأساس ) الطفل لما بيعيط .. مش بيكون عنده المعلومات و المنطق اللي عند الكبار . و عشان كده لما بنقعد جنبه و نواسيه .. بنقدر ننسيه معاناته دي بحاجة بسيطة .. زي لعبة جديدة .. او بالونة تانية ..

لكن الراجل اللي فقد كل ذويه و ممتلكاته .. مافيش حد يقدر يوعده بإسترجاعهم في الدنيا خلاص .. لكن تخيل .. تخيل لو كان في .. لو كان في آلة زمن أقدر أقدمها لك .. و أقول لك و أنا باطبطب عليك .. خلاص خلاص .. إحنا حنركب آلة الزمن و نخلي أهلك ياخدوا بالهم من الزلزال قبل حدوثه .. و نحمي لك ممتلكاتك كمان .. هل حتفضل تبكي و تشعر بالمعاناة ساعتها ؟! … … علي قدر حدود معلوماتنا و قدراتنا .. علي قدر معاناتنا … كريستيانو بكل ما يملك .. مايقدرش يعيد كاس العالم و يخلي البرتغال هي اللي تغلب .. و عشان كده هو حاسس بكل ما يشعر من معاناة الآن . .. مهما جيت إنت بقي للراجل اللي فقد كل ذويه و ممتلكاته .. و فضلت تشرح له إن ( إحمد الله ) .. لأنه لسة عنده أعضائه كاملة . عمره ما حيحس إن دي حاجة غالية عنده .. لأنه ببساطة مش حاسس بمعاناة الشخص اللي فقد أحد أعضائه في الزلزال ده . … الطفل اللي بالونته فرقعت .. و هو في الشارع .. و مافيش حد حواليه يديله بالونة تانية .. من وجهة نظره الصغننة الضيقة .. متع حياته كلها إنتهت . … … … و سبحان الله .. الحياة الدنيا دايماً كده .. … في تصميم الفيديوجيمز و الألعاب عموماً .. في قاعدة أساسية ماينفعش تكسرها .. و هي : اللعبة لازم تكون مش سهلة جداً .. لدرجة إنك ماتحسش إنك مش محتاج تتعب عشان تفوز .. ولا صعبة جداً .. لدرجة إنك تحس إن مافيش أمل في الفوز . .. الحياة نفس الشيء .. لو حياتك سهلة جداً بدون معاناة إطلاقاً .. حتلاقي إنك زهقان طول الوقت و فاقد الإحساس بمعني أو قيمة أى شيء . و أكبر دليل علي ده .. هو إنك مش بتسجد 10 ساعات يومياً علي الأقل بتحمد الله و تشكره علي ما لا يُحصي من النعم عندك .. فقط لأنك ( معتادها ) . لكن جرب إنك تفقد أى جزء بسيط جداً من النعم دي للحظة .. حتحس بقيمتها التي لا تُقدر . … … إمبارح في الجيم .. كنت باتمرن في ال (ساندباج - بتاعة الملاكمة دي ) زي كل يوم .. و بعد شوية ضربات و لكمات .. باعمل ضربة رجل جانبية عالية ( عادية جداً ) .. زي اللي عملتها قبل كده آلاف المرات .. و الساندباج وقعت .. بالحامل المعدني الضخم نسبياً بتاعها .. علي شنطتي اللي كنت حاطتها تحت الساندباج مباشرة .. و موبايلي كان فوق الشنطة .. موبايلي ال (samsung s22 ultra ) اللي معايا بقاله سنة .. لوهلة شفت حياتي بدون الموبايل لحد ما أصلح شاشته .. أو أشتري واحد تاني .. … اللهم لك الحمد و الشكر .. الحامل المعدني وقع علي بعد سنتيمترات من الموبايل .. و ماحصلش للموبايل حاجة .. … و لكن ( و ده مدي هبلي و غبائي و حماقتي ) كإنسان .. أنا كنت معتاد .. معتاد مش بس إن الموبايل عادي و مش مكسور بفضل الله .. لا .. معتاد جسمي نفسه .. و إني الحمد لله مش مُصاب حالياً .. و إني قادر أعمل الحركات دي .. ( في حين إني إتصابت كتير قبل كده و جربت إحساس إني أكون متجبس و قاعد في السرير ) . .. معتاد إني قريب جداً من وزني المثالي بفضل الله .. و نسيت معاناتي لما كنت مش قادر أمسك في بار العقلة من الأساس .. … معتاد ملايين و ملايين .. و عدد لا يُحصي من النعم .. و مركز فقط علي : كاس العالم اللي مأخدتوش 😅 . … … … أنا ماعرفش كتير عن حياة ليونيل ميسي .. يمكن لأنه مش بيتكلم إنجليزي كويس .. و أنا مابفهمش أسباني .. فمش باشوف ليه لقاءات كتير .. لكن أنا متأكد بدون شك .. إنه هو كمان عنده معاناة ما .. أنا مش محتاج أعرفها عشان أحس بالرضا عن نفسي ..

و مش محتاج إني أفضل أتفرج علي معاناة بشر غيري عشان أفضل أحس بالرضا عن حالي .. اللبيب بالإشارة يفهم … و ربنا ضرب لنا من الأمثال ما يكفي إننا نتعلم و نتعظ .

لكن التذكرة أحياناً بتكون مفيدة … … اللهم لك الحمد و الشكر .