بمناسبة التاريخ اللي إتلعب فيه ماتشات كتير ده .. .عشان

بمناسبة التاريخ اللي إتلعب فيه ماتشات كتير ده .. .عشان لو حصل .. و فجأة لقيت اللي حواليك بيلبسوك شارة الكبتنة .. شوية نصايح ممكن ينفعوك : .. 1- القيادة .. غير الإدارة .. الإتنين مختلفين عن بعض جداً جداً جداً .. و قليل جداً إن واحد بيكون عنده الإتنين ( بس ده نادر جداً جداً جداً .. كإنك بتدور علي حد ب راسين حرفياً ) .. .. 2- القائد .. دوره الأول و الأهم هو إنه ( يلهم ) اللي حواليه … يخليهم يؤمنوا بيه .. و برسالة و هدف أكبر منهم .. و يحبوا إنه يموتوا نفسهم في سبيل الهدف ده . … 3- المدير .. دوره الأول و الأهم هو تحقيق الأهداف بواقعية و كفاءة .. ( و ركز جداً جداً في موضوع الواقعية و الكفاءة دي ) .. … 4- القائد .. جزء أساسي من وجوده و دوره .. هو إنه يحلم .. و يخلي اللي حواليه يحلموا معاه .. و يصدقوا الحلم ده .. مهما كان مجنون و بعيد و غير واقعي . … 5- المدير .. جزء أساسي من وجوده و دوره .. هو إنه مايحلمش .. و لكن يكون صاحي طول الوقت و يصحي اللي حواليه .. و ينبههم بالخطوة المباشرة القريبة اللي تحت رجليهم اللي لازم ياخدوا بالهم منها .. و إلا يضيعوا كلهم . … 6- القائد .. لو إتنفخ زيادة عن اللزوم .. حيصدق نفسه و حلمه و إلهامه .. و حيلبس نفسه و كل اللي حواليه في الحيط .. لأنه مش حيشوف الخطوات الواقعية و الأولويات المهمة اللي تحت رجليه .. و حيفضل باصص لبعيد .. فيقع . … 7- المدير .. لو إتنفخ زيادة عن اللزوم .. الناس حتسيبه و تمشي .. و تكرهه .. و تكره نفسها .. و تتحسر عاليوم اللي صدقوا فيه القائد . لأن المدير مابيحلمش .. و من غير حلم .. مافيش طعم لأى حاجة .. مهما كانت كفاءتها عالية . … 8- القائد كلمته المفروض تمشي عالمدير … و المدير كلمته المفروض تمشي عالقائد .. و لازم يتخانقوا و صوتهم يعلي .. و يضربوا بعض بالشباشب كمان .. لكن فآخر اليوم … آخر الشهر .. آخر الكوارتر .. يسلموا علي بعض بكل إحترام و تقدير .. لأن كل واحد منهم فاهم دور التاني و أهميته كويس جداً جداً . … 9- القائد .. الناس بتخاف عليه .. المدير .. الناس بتخاف منه .. … 10- لما تلاقي اللي حواليك بقي بيلبسوك شارة الكبتنة .. إهدي كده و بص في المراية و إتأكد إنت مين في الإتنين .. قائد ؟ .. ولا مدير ؟ . و لو لسة مش عارف .. ماتلبسش .. شارة الكبتنة أقصد 🤣