تقريباً في سوء فهم ضخم كبير عند ناس كتير من

تقريباً في سوء فهم ضخم كبير عند ناس كتير من اللي بتقرأ بوستاتي و هم مايعرفونيش بشكل شخصي . . بوستاتي و الحاجات اللي باكتبها كلها لا تعبر إلا عن : ( وجهة نظري الشخصية جداً ) . . و جميعها تقريباً آخر جملة فيها هي ( و الله أعلم ) .. لسبب أساسي جداً .. و هو إني فعلاً متصالح جداً مع فكرة إن أغلب ما أعلم قد يكون خطأ أو ناقص أو غير كامل . . فبالتالي .. خليني أوضح شوية حاجات كأمثلة عالكلام ده . . 1- أنا باكره أم كلثوم جداً .. جداً .. صوتها بيعصبني و يضايقني طول عمري من طفولتي .. و بعد ما كبرت و بدأت أتعلم عن مجالات مختلفة ( بما فيهم الموسيقي ) .. فضلت برضو أكرهها جداً . دي وجهة نظري .. الشخصية .. و اللي بتخلي ناس كتير من عشاق أم كلثوم بيختلفوا معايا بشراسة و ضراوة .. و لكن .. اللي متأكد منه برضو .. إن ناس كتير جداً من اللي بيهيموا عشق في أم كلثوم و صوتها .. ماسمعوش ما يكفي أو عرفوا ما يكفي .. و لكنهم خاضعين لسيطرة المجتمع اللي حواليهم ( Peer pressure ) .. . 2- أنا باكره بشدة أغلب مبادئ و مفاهيم الرأسمالية .. مثلاً … لو أنا بابيع منتج معين .. بسعر 100 جنيه .. و عارف إن في منافس ليا .. بيبيع نفس المنتج بسعر 90 جنيه .. كل خلية جوايا بتزعق فيا إني أقول لأى حد جاي يشتري مني .. إنه يروح يشتري من المُنافس بتاعي .. أو .. أنزل أنا سعر منتجي ل 90 جنيه .. و أنسق مع المنافس بتاعي .. و مش بس كده .. لا .. أشوف إزاي أنا و هو ممكن نتفق و نتعاون عشان مكسبه يزيد و مكسبي يزيد .. و لو عرفت إن في منافس تالت لينا .. ححاول أضمه و أكسبه معانا برضو . . كل اللي فوق ده مٌتعارض بشكل مباشر مع أغلب مفاهيم و مبادئ الرأسمالية الحالية .. و اللي هي مُعتمدة بشكل مباشر علي حاجة إسمها : ( Zero sum games = الألعاب ذو الفائز الوحيد ) .. اللي هي الألعاب اللي طالما أنا حاكسب فيها .. لازم يكون الكل خسران . . الكلام ده بينرفز و يضايق أغلب اللي إشتغلوا معايا بشكل مباشر في حاجات لها علاقة بفلوس و بيزنس .. . أغلبهم إداني محاضرات طويلة في إن : ( إنت عايز عالم مثالي, إنت مالكش دعوة , إنت مش فاهم السوق و لا الدنيا ) .. . و أنا الصراحة تعبت و نفسي قصير في الجدال .. فقررت إني فأغلب المجالات اللي أنا شغال فيها بقالي سنين .. إني أبعد عن جانب البيزنس قدر إستطاعتي .. و أركز في إني أكون ( صنايعي = Developer, designer , vision , … و غيرها من صور الصنايعية ) … 3- فبالتالي .. كتاب زي ( الأب الغني , الأب الفقير ) .. بالنسبة لأغلب الناس اللي ماعندهاش أى مبادئ معلومات عن ( الإقتصاد , إدارة الأعمال , الفلسفة , علم الإجتماع , … ) و غيرها من العلوم الأساسية جداً لأى إنسان عشان يفهم مكانه في العالم .. الكتاب ده بالنسبة للناس اللي ماعندهاش المعلومات دي … رائع .. ليه ؟! لأنه بيقدم وهم ال (نجاة ) للأفراد .. بغض النظر عن تأثير الوهم ده علي المجتمع بشكل عام . . 4- يعني … إنت دلوقتي ك فرد .. نجاتك بتعني لك ( تكوين ثروة ) .. لكن الثروة اللي حتكونها دي حتيجي منين ؟! .. . يعني لو إنت مليونير بعملة المريخ ( زي ما أمي دايماً بتقول لي ) .. إنت الملايين اللي معاك دي مالهاش تأثير ولا معني في المجتمع اللي عملته هي ال( جنيه المصري ) مثلاً .. إلا لو كان في قيمة للجنيه المريخي بالجنيه المصري . . لكن في مجتمع معين .. كل ما فيه من (فلوس مصري ) مثلاً .. 