في لعبة ذهنية باحب ألعبها مع نفسي من وقت للتاني

في لعبة ذهنية باحب ألعبها مع نفسي من وقت للتاني .. فكرتها كالتالي : .. ماذا لو كان عندي القدرة في الرجوع في الزمن ( عدد معين من السنين ) مش لازم في عمري .. يعني ممكن أرجع لسنة 1900 مثلاً … بس بكل ما عندي من معلومات حالياً .. و أقدر آخد اللي عايز يرجع في الزمن معايا .. . حسافر لأنهي زمن؟ .. و حاعمل إيه مختلف ؟ … و ليه ؟ … و إزاي ؟ … و مع مين ؟ … خليني أشرح كل سؤال من الخمسة دول :

يعني .. أول حاجة حتيجي فذهن أى إنسان يفكر في شيء مشابه .. هو إرضاء كل غرائزه و إحتياجاته و رغباته .. لحد ما يوصل لمرحلة الإشباع التام اللي ينتج عنه ملل .. إنت حيبقي معاك كل المعلومات اللي تحب تاخدها معاك لما ترجع لسنة 1980 مثلاً .. فحتقدر تستثمر بسرعة مثلاً في شركات التكنولوجيا المختلفة بدري جداً .. و تبقي ملياردير بسرعة فحت .. أو تراهن علي نتايج مباريات كاس العالم اللي تكون حافظها .. و تكسب بسرعة و برضه تبقي ملياردير بسرعة فحت .. تشتري كل اللي نفسك فيه .. تتجوز كل اللي نفسك فيه .. تعمل كل حاجة الفلوس ممكن تخليك تعملها .. و بعدين ؟! .. حتزهق .. فحتبدأ تفكر في حاجات أكبر من وجودك المحدود .. و تكبر دايرة وعيك تدريجياً .. إنك مثلاً تأمن مستقبل أسرتك و أحفادك .. و أحفادهم .. و بعدين تلاقي نفسك بتفكر في إن عشان تأمن مستقبل أجيال أسرتك القادمة بعدك بشكل فعال .. إنت محتاج أكتر من مجرد ال ” فلوس ” .. إنت محتاج ” قوة ” .. محتاج إنهم يكونوا أقوي من إن دولة تعلن الحرب علي دولتك .. محتاج إنهم يكونوا أقوي من إن فيضان أو زلزال أو أى كارثة طبيعية تإذيهم . .. فحتبدأ تفكر في إزاي إنهم مش بس يكونوا أغنيا جداً .. و لكن يكون عندهم قوة سياسية عالمية كمان .. .. عند المرحلة دي حتلاقي نفسك بتفكر في الأسئلة التلاتة التانيين .. طالما تقدر تاخد معاك ناس في الرحلة اللي عبر الزمن دي .. حتفكر في التحالفات .. إنك تاخد معاك ” مين ” اللي حيسعي برضو إنه يحقق كل أحلامه ده .. و بعد كده يكمل معاك الصورة اللي توصلكم لإمتلاك ” قوة ” حقيقية . .. يعني لو فرضنا إنك درست التاريخ الأمريكي بشكل متعمق جداً .. و رجعت للفترة اللي كانت فيها أمريكا بيتم تكوينها .. و اللي كان بيحط إيده علي أرض فيها بترول أو منجم دهب .. كان بيمتلكها و يكون ثروة .. و وصلت إنك تكون عيلة من أكبر عائلات أمريكا في الوقت ده .. بس إنت في الأساس أصلك من كوريا الشمالية مثلاً .. و أصل عيلتك من كوريا الشمالية 😅 .. فبالتالي حتعمل إيه عشان تكون النتيجة دلوقتي ( سنة 2021 ) إن أصولك و الناس اللي إنت المفروض مهتم بيهم فعيلتك في أمان . أمان مادي .. أمان ناتج عن إمتلاك قوة سياسية عالمية ضخمة .. حتغير في التاريخ إزاي ؟! . … … قاعدة وحيدة حاحطها هنا في اللعبة .. ألا و هي : السفرية في الزمن دي .. نقدر نعملها مرة واحدة بس .. و للماضي .. و ماينفعش نرجع خلاص . … 1- حتاخد مين معاك ؟ 2- حتسافر لإمتي ؟ 3- حتعمل إيه ؟ 4- حتعمل اللي حتعمله ده .. ليه ؟ 5- و إزاي حتوصل للنتيجة اللي تحب إنك توصلها ؟