هل سبع صنايع .. معناها فعلاً إن البخت لازم يكون

هل سبع صنايع .. معناها فعلاً إن البخت لازم يكون ضايع ؟

أكيد تعرف شخص أو أكتر في حياتك .. بيفهم في الكهرباء و يقدر يصلح حاجات كتير بسهولة نسبياً .. و بيفهم في السباكة .. و بيفهم في النجارة .. و مثقف جداً .. و بيعرف يلعب بلايستيشن و صعب جداً تغلبه . لو إتعلم السواقة .. حتلاقيه في خلال فترة بسيطة مش بس سواق درجة أولي .. و لكن ميكانيكي محترف .. و عفشجي .. و يغير عجلة عربيته لو إتخرمت أثناء ما العربية ماشية عادي 😅. بيعوم مسافات طويلة .. و بيلعب كورة أحسن من أى حد .. و بيشرب سجاير .. أثناء ما هو بيلعب كورة و بيجري من غير ما ينهج كمان . و أكتر و أكتر .. … و لكنه طول الوقت غالباً ( مقشفر = يعني مفلس ) .. نادراً لو كان ثابت في شغلانة واحدة .. أو عنده مشروع مثلاً معروف ملامحه ( حاجة كده زي محل .. شركة .. مشروع توليد أرانب ) .. مختفي معظم الوقت .. و لما تدوروا عليه تلاقوه بيعمل حاجة عجيبة فمكان أعجب ( حاجة كده زي بياخد دورة غطس مع منظمة دولية غير هادفة للربح هدفها الإهتمام بحياة السناجب المعرضة للإنقراض في السنبلاوين ) . … غالباً إرتبط أكتر من مرة .. و خطب كذا مرة .. و كل مرة يرتبط أو يخطب فيها .. تلاقيه حلق شعر و دقن .. و بدأ يكوي القميص قبل ما ينزل .. و بقي بيغسل وشه .. .. و بعد شوية .. تلاقيه رجع تاني يختفي .. و يلبس تيشيرتات مش مكوية .. و شعر و دقنه يطولوا .. و يبلغكوا إنه ( فك الخطوبة / فصل / … ) . … و هكذا . … إحتمال إن الشخص ده بيعاني من نفس الشيء اللي باتكلم عنه بقالي كام بوست ( ADHD) . … زمااااااااااااااااان .. و قبل سيادة العصر الإقتصادي الرأسمالي اللي إحنا عايشين فيه ده .. الشخص ده كان بيُطلق عليه لقب ( maverick = فهلوي و حِرٍك و بتاع كله ) . و كان بيبقي من الشخصيات اللي بيدور عليها أى حد عشان يخليه جزء في المجتمع / القرية / القبيلة بتاعته .. … ببساطة .. لأن في الوقت ده كان بقاء المجمتع / القرية / القبيلة معتمد بشكل كبير علي جودة كل الأفراد اللي بيشكلوا القرية دي .. و بالتالي .. ماكنش في إستقلالية مادية شديدة أوي زي دلوقتي للأفراد .. و لكن كان القرية / القبيلة بتعتني بالأفراد اللي فيها بالكامل ( في الأكل و الشرب و المسكن ) .. … و ماكنش في رفاهيات كتيير متنكرة ك ( أساسيات ) تبين العجز المادي بسهولة عند الأفراد .. يعني لما كنت تحب تتجوز .. ماحدش كان