لحد النهاردة والله العظيم .. متي جاءت سيرة ( ثانوية

لحد النهاردة والله العظيم .. متي جاءت سيرة ( ثانوية عامة 2004-2005 ) بتاعتي أمام أمي ربنا يبارك فيها و يحفظها .. و ذكرياتي عنها .. أول كلمة أمي بتقولها هي : ” إنت كنت بتجري في البيت ب فورريرة و يويو 🤣😅 … طبيعي كنت متوقعة عنك إنك بالعافية حتجيب 70% مثلاً 🤣 ” . . نتيجة تالتة ثانوي بتاعتي كانت : 98.6% 😁 . … خليني أحكي قصة ال( فورريرة و اليويو ) دول ؟! .. إحنا الدش المركزي دخل عالمنا سنة 2003 .. و دي السنة اللي إكتشفت فيها ( سبيستون ) .. و إكتشفت ( سابق و لاحق .. و بي بليد .. و سلام دانك .. و سوبر سونيك سبينر .. و غيرهم من مسلسلات الأنيمي الكتيييييييير أوي اللي أدمنتهم بالكامل ) . … من طفولتي زي ما شرحت كتير .. و أنا عقلي دائم الأسئلة بشكل لا ينتهي .. و بناءاً علي ده .. كنت باكسّر كل اللعب اللي بتجيلي أول يوم يتجيلي فيه .. و أفكها و أحاول أشوف كل تفاصيلها و أفهمها .. و بعدين أحاول أركبها فبعضها .. و لكن .. و لكني كنت محدود .. جداً .. محدود بأدواتي و مواردي البسيطة ك طفل .. .. ف لما إتعلمت القراءة .. عالمي إتسع بشكل ضخم جداً .. و ده يمكن السبب لإدماني روايات مصرية للجيب .. و بالأخص ( رجل المستحيل و ملف المستقبل ) .. و لكن .. و لكني كنت محدود .. جداً .. محدود بحدود العالم اللي بيرسمه خيال المؤلف .. و بقدرتي علي تخيل العالم ده . … لكن في الأنيمي .. فجأة .. إكتشفت عوالم جدييييييدة عمري ما فكرت فيها قبل كده .. زي إن يبقي في عربيات تتحرك بأوامر صوتية مني .. و تتأثر بمشاعري و صريخي لها 🤣 ( زي سابق و لاحق ) .. أو إني أركز طاقة جسمي في إيديا عشان أحرّك ورقة شجر بتطفو علي سطح كٌباية مياه ( مشهد إتقان النين في القناص 😅😁 ) .. و قسماً بالله قضّيت ليالي كتير في ثانوي عام .. باطلع كٌبايات من النيش و أملاها مياه .. و أحط عليها ورقة شجر .. و أشوف لو حاعرف أطلع ( نين أنا كمان أو لا 🤣🤣🤣 ) .. و غيرها كتير جداً من أمثلة إزاي كنت دايماً باسأل نفسي : هل في طريقة إن الخيال اللي باشوفه في الأنيمي ده .. يتواجد في الواقع ؟! … الوقت ده نفسه في عمري .. كان هو اللي درست فيه كيمياء تانية ثانوي .. و فيزياء في تالتة ثانوي .. و فيهم .. بذل المدرسين بتوع الكيمياء و الفيزياء قٌصاري جهدهم فإنهم يشرحوا معلومة مهمة جداً جداً جداً .. و هي : . إن الإليكترون له طبيعتين .. طبيعة مادية.. و طبيعة موجية 🤣🤣🤣 … زي ما شرحت في البوستات السابقة .. أنا عقلي بيرفض يحتفظ بأى معلومة مُجردة .. مالهاش علاقة بباقي شجرة المعلومات في عقلي .. . ف علي مدار السنتين تانية و تالتة ثانوي .. و أنا الجملة دي ( إن الإليكترون له طبيعتين .. طبيعة مادية و طبيعة موجية ) .. كانت مسببة ليا مشاكل كتير . . ليه ؟! لأني ماكنتش قادر أتخيلها 🥹🥲 . أنا