باشتغل نفسي .. تشتغل نفسي معايا ؟!

باشتغل نفسي .. تشتغل نفسي معايا ؟!

يمكن الموضوع ده إتكلمت عنه بأشكال مختلفة قبل كده .. و Da7ee7 - الدحيح برضو إتكلم عنه ففيديو على ما أتذكر .. بس الموضوع خطر فبالي تانى برضو .. .. ماذا لو .. إتعرض عليك تبقى من أول 1000 واحد مثلاً حيبعتوهم يعيشوا فكوكب جديد مشابه للأرض بالظبط فظروفه المناخية .. بس طازة فحت .. يعنى لسة بسلوفانته و حيواناته و نباتاته … و مافيهوش لسة كوكاكولا ولا محمد رمضان … حتعمل إيه ؟ … 1- السؤال الأول .. حتوافق ؟

• هاااااااااااااااااااااااح ( تنهيدة حارة مع نظرة للركن البعيد الهادى ) .. و تحس إن موسيقى تصويرية حزاينى بدأت تعزف فى الخلفية .. و يقول بحرقة .. طب هى فين ؟ .. فين التذكرة بس اللى تيجي .. و أنا أوافق … هااااااااااااااااااح . .. فى الغالب ده بيبقى لأن كلنا بحكم طبيعتنا كبشر .. بنرتكب أخطاء فادحة على مدار حياتنا .. و بعد فترة نبدأ نراجع نفسنا .. و نندم .. و نتمنى إننا يرجع بينا الزمن و نبتدى من الأول .. من صفحة بيضااااا .. بس بخبرتنا الحالية . … 2- السؤال التانى .. حتعمل إيه ؟ بتكون الإجابة .. حاعيش يا جدع … حياة رايقة هادية مافيهاش مسؤوليات و لا دوشة و قرف الحياة اللى حوالينا دى … حاطلع الصبح من الكهف .. آخد شاور بلبطة فى البحيرة جنب البط .. و أصطادلى غزالة ولا حاجة .. أشويها باقى اليوم .. و أقضيها أنا و رفيقة الكهف و إحنا بنراقف النجوم و نعدها . … 3- مش حيوحشك الفيس و النت و التيليفزيون و برامج رامز ؟
• إنت بتهزر ؟ .. يا جدع أنا مابطيقش الفرجة عليه … و بابقى عايز أرجع و أنا باشوفه بعد الفطار كل يوم .. = طب بتشوفه ليه ؟
• أهو حاجة الواحد يسلى بيها نفسه .. و معظم الوقت بتبقى دماغى مش معاه بس مشغولة بهموم الدنيا . … 4- هموم الدنيا اللى هى إيه ؟!
• الهموم اللى لاهية الواحد و مكرهاه فعيشته و مايحسش بطعم اللقمة اللى بياكلها و لا يهداله بال ولا جنب على فرشة . … 5- أيون شكراً يا طنط أمينة رزق … اللى هى إيه برضه ؟!
• إنت مش منا هنا يا عم ولا إيه ؟ .. الفلوس .. الشغل .. أكل العيال .. تعليمهم .. مصاريف البيت .. تعليم العيال و مستقبلهم .. قرف الشغل و البيت .. الناس الوحشة .. الناس اللى مابقتش تحب حاجة لحد .. الناس المضايقة اللى تشوف وشوشها تضايق . … 6- الناس المضايقة دى .. و الهموم دى … مش حتضايقك عالكوكب الجديد ؟! .
• يا عم الواحد حيبقى ضارب الدنيا صرمة (يعنى بالحذاء ولامؤاخذة) هناك .. مش حيشغل باله مدير ولا تعليم عيال و لا أحزنون .. العيل من دول يطلع يساعدنى فصيد الغزالة و عوده يشد بدل قعدته ليل نهار عالفيس هو كمان . … 7- إنت ضامن موضوع الغزالة ده أوي ليه كده ؟ .. سيادتك شفت فيلم أفريكانو كام مرة بالظبط ؟!
• يا عم بلاش غزالة .. خروف .. جدى .. أى بقر بري معدى .. أو حتى يوم نقضيها نقطف فاكهة من الشجر … حنعيش يا عم . … 8- موافقك يا حاج طرزان .. سؤالى هو إنت لياقتك و سنك يسمحوا بده فوجهة نظرك ؟
• يابا اللى معجزنا هى قعدتنا … بالك إنت جدى فى البلد زمان .. كان رهوان و عوده ولا محمد صلاح ببوكسر كيلفن كلاين … كان لحد ما وصل السبعين بينزل يحرث الأرض ورا الجموسة … و ساعات كان هو اللى بيشد الجموسة مش هى اللى تشده . … 9- و المطر ؟ .. و الأعاصير ؟ .. و السقعة ؟ .. و الحر ؟ .. و الحيوانات الضارية ( المفترسة يعنى ) .. و النمل .. و الحمام اللى من غير شطافة ؟ … إيه ؟!!!!
• حنتصرف يا أخى .. يعنى هو اللى قبلنا كانوا بيتصرفوا إزاى ؟ … … … 10- إيه اللى مانعك تعيش كده دلوقتى ؟!
• إيه ؟ … 11- إيه اللى مانعك تعيش كده دلوقتى ؟!
• مش واخد بالى يعنى .. تقصد إيه سيادتك . … 12- إيه اللى مانعك … تعيش كده … دلوقتى ؟!! يا ريته كان ينفع يا باشا … 13- أيون هو سؤالى … ماينفعش ليه ؟!!
• أنزل أصطاد غزلان تحت البلكونة تقصد يعنى ؟! … 14- إيه اللى منعك تثق أوى كده فإن رزقك ( رزقك اللى مقسوم لك فعلاً .. مش تمن الأيفون الجديد اللى مابتعرفش تستخدمه ) حيجيلك لحد عندك لو سعيت ليه ( زي ما حتسعى ورا الغزالة .. مش حتأنتخ فى الكهف ) ؟ .. . 15- إيه اللى منعك لو ليك مزاج تعمل أى حاجة تعملها و ماتخافش من وجهة نظر زميلك فى الكهف اللى جنبك طالما مش بتعمل حاجة غلط ؟ .. أقعد فى الشارع و شوف النجوم اللى فى السما بمزاجك طالما نفسك فكده .. و ماتشغلش بالك بصوت التيليفيزيون فى الكهف اللى مفتوح قهوة هناك ده . .. عيش الحياة اللى إنت نفسك فيها فعلاً .. اللى شايف نفسك مستريح و مفيد فيها فعلاً .. قبل ما تشد الرحال على الكوكب الجديد .. إيه اللى يمنعك ؟
• ااااااا ايييي ه … هممممم .. . ما هو أصل … همممم . … … … الحوار السابق حقيقي بنسبة 90% تقريباً .. مع تصريف بسيط حفاظاً على خصوصية المشتركين فيه .. كان له بقية .. و تفاصيل تانية عن شغلى … و الإنجليزي .. و السفر … و حاجات تانية .. قد أكملها لاحقاً .. لكن البوست طول كده أعتقد .. و أعتقد وجهة نظرى مبدأياً وصلت