1- قراءة سورة الكهف كل يوم جمعة

1- قراءة سورة الكهف كل يوم جمعة .

أعتقد إني بفضل الله وحده مواظب علي الموضوع ده من أيام الكلية ( أكتر من 15 سنة تقريباً ) .. إن لم يكن من أيام ثانوي عام . و يمكن دي أكتر حاجة أظن إني مواظب عليها مهما كنت فين , أو باعمل إيه .. و باحمد الله إني حافظها . في أسباب كتير عن فضل قراءة سورة الكهف يوم الجمعة , كان اللي دفعني علي ده أعتقد هو : روى الحاكم في المستدرك مرفوعا إن من قرأ سورة الكهف يوم الجمعة أضاء له من النور ما بين الجمعتين. وصححه الألباني.

و أحد الشروحات اللي قرأتها عن الحديث ده , فسر النور إنه نور علم . فكان لأطول مدة أعتقد النور اللي باتتبعه و أقصده كل جمعة بقراءة سورة الكهف هو نور العلم إن ربنا يقربني و يساعدني علي التعلم بشكل عام . بعد كده فهمت إن في معاني كتير جداً لل ( نور ) غير العلم فقط , أتمني من الله سبحانه و تعالي إنه يهديني لها .

… 2- أحد الحاجات اللي مواظب عليها بشكل يومي تقريباً هو السعي إني ( أعرف أنا مش عارف إيه ) .

يعني مثلاً أول إمبارح أنا ماكنتش أعرف حاجة عن رحلة الفضاء اللي حتطلعها ( سبيس إكس ) و عليها 3 رواد فضاء سعوديين , و معاهم ( بيجي ويتسون ) رائدة الفضاء المخضرمة اللي قضت أكتر من 650 يوم تقريباً في الفضاء , و كانت طلعت معاش .. بس قررت ترجع تاني 😆 .

النهاردة أنا بكل تأكيد ماعرفش أى تفاصيل عن الموضوع ده , لكن بقيت عارف إني ماعرفش أى تفاصيل عن الموضوع ده .

طيب , أنا عرفت عنه إزاي ؟

من 2015 أعتقد , كنت عرفت إن أحد خصائص (google assitant ) إنك بعد ما تشغله علي موبايلك الأندرويد , تقدر تقول له : listen to news أو play the news و حيشغل ليك إذاعات و بودكاستات من كل شكل و لون , و تقدر تتحكم فيه و … بص .. أنا لقيت إن شرح الموضوع ده كتابة كده حيكون ممل للغاية , فسجلت فيديو سريع علي الموبايل يشرح إزاي تعمله . الفيديو في الكومنت الأول .

أما عن عرفت إزاي عن الخاصية دي في موبايلي أساساً ؟ فده لأني بفضل الله متابع معظم المواقع الإخبارية الضخمة عن التكنولوجي بشكل يومي من 2009 تقريباً . … 3- الجيم .

أنا باتمرن فيتنس و فنون قتال بشكل عام من أيام ثانوي بشكل متقطع بسبب الدراسة و الشغل و الإصابات المختلفة .

بفضل الله وحده رجعت جيم بعد توقف لمدة 3 سنين ( الحظر و كورونا و أيامها ) من شهر فبراير السنة اللي فاتت , و مكمل لحد دلوقتي بدون توقف الحمد لله . بمعدل 3 ل 5 مرات أسبوعياً تقريباً . و أى إنسان بيواظب علي التمرين لمدة 6 شهور تقريباً علي الأقل حيشوف نتيجة بكل تأكيد بإذن الله .

أعتقد ممكن ندمج مع النقطة دي ال (مشي ) , أنا مدمن مشي بفضل الله , و أحد أنشطتي المفضلة جداً طول حياتي هو إني أحط السماعات فوداني .. و أمشي ساعتين تلاتة مثلاً .. أثناء ما باسمع بودكاست أو كتاب ( audiobook ) أو ما شابه . …

4- الفشل .

