هشام عبّاس 😍😅

هشام عبّاس 😍😅 .. لو في تكنولوجيا تقدر تحول ذكرياتي ل فيلم .. غالباً الفيلم ده حيطلع كل الأغاني اللي فيه خلال سنين عمري ( لحد عمر 17 سنة ) .. بصوت هشام عبّاس 😅 . .. صوته علي مدار عٌمري كان دايماً بيحسسني إني باضحك 😅 .. أو عايز أضحك .. أو المفروض أضحك .. بالظبط زي المشهد بتاعه اللي إتعمل في مسلسل الوصية . .. في نادي مشهور في دمنهور .. عامل حفلة بمناسبة إفتتاحه تقريباً .. و جايبين هشام عباس .. و شخص آخر ماعرفتوش من صورته اللي في الإعلانات الصراحة . . بيتي قريب جداً من النادي ده .. و الدنيا شتاء … و الجو سقعة لطيفة .. و بالتالي أنا فاتح باب بلكونة أوضتي عشان أستمتع بالأجواء دي .. باب بلكونة أوضتي .. من أعلي أنواع الألوميتال عزلاً للصوت .. ده كان أحد أهم البنود في تجهيزه .. . و لكن .. حتي مع غلق باب البلكونة .. و حرمان نفسي من أجواء الشتاء المٌحببة للغاية ليا .. صوت الحفلة واصل لحد مكتبي .. ( عيني .. عيني .. نفسي و مني عيني .. أسهر تغنيلي .. و تميلي علي ميلي ) ( ليلة و ليلة عيونك دولة ) ( .. ناري نارين .. ناري من جماله .. ناري نارين .. قلبي إيه جراله ) .. بيغنيها أثناء لحظة كتابتي للسطر ده بالظبط . … دلوقتي .. مشاعري عبارة عن صراع بين : ذكريات طفل صغير كان أحد أكبر أحلامه لما كان فأولي إعدادي .. هو إقتناء شريط ناري نارين .. و اللي كان تمنه 9 جنيه من عند حسونة بتاع الشرايط .. نسخة ستيريو … لو كان هو اللي مٌسيطر عليا حالياً .. كان زمانه قاعد في البلكونة بيرقص 🤣 . و إنسان عجوز ( حالياً ) بيكره أى صوت يسبب له إزعاج .. خصوصاً الساعة 1.30 بعد منتصف الليل … و بيدور علي أى وسيلة يمنع بيها الإزعاج ده عن نفسه .. دلوقتي بيغني ( فينه ) 😍 . … أنا ماقابلتش هشام عباس شخصياً قبل كده .. ماقابلتش كتير من ( أبطال ) طفولتي .. الناس اللي تعلّقت بإنتاجهم .. إذا كان إنتاجهم ده ( كتب , أغاني , أفلام , مسلسلات , … أو حتي مٌجرد أفكار ) .. . و لكني مٌدرك كويس جداً دلوقتي .. إن في فرق ضخم … ضخم .. بين الشخص .. و إنتاجه . . هشام عباس نفسه .. مالوش علاقة ب ( هشام عباس ) اللي في ذكرياتي .. . هشام عباس ذكرياتي .. شخص مختلف بالكامل .. شخص عاش معايا كل لحظات طفولتي تقريباً .. شخص فاهمني بالكامل .. شخص من صٌنع عقلي بالكامل . . زي ما أشخاص كتير جداً .. حبيت أفلام كتير لهم .. أو مشاهد معينة .. أو أى ذكري معينة في عقلي .. لكن الأشخاص نفسهم فيما بعد إتضح إن عندهم مشاكل ضخمة ( في شخصهم , في عقلهم , في أفكارهم ) .. . أقدر دلوقتي إني أفصل بين : تقديري للشخص .. و تقديري لإنتاج الشخص .. و تقديري ل ذكرياتي عن بعض إنتاج الشخص … و لو ماتقدرش تعمل ده .. يبقي لازم تلتزم بالمقولة المشهورة جداً : ( ماتقابلش أبطالك - don’t meet your heroes ) . … فبالتالي .. و إلي أن ينتهي هشام عباس ( أو الشخص التاني اللي ماعرفش هو مين ) من إزعاجي … أقدر أكون مٌتصالح مع أفكاري دي .. و أتضايق منه براحتي 🤣 . و الله أعلم .