أنا إستأذنت من صاحب الرسالة دى إنى أحطها كبوست هنا

أنا إستأذنت من صاحب الرسالة دى إنى أحطها كبوست هنا و أرد عليها خلال ساعات كفيديو إن شاء الله ..

إزيك يا باش مهندس يا رب تكون بخير متردد بقالي فترة اني ابعتلك الكلام ده لأني عارف انك مشغول .. بس انا هقولهولك وأرجو انك تفيدني في وقت ما تكون فاضي لأنك من الناس اللي بثق في كلامهم جدا ربنا يبارك فيك

الكلام ممكن يكون طويل شوية بس معلش استحملني من وأنا صغير وانا كنت شغوف جدا بالكمبيوتر .. مجنون بيه كنت في 2 ابتدائي وبعرف اعمل ويندوز واسطب برامج وكنت كمان بفتح الكيسة بتاعت الكمبيوتر وافك واركب .. كانت حب عجيب للجهاز ده لحد ما دخلت ثانوي كان هدفي اني اطلع مهندس كمبيوتر وان شغلي يكون خاص بالبرمجة وكدة في 2012 كنت عاوز اعمل بانر وكارنيه لواحد صاحبي عنده محل فاتعلمت الفوتوشوب من ساعتها وحبيت الجرافيك .. وكان نفسي اكمل في حاجة من الاتنين البرمجة او الجرافيك ولو الاتنين ما يضرش .. لحد ما خلصت ثانوية عامة وللأسف ما دخلتش الكلية اللي عايزها (حاسبات) ودخلت تجارة ودرست فيها 4 سنوات عن الادارة والاقتصاد .. واتخرجت كأن شيئا لم يكن .. في سنوات الكلية اشتغلت واتعلمت اكتر حاجات في الفوتوشوب .. مشيت فترة في تعليم الويب واتعلمت html و css و كنت ماشي كويس لكن ما كملتش .. بعدها بفترة قلت اجرب الاندرويد .. وشاركت في المبادرة اللي كانت معمولة ومشيت كويس وخلصتها .. بعد كدة بدأت اتعلم جافا اونلاين وكنت ماشي كويس لحد ما خلصت امتحانات اخر سنة في الكلية وجالي شغل في مكان قريب من البيت بمرتب 2000 جنيه .. الشغل عبارة عن اني بعمل حاجات بسيطة جدا بالفوتوشوب وشوية حاجات ادارية كدة .. شغل 8 ساعات .. في الاول كنت مبسوط جدا اني مجرد ما اتخرجت لقيت شغل وقريب من البيت وشغل مش متعب .. لكن مع الوقت اكتشفت اني في مصيبة .. الشغل ده مش بيطور مني أي شيء بالعكس انا اعلى واحد تعليميا في المكان واعلى من صحاب المكان نفسهم بالرغم من المكاسب اللي بتدخلهم .. واكتشفت بردو ان شغلتي مش محددة انا هنا شغال ايه مش عارف.. ومع الوقت لما بدأت في الشغل بدأت اقلل من دروس الجافا اللي كنت مواظب عليها لحد ما وقفت .. وتقريبا نسيت جزء كبير جدا من اللي اتعلمته .. حاولت اطور نفسي في شغل الجرافيك وبدأت اتعلم اليستريتور بس ماشي فيه ببطء شديد عشان البرنامج تقيل جدا ولازم اطبق وده بيكون على جهاز الشغل عشان جهازي في البيت ما يستحملش .. الوضع ده عمللي قلق شديد جدا .. وبقيت مش عارف انا بعمل ايه بقالي سنة .. اشتغل فري لانسر؟ طيب مانا امكانياتي ما تسمحش ولا اكمل في مكان مش بيطور مني اطلاقا وعامللي احباط ولا اشوف اي شغل وخلاص بس ممكن يكون اقل من اللي انا فيه .. ولا اروح لأقل واخد خبرة؟ بس انا اصلا مش بحب الشغل الروتيني والشركات والجو ده بدأت احس ان العيب فيا وان انا اللي كسول حتى الشغل اللي متعلق بمجال دراستي مش عارف عنه حاجة والحاجات اللي اعرفها عنه تقريبا محدودة انا كان حلم حياتي يبقى ليا البيزنيس الخاص بتاعي بس مش عارف ابدأ منين؟ ودايما في فكرتين راعبيني ومش مخلييني انام الناس حواليا بيلاقوا شغل وحاجات كويسة وانا مش عارف اعمل ده.. مش عارف حتى الاقي ومش قادر احدد العيب في ايه وقدمت في كذا وظيفة اونلاين محدش كلمني الحاجة التانية اني حاسس ان القطر فاتني لو حبيت اتعلم برمجة مثلا هبدأ من الاول تاني طيب امتى هقدر ابقى كويس؟ بقيت مش عارف ودايما عندي وسواس من فكرة اني افضل كدة كتير لأني اخ كبير ومسؤول عن اخواتي .. يمكن فكرة المسؤولية دي هي اللي مخلياني عايز حل سريع .. لو لوحدي افتكر كان الوضع هيختلف .. او لا مش عارف

المهم انا بعتذر لو دوشتك بموضوعي بس اتمنى ترد عليا في فيديو او هنا زي ما تحب يمكن ربنا يجعلك سبب في تغيير حاجات كتير أوي وتاني مرة آسف على الإطالة