" بص يا صاحبي .. أنا كده .. طبعي كده

” بص يا صاحبي .. أنا كده .. طبعي كده .. ماعرفش أغيره .. و ولا عايز أغيره .. اللي يقبلني يقبلني زي ما أنا بعيوبي دي .. و اللي مايقبلنيش .. ولا يشغلني .. و ولا أنا عايز أشوف وشه من أساسه ” . .. الكلام اللي فات ده .. نصاً من أحد حواراتي مع أحد المعارف .. كان بيشتكي ليا من شخص عزيز عليه جداً و بيشتكي من عيوبه .. فلما سمعت منه .. و بعدين بدأت أشرح له إن المشكلة فيه هو .. ده كان رده . … سمعت منه الكلام ده .. سلمت عليه و شرحت له إني مشغول و ورايا مواعيد .. و سبته و مشيت . أنا فعلاً باكره الأشخاص اللي من النوعية دي . باكرههم جداً جداً .. جداً . … … من شهر كنت قلت إني خلصت مسلسل ( better call saul ) .. بس ماكنتش كتبت رأيي عنه أيامها .. المسلسل لو إنت ماشفتوش .. أو حتي ماشفتش ( breaking bad ) اللي هو معمول ضمن العالم بتاعه .. تلخيصه المخل كالتالي :

بيتكلم عن ( jimmy mcgill = saul goodman ) هو نفس الشخصية بس له إسمين ( حاشرح موضوع الإسمين ده كمان شوية ) .. شخص إتعلم من طفولته إنه يمشي شمال .. سبب مشيه الشمال ده .. هو إنه شاف أبوه بيتظلم و بينضرب علي قفاه .. و شاف إن المشي الشمال ده هو اللي بيجيب الحق .. و إن العيلة اللي مافيهاش صايع .. حقها ضايع .

له أخ أكبر منه بكذا سنة .. إسمه ( تشارلي ) .. تشارلي ده دحيح كبير .. دايماً الأول .. و بيكوي القميص .. و يدخله جوة البنطلون كمان .. تشارلي كبر و بقي محامي كبير أوي .. و غني .. في حين إني ( جيمي ) كبر و بقي حرامي و نصاب و رد سجون و في الضياع .

تشارلي بيطلع ( جيمي ) من السجن بكفالة .. و يقوله عندك فرصة أخيرة تحترم نفسك فيها و تمشي عدل .. جيمي بيسمع كلام تشارلي .. و يسيب صديق عمره اللي كان بيشاركه في النصب و المشي الشمال .. و يروح يشتغل في شركة أخوه الكبير . بيشتغل ساعي .

بيشوف هناك واحدة معاه بتشتغل ( ساعي ) هي كمان .. و بيُعجب بيها من بعيد لبعيد .. بس هي عندها طموح و هدف ( بعد كده بنعرف إنها كان لها أم ضايعة و شمال .. و إن البنت مش عايزة تطلع زي أمها ) . المهم إن البنت دي ( إسمها كيم ) بتدرس مُحاماة جنب شغلها .. و بتقرب تتخرج .

( جيمي ) بيقرر إنه يعمل من نفسه بني آدم عشان ( كيم ) .. و بيبدأ هو كمان يدرس ( محاماة ) من غير ما يقول لحد .. و فعلاً بيقدر خلال كام سنة يحصل علي رخصة مزاولة المحاماة .. من واحدة من أحقر جامعات أمريكا .. و إنتساب كمان .. و لكنه حالياً أصبح … ( محامي ) . … … عند المرحلة دي بيبتدي المسلسل .. كل اللي كتبته فوق ده عبارة عن تفاصيل بتعرفها أثناء المسلسل و ال6 مواسم بتوعه .. المسلسل بيدور حوالين الأفكار التالية :

1- صراع جيمي الدائم بين إنه يكون ( إنسان محترم ) .. و بين إنه ( يكون شمال الشمال ) و نصاب .

2- صراع ( تشارلي ) مع أخوه … لأنه شاف طول عمره أخوه بيسبب مشاكل لكل اللي حواليه .. و مع ذلك محبوب من أمه و أبوه .. في حين إنه هو ( تشارلي ) كان دايماً ماشي عالعجين مايلخبطوش .. و ناجح جداً .. و كاره فكرة إن (جيمي ) بيعمل كل اللي علي مزاجه .. و برضه بيطلع كسبان في الآخر .

3- صراع ( جيمي ) مع نفس الفكرة اللي إتزرعت فعقله من صغره .. و هو إن المشي السليم و القانوني بيضيع حقه و حقوق اللي حواليه .. لكن لو إنت عايز تاخد حقك .. يبقي تمشي شمال .. و تكسر القانون .. طالما هدفك خير .

4- في التلت الأخير من المسلسل .. بيحصل التالي : تشارلي بيخسر صراعه قدام غيرته و كراهيته لجيمي .. و بينتحر محروق . جيمي ( اللي بيحب أخوه جداً جداً جداً طول المسلسل ) ..بيكون قرر إنه يخسر الصراع قدام نفسه .. طالما خلاص مافيش سبب يخليه يحاول يكون نضيف ( لأنه طول الوقت كان بيحاول يعمل الصح عشان أخوه يكون فخور بيه .. مش عشان كيم اللي بيحبها إطلاقاً ) . و بيقرر يغير إسمه لأسم ( saul goodman ) الإسم اللي كان إخترعه لنفسه زمان أيام الشقاوة .. و الإسم ده عبارة عن جملة ( it’s all good man = كله كويس يابا ) و ده كان شعار حياته طول عمره .. اللي هو إمشي شمال و زي ما تيجي تيجي .. كله كويس يابا في الآخر .

5- فوجهة نظري أحد أجمل لحظات المسلسل .. هي اللحظات اللي كان بيخوض فيها ( جيمي ) صراعه قدام نفسه ( سول ) .. يعني : كان يروح يقدم علي شغلانة نضيفة .. و بعدين يلاقي المدير متردد إنه يقبله .. ماييأسش .. و يروح راجع و يحاول يقنعه تاني .. المدير يقتنع .. بسهولة و ببساطة .. الحاجة اللي غيره يمكن يعيش حياته شهور مايعرفش يوصل لها ( شغلانة نضيفة و بتكسب ) .. ( جيمي = سول ) بيقدر ياخدها بكل بساطة .. و فخلال دقايق .. .. بيطلع من الشركة اللي قبلوه فيها دي .. و يقف شوية … و يدخل تاني .. و يبدأ يشتم المدير و يهزأه .. بيشتمه و يهزأه لأنه إداله الوظيفة بكل بساطة .. بكل سهولة .. بيشتمه و يهزأه .. لأنه ( جيمي ) عارف إنه جواه شخصية شمال .. ممكن جداً ينصب و يسرق بكل سهولة .. و مش المفروض حد يثق فيه بالبساطة دي . بيشتمه و يهزأه .. لأنه طول الوقت شايف قدامه صورة أبوه البسيط اللي بيثق في الناس بكل سهولة .. و يتنصب عليه . .

6- فآخر حلقة في المسلسل خالص .. المسلسل بينتهي إن ( سول ) بعد ما شاف كل الشمال وصله لفين هو و أعز الناس علي قلبه .. بيقرر إنه بعد ما بيكسب كل اللي هو عايزه بالشمال .. و بعد ما حرفياً بيذل أنفاس المؤسسة القانونية بالكامل و ياخد منهم كل اللي هو عايزه .. بيعترف علي نفسه بكل شيء .. و يخسّر نفسه بنفسه .. … و لما القاضي بيسأله ( أستاذ سول .. إنت مدرك إنت بتعمل إيه فنفسك ؟! ) .. بيرد عليه ( إسمي جيمي يا سعادة القاضي … جيمي مكجيل ) .. .. كتوضيح إن في الآخر خالص .. ماحدش كان حيقدر يغير ( جيمي ) .. و يخليه يسيب الشمال .. غيره هو نفسه .. لا عصابات قدرت تغيره .. ولا قانون قدر يغيره .. ولا حب حياته قدرت تغيره .. ولا أهل قدروا يغيروه .. ولااااااا أى حد .. .

هو بس .. اللي بعد ما كسب كل شيء .. و شاف إنه بالشمال خد كل شيء .. إكتشف إنه سراب .. و قرر يتغير .. بنفسه . … … الشخص المعرفة اللي إتكلمت عنه فأول البوست ده .. أنا شفت زيه كتير جداً .. جداً .. بنات و ولاد .. كلهم عايشين بمبدأ ( جامدين أوي و مافيش إلا إحنا ) .. .. الناس اللي عايشة بالمبدأ ده .. بتعاني أشد المعاناة فحياتها .. لأن كل شخص بيتعاملوا معاه .. بيكون بالنسبة لهم مراية .. هما مش بيشوفوا هما بيتعاملوا مع مين … لا .. هما بيكونوا شايفين بس نفسهم .. في المراية اللي قدامهم .. لأنهم ( جامدين أوي و مافيش إلا هما 😅 ) . … و بتكون النتيجة هي إنهم بيعيشوا طول عمرهم في صراعات مابتنتهيش .. صراعات لا تنتهي .. مش لأن أعدائهم كتير .. إطلاقاً .. و لكن لأن عدوهم الأول و الأخير .. هو نفسهم .. اللي هما بيشوفوه و مش شايفين غيره في المراية . … و قليل منهم .. قليل جداً جداً .. اللي بعد صراعات و حروب و خوازيق كتير جداً بيلبسوها لنفسهم .. بيبدأ يكتشف الحقيقة .. الحقيقة اللي هي : أى دنيا حتكسبها بخسارة جزء من نفسك .. فهي خسارة من غير مكسب .. أى فلوس / علم / مكانة / كبرياء … حتكسبها بخسارة جزء من نفسك .. حتخسرها .. و حتكون خسرت أكتر منها … من نفسك .. .. و العكس .. أى مكسب حتكسبه لنفسك .. بخسارة دنيا ( فلوس / علم / مكانة / كبرياء / … ) .. حتكسب بيه أضعاف أضعاف اللي خسرته من الدنيا .. و لو بعد حين . … … … أنا كنت شفت ( breaking bad ) زمان .. أيام ما كان بينزل .. و حالياً .. و بعد ما خلصت ( better call saul ) .. غالباً حارجع أشوف (breaking bad ) مرة تانية .. بعنين جديدة .. … و الله أعلم .

*** الصورة بتاعت البوست ده .. من أحد اللقطات العبقرية في المسلسل فوجهة نظري :