عمري ما شفت إليكترون .. و الفيزياء قالت لي إني حتي لو شفته .. مش حاشوفه إلا في حالة واحدة .. أنا ماكنتش قادر أتخيل . … في الأنيمي ( بي بليد ) .. بتاع البلابل 🤣🤣🤣 .. كان البطل بيطلع ال (إحم .. الفورريرة بتاعته ) .. و بعدين يرميها .. و تبدأ يطلع منها تنانين بقي .. و حاجات بتطير .. و مؤثرات صوتية و مرئية .. و أنا عينيا متعلقة بشاشة التيليفزيون .. و لكن عقلي دائم البحث .. عن علاقة .. هل ممكن ده يتواجد في الحقيقة ؟! … في تالتة ثانوي … سألت أستاذ الفيزياء بتاعي اللي أدين له بكم ضخم جداً جداً جداً من الشكر و المعروف .. إيه اللي يحصل لو رميت ال ( بُل.. إحم .. الفورريرة ) .. و فضلت سرعتها تزيد ؟! … أستاذ الفيزياء بتاعي .. ماكنش مدرس عادي .. و لكن كان عاشق للفلسفة قبل ما يكون عاشق للفيزياء .. و بدأ يفكر معايا فعلاً .. إن أى جسم مادي لو بدأت تحركه .. و إفترضت هنا إن مش حيبقي في فشل ميكانيكي في التجربة … إيه اللي حيحصل ؟! .. يعني إيه الأول ( فشل ميكانيكي ) ؟! .. يعني إن الفورريرة تفضل متماسكة .. و إن الخيط اللي اليويو مربوط بيه مثلاً مايتقطعش .. و هكذا . .. لو جرّبت ده بنفسك .. حتلاقي دايماً إن عند مرحلة معينة من سرعة الحركة و الدوران … بيطلع صوت .. الصوت ده ناتج من إحتكاك جزيئات الجسم اللي إنت بتحركه .. مع جزيئات الهوا .. .. و كل ما تزود السرعة .. يزيد الإحتكاك .. يزيد الصوت و الطنين .. لحد ما تسمع إنفجار .. ده معناه إنك كسرت حاجز الصوت .. و بقيت بتلف ال ( بُل.. إحم .. الفورريرة بتاعتك ) .. بسرعة أعلي من سرعة الصوت 🤣 . . زود السرعة أكتر .. و عند مرحلة معينة .. الإحتكاك حيولد حرارة .. . زود أكتر .. الحرارة حتولد ( بلازما ) .. . وقفت أنا هنا .. و بدأت أسأل ( إيه هي البلازما دي ؟!! ) . و شرح ليا أستاذي إنها ( الحالة الرابعة للمادة ) .. . حالات المادة اللي إنت خدتها في إبتدائي اللي هي ( صلب و سائل و غازي ) .. الحقيقة إن كان في حالة رابعة .. مسافرة و بتيجي في الأجازات 🤣 .. و هي ال ( بلازما ) .. . و اللي حتعرفه لو دوست في الحتة دي شوية … إن في حالات تانية .. بس ما علينا منهم دلوقتي … حييجي وقت في بوست قادم .. و أشرح فيه حالات المادة .. و البلازما .. بتفصيل أكتر إن شاء الله . … المهم .. أنا ماكنتش برضو لسة متخيل بالكامل .. و خصوصاً إن كان في صورة تانية خالص للتجربة دي .. و هي : إيه اللي يحصل لو كنت بتلعب بال (بُل .. إحم .. الفورريرة بتاعتك ) في الفضاء .. يعني من غير ما يكون في جزيئات هوا تسبب إحتكاك ؟!!! … علي مدار تانية و تالتة ثانوي .. و أنا كان في حاجتين أساسيين بالعب بيهم طول الوقت :

• فورريرة ( صنّعت واحدة .. و بعدين كسرتها .. و بعدين إشتريت بي بليد فعلاً .. و بعدين كسرته .. و بعدين صنّعت منهم هما الإتنين ال هايبريد بتاعي 😎😁 ) . .
