يا تري ( لوسي ) إبن طنط فكيهة .. كان

يا تري ( لوسي ) إبن طنط فكيهة .. كان شايل عدّة أندرويد ولّا آيفون ؟! . 😅 .. معلش … عيش معايا الخيال شوية .. و تعالي نسرح في شوية أسئلة .. تعالي نرجع بالزمن ل سنة 1961 .. أيام فيلم ( إشاعة حب ) .. و تعالي نبحث عن شاب رقيع .. بالظبط زي ( لوسي إبن طنط فكيهة ) 😅 . و تعالي نحاول نبيع له … موبايل . … في أسئلة كتير أوي بتظهر هنا .. منها مثلاً : هل لوسي إبن طنط فكيهة .. حيشتري منك ؟! .. طيب .. هل لو إشتري الموبايل فعلاً .. حيعرف يستخدمه ؟! . … عشان تقدر تتخيل الإجابة علي الأسئلة دي .. عايزك تنسي إسم الدلع بتاع الموبايل اللي في إيدك .. إنسي إنك بتقول عليه ( موبايل , محمول , تفاحة , تلفون طاطش بكامرا 🤣 , .. ) . و نادي عليه بإسمه الحقيقي … إنت ماسك في جيب بنطلونك : . حاسب آلي إلكتروني فائق القدرة مزود بذاكرة رقمية ممتدة , مٌدمج معه عدد كبير من الحسّاسّات و المستشعرات الرقمية ( للضوء و الصوت ) . قادر علي الإتصال بشبكة عنكبوتية لا مركزية للمعلومات بعدة تقنيات إتصال. و وسيلتك للتواصل مع الحاسب الآلي ده هو نظام تشغيل قائم علي المٌدخلات الحسّية مثل اللمس و الصوت . 🙂 . اللي فات ده .. هو الموبايل بتاعك بأبسط صوره .. آه والله العظيم .. . تعالي بقي نروح ل ( لوسي إبن طنط فكيهة ) .. و نعرض عليه الشيء اللي في جيبك ده .. . تتخيل ردّه حيكون إيه ؟! 🤣 . بالظبط زي ما تخيلت .. من رابع المستحيلات إنه يشتري منّك .. مش لأنه رقيع و تافه .. إطلاقاً .. و لكن لأنك ماقدرتش تقرّب له .. ماقدرتش تثير إهتمامه .. إنتباهه .. رغباته .. … عدد كبييييييييييييير بقي من البشر .. و مبالغ ضخمة إتصرفت .. عشان أى ( لوسي إبن طنط فكيهة ) عايش في عصرنا الحالي دلوقتي .. يبقي أول أحلامه و إهتماماته و رغباته في الحياة هي : موبايل . .. إزاي ؟! . مش بإنك خدت الشاب الرقيع ده و شرحت له كورسات كتير في أهمية الحاسب الآلي .. و شبكات الإتصال المعلوماتية العنكبوتية اللامركزية 🤣 . . لا .. . و لكن عن طريق إنك خاطبت أحلام الشاب الرقيع ده مباشرة ..

• عايز تبقي شاب كوول و روش و كاجوال طحن ( لغة الألفينات ) : هات موبايل و إلبسه فحزامك 🤣 .

• عايز لما تشقط البنت تعرف تكلمها فأى وقت تحبه ( كل إعلانات الموبايلات في الألفينات تقريباً كان فيها نفس المشهد بتاع الحبّيبة و هما سهرانين بيكلموا بعض بالليل 🤣 ) : يبقي هات موبايل و إدفع فلوس إشحنه بيه .

• عايز لما تشقط البنت .. تاخد صورة تخلّد الذكري دي ؟! .. يبقي هات موبايل فيه ( كاميرا = حسّاس صوت و صورة ) .

• عايز تبقي فاهم النكتة اللي الشلّة قالتها إمبارح في الشات .. و ماتبقاش غريب عنهم و منبوذ ؟! .. يبقي هات موبايل بيدخل عالنت .. و إنضم معاهم لجروب الشات . … و تدريجياً .. حصل التالي : . الشاب الرقيع ( لوسي إبن طنط فكيهة ) .. بيحوّش مبلغ ضخم من الفلوس ( بدل ما كان حيصرفه في الديسكو أو الرحلات أو أى رفاهيات أخري ) .. و بيصرفه في ( حاسب آلي فائق القدرة ) . . و بعدين .. الشاب الرقيع ( لوسي إبن طنط فكيهة ) .. بيصرف كم ضخم من وقته و مجهوده اليومي .. في إنه يتعلّم :

• كيفية إستخدام نظام تشغيل مٌعقّد جداً ( android or ios operating system ) .