بيقول لك ( فين النيش ؟! ) . … … لما ساد العصر الإقتصادي الرأسمالي الظريف اللي إحنا عايشين فيه دلوقتي .. إستقل أغلب الأفراد بمواردهم .. و أصبح كل إنسان كيان مالي مستقل بذاته .. و زادت الرفاهيات بشكل كبير ( كوسيلة كسب و تنمية أكتر للمال ) .. و زاد إعتناق المجتمعات للرفاهيات دي ك ( أساسيات ) .. فأصبح لا يكفي إطلاقاً إنك تكون قادر ( تاكل , تشرب , تسكن ) لفترة من الزمن .. أصبح لازم ” تمتلك ” ما يكفي إنك تجيب الرفاهيات الكتير دي .. و تتنافس بيها . … … في العصر ده بالذات … ال ( maverick = الشخص السبع صنايع ) ده .. بيعاني جداً … … السبب : زي ما شرحت فأكتر من بوست في البوستات اللي فاتوا .. الشخص اللي بيعاني من ( ADHD) .. أحد أكبر المشاكل اللي عنده هي ال ( ذاكرة ) .. ببساطة .. هو ماعندوش حاجة تفكره باللي وراه و اللي عليه .. هو فعلاً بيلاقي نفسه كل شوية ( أبيض يا ورد ) .. يعني مهما كان مشغول في شيء معين .. بيلاقي فجأة عقله فاضي .. و بيدور علي حاجة جديدة يشغل نفسه بيها .. .. ده لأن الإنسان العادي عنده إفراز بنسب طبيعية للهرمونات المسئولة عن التركيز و الذاكرة و السعادة و الحماس .. فلما الإنسان العادي بيشتغل علي حاجة معينة .. أو يدرك إنها مهمة .. بيبدأ ” تدريجياً ” يستمر في إفراز الهرمونات دي .. و عقله بيكوّن للحاجة اللي هو مشغول بيها مكانة كبيرة و مهمة .. فصعب جداً تلاقيه بعد فترة قادر يتشتت عنها .. لأنه عقله كوّن أهمية للحاجة اللي هو شغال عليها . … الإنسان اللي بيعاني من ( ADHD ) لما حاجة جديدة بتدخل مجال إنتباهه .. عقله بشكل غير واعي بيديها ” كل ” إهتمامه .. مش بيزيد الإهتمام ده بشكل تدريجي زي الإنسان العادي .. و بالتالي .. بتلاقي الإنسان ال ( ADHD) .. فجأة أصبح كل حياته و إهتمامه و تركيزه هو في الحاجة الجديدة اللي دخلت مجال إنتباهه .. و بعد فترة .. حاجة تانية بتدخل مجال إنتباهه .. فبشكل غير واعي .. و بدون إرادة منه أو تدخل … ” كل ” إنتباهه بيروح علي الحاجة الجديدة دي .. و بيلاقي نفسه فجأة مش قادر ( يهتم / يفكر / يحب ) الحاجة اللي كان مهتم بيها قبلها .. … بيحاول .. والله بيحاول إنه يجبر نفسه إنه يرجع يهتم بالحاجة الأولانية زي ما كان .. و إنه يرجع ” حلاوة البدايات ” مرة تانية .. و لكنه بيفشل .. … لو كانت الحاجة دي ” علاقة عاطفية مثلاً ” .. الطرف التاني اللي معاه في العلاقة بيبقي حيتجنن ..

• هو إتغير ليه كده ؟ ..