• يويو ( إشتريت واحد .. و كسرته .. و بعدين صنّعت واحد .. ونفس القصة برضو كسرته .. و بعدين عملت الهايبريد .. و كسرته .. و بعدين ربطت أستيكة ب حبل و بقيت بالفها طول الوقت 🤣 ) . … و علي مدار تانية و تالتة ثانوي .. كنت دايماً باتسائل .. عند أنهي مرحلة من السرعة و الدوران .. حابدأ أطلّع موجات كهرومغناطيسية ؟! … … شرحت في البوست اللي فات .. إن سبب إختياري الأساسي ل قسم كهرباء إتصالات و إليكترونيات .. هو جهلي بالعالم ده .. … أنا كنت قادر أتخيل في عقلي من طفولتي إني ممكن أبني قلاع و أبراج و مدن كاملة بالدومينو و الكوتشينة … ده كان شيء منطقي و حدسي جداً . . كنت قادر أتخيل في عقلي .. إزاي ماكينة الخياطة بتشتغل .. إزاي عجل القطر بيتحرك .. و كل اللي كنت باحتاج أعمله .. هو إني أتخيل إن مصدر الطاقة ( لأني كنت لسة مش فاهم محرك إحتباس حراري .. ولا فاهم كهرباء ) .. هو إني كنت باتخيل مصدر الطاقة هو : زمبلك كبير 🤣🤣 = spring أو أستك كبير . . لكن .. مهما حاولت قبل ما أدخل الكلية .. عمري ما قدرت أتخيل عالم الموجات الكهرومغناطيسية ده . … زي ما أنا مدين ب فهمي ل أغلب أساسيات الفلسفة و المنطق .. ل أمي .. ربنا يحفظها و يبارك فيها . و مدين ب فهمي لأغلب أساسيات الرياضيات و الهندسة .. لأساتذتي في إعدادي و ثانوي . و مدين ب فهمي لأغلب أساسيات الفيزياء .. لأستاذ الفيزياء بتاعي في ثانوي عام . . ف أنا مدين ب فهمي لأغلب أساسيات عوالم الموجات الكهرومغناطيسية .. ل دكتور : شوقي شعبان .. الله يرحمه و يغفر له . اللي درّس لي أكتر من مادة في الكلية .. و كان أحد اللي ناقشوا مشروع تخرجي .. و قال لي و هو بيسلم عليا بعد المناقشة إني ( نصّاب محترف 🤣🤣🤣🤣 ) .. لأني حورت كتير أوي في المناقشة عشان تعدّي من غير ما نتسأل في أى شيء من الحاجات اللي كان المفروض نعملها و ماعملناهاش 🤣 . … د شوقي شعبان رحمة الله عليه … فأكثر من مادة من المواد اللي درسها لنا .. كرر رسم و شرح حاجة معينة .. و عمري ما نسيتها .. .. كان بيرسم خط مستقيم علي السبورة .. و يشرح إن ده هو ال (Electromagnetic Frequency spectrum = يعني .. سلم الترددات الكهرومغناطيسية ) . .. سلم .. بيبتدي ب : صفر .. أو ما يعني ( تقريبياً ) .. حالة ثبات .. و لكن ده مش موجود في الحقيقة تقريباً .. لأنك ماتقدرش تمسك إليكترون و توقفّه .. و حتي لو وقفته .. مش حتقدر تمنعه إنه يطلع موجات .. في كلام بعدين نشرحه .. عن إيه اللي بيحصل في درجة حرارة صفر كلفن ( كل ما تسقّع المادة .. كل ما تبطأ حركتها ) .. لكن ده مش وقتنا دلوقتي 🤣 .. و بعدين .. كل ما تطلع علي السلم ده .. الترددات تعلي شوية .. لحد ما توصل ل العالم اللي بتعيش فيه ترددات ال( راديو ) .. اللي هي بتبتدي ب ال (AM ) .. يعني إذاعة الشرق الأوسط و البرنامج العام .. و القرآن الكريم . .. و بعدين ال ( fm ) .. اللي هي نجوم fm 🤣 .. .. تطلع شوية علي السلم .. تلاقي عالم ترددات المايكروويف ( أيون .. اللي بتسخّن فيه الأكل .. و تلاقيه بيسخن من الأطراف لدرجة إنك تبقي مش عارف تمسكه .. و لكن الطبق في الوسط بيبقي لسة ساقع و متلج 🤣 … حييجي بوست قادم و أشرح فيه بالظبط ليه إن شاء الله ) . .. و بعدين تطلع تلاقي ترددات الآشعة تحت الحمراء ولامؤاخذة .. .. و بعدين تسأل نفسك هنا .. هو إيه اللي بعد الآشعة اللي تحت الحمراء ؟! الإجابة : الحمراء 🤣🤣 .. ولامؤاخذة … يعني الضوء الأحمر . .. الضوء المرئي ( اللي عينينا تقدر تشوفه ) .. تردداته بتبتدي بالأحمر .. و بعدين : برتقاني أصفر أخضر أزرق فاتح أزرق غامق بنفسجي .. فاكر لما كنا بناخد تجربة غطا علبة الميلكانا في إبتدائي ؟! ( لما كنت بتلون غطا علبة الجبنة المثلثات بالألوان بتاعت الطيف .. و تحط مسمار في النص و تلف الغطا .. تلاقي الألوان كلها إتحولت لأبيض ) .. هو ده .. الضوء الأبيض المرئي .. عبارة عن الترددات دي مضروبة في الخلاط 🤣.. .. أما عن ليه عينيك بتشوف الخليط ده ك ( ضوء أبيض ) .. ف ده حنوصل له في حصة الأحياء إن شاء الله 🤣 .. و أنا باشرح لك تشريح عينيك ولامؤاخذة .. و بتستقبل الضوء و الألوان إزاي . ( الناس اللي حضرت ليا كورسات جرافيكس .. فاكرين لما شرحت لهم الجزء ده 🤣🤣🤣 ) . … و بعد البنفسجي ؟! .. و إحنا طالعين السلم .. بنلاقي ؟! بالظبط .. الآشعة الفوق بنفسجية .. منطقي خالص أهه .. … كمل بعد كده بقي .. حتلاقي ( آشعة إكس .. اللي هي بتعملها لما عضمك ينكسر لا قدر الله ) … و بعدين ( آشعة جاما .. اللي هي بتاعت الرجل الأخضر هالك 🤣 ) .. … و بعد كده عالم تاني مش وقت إني أفتح عينيك عليه دلوقتي 🤣 … السلم ده من الترددات ( بتاع الترددات الكهرومغناطيسية ) .. سلم موازي ل السلم اللي إتكلمت عنه مع أستاذ الفيزياء ( بتاع إيه اللي يحصل لما ألف فورريرة بسرعة أوي ) .. .. يعني .. الفورريرة دي .. طول الوقت .. عايشة علي سلمين .. واحد مادي .. و واحد كهرومغناطيسي . … ماقدرتش أتخيل العالم ده بشكل يستريح له عقلي … غير بعد ما دخلت الكلية .. مش عشان إتشرح ليا في الكلية … لا .. و لكن .. لأن أول مرة في حياتي أمسك موبايل في إيدي .. كان لما دخلت الكلية 🤣 … الموبايل اللي إنت يمكن بتقرا عليه البوست الطويل أوي فحت ده .. له طبيعتين .. طبيعة مادية .. يعني تقدر تهبده في الحيطة يتكسّر بعد ما زهقت من الرغي بتاعي ده .. و طبيعة تانية .. طبيعة موجية .. اللي هي بتخليه متصل بأبراج المحمول .. و شبكات الوايفاي . … و لما بتلعب فيه ( الموبايل أقصد 🤣 ) .. تقدر تتخيله دايماً عايش في العالمين دول .. … الإليكترون ( اللي هو حنفترض عشان نسهّل التشبيه ) إنه أصغر جسم في الذرة .. زي الموبايل بتاعك بالظبط .. له طبيعة مادية .. و تقدر توزنه .. و تمسكه .. . و له طبيعة كهرومغناطيسية .. تمكنه من إنه يعيش في عالم تاني خاااااااااالص .. عينيك مش بتشوفه .. و لكنه موجود .. و بتشحن له باقة .. .. و في حالتي مثلاً .. لا يتوقف عن الزن إطلاقاً .. و بيخليني لازم أنهي البوست عند هنا .. و أكمّل لاحقاً .. … زمااااااااااااااااان … لما كنت ماشي في البيت ماسك فورريرة و يويو .. ماكنش لسة في علي أيامي موبايلات تمكني إني أتخيل التشبيه ده .. … الله أعلم .. لو كنت في ثانوية عامة دلوقتي .. كنت حابقي ماشي في البيت ماسك إيه 🤣 .. الله أعلم . 🤣