10 مليون جنيه مصري .. إنك يكون معاك 2 مليون منهم لوحدك .. ده معناه إن باقي أفراد المجتمع بالكامل معاهم (8 مليون ) بس .. . إنت فرحان .. لكنهم بيعانوا .. . الطريقة دي في التفكير بتضاد بشكل مباشر هيمنة و سيطرة الفكر الرأسمالي علي العالم ( و اللي بتتقدمه أمريكا ) . . جزء كبير من اللي باقوله .. بيتوافق في الشكل من بعيد مع الفكر ال ( شيوعي ) .. ال ( شيوع ) هنا معناها شيوع الثروة علي المجتمع .. . و لكن تطبيق الفكر ده علي مدار التاريخ دايماً بيكون مستحيل بدون دين . . ليه ؟! .. لسبب رئيسي برضو تقدر تفهمه من ( Game theory ) .. و هو إن دايماً حتلاقي حد متخلف غبي فأى مجتمع عايز ينجو لوحده علي حساب الباقي .. . و بمجرد تواجد واحد زي ده .. بيتكاثر كالسرطان بالظبط لأن كل واحد حيشوفه حيقول ( إشمعني أنا ) … و حتلاقي المجتمع بشكل سريع بيتحول إما لمجتمع شيوعي فاسد ( يعني فئة قليلة بتسيطر بالدكتاتورية و الإجبار علي الأغلبية ) .. . أو بيحصل زي ما حصل في فرنسا ( أيام ماري أنطوانيت ) .. و بتثور الأغلبية و بتحاول تتحول لمجتمع رأس مالي ( اللي هو كل واحد ينجو بنفسه لوحده ) . … … 5- في وسط بزرميط الفوضي دي بقي .. و المخمضة اللي بيتمخمضها الإنسان العادي أثناء حياة المجتمعات دي .. بيظهر ( الصيادين في المياه العكرة ) .. . اللي هو الناس اللي عندها شوية معلومات بسيطة عما سبق .. و بيقدموا مسكنات و مسكرات .. تمتع الزبون علي المدي القريب .. و لكن تهدم جسم المجتمع بالكامل .. و تموت الزبون برضو .. علي المدي البعيد . . و ( روبرت كيوساكي - كاتب الأب الغني , الأب الفقير ) ده .. بغض النظر عن مصائبه التانية و نصباته الكتير .. هو في الأساس ( صياد في المياه العكرة ) . … و لو جيت تشرح مدي خطورته .. حتلاقي كتيييييييير جداً .. من اللي فعلاً حصلوا علي إستفادة ( سريعة ) من المنتج اللي هو بيبيعه ( مسكنات و مسكرات ) .. حيدافعوا عنه بضراوة . . و ده بسبب صفة رئيسية في الطبيعة البشرية في الإنسان .. هي : ( إحييني النهاردة و موتني بكرة ) … و إتكلمت عن ده قبل كده كتير فبوستات طويلة جداً .. و عشان تفتكر : كل إنسان عنده طبيعتين أساسيين ..

• طبيعة بشرية : فيها كل الصفات اللي بتسبب مشاكل و معاصي و ذنوب و طمع و جهل و غباء و … .
• طبيعة ربانية : فيها كل خير الإنسان و صفات تكريمه من الله عز و جل … الإنسان في طبيعته البشرية .. عمره ما حيفكر في قيمته بالنسبة للمجتمع اللي حواليه .. إطلاقاً .. طبيعته حتقول له : يولع المجتمع .. المهم مصلحتي أنا . . و الطبيعة دي هي اللي ذُكرت في القرآن في أكتر من مكان .. و إزاي كان جزء أساسي من رسالة الأنبياء علي مدار التاريخ هي شرح خطورة الطبيعة دي .. لأنها عاجلاً أم آجلاً دايماً بتؤدي لهلاك الإنسان و المجتمع مع بعض … لكن في الطبيعة الربانية للإنسان .. الإنسان بيفكر في المجتمع قبل نفسه .. و بيسعي دايماً إن قيمته تكون للمجتمع .. و في الحالة دي المجتمع بيكون رخاءه عام علي جميع الأفراد . … … 6- يعني .. شرح الكلام المجعلص اللي فوق ده .. اللي روبرت كيوساكي و أمثاله بيعملوه هو : بيع قوارب نجاة لأفراد سفينة .. مصنوعة من تقطيع و نشر خشب السفينة نفسها .. فهمت ؟! . … … 7- أمريكا حالياً عايشة فترة من أكثر الفترات اللي فيها وضوح للكلام اللي باقوله فوق ده .. . و لازم أوضح هنا نقطة أساسية .. انا ماقولتش فأى وقت الصح فين و الغلط فين .. . أنا باقول ( ضميري و ديني ) أنا بيقولوا ليا إيه .. . لكن بكل تأكيد .. لو إنت فهمت كل اللي فوق ده .. و عندك ذكاء و موارد واحد زي إيلون ماسك .. مش حالومه لحظة علي اللي هو بيعمله دلوقتي في إدارة ترامب.. . إيلون ماسك زي ما كتبت كتير قبل كده .. إطلاقاً مش عبيط .. أنا قرأت له و عنه من أيام 2012 .. يعني سنييييييييين قبل ما يكون (mainstream ) .. . و في بودكاستات كتير حديثة شرح فيها تفصيلياً فهمه الكامل لحاجات كتير من اللي إتكلمت عنها فوق .. . و هو إختار معايير نجاته و نجاة اللي حواليه في مجتمعه الضيق الصغنن .. علي حساب كل اللي بيغرقوا من السفينة حالياً .. . ماقدرش ألومه علي إختياراته ولا أشتمه .. . لكن أقدر أواجه نفسي أنا شخصياً في المراية .. و أسأل نفسي .. في معاييري و أدوات نجاتي الخاصة أنا .. أقدر أقدم إيه لمين ؟! … و بالتالي .. معاييري دي مابتنتهيش بالحياة الدنيا فقط .. بالنسبة ليا .. عقيدتي 100% فيها : الحياة الدنيا لعب و لهو .. . فبالتالي .. جزء من ما أقدر عليه .. هو إني أكتب و أبلغ .. . و أنهي كلامي ب : . والله أعلم .