• أنا عملتله إيه عشان يتغير معايا كده ؟
• فجأة أصبح مهمل فيا بعد ما كان أحلي و أجمل حاجة فحياتي !! . .. ببساطة .. ال ( ADHD) بيكون أحلي و أجمل و ألطف شيء في الحياة في العلاقات العاطفية في الأول … و فجأة … بيتحول للعكس تماماً . خصوصاً لو ماكنش فاهم يعني إيه (ADHD) .. و فاهم نفسه . .. و خصوصاً أكتر .. ده بيحصل في العالم الرأسمالي المستفز اللي إحنا عايشين فيه . … … و لكن علي العكس .. زمااااااااااااااااان كان الشخص اللي من النوعية دي ( ADHD) عملة نادرة و قيمة جداً .. لأن ماكنش في ” تخصص ” بشكل ضخم زي دلوقتي .. يعني زمان ماكنتش تلاقي دكتور متخصص في صحة ضوافر السناجب المعرضة للإنقراض في السنبلاوين .. زي دلوقتي .. و لكن كنت تلاقي ال ( Generalist ) .. زي دافنشي و إبن سينا و غيرهم .. بيبقي عالم في الرياضة و الطب و الهندسة و الموسيقي و الفلك … و عنده كمان معلومات عن السناجب المعرضة للإنقراض في السنبلاوين . .. و دول كنت دايماً بتلاقي حواليهم ناس تساعدهم .. ( تلاميذ ملازمين ليهم طول الوقت - Apprentices ) . و لو قرأت في السير الذاتية لكل العلماء القدامي و الشخصيات التاريخية دول .. حتلاقي إن تلاميذهم الملازمين ليهم كانوا مهمين جداً جداً في حياتهم .. .. و كانوا دايماً مسئولين عن تغطية نقصانهم و مساعدتهم في الأمور اللي هما ( عقلهم مش مؤهل ليها ) . … لكن دلوقتي .. مافيش ( تلمذة ملازمة = apprenticeship ) .. و لكن في قوالب .. في فصل 80 طالب لازم كلهم يتعلموا بنفس السرعة .. و يقولوا نفس الكلام .. و يفكروا نفس الأفكار .. .. فطبيعي جداً إنك بتلاقي الطالب المختلف عنهم بيعاني .. حتي لو كان في وقت من الأوقات هو العملة النادرة اللي الكل كان بيدور عليها . … فبيطلع شاب عنده 30 سنة .. لوحده .. بيعاني .. لوحده .. مطلوب منه يكون زي الباقي .. و هو مستحيل يكون زيهم .. … الناس اللي من النوعية دي (ADHD ) .. مجرد ما بيتواجد معاهم بشكل ملازم حد يعوض نقصانهم ده .. بيتحولوا فعلاً لمميزين جداً و ناجحين جداً جداً .. و فجأة اللي حواليهم بينبهروا بكمية المعلومات و المهارات اللي بيمتلكها الشخص ده .. … … مش سهل إطلاقاً أنا عارف إنك لو بتعاني من إختلاف ما .. إنك تنزل الشارع تدور علي حد يلازمك و يكون فاهم نقصانك و يعوضه لك .. .. و لكن الخطوة الأولي دايماً بتكون : إعرف إنت مش عارف إيه .. .. يعني لو ماكنتش عارف إنت عقلك بيتعامل إزاي مع المشاريع .. إنت دلوقتي لسة ماعرفتش التفاصيل .. و لكنك عرفت إنك مش عارف التفاصيل و الكيفية .. و ده معناه إنك تقدر دلوقتي تدور علي حاجة إنت عارف هي إيه .. .. لكن قبل كده .. إنت كنت بتعاني بدون ما تعرف ليه . … … حاجة كمان … في المشاريع اللي بتبتديها و تسيبها من غير ما تكملها دي .. لازم تعرف إن غالباً إنت عملت حاجات غيرك كتير مايقدروش يعملوها .. المشاريع دي مش ميتة .. و لكنها منتظرة إن غيرك من اللي يقدروا يكملوا يتواجدوا فيها و يكملوها معاك . .. ربنا أمرنا بالتدبر و التأمل في خلقه .. الزرعة عشان تطلع ثمرة ناكلها و نعيش بيها .. عدت علي أكتر من مرحلة من لحظة تجهيز التربة نفسها للزراعة .. .. لكن لو طلبنا من النحلة اللي لقحت الزهرة إنها هي كمان تقطف الزهرة .. حتفشل . و لو طلبنا من النخل إنه يلقح نفسه بدون تدخل بشري … حيموت .. … … العالم حالياً ( تكنولوجياً ) فيه حلول كتييييييييييير تساعدك ماتكونش لوحدك .. … … ** المقولة بتاعت ( سبع صنايع و البخت ضايع ) دي .. ترجمة لمقولة إنجليزي مشهورة هي : Jack of all trades , master of none المقولة دي مقطوعة … تكملتها هي : a jack of all trades is a master of none, but oftentimes better than a master of one