سنة 2040 ( يعني كمان 16 سنة من دلوقتي )

سنة 2040 ( يعني كمان 16 سنة من دلوقتي ) بسببك إنت العالم إتغير .. إنت البطل اللي العالم كله إلتف حواليه و مشي وراه .. إنت البطل اللي قدر يقود العالم بالكامل للنصر علي الظلم و الشر .. إنت البطل اللي كل محاولات الأشرار فإنهم يهزموه .. فشلت .. لأنك … بطل .. مابتتهزش .. مابتضعفش قدام المغريات .. بتتمرن أكتر من أى حد .. بتذاكر أكتر من أى حد .. إنتباهك و تركيزك بتوعك إنت .. مش بتوع تريندات أو بهلوانات بترقص و بتقلع في الشاشات قدامك .. فلوسك بتصرفها بعبقرية فكل حاجة تخليك بطل .. مش بتصرفها لهم .. و تشحت منهم بعد كده .. وقتك كله بتاعك إنت .. بتستثمره بكفاءة … و ماحدش قدر يضيعه لك فكلام فاضي و يخليك تور في ساقية . .. و عشان كده .. العالم كله بقي معتبرك المثل و القدوة .. و وثقوا فيك .. و مشوا وراك .. … و لكن .. الأشرار كان عندهم آخر وسيلة و آخر طريقة يحاولوا يهزموك بيها .. إخترعوا آلة زمن .. و رجع بيها شوية جواسيس من المستقبل .. لزمننا الحالي .. هدف الجواسيس الوحيد هو … إنك ماتكونش البطل .. … قتلك مش الحل .. لأن غيرك حيطلع مكانك .. لكن تحويلك لخيال مآتة … شُرابة خُرج .. كائن مخوخ .. عيل طري هٍتية .. هو ده الهدف .. و بالتالي .. لما تيجي سنة 2040 .. حتكون مجرد صفر عالشمال زي باقي البشر .. مالكش قيمة .. مالكش تأثير .. و مجرد كائن بياكل و يموت زي باقي الحيوانات بالظبط .. … الجواسيس خطتهم مُعقدة جداً .. ..

• منهم اللي ضافك علي السوشيال ميديا و بيقعد يشير تريندات و هري و كلام تافه قدامك طول الوقت ..
• منهم اللي صاحبك و قرب منك و بيناديك تقعد جنبه عالقهوة كل يوم بالليل ..
• منهم البنت اللي حتبعت لك آد علي سوشيال ميديا و تقول لك ( إزيك 😅 ) .. و تفضل تسحبك وراها بدون أى هدف حقيقي ..
• منهم اللي حيطلع قدامك في التيليفزيون ..
• منهم اللي حيصلي جنبك في الجامع و يتصرف بشكل مقرف يكرهك في الصلاة في الجامع ..
• منهم اللي حيقعد جنبك في المواصلات و يشتكي من كل شيء في الحياة و يزودك يأس ..
• منهم اللي حيتخانق معاك بدون هدف عشان تتخانق معاه بدون هدف .. بس المهم تخسر أعصابك و دينك . …
• منهم اللي حيغتني بكل الطرق الشمال .. و يتمنظر بفلوسه و ثروته قدامك .. عشان تخسر مبادئك و إنت مفكر إن الثروة من الطرق الشمال هي الحل .. …
• منهم المغني و الممثل و لعيب الكورة .. و غيرهم و غيرهم .. … … سنة 2040 .. إنت البطل عشان فآخر سنة 2023 .. إنت أخدت قرار .. بدأت زرعة بتاخد وقت عشان تطلع ثمرة .. و صبرت عليها .. ماستعجلتش .. ميأستش .. ماغيرتش هدفك .. فهمت إن 16 سنة وقت قصير أوي أوي .. و بيعدي زي الهوا .. … … يا بطل .. في ناس باعتين لك رسالة من المستقبل .. إنت الأمل الوحيد .. إنت اللي العالم كله كان مستنيك تصبر .. إنت الوحيد اللي تقدر .. خلي بالك من الجواسيس .. ماحدش منهم حياخد منك حاجة غصب عنك .. أبداً .. و لكنهم حيحاصروا كل مكان حوالين عينيك و عقلك و إنتباهك .. إجمد .. … كلنا مستنيينك في المستقبل .. .. يا بطل