أعتقد إني مواظب علي الفشل بشكل ( proactive = يعني أسعي له ) من أول ما أدركت إني (أى شيء أخسره غير ديني ) .. فهو لا قيمة له من الأساس . فبالتالي .. أنا دايماً بارحب بأى محاولة جديدة لبناء أى شيء , و تعلم أى شيء , و تجربة أى شيء ( طالما مابتخالفش ديني ) . و بابدأ كل حاجة من الحاجات دي و أنا متوقع و مستني الفشل . مؤمن بفضل الله و كرمه و توفيقه بكل تأكيد . و لكن متأكد إن ( نفسي الهشة ) أكبر حججها و أعذارها هي ( الخوف من الفشل ) . فبالتالي .. باجيب من الآخر مع نفسي .. و بابدأ بإني : أفشل حد مسك ( فيولين = كمانجا ) و حاول يعزف عليها .. أفشل حد جرب ي( skate = يتزلق ) علي الجليد .. 🤣 أفشل حد بيحاول ينظم جدوله و يرتب مواعيده يومياً .. أفشل حد حيحاول يتعلم مهارة جديدة .. أفشل حد حيحاول يتعلم برنامج جديد .. و هكذا و هكذا ..

و لما بافشل .. مش باوقف .. مش بابطل .. إطلاقاً .. قدر إستطاعتي .. باحاول أفشل تاني و تالت و عاشر .. و أضحك أثناء الفشل ده , و أشارك أخباره مع اللي حواليا ( علي حسب نوع الحاجة اللي باحاول أعملها .. و هل أحب أشارك ده علي العام هنا علي الفيسبوك مثلاً .. أو مجرد أشارك المقربين حواليا و بس ) .. و هكذا .. لحد ما ينجح شيء ما .. أو يبدأ يطلع قماش .. باحمد الله و أشكره .. و أفكر نفسي بإن ده مش المعتاد .. و مش ال( default) .. عشان ماتقفلش لو جيت أجرب حاجة تانية و فشلت .

و باعلن عن تجارب مشابهة هنا أحياناً .. و أحيان أخري أكتر .. مابعلنش عنها أى شيء .

و لكن لما باقابل أى حد متردد ( يبدأ , يجرب , يحاول , … ) .. باشرح له إني ( مدمن فشل 🤣 ) .

و إن بعد فترة .. حيكتشف هو كمان و يفهم إن من الأول معني الفشل بالنسبة ليا كان مختلف عن معني الفشل بالنسبة له .

الفشل اللي أنا مدمنه .. هو الفشل اللي دايماً بييجي بعده دايماً محاولة . الفشل اللي الناس بتخاف منه , و أنا كمان باخاف منه و بادعي ربنا يبعده عني و يبعدني عنه ..

هو الفشل اللي أيأس بعده .. و محاولش . … الأربع حاجات اللي فوق دول أنا مواظب عليهم جميعاً أعتقد من سنين .

النقطة القادمة دي جديدة علي جدولي , و لكنها تستحق الترشيح و بشدة . …

5- كل محتوي باشمهندس ( أيمن عبد الرحيم ) ربنا يبارك له .

علي مدار الشهرين اللي فاتوا .. أنا خلصت له ( دورة تأسيس وعي المسلم المعاصر ) و ( تاريخ الأمويين و العباسيين ) , و عدد محترم من الندوات المسجلة . النهاردة كنت باسمع له ( ندوة القرآن و علم النفس ) .. حاسيب لها لينك في الكومنت التاني .

قمة الرووووووووووعة , و مهما أقول في حقه .. ماعتقدش إني لسة عندي القدرة أو العلم الكافي إني أوفيه حقه.

و كل ما يرشحه باشمهندس أيمن في محاضراته , أو يُحيل عليه من مقالات أو كتب , غالباً إن شاء الله حيكون محتوي أطلع عليه في جدولي . … …

لينك ( صارحني ) حيكون في التعليق التالت ..