• بيحفظ كم ضخم من مصطلحات و لغة و ( Lingo ) .. ماكنش لها أى وجود في عقله قبل كده ( إيموجي , مصطلحات شات , برامج سوشيال ميديا , … )

• إيديه بتتعلّم كم كبير جداً من المهارات العضلية المعقدة بتاعت إستخدام نظام ال ( طاطش ) بتاع الموبايلات . … عايز تشوف اللي باتكلّم عنه ده بكل وضوح ؟! .. حاول تخلّي شخص كبير في السن مثلاً و عمره ما مسك موبايل تاتش قبل كده ( جدك أو جدتك ) .. يحاول يتعامل مع موبايلك .. و شوف هو بيتعامل إزاي .. . الطريقة اللي هو بيحاول يتعامل بيها دي مع موبايلك … هي بالظبط الطريقة اللي إنت شخصياً كنت بتتعامل بيها مع أول موبايل عينك وقعت عليه فحياتك . . و لكن .. .. و لكن .. لأنك خدت الرحلة دي بالتدرييييييييييييييييييج أوي .. و خدت الرحلة دي .. ضمن عدد كبيييييييييير من أبناء جيلك و سنك و أصدقائك .. و خدت الرحلة دي .. و إنت مش مركّز إطلاقاً علي صعوبتها .. و لكن مركّز فقط علي ( رغبتك في إنك تشقط البنت .. و تكلمها .. و تتصور معاها .. و تتواصل معاها عالسوشيال ميديا … ) ف ماحسيتش إطلاقاً بأى صعوبة عدّت عليك . . بالرغم من إن الرحلة في حقيقتها ( صعبة و مٌعقدة جداً جدأ جداً ) . … تعالي بقي أكلمك عن رحلات مٌختلفة تانية .. . زي : رحلة إتقان التحكّم في مٌحرّك إحتراق داخلي .. قائم علي فيزياء الديناميكا الحرارية .. بشكل يتطلّب حساب عدد ضخم من المتغيرات المتحركة و إتخاذ قرارات حاسمة في بضع ثواني قليلة . . أو اللي هو إسم الدلع بتاعه : السواقة . 😅 . أو مثلاً : رحلة فهم نشاط تنافسي .. قائم علي الحركة الجسدية في نطاق زماني و مكاني محدود .. بين عدد كبير من الأفراد يصل ل 22 فرد .. عن طريق التحكّم في عنصر هندسي يطيع الحركة بأكثر شكل غير محدود من الأشكال الهندسية في الفراغ … و هذا النشاط محدود ب سلسلة من القوانين يتخطي عددها ال 17 قانون في أبسط صوره . . أو اللي هو إسم الدلع بتاعه : كرة القدم 🤣🤣 . … فهمت حاجة ؟! … إنت .. كإنسان عادي ماشي في الحياة حالياً .. غالباً قدرت ” تحترف ” كم ضخم جداً جداً من الأنظمة و التفاصيل الغاية في التعقيد .. و وصلت لدرجة ” إحتراف ” عالية فيها .. إنك بتمارس و تستخدم الأنظمة دي بكل أريحية .. بدون الشعور بإنك بتعمل حاجة صعبة إطلاقاً . … و الأنظمة ( اللي إنت محترف فيها ) دي كلها .. لا تختلف إطلاقاً .. عن أى شيء آخر تظن إنت إنه ( صعب ) .

• فيزياء ذرية ؟!

• هندسة نووية ؟!

• عوالم بيزنس و تجارة معقدة ؟!

• مهارات تقنية متقدمة جداً ؟! … كل مجال من المجالات دي .. مش صعب إطلاقاً .. و لكن .. لأن المجالات دي ( ماتباعتش ) لك .. زي ما ( الموبايل ) إتباع لك .. ف إنت ماشتريتش . … أكتر شخصية شدّة إنتباهي حتي الآن بالمناسبة في المسلسل ( لا ترد ولا تستبدل ) .. هي شخصية ( بعوضة 🤣🤣 ) .. و ما زلت مٌنتظر إني أعرف سبب التسمية دي . .. و لكن سبب إني مهتم فعلاً بالشخصية دي .. لأني شٌفت منهم كتييييييييييييييييييييييييييييييييييير جداً علي مدار حياتي .. و طول الوقت كنت باتسائل .. . يا تري .. يا هل تري .. أبيع له (إيه ) ؟! … و ( إزاي ) ؟! . … و الله أعلم .