أنا ماعرفش أستاذ عصام الزيات , و لكني ححاول أوضح

أنا ماعرفش أستاذ عصام الزيات , و لكني ححاول أوضح وجهة نظري عشان أخاف إن حد يفهم من البوست بتاعه إنه مش المفروض يدور علي التميز … و ده في وجهة نظري .. غلط كبير جداً .

الإنسان بطبعه كريم بيسعي للتميز … دي صفة أساسية ربنا خلقها فينا كبشر .. و دافع أساسي بيحركنا .. و بيحرك معظم تصرفاتنا البشرية .

فبالتالي .. رغبة الإنسان فإنه يشعر إنه ( إستثنائي , ماحصلش زيه قبل كده , متميز , و فلتة زمانه و زمن غيره ) .. دي رغبة مشروعة و حسنة و متأصلة في تكوينه البشري .

1- عدم فهمه لطبيعة الكون .. ممكن يسبب له مشاكل كتير 2- عدم فهمه لطبيعته الشخصية .. ممكن يسبب له مشاكل أكتر .

لكن مهما حاول إنه يتجاهل / يرفض / يغير من الطبيعة دي .. ده حيؤدي بيه لمشاكل كتير جداً جداً .. و إطلاقاً مش حيوصله للحياة السعيدة ال ( peaceful ) الخالية من المشاحنات و الإنهزامات و الألم .

المثال اللي تم إستخدامه في البوست ل ( محمد صلاح ) , مثال غير عادل و غير كامل و غير واضح إطلاقاً . 1- محمد صلاح مش متربع علي عرش كرة القدم منفرداً إطلاقاً .. بل و في وجهة نظري كمتابع من بعيد جداً لكرة القدم .. و بالتقريب .. نقدر نعتبره واحد من أفضل 10 هدافين ممكن خلال ال6 سنين الأخيرة . 2- محمد صلاح في أهرام كتير جداً هو أساساً ممكن يكون في قاعدتها .. بل ممكن مايوصلش لقاعدة الهرم أساساً … و ده لا يعيبه في شيء .. هو متخصص في مجاله .. لكن مانقارنش بينه مثلاً و بين أفضل ميكانيكي تصليح عربيات في منطقة صناعية في محافظتي . لو عربيتك عطلت .. أو عندك مشكلة عويصة .. صدقني ساعتها حيكون الميكانيكي ده هو قمة الهرم بالنسبة لك . 3- متفهم إنه في البوست حصر مجال المقارنة علي لاعبي كرة القدم و ماجبش سيرة الميكانيكيين ,و لكن هي دي المشكلة اللي أنا باتكلم فيها … إن الحياة مش مجال واحد ضيق إطلاقاً . ..

يعني : لو إنت فاهم إن التميز و الإستثنائية هما إنك تختار مجال معين بناءاً علي شوية مفاهيم غير كاملة في تعليمك .. و بعدين تفضل حاصر أحلامك و اهدافك في المجال ده .. يبقي أستأذنك فعلاً تصدق الكلام اللي مكتوب في بوست أستاذ عصام .. لأنك حتقابل الكتير و الكتير من الرفض و الهزائم اللي عمرها ما حتؤدي بيك غير لإعتياد الإنهزامية و الخسارة . .. لكن لو عايز تكون فعلاً متميز و إستثنائي .. فحستأذنك تبدأ ترفع عينيك عن العالم الضيق جداً جداً جداً اللي إسمه الدراسة الأكاديمية , أو الثانوية العامة , أو حتي معظم المجالات اللي إنت شايف بيتم الإحتفاء بيها بين عامة البشر . ( ألم تكن أرض الله واسعة ؟! ) .

الإنهزام و الخسارة و الرفض بيؤدوا لليأس .. و اليأس بيؤدي للكفر .

لو إنت مش أحسن حد يلعب كورة .. مش باقول لك ماتلعبش .. لا إلعب .. بس دور علي إنت ليه مش أحسن حد بيلعب كورة .. و الإجابة مش عشان تحسن من مستواك في لعب الكورة .. لا .. الإجابة إنك ممكن جداً تكون أحسن حد في عشرات المجالات التانية .. بس لسبب ما مشاعرك و أحلامك إتعلقت بكرة القدم . سبب تعلق مشاعرك و أحلامك بمجال غير اللي تقدر تتميز فيه .. ده هو اللي إنت محتاج تدور عليه . و تفهمه . عشان تعرف إنت فهمت غلط .. و لا كان مضحوك عليك .

يعني .. لو عايز تتحكم في أسد بكل سهولة .. خليه طول عمره يتنافس مع القطط فإنه يكون أليف أكتر منهم .. و طري أكتر .. و أنيس أكتر .. يا حبيبي ده ضد فطرته أساساً .. و حيفضل طول عمره حاسس إن في حاجات كتير غلط .. لكن لو فهم إنه أسد .. حيعيش مستريح أكتر .. و يبدأ يفهم ممكن يدور علي تميزه إزاي ساعتها .

خلاصة كلامي : لو فأى لحظة لسة حاسس إنك مأشبعتش رغبتك في التميز .. يبقي إنت لسة مافهمتش الحياة أكتر .. و ماشفتش من الحياة أكتر . و لحد ما توصل للفهم الكامل إن المجال الأول اللي يظبطلك بوصلتك من الأساس هو المجال اللي رب العالمين قال عنه ( و في ذلك فليتنافس المتنافسون ) .. ممكن تعيش حياتك كلها بتدور علي سراب .

و صدقني .. قسماً بالله .. في المجالات اللي علي مدار حياتي البسيطة حتي الآن .. وصلت فيها لمرحلة ممكن يتم إعتباري إستثنائي جداً فيها .. و متميز جداً .. و فلتة زماني و مكاني .. كنت برضو حاسس إني لسة مش راضي .. و مش سعيد .. و مش ( fulfilled ) .. لحد ما فهمت إن جوعي ده لا يشبعه شيء دنيوي .. و يا رب أقدر في الباقي من حياتي .. أفضل مسيطر علي الشهوة دي .. مش هي اللي تسيطر عليا .

و الله